‘Edọdiọn̄’ Ẹdụk Mme Mbono Esop
1 Edisop idem ọtọkiet esidi akpan n̄kpọ ọnọ ikọt Jehovah kpukpru ini. Nditọ Israel ẹma ẹnyene temple ye mme synagogue mmọ nte mme iwụk ebiet utuakibuot akpanikọ, ukpepn̄kpọ Abasi, ye idara idara ebuana. Ukem ntre, mme akpa Christian ikesịnke ndisop idem ọtọkiet. Nte mme mfịghe ye idomo ẹkọride ke ndiọkeyo ukperedem ini ẹmi, nnyịn n̄ko imoyom nsọn̄idem eke spirit oro mme mbono esop ẹnọde—ndien nnyịn ‘idọdiọn̄’ iyom enye. (Heb. 10:25) Tịm fiọk ntak ita ẹmi nnyịn isidụkde mme mbono esop.
2 Kaban̄a Ebuana: N̄wed Abasi eteme nnyịn ete ‘isọn̄ọ kiet eken esịt, inyụn̄ inam kiet eken ọkọri.’ (1 Thess. 5:11) Ebuana ido Abasi anam esịt nnyịn ọyọhọ ye nti ekikere onyụn̄ onụk nnyịn ndinam nti utom. Edi edieke inịmde idem nnyịn nsannsan, eyedi nnyịn iyenyene ndisịme, ibụk ibụk, m̀mê idem mme oburobụt ekikere.—N̄ke 18:1.
3 Kaban̄a Ukpep: Mme mbono esop Christian ẹnọ n̄kaiso ndutịm ukpep Bible oro ẹdiomide ndinam ima Abasi enyene uwem ke esịt nnyịn. Mmọ ẹnọ ata ata ndausụn̄ ke ndida “ofụri uduak Abasi” nsịn ke edinam. (Utom 20:27) Mme mbono esop ẹnọ nnyịn ukpep ke usọ edikwọrọ ye edikpep eti mbụk, mme usọ oro ẹdiọn̄de-diọn̄ ẹyom idahaemi man ẹnyene idatesịt oro inua mîkemeke nditịn̄ ke ndikụt nnyụn̄ n̄n̄wam mbon ẹmi ẹdinyịmede akpanikọ Bible.
4 Kaban̄a Ukpeme: Ke idiọk ererimbot emi, esop edi ata ebiet udịbe eke spirit—kpa ebiet emem ye ima. Ke ini nnyịn idụkde mme mbono esop, edisana spirit Abasi enyene ọkpọsọn̄ odudu ke idem nnyịn, osion̄ode mbun̄wụm “ima, ye idatesịt, ye emem, ye ime, ye mfọnido, ye eti ido, ye edinam akpanikọ, ye ifụre ifụre ido, ye mfara ke idem.” (Gal. 5:22, 23) Mme mbono esop ẹsọn̄ọ nnyịn idem ndisọn̄ọ nda ke mbuọtidem. Mmọ ẹtịm nnyịn idem ndiben̄e idem nnọ mme idomo ẹdude ke iso.
5 Ebede ke ndidụk mbono esop kpukpru ini, nnyịn ifiọk se andiwet psalm eketịn̄de aban̄a, nte ẹwetde ke Psalm 133:1, 3: “Idụn̄ nditọete ke idem ọtọkiet ọfọn didie! onyụn̄ eye didie!” Ebiet ekededi emi ikọt Abasi ẹnamde utom ẹnyụn̄ ẹsopde idem ọtọkiet mfịn, “do ke Jehovah owụk n̄kpọ ufọn, kpa uwem nsinsi.”—Sịghisịghi ubọkn̄wed edi eke nnyịn.