Na Koronivuli ni Vuli iTalatala Liutaki Vakalou ni 2001
1 E levu na vuna vakaivolatabu meda vakaitavi kece ena kena levu eda rawata ena Koronivuli ni Vuli iTalatala Liutaki Vakalou.—Vkai. 15:23; Maciu 28:19, 20; Caka. 15:32; 1 Tim. 4:12, 13; 2 Tim. 2:2; 1 Pita 3:15.
2 Sa dede na kena taurivaki tiko ena koronivuli oqo na ituvatuva ni wili iVolatabu vakamacawa. Eda na wilika kina e rauta ni dua na taqa ni iVolatabu ena dua na siga. Me tekivu ena yabaki 2001, sa na caka tale ga na wili iVolatabu ena macawa kece e dau caka kina na railesuvi. Sa mai cava na ikuri ni wili iVolatabu a tuvanaki ena tolu na yabaki sa oti me kuri kina na noda wili iVolatabu vakamacawa. Ia ke o via wilika vakalevu na iVolatabu mai na kena e volai tu ena ituvatuva, e rawa ni o cakava ga na nomu ituvatuva.
3 Na Vosa Naba 2 e vukea e dua na tacida tagane me “wilika e matanalevu” na Vosa ni Kalou. (1 Tim. 4:13, NW) Ni soli vei iko na itavi oqo, vakatovotovo vakavica vata ena nomu wilivola vakadomoilevu.
4 Na Vosa Naba 3 kei na Naba 4 e yavutaki ena ivola na Reasoning, e vakarautaki me vakayagataki ena cakacaka vakaitalatala. Ke soli vei iko na itavi qai levu na ka mo vosa kina ni veidutaitaki kei na gauna, digitaka ga na kena e yaga ena yalava ni nomu ivavakoso. Me vakayagataki na ituvatuva e ganita nomu yalava.
5 Cakava ena nomu vinaka kece na nomu itavi ena koronivuli. Me tiko na gauna mo vakavakarau vinaka kina, qai vosa sara ga mai vu ni lomamu. O na vu ni veivakayaloqaqataki ena ivavakoso, ena yaga sara ga vei iko na nomu vakaitavi mai vu ni lomamu ena Koronivuli ni Vuli iTalatala Liutaki Vakalou ena yabaki 2001.