Vunau e Kalili, Vakavulici na Yapositolo

Sa via rua na yabaki nona vunau voli vagumatua o Jisu. E sega ni bau nanuma me sa rauta na vunau se me vakalailaitaka na gauna e vakayagataka kina. Sa qai vakalevutaka ga nona cakacaka vakavunau ni “sikova . . . na koro lelevu kece kei na koro lalai kece [e Kalili], e veivakavulici ena nodra valenilotu, e vunautaka na itukutuku vinaka ni Matanitu ni Kalou, qai vakabula na veimataqali tauvimate kei na malumalumu kece.” (Maciu 9:35) E uqeti koya na ka e raica me vakalevutaka na cakacaka vakavunau. Ena cakava vakacava qori?

E raica o Jisu ena vanua kece e lakova nira via vakabulai vakayalo qai vakacegui na lewenivanua. Era vaka na sipi e sega na kena ivakatawa, era suivotu qai biu wale tu. E lomani ira o Jisu mani tukuna vei ratou nona tisaipeli: “Io, e levu sara na ka me tamusuki, ia era le lailai na tamata cakacaka. O koya gona, dou kerea na Turaga ni tatamusuki me tala mai eso tale na tamata cakacaka ina nona tatamusuki.”​—Maciu 9:37, 38.

E kila o Jisu o cei e rawa ni veivuke. Sa qai kacivi ratou na 12 nona yapositolo, qai talai ratou yarurua me ratou lai vunau. E matata nona ivakasala vei ratou: “Dou kua ni lako vei ira na kai veimatanitu, kua tale ga ni curu ina dua na nodra koro na kai Samaria, dou lako ga vei ira na sipi ni matanitu o Isireli era yali tu. Ni dou lako voli, dou vunau, dou kaya, ‘Sa voleka na Matanitu vakalomalagi.’”​—Maciu 10:5-7.

Eratou na lai vunautaka na Matanitu a cavuta o Jisu ena masu a vakavulica. E rawa ni tukuni ni ‘sa voleka na Matanitu’ ni a tiko sara ga ena gauna ya o Jisu Karisito, na Tui e lesia na Kalou. E solia vei ratou na nona tisaipeli o Jisu na kaukaua me ratou vakabulai ira wale na tauvimate kei na mate, me vakadeitaka ni ratou matataka dina na Matanitu ni Kalou. Vakacava na veika vakayago me ratou bula kina na yapositolo, me vaka na kakana?

E tukuna o Jisu vei ratou na nona tisaipeli me kua ni vakarautaki e dua na ka me baleta nodratou ilakolako vakavunau. Me ratou kua ni tawana na koula, siliva se kopa ena nodratou taga ni ilavo. E sega ni gadrevi tale ga me kau na taga ni kakana, rua na isulu e loma se na ivava. Sa qai vakadeitaka vei ratou o Jisu: “[E]na soli na kena kakana na tamata daucakacaka.” (Maciu 10:10) Era na veivuke ena veika vakayago me ratou bula kina o ira era taleitaka nodratou itukutuku. E kaya o Jisu: “Ni dou sa curu ina dua na vale, dou tiko kina me yacova ni dou biuta na vanua qori.”​—Marika 6:10.

E vakavulici ratou tale ga o Jisu ena ka me ratou cakava ni ratou sa lai vunau: “Ni dou curu i vale, kidavaki ira na lewena. Ke ra veiciqomi, vakacegui ira, ia ke ra sega ni veiciqomi, me suka lesu vei kemudou na vakacegu dou kauta yani. Ke dua e sega ni vakacurumi kemudou se rogoca na ka dou tukuna, ni dou biuta na vale se koro qori, dou kuretaka tani na kuvu ni qele mai yavamudou.”​—Maciu 10:12-14.

Vakacava ke cata na nodratou itukutuku e dua na koro taucoko, cava ena yaco ena vanua ya? E vakaraitaka o Jisu ni na warumisa na kena itotogi ni kaya: “Au tukuna vakadodonu vei kemudou, ena lailai na cudru a tau vei Sotoma kei Komora, ena levu e tau ina koro qori ena Siga ni Lewa.”​—Maciu 10:15.