-
O Cei Era Vunautaka Tiko na iTukutuku Vinaka?Na Vale ni Vakatawa Kacivaka na Matanitu i Jiova—2011
-
-
O Cei Era Vunautaka Tiko na iTukutuku Vinaka?
“Ena vunautaki . . . ena veiyasa i vuravura.”—MACIU 24:14.
ERA vunautaka na itukutuku vinaka e veiyasa i vuravura na iVakadinadina i Jiova ena levu na sala. Dua qo . . .
Era Tukuna. Me vakataki Jisu kei ira na nona tisaipeli, o ira tale ga na iVakadinadina i Jiova era lai tukuna vei ira na lewenivanua na itukutuku vinaka. (Luke 8:1; 10:1) Era sega ni waraka mera lakovi ira mai na lewenivanua. O ira kece na iVakadinadina i Jiova era vakaitavi ena vunautaki ni Matanitu ni Kalou—sa sivia qo e vitu na milioni na kedra iwiliwili. Era vunau e veivale, ena salatu, ena talevoni, kei na so tale na sala. Ena yabaki sa oti, era vakayagataka e sivia e dua veimama na bilioni na aua ena cakacaka qo.
Na lewe ni nodra itukutuku e sega ni okati wale ga kina na Matanitu ni Kalou, e wili tale ga kina ‘na ka kece a vakarota [o Jisu].’ (Maciu 28:20) Era vakavulica wasoma e sivia na le walu na milioni ena iVolatabu, ia e sega ni saumi.
Ena gauna qo era vunau tiko na iVakadinadina i Jiova ena 236 na vanua. Era vunau vei ira na tamata kece ga, dina ni duidui na ivakarau ni nodra bula. O ira era vakaitikotiko ena lomanivanua kei na siti, ena veikau mai na Amazon kei na veikauloa mai Siberia, ena vanua dravuisiga mai Aferika kei na Ulunivanua na Himalaya. Era sega ni saumi ena cakacaka qo; ra vakayagataka ga na nodra iyau kei na nodra gauna nira lomana na Kalou kei ira na wekadra. Dua tale na sala era vunautaka kina na itukutuku vinaka . . .
Na Veika e Tabaki. Na mekesini qo Na Vale ni Vakatawa Kacivaka na Matanitu i Jiova, e sa tabaki ena 185 na vosa qai veisoliyaki e sivia ni 42 na milioni na ilavelave ena itabataba yadua. Ia e dua tale na mekesini e kacivaka tale ga na Matanitu ni Kalou, na Yadra!, e tabaki ena 83 na vosa qai veisoliyaki e rauta na 40 na milioni na ilavelave ena itabataba yadua.
Na ivola, brochure, tikidua, na CD, MP3, kei na DVD e vakamacalataka na ivakavuvuli e yavutaki ena iVolatabu ena 540 vakacaca na vosa. Ena loma ni tini ga na yabaki sa sivi, sa vakarautaka qai veisoliyaka na iVakadinadina i Jiova e sivia e 20 na bilioni na iyaya kece qori, e vakatauvatani ni rauta ni yatolu mai na dua na lewe i vuravura!
E vakadonui me tabaka na iVakadinadina i Jiova na ivakadewa tale eso ni iVolatabu. Na New World Translation of the Holy Scriptures—sa vakadewataki, tabaki vakatikina se tabaki taucoko ena 96 na vosa ra qai veisoliyaka na iVakadinadina i Jiova e sivia na 166 na milioni na ilavelave. Era wasea tale ga na iVakadinadina i Jiova na itukutuku vinaka ni Matanitu . . .
Ena Soqoni vaKarisito. Na inaki ni soqoni vaKarisito e caka e veimacawa ena Kingdom Hall mera vakavulici kina, e sega ni dua ga na ivakarau ni lotu. Na vunau e yavutaki ena iVolatabu qai vulici na iVolatabu ni vakayagataki na Vale ni Vakatawa kei na so tale na ivola. Era vukei ena soqoni na iVakadinadina i Jiova mera toroya cake na iwalewale ni nodra vunautaka na itukutuku vinaka.
E tautauvata na ka era vulica na iVakadinadina i Jiova ena sivia na 107,000 na ivavakoso e veiyasa i vuravura, qo na sala era duavata tiko ga kina. Na nodra soqoni era sureti kina na lewenivanua. E sega ni dauveisoliyaki kina na veleti ni soli. Ia ena tawayaga na veika kece qo ke ra sega ni cakava na iVakadinadina i Jiova na ka era vunautaka. Era na saga tale ga mera vunautaka na itukutuku vinaka ena . . .
Nodra iVakaraitaki. Era saga vagumatua mera ivakaraitaki ena nodra muria na itovo ni lotu vaKarisito nira cakava na ka era vinakata me caka vei ira. (Maciu 7:12) E macala nira sega ni uasivi, e tiko tale ga na nodra dui malumalumu. Ia era vinakata dina mera vukei ira na matatamata kece. Era sega gona ni vunautaka ga na itukutuku vinaka, era dodoliga tale ga mera veivuke ena gauna ni leqa.
O ira na iVakadinadina i Jiova era sega ni vaqara lewenilotu ena nodra cakacaka vakavunau. Ni sa vakayacori na cakacaka qo ena kena iyacoyaco e vinakata o Jiova, sa na qai yaco na icavacava me vaka a parofisaitaka o Jisu. Na cava gona ena yaco ena vuravura kei ira era na bula kina?
[iYaloyalo ena tabana e 7]
O ira na iVakadinadina i Jiova era vunautaka tiko na itukutuku vinaka ena veiyasa i vuravura
-
-
Na Cava “na iCavacava”?Na Vale ni Vakatawa Kacivaka na Matanitu i Jiova—2011
-
-
Na Cava “na iCavacava”?
“. . . sa na qai yaco na icavacava.”—MACIU 24:14.
SA DUA na ka na kena veivosakitaki vakalevu nikua na icavacava kei vuravura. E laurai qori ena iyaloyalo, ivola, mekesini, kei na komiki ni vakamacalataki kina e levu na rai me baleta na siga ni veivakarusai vakadomobula, so me ka ni lasa so tale e rai vakasaenisi. E okati kina na veivakarusai ena ivalu vakaniukilia, coqa ni vuravura lalai e maliwalala, mate rerevaki, veiveisau vakalevu ni draki, se na ravuravu mai maliwalala.
E duidui tale ga na rai ni veimatalotu; e levu era vakavulica ni “icavacava” ena vaqeavutaka na ka bula kece e vuravura. E dua na daunicioloji a vola na vosa qo ni vakamacalataka tiko na Maciu 24:14: “Qo e dua vei ira na tikinivolatabu bibi . . . Sa na voleka ni vakarusai na itabatamata qo, na levu ni vanua ena tara era sega ni bau vakasamataka eso.”
Na rai va oya e lecavi kina e dua na ka bibi: Sa “vakataudeitaka” na vuravura na Kalou o Jiova; e “sega ni cakava me lala, sa bulia ga me tawa.” (Aisea 45:18) Ni vakamacalataka gona o Jisu na “icavacava,” a sega ni tukuna tiko ni na vakarusai na vuravura qele; se na noda vakawabokotaki na kawatamata. A tukuna tiko ga nira na vakarusai o ira na vakayacora tiko na veika ca ra qai sega ni muria na veidusimaki i Jiova.
Me kena ivakaraitaki. Kaya mada ke dua na nomu vale totoka, o qai solia vei ira eso mera tiko wale kina. So vei ira na vakaitikotiko kina era dau veimaliwai vinaka ra qai qarava vinaka na nomu vale. Ia eso tale era vakavu ca, dauveivala, ra qai vakacacani ira era qarava vinaka na nomu vale. Era vakacacana tale ga na nomu vale ra qai sega ni via rogoci iko.
Na cava o na cakava? O na vakarusa nomu vale? E sega. De dua o na vakatalai ratou ga na dauvakacaca qai vakavinakataka tale na nomu vale.
Ena cakava tale ga qori o Jiova. A uqeta na daunisame me vola: “Ni na muduki tani na daucaka ca; ia ko ira sa dauwaraki Jiova, era na taukena na vanua. Malua mada vakalailai, ena qai takali na tamata ca; io, ko na vakananuma na nona yasana, ia sa na yali kina ko koya. Ia ko ira na yalomalumalumu era na taukena na vanua; ka na daumarau tiko e na veivakacegui vakaidina.”—Same 37:9-11.
Na yapositolo o Pita a vosa tale ga ena ulutaga qo. A uqeti vakalou me vola: “Ni vosa ga ni Kalou e tiko kina na lomalagi ni gauna makawa, e votu mai wai na qele mamaca, ena maliwa tale ga ni wai, ena vuku gona ni ka kece qo e vakarusai kina na vuravura ena gauna ya ni luvuci ena wai.” (2 Pita 3:5, 6) E vakaibalebaletaka tiko na yapositolo na Waluvu ena gauna i Noa. A vakarusai o ira era sega ni doka na Kalou, ia a tu ga na vuravura qele. Na Waluvu ena gauna oya e “ivakaraitaki ni ka ena yacovi ira era sega ni doka na Kalou.”—2 Pita 2:6.
E tomana o Pita: “E maroroi . . . na lomalagi kei na vuravura ni gauna qo me qai vakamai.” Ke yaco ga eke na noda wiliwili ena solia na vakasama cala. Ia nida wilika vakaoti na tikina qo e tukuna nira na “vakarusai kina o ira na sega ni doka na Kalou.” E kena ibalebale ni na sega ni vakarusai na vuravura qele, o ira ga na sega ni doka na Kalou. Na cava ena yaco tarava? A vola o Pita: “Eda waraka na lomalagi vou [Matanitu vakaMesaia ni Kalou] kei na vuravura vou [lewe i vuravura e vakadonui ira o Jiova] me vaka na nona yalayala, era na tiko kina na yalododonu.”—2 Peter 3:7, 13.
E vakadinadinataka na parofisai ena iVolatabu ni sa voleka sara na “icavacava.” Wilika mada na Maciu 24:3-14 kei na 2 Timoci 3:1-5 mo raica kina na kena dina.a
O kurabuitaka beka nira veilecayaki e levu ena ka e tukuni ena Maciu 24:14, na tikinivolatabu e rawa mada ga ni kila e dua na gone? E tiko na vuna. O Setani e vakamatabokotaka na kawatamata mera kua ni kila na ka dina talei e tu ena Vosa ni Kalou. (2 Korinica 4:4) Kuria qori ni vunitaka na Kalou na nona inaki vei ira na viavialevu qai vakaraitaka ga vei ira na yalomalumalumu. A tukuna kina o Jisu: “Au vakavinavinaka vei kemuni, Tamaqu, na Turaga ni lomalagi kei na vuravura ni oni vunia na veika qo vei ira na vuku kei ira na vuli vinaka, oni qai vakatakila ga vei ira na gone lalai.” (Maciu 11:25) Sa dua dina na ka dokai meda maliwai ira na yalomalumalumu era kila vinaka na Matanitu ni Kalou ra qai vakanamata ina veivakalougatataki ena kauta mai!
-