Porokaramu Vou ni Siga ni Soqo Lavotaki
‘Mo ni Tamatabula Ena Vuku,’ oqo na usutu ni porokaramu ni siga ni soqo lavotaki me tekivu ena Sepiteba 2000. (1 Kor. 14:20) Ena yaga vakacava vei keda na noda na tiko kina? Eda bula tu ena vuravura sa rui sivia kina na ca. Me rawa nida vorata oqo, ena vinakati meda bucina na vuku vakayalo me rawa nida valuta kina na ca ena vinaka. Ena vukei keda gona kina na porokaramu ni siga ni soqo lavotaki.
Ni tekivu na porokaramu, ena vakamacalataka na ivakatawa ni tabacakacaka na “iVukevuke Meda Tamatabula Kina Ena Kilai ni iVolatabu.” Ena vakaraitaka o koya vei keda na sala meda vakataudeitaki kina ena vakabauta vakarisito. Na mata mai na valenitabana ena vosa tiko ena ulutaga, “Taqomaki na Bula Vakayalo ke O Vakavulica na Lomamu.” Ena vakaraitaka o koya ni na sega ni rawa meda bucina na rai titobu ke da sega ni muria se bulataka na ivakavuvuli ni iVolatabu.
E dodonu tale ga vei ira na itabagone mera bucina mera tamatabula ena vuku. Ena veivosakitaki oqo ena ulutaga “Na Vuna Mo ni Gonelailai Kina Ena Ca” kei na “iTabagone Era Rawata na Vuku Ena Gauna Oqo.” Eda na rogoca na nodra ivakamacala e so na itabagone ena sala era vakaukauataki ira kina vakayalo mera kua ni via vakilakila na ivalavala tawakilikili ni vuravura nira na taqomaki ga kina.
Eda na kunea vakacava na marau levu ena noda bula? Ena vakamacalataka oqo na mata mai na valenitabana ena itinitini ni vosa, “Yaga ni Vukutaki na Kena Bulataki na iVakavuvuli ni iVolatabu.” Ena vakamacalataka e so na ivakaraitaki ni kena bulataki na Vosa ni Kalou ena vukei keda meda walia na noda leqa, da vakatulewa vinaka, me yaga kina vei keda na nona veivakatavulici o Jiova.
Vei kemuni oni na via vakaraitaka tiko ena soqo oqo na nomuni yalayala vua na Kalou ena nomuni papitaiso ena wai, oni kerei mo ni raici koya rawa na ivakatawa daulewa ena dua na gauna totolo. Ni kacivaki na tikinisiga ni soqo lavotaki ena vinaka mo toqa sara toka ena nomu ivolanivula, navuca mo na kua ni calata na porokaramu vakasakiti oqo. Kua ni calata e dua na iwase ni siga ni soqo lavotaki! Ena vakaukauataki iko mo vosota tiko ena ituvaki ca oqo, mo yalodina tiko ga kina vei Jiova.