Wase 11—Na Ka me Caka Mera Toso Kina Noda Vuli iVolatabu
Vukei Ira na Vuli iVolatabu Mera Veisikovi Lesu
1 Nira sa vakaitavi tiko na noda vuli iVolatabu ena cakacaka vakavunau, era na sotavi ira na tamata era taleitaka na itukutuku vinaka. Eda na vukei ira vakacava na dautukutuku vou oqo mera veisikovi lesu ra qai vakabulabulataka na tataleitaki era kunea?
2 E tekivu sara ga na vakavakarau me baleta na veisikovi lesu ena imatai ni gauna eda vunau kina vei ira na itaukeinivale. Uqeti koya na gonevuli e dautukutuku vou me dau kauaitaki ira dina na tamata e vosa vei ira. (Fpai. 2:4) Vukei koya me uqeti ira na itaukeinivale mera vosa tale ga, rogoca na ka era kaya, qai nanuma toka na ka era kauaitaka. Ke dua e tataleitaki, uqeta na dautukutuku vou me vola na veika e so e veiganiti me baleti koya e tataleitaki. Me vakayagataka na veika e vola oya ena nona vakarautaka na veisiko era tarava.
3 Vakavakarau ina Veisikovi Lesu: Drau railesuva na veika e yaco ena imatai ni veitalanoa, qai vakaraitaka vua na gonevuli na kena digitaki e dua na itukutuku ni Matanitu ni Kalou ena taleitaka na itaukeinivale. (1 Kor. 9:19-23) Drau vakarautaka vata e dua na ivakamacala lekaleka e vakayagataki kina e dua na tikinivolatabu kei na dua na parakaravu ena ivola e dau vulici. Drau vakarautaka tale ga e dua na taro me tarogi ni sa oti na vakamacala me idewadewa ni veisiko e tarava. Vakaraitaka vua na dautukutuku vou na sala e rawa ni vakuria tiko kina na nona kila na Vosa ni Kalou o itaukeinivale ena veisiko kece.
4 E veivuke tale ga na kena vakaraitaki vua na gonevuli me vakayagataka e dua na ikau ni vosa rawarawa. Ni rau veikidavaki oti kei na itaukeinivale e rawa ni kaya: “Au marautaka dina na nodaru veitalanoa sa oti, au lesu mai oqo meu mai wasea e so tale na ivakamacala mai na iVolatabu me baleta na [tukuna na ulutaga].” De vinaka mo vakaraitaka tale ga vua na dautukutuku vou na ka me kaya ke duatani e dolava mai na katuba.
5 Gumatua ena Veisikovi Lesu: Uqeta na gonevuli me gumatua ena nona dau sikovi ira totolo na tataleitaki. De na vinakati me siko vakavica ni bera ni qai kunea na itaukeinivale. Vakaraitaka vua na gonevuli na ivalavala ni kena lokuci na veisiko e tarava, vakaraitaka tale ga vua na kena bibi me lesu ena gauna e yalataka. (Maciu 5:37) Vakavulica na dautukutuku vou me dau yalololoma, veinanumi, qai veidokai ni vakasaqarai ira era vaka na sipi ena nona vakabulabulataka na nodra tataleitaki.—Taito 3:2.