Veisikovi Lesu e Tauyavu Kina na Vuli iVolatabu
1. Cava e bibi kina na veisikovi lesu?
1 A sega wale ga ni vakaroti ira nona tisaipeli o Jisu mera vunau, ia mera ‘veivakatisaipelitaki qai veivakavulici’ tale ga. (Maciu 28:19, 20 VV) O koya e vunau ena tukuna ga, ia na qasenivuli e levu na ka e cakava. E veivakavulici, e vakamacala, qai vakadinadinataka. Dua na sala eda veivakavulici kina oya noda sikovi ira lesu na tataleitaki ena inaki me tekivutaki kina na vuli iVolatabu.
2. O cei meda sikova lesu?
2 O cei mo sikova lesu? E dodonu mo sikovi ira lesu na ciqoma na ivola, se o ira mada ga e laurai vakalailai nira taleitaka na itukutuku vinaka. Ke so era tataleitaki ni o vunau ena vanua e levu kina na tamata, tovolea mo vola na nodra itikotiko se naba ni talevoni me rawa ni vakabulabulataki tiko ga kina na tataleitaki. Mo nuidei ni o na tekivuna e dua na vuli iVolatabu. Vakasaqarai ira tiko ga era vinakata mera vulica na iVolatabu, o na kunei ira dina.—Maciu 10:11.
3, 4. Cava e so na ka ena gadrevi me cakayaco kina na veisikovi lesu?
3 Kauaitaki Ira Dina: E rawa ni yaga na veisikovi lesu ke o vakavakarau ena imatai sara ga ni gauna o lai vunau kina. O ira na dautukutuku gugumatua era dau raica na veika e dreti ira na itaukeinivale, ra qai vakayagataka oya me usutu ni nodra veivosaki. E so tale era raica ni vinaka mera taroga e dua na taro ena itini ni nodra veivosaki, me rawa ni uqeti koya na itaukeinivale me vakanamata tiko ena veisiko e tarava. Noda kauaitaki ira dina, eda na vakasamataki ira tiko ga ena gauna eda sa biuta mai kina nodra katuba, ena uqeti keda tale ga me kua ni bera noda sikovi ira lesu. Kevaka e rawa, lesuvi ira tale ni se ra tataleitaki tiko—ena loma ni dua se rua ga na siga.
4 Ni o sa sikova lesu e dua, tekivuna nomu vosa ena veika ga drau a veitalanoataka ena veisiko sa oti. Me nomu isausau mo wasea e dua mada ga na tikinivolatabu ena gauna kece o veisiko kina, qai tu vakarau mo dau vakarorogo. Saga mo kilai koya vakavinaka na itaukeinivale. Ni o sikovi koya tale, wasea vua na ka dina mai na Vosa ni Kalou e kovuta na veika e kauaitaka.
5. Na iwalewale rawarawa cava e rawa ni vakayagataki me tekivutaki kina na vuli iVolatabu?
5 Tu Vakarau Mo Tauyavutaka na Vuli iVolatabu: Ni o veisikovi lesu, me nomu isausau mo tauyavutaka e dua na vuli iVolatabu. E rawa ni caka vakacava oqo? Tukuna ni o via wasea vua e dua na vakasama, qai cega e dua na parakaravu ena ivola na Kila se na brochure na Loma ni Kalou o nanuma ni na kauai kina o itaukeinivale. Wilika na parakaravu, taroga na taro, drau qai veitalanoataka e dua se rua na tikinivolatabu e koto ena parakaravu oya. Oqo e rawa ni caka sara ga ena matanikatuba ena loma ni lima ina tini na miniti. Tinia ena nomu taroga na taro e tarava qai tuvanaka mo drau tomana na veivosaki ena dua tale na gauna.
6. Eda na vakaraitaka vakacava noda kauaitaka na bibi ni veisikovi lesu?
6 E dua na tiki bibi ni noda cakacaka vakaitalatala na nodra vakabulabulataki na tataleitaki kece eda kunea. Biuta vakatikitiki e dua na gauna ena nomu ituvatuva vakamacawa mo veisikovi lesu kina. Ena vuavuaivinaka kina nomu cakacaka vakaitalatala qai kauta tale ga mai vei iko na marau dina.