Emem Ererimbot—Didie?
NTE emem ererimbot ekpere? Ediwak owo ẹkekere ntre ini kiet ko edi ẹnyene eyịghe ẹban̄a oro idahaemi. Nte ekemde ye ntọt kiet oro enemede mme n̄kpọ-ata oro ini iso nnyịn akamade, oro ẹkemịn̄de ke Daily Mail & Guardian eke South Africa, “idahaemi etie nte idotenyịn idụhe aba inọ obufa editịm n̄kpọ ofụri ererimbot oro ẹkebemde iso ẹtịn̄ ẹban̄a ke isua 10 emi akakam ẹbede.”
Mme ewetn̄wed oro ẹkere ẹban̄a idotenyịn oro okodude ke isua duop emi ẹkekam ẹbede. En̄wan Ukaraidem ndisụk n̄kụre ekedi oro, ndien en̄wan akwa odudu ukara ikodụhe aba. Ke se iketiede nte ntọn̄ọ obufa emana, ediwak owo ẹma ẹdori enyịn nte ke ubonowo ọyọtọn̄ọ ndinam n̄wọrọnda n̄kọri ke ndikpan unana, udọn̄ọ, ye mme mfịna n̄kann̄kụk. Ntọt oro ọdọhọ ete: “Idahaemi etie nte mme n̄kpọ oro ẹkebemde iso ẹtịn̄ ẹban̄a ẹdi ikpîkpu idotenyịn mfọnọn̄kpọ. Mbufa en̄wan ẹmesiaha ke mme ikpehe oro nnyịn mîkọfiọkke; unana ke aka iso ndikọri ke ererimbot. Mbufa idụt iba ẹnyene n̄kpọekọn̄ nuclear. Ukeme UN enen̄ede emem ke ntak oro enye mîkemeke ndinam n̄kpọ mban̄a n̄kaiso mfịna owo. Idotenyịn oro omokpụhọde oto ikpîkpu idotenyịn mfọnọn̄kpọ esịm idotenyịn ndiọhọn̄kpọ.”
Nditọ ukpepn̄kpọ Bible ẹfiọk ẹte ke tutu amama ukeme owo, inamke n̄kpọ m̀mê enye okpon didie, ikemeke ndikụt unen ọyọhọ ọyọhọ. Ntak mîkemeke? Koro, nte Bible ọdọhọde, “ofụri ererimbot onyụn̄ esịne ke ubọk andidiọk.” (1 John 5:19) Ke adan̄aemi odude ke idak ukara Satan, owo ikemeke ndinam ererimbot edi Paradise oro Abasi okobotde enye ete edi.
Ke ukem ini oro, ntak odu ndinyene idotenyịn. Jehovah Abasi ọn̄wọn̄ọ ndida emem ererimbot ndi, idịghe ke ndinen̄ede editịm n̄kpọ emi, edi ke ndida “obufa isọn̄” emi ‘edinen ido edidụn̄de’ ndi. (2 Peter 3:13) Ih, ebede ke Obio Ubọn̄ Abasi, ẹyenam ekondo nnyịn akabade edi emem emem ebietidụn̄ inemesịt, emi uwem ye utom edidide n̄kpọ idatesịt kpukpru ini ọnọ kpukpru okopitem ubonowo. N̄ko-n̄ko, Abasi ọn̄wọn̄ọ ‘ndikwọhọde kpukpru mmọn̄eyet ke enyịn mmọ mfep. N̄kpa idinyụn̄ idụhe aba; eseme ye ntuan̄a ye ubiak idinyụn̄ idụhe aba.’ Mme un̄wọn̄ọ emi ikọn̄ọke ke mme un̄wọn̄ọ owo emi mînyeneke nsọn̄ọnda. Utu ke oro, mmọ ẹkọn̄ọ ke anana-ndudue Ikọ Andibot, emi mîkemeke ndisu nsu.—Ediyarade 21:4; Titus 1:2.