Asomafo Ndwuma
24 Nda enum ekyir no, ɔsɔfopanyin Ananias nye ɔman no mu mpanyimfo bi na obi a ɔbɛkasa ama hɔn* a wɔfrɛ no Tertullus bae, na wɔdze asɛm a wɔwɔ tsia Paul no bɔtoo ambrado no n’enyim. 2 Na aber a wɔfrɛɛ Tertullus dɛ ɔnkasa no, ɔhyɛɛ ase bɔɔ Paul sombo wɔ Felix n’enyim. Ɔkaa dɛ:
“Ɔwo ntsi yɛwɔ asomdwee kɛse, na osiandɛ edwen hwɛ kan ntsi mpontu pii reba ɔman yi mu. 3 Na aber biara nye beebiara a yɛwɔ no, yɛka dza ayɛ yi ho asɛm, O Onyimnyamfo Felix, yɛda wo ase a ɔnnsa da. 4 Naaso memmpɛ dɛ mesɛɛ wo ber pii, ntsi meserɛ wo, w’enyidzii mu ara, tsie hɛn kakra. 5 Yeehu dɛ ɔbarimba yi yɛ ɔmambɔenyi,* na otutu gu Jewfo a wɔwɔ wiadze nyina hɔn asomu dɛ wɔnsoɛr ntsia aban no. Afei so Nazarethfo hɔn nyamesom kuw no, ɔno na odzi enyim. 6 Bio so ɔyɛɛ dɛ obogu asɔrfie no ho fi, ntsi yɛkyeer no. 7* —— 8 Sɛ woara so bisa no a, ibohu dɛ sombo a yɛdze abɔ no yi nyina yɛ nokwar.”
9 Na Jewfo no so dze hɔn ano too mu bi, na wɔkaa dɛ dɛm nsɛm yi nyina yɛ nokwar. 10 Na ambrado no bɔɔ ne tsir adze kyerɛɛ Paul dɛ ɔnkasa, ntsi ɔkaa dɛ:
“Minyim yie paa dɛ ayɛ ɔman yi ne tsɛmbuafo mfe pii, ntsi ɔyɛ me dɛw dɛ miribeyi m’ano wɔ w’enyim. 11 Mokɔsomee wɔ Jerusalem no, bɛyɛ ndafua 12 ara nye yi. Dza mereka yi, woara botum ebisa ahwɛ. 12 Woennhu me dɛ menye obiara regye kyim wɔ asɔrfie hɔ anaadɛ murututu gu nyimpadɔm bi hɔn asomu wɔ nhyiamuadan no mu anaa kurow no mu beebiara mpo dɛ wɔnyɛ basabasa. 13 Na sombo a seseiara wɔdze robɔ me yi so, worinnya no ho dase biara mma wo. 14 Naaso megye to mu wɔ w’enyim dɛ, dza hɔn wɔfrɛ no nyamesom kuw no, ɔno nye kwan a mefa do dze ɔsom krɔnkrɔn ma m’egyanom hɔn Nyankopɔn no, na dza ɔwɔ Mbra no mu nye dza wɔakyerɛw no wɔ Nkɔnhyɛfo no mu no nyina so megye dzi. 15 Na mowɔ enyidado wɔ Nyankopɔn no mu dɛ owusoɛr bi bɛba ma woeenyan hɔn a wɔtsen nye hɔn a wɔnntsen efi ewufo mu, na dɛm enyidado yi ara bi na dɛm mbarimba yi so wɔ. 16 Na osian iyi ntsi, aber nyina mobɔ mbɔdzen dɛ medze tsibowa pa* bɔbɔ me bra wɔ Nyankopɔn na nyimpa enyim. 17 Mfe pii ekyir no, mebaa dɛ merebɛyɛ me man adɔyɛ na maabɔ afɔr. 18 Aber a mereyɛ dɛm ndzɛmba yi no, wohun me wɔ asɔrfie hɔ; nna matsew moho* dɛ mbrɛ Mbra no kyerɛ no, naaso nna nyimpadɔm biara nnka mo ho na mannyɛ basabasa biara so. Naaso nna Jewfo bi a wofi Asia mantɔw no mu wɔ hɔ. 19 Na sɛ wɔwɔ biribi tsia me a, nkyɛ hɔn mbom na ɔsɛ dɛ wɔba w’enyim bɔbɔ me sombo. 20 Anaadɛ ma mbarimba yi a wɔwɔ ha yi hɔnankasa mbue hɔn ano nka mfom a wohunii wɔ mo ho aber a nna migyina Sanhedrin no n’enyim no. 21 Adze kor pɛ na wobotum egyina do abɔ me sombo, ɔno nye dɛ aber a nna migyina hɔn finimfin no, memaa me ndze do kaa dɛ: ‘Ewufo a wobenyan hɔn ntsi na ndɛ migyina hom enyim ma worubu me atsɛn yi!’”
22 Naaso osiandɛ nna Felix nyim Ɔkwan yi ho asɛm yie paa ntsi otuu hɔn asɛm no hyɛɛ da na ɔkaa kyerɛɛ hɔn dɛ: “Aber biara a Lysias a ɔyɛ ɔsahen no bɛba no, mubobua hom asɛm yi.” 23 Na ɔhyɛɛ sogyanyi panyin no dɛ ɔnhwɛ no do, naaso ɔmma no fahodzi kakra, na sɛ no nkorɔfo so ba dɛ wɔrebɛyɛ biribi ama no a, ɔmma hɔn kwan.
24 Nda bi ekyir no, Felix nye ne yer Drusilla a ɔyɛ Jewnyi no bae, na ɔsomae ma wɔkɛfrɛɛ Paul, na wotsiee Christ Jesus no mu gyedzi ho asɛm a ɔkae no. 25 Naaso aber a Paul kaa tsenenee na ahohyɛdo na atsɛmbu a ɔbɛba no ho asɛm no, Felix n’akoma tui na ɔkaa kyerɛɛ no dɛ: “Ɔwo dze kɔ, na ekyir yi minya ho a mobɔsoma ma wɔaabɛfrɛ wo bio.” 26 Dɛm aber yi nyina nna ɔrohwɛ kwan dɛ Paul bɛma no sika. Osian iyi ntsi, nna ɔtaa soma ma wɔkɛfrɛ no ba ma ɔnye no bɔ nkɔmbɔ. 27 Mfe ebien ekyir no, Porcius Festus bedzii Felix n’adze; na osiandɛ nna Felix pɛ dɛ onya Jewfo no hɔn enyim enyimnyam ntsi, ogyaa Paul ma ɔkɔr do daa efiadze.