Nkorɔfo a Hebrewfo nwoma no ka dɛ wɔdaa gyedzi edzi no, Moses ka ho. Nna Moses wɔ gyedzi kɛse. (Heb. 3:​2-5; 11:​23-25) Na Nyankopɔn so amma Moses ne nsa ennsi famu osiandɛ ɔyɛɛ anwanwadze ma wonyaa nsu na edziban, na iyi maa wotumii tsenaa asaase pradada no do. (Ex. 15:​22-25; Ndw. 78:​23-25) Aber a Jehovah gyee Israelfo no fii Egypt bɛyɛ afe kor ekyir no, ɔkaa kyerɛɛ hɔn dɛ ɔbɛma hɔn nam ma wɔaawe. Nna Moses gye Jehovah dzi paa, naaso nna n’adwen yɛ no dɛ Jehovah runntum nnyɛ biribi a ɔtse dɛm. Nna nyimpa ɔpepem pii na wɔwɔ sar pradada no do, ntsi nna Moses nnyim kwan a Jehovah bɛfa do ama hɔn nyina nam ma wɔaaso hɔn. Jehovah bisaa Moses dɛ: ‘Ana woetwa Jehovah ne nsa do a?’ (Nka. 11:​21-23) Ntsi kwan bi do no nna Jehovah ribisa Moses dɛ, ‘W’adwen yɛ wo dɛ murunntum nnyɛ dza maka dɛ mebɛyɛ no anaa?’ w25.03 26 ¶1-2

Nna Nsuyirii no gyina hɔ ma asɛm bi a obesi daakye anaa? Oho. Ebɛnadze ntsi na yɛreka dɛm? Osiandɛ asɛm biara nnyi Kyerɛwnsɛm no mu a yebotum egyina do aka dɛm. Ɔwɔ mu dɛ Jesus dze ne mbae no totoo Noah nda no ho dze, naaso ɔannka dɛ biribiara a osii wɔ Noah n’aber do no gyina hɔ ma biribi a nna obesi daakye. Na dɛmara so na ber a Jehovah dze toow adaka no n’abow no mu no so nngyina hɔ mma biribiara. (Matt. 24:​37-39) Aber a Noah tsee dza Jehovah rebɛyɛ no ho asɛm no, ɔyɛɛ dɛn? Ɔyɛɛ adaka dze kyerɛɛ dɛ ɔwɔ gyedzi. (Heb. 11:7; 1 Pet. 3:20) Dɛmara so na ɔtse ndɛ. Ɔsɛ dɛ hɔn a wɔtse Nyankopɔn n’Ahendzi no ho asɛmpa no tu ho anamɔn. (Andw. 3:​17-20) Ɔsomafo Peter kaa Noah ho asɛm dɛ nna ɔyɛ “tsenenee sɛnkafo.” Ndɛ so, yɛrobɔ mbɔdzen dɛ yɛbɛka asɛmpa no akyerɛ nkorɔfo wɔ wiadze yi mu beebiara, na yɛdze nsi na ahokeka na yɛdze reyɛ dɛm. Naaso hɛn mbɔdzembɔ nyina ekyir no, obiara runntum nntse asɛmpa no ansaana ewiei no aba. w24.05 9-10 ¶3-5

Ɔsɛ dɛ yɛhwehwɛ hokwan ahorow dze da ayamuyie na obu edzi kyerɛ Jehovah n’anyɛnkofo. (Rom. 12:10) Yesi dɛn yɛ dɛm? Yehu kwan kor a yebotum afa do ayɛ dɛm no wɔ Ndwom 15:4. Hɔ ma yehu dɛ obi a ɔabɔsoɛ Jehovah ne ntamadan mu no, ‘sɛ ɔka ntam na ɔbɛma oenya amandze mpo a, ɔnnsesa n’ano.’ Sɛ yɛhyɛ nkorɔfo bɔ na yeenndzi do a, obotum ahaw hɔn paa. (Matt. 5:37) Iyi ntsi na Jehovah pɛ dɛ awarfo dzi hɔn awar ntam do no. Afei so, sɛ awofo hyɛ hɔn mba bɔ na wɔyɛ dza wobotum biara dzi do a, ɔma Jehovah n’enyi gye. Osiandɛ yɛdɔ Nyankopɔn na nkorɔfo ntsi, yɛyɛ dza yebotum biara dzi bɔ biara a yɛahyɛ no do. Adze fofor so a yebotum ayɛ dze edzi Nyankopɔn n’anyɛnkofo nyi nye dɛ yɛbɛgye hɔn ahɔho na yɛayɛ hɔn adɔyɛ. (Rom. 12:13) Sɛ asafo nhyiamu na asɛnka a yɛnye hɛn nuanom bɔ mu kɔ no da nkyɛn a, ɔsɛ dɛ yɛgye ber nye hɔn bɔ. Sɛ yɛyɛ dɛm a, ɔbɛma anyɛnkofa a yɛnye hɔn wɔ no no mu ayɛ dzen. Afei so, ɔbɛma yɛabɛn Jehovah kɛse. Bio so, sɛ yɛgye hɛn nuanom ahɔho a, nna yerusuasua Jehovah. w24.06 12 ¶15-16