Nǔ e Mɛsɛ́dó lɛ́ wa lɛ́ é

23 Pɔ́lu kpɔ́n Hwɛɖɔxɔsá ɖaxó Jwifu lɛ́ tɔn sín hǎgbɛ́ lɛ́ tlítlí bo ɖɔ: “Nɔví ce lɛ́ mi, káká jɛ égbé ɔ, un zán gbɛ kpó ayixa e mɛ́ bɔ nǔ bǐ vɔ ɖ’é wú é kpó ɖo Mawu nukɔn.” 2 Ée é ɖɔ mɔ̌ é ɔ, vɔ̌sánúxwlémawutɔ́ ɖaxó Ananiyási ɖe gbe nú mɛ e ɖo te ɖo Pɔ́lu kpá lɛ́ é ɖɔ yě ní gba nu i. 3 Pɔ́lu ka ɖɔ n’i ɖɔ: “Hwi dǒ e è sá nǔ wěwé dó é ɖɔhun élɔ́ ɔ, Mawu wɛ ná xo we. A jínjɔ́n ayǐ bo ná ɖɔ hwɛ xá mì sɔgbe xá Sɛ́n ɔ, bɔ hwe ɖokpó ɔ nu ɔ, a lɛ́ ɖe gbe ɖɔ è ní xo mì, bo ná gba Sɛ́n ɔ wɛ a?” 4 Mɛ e ɖo te ɖo fínɛ́ lɛ́ é ɖɔ: “Vɔ̌sánúxwlémawutɔ́ ɖaxó ɔ zun wɛ a ɖe a?” 5 Bɔ Pɔ́lu ɖɔ: “Nɔví ce lɛ́ mi, un tuun ɖɔ vɔ̌sánúxwlémawutɔ́ ɖaxó wɛ n’i ǎ. Ðó è ko wlán ɖɔ: ‘A ɖó ná nylá nu dó mɛ e nyí gǎn ɖo togun towe mɛ é ɖé wú ǎ.’”

6 Din ɔ, ɖó Pɔ́lu tuun ɖɔ mɛ e kplé lɛ́ é ɖě nyí Saduseɛn, bɔ mɛ e kpo lɛ́ é nyí Falizyɛn wútu ɔ, é sú xó ɖo Hwɛɖɔxɔsá ɖaxó Jwifu lɛ́ tɔn bo ɖɔ: “Nɔví ce lɛ́ mi, Falizyɛn wɛ nú mì, bɔ un lɛ́ nyí Falizyɛn ví jiji. Fínfɔ́n sín kú mɛkúkú lɛ́ tɔn sín nukúnɖíɖó wú wɛ è ɖo hwɛ ɖɔ xá mì wɛ.” 7 Ðó mɔ̌ e é ɖɔ é wútu ɔ, gbemanɔkpɔ́ ɖé fɔ́n ɖo Falizyɛn lɛ́ kpó Saduseɛn lɛ́ kpó tɛ́ntin, bɔ ahwan ɔ klán. 8 Ðó Saduseɛn lɛ́ nɔ ɖɔ ɖɔ fínfɔ́n sín kú kún tíin ó, wɛnsagun ɖě kún tíin ó, gbigbɔ ɖě kún ka lɛ́ tíin ó; amɔ̌, Falizyɛn lɛ́ nɔ yí gbe* ɖɔ nǔ énɛ́ lɛ́ bǐ tíin. 9 Énɛ́ wú ɔ, hunnyahunnya ɖaxó ɖé fɔ́n, bɔ sɛ́nkplɔ́nmɛtɔ́ e ɖo Falizyɛn lɛ́ sín gbɛ̌ta mɛ é ɖé lɛ́ sí te bo jɛ nǔ dɔn jí syɛ́nsyɛ́n bo nɔ ɖɔ: “Nya élɔ́ wa nǔtí nyi do bónú mǐ mɔ ǎ, amɔ̌, ényí gbigbɔ alǒ wɛnsagun ɖé wɛ ɖɔ xó n’i ɔ, . . .” 10 Din ɔ, ée gbemanɔkpɔ́ ɔ ɖo syɛ́nsyɛ́n d’é jí wɛ é ɔ, ahwangán ɖaxó ɔ ɖi xɛsi ɖɔ yě táá wá vúnvún Pɔ́lu. Énɛ́ wú ɔ, é ɖe gbe nú sɔ́ja lɛ́ ɖɔ yě ní yi dɔn Pɔ́lu sín tɛ́ntin yětɔn, bo kplá ɛ yi ahwansla ɔ mɛ.

11 Amɔ̌, zǎn e bɔ d’é wú é mɛ ɔ, Aklúnɔ wá nɔ te Pɔ́lu kpá bo ɖɔ: “Kpan akɔ́n! Ðó lěe a ɖo kúnnu ɖe nú mì wɛ mlɛ́mlɛ́ ɖo Jeluzalɛ́mu gbɔn é ɔ, mɔ̌ wɛ a ɖó ná lɛ́ ɖe kúnnu gbɔn ɖo Hlɔ̌ma.”

12 Ayǐhɔ́ngbe tɔn ɔ, Jwifu lɛ́ blá gbě, bo ɖɔ ɖɔ ényí émí ma hu Pɔ́lu cóbó ɖu nǔ alǒ nu sin ǎ ɔ, nudómɛ wɛ é ná nyí nú émí. 13 Súnnu 40 jɛjí wɛ blá gbě énɛ́, bo xwlé nǔ d’é jí. 14 Yě yi vɔ̌sánúxwlémawutɔ́gán lɛ́ kpó tomɛxó lɛ́ kpó gɔ́n bo ɖɔ: “Mǐ xwlé nǔ ɖɔ mǐ ɖó ná hu Pɔ́lu cóbó ná dó nǔ ɖěbǔ nu, é ma nyí mɔ̌ ǎ ɔ, nudómɛ wɛ é ná nyí nú mǐ. 15 Énɛ́ wú ɔ, mi kpó Hwɛɖɔxɔsá ɖaxó Jwifu lɛ́ tɔn sín hǎgbɛ́ lɛ́ kpó ní ɖɔ nú ahwangán ɖaxó ɔ ɖɔ é ní kplá Pɔ́lu wá nú émí, cí nǔ ɖɔ mi jló ná gbéjé xó tɔn kpɔ́n hlɛ́nhlɛ́n hú gǎn wɛ ɖɔhun. Amɔ̌, cóbónú é ná wá ɔ, mǐ ná ko ɖo gbesisɔmɛ bo ná hu i.”

16 Nɔví nyɔ̌nu Pɔ́lu tɔn sín vǐ súnnu ka se gbě e blá wɛ yě ɖe é, bo byɔ́ ahwansla ɔ mɛ bo gb’akpá tɔn nú Pɔ́lu. 17 Énɛ́ ɔ, Pɔ́lu ylɔ́ sɔ́jakanwekogán lɛ́ ɖokpó bo ɖɔ n’i ɖɔ: “Kplá dɔ̌nkpɛvú élɔ́ yi ahwangán ɖaxó ɔ gɔ́n, ɖó é ɖó xó ɖé bá ɖɔ n’i.” 18 Sɔ́jakanwekogán ɔ kplá dɔ̌nkpɛvú ɔ hɛn yi ahwangán ɖaxó ɔ gɔ́n bo ɖɔ: “Gantɔ́ Pɔ́lu wɛ ylɔ́ mì, bo byɔ́ mì ɖɔ nyi ní kplá dɔ̌nkpɛvú élɔ́ wá nú we, ɖó é ɖó xó ɖé bo ná ɖɔ nú we.” 19 Ahwangán ɖaxó ɔ hɛn alɔ tɔn bo kplá ɛ jɛ vo, bo kanbyɔ́ ɛ ɖɔ: “Étɛ́ a ka ɖó bo ná ɖɔ nú mì?” 20 É ɖɔ: “Jwifu lɛ́ ɖó gbe kpɔ́, bo ná byɔ́ we ɖɔ hwi ní kplá Pɔ́lu wá Hwɛɖɔxɔsá ɖaxó Jwifu lɛ́ tɔn sɔ, cí nǔ ɖɔ yě jló ná gbéjé xó tɔn kpɔ́n hlɛ́nhlɛ́n hú gǎn wɛ ɖɔhun. 21 Amɔ̌, ma wa nǔ e yě ná byɔ́ we é ó, ɖó súnnu yětɔn 40 jɛjí ko tɔwu, bɔ yě ɖɔ ɖɔ ényí émí ma hu Pɔ́lu cóbó ɖu nǔ alǒ nu sin ǎ ɔ, nudómɛ wɛ é ná nyí nú émí; yě ko ɖo gbesisɔmɛ din, bo ɖo te kpɔ́n we bónú a ná ná gbe.” 22 Énɛ́ ɔ, ahwangán ɖaxó ɔ ɖe gbe nú dɔ̌nkpɛvú ɔ ɖɔ: “Ma ɖɔ nú mɛ ɖěbǔ ɖɔ émí tín xó élɔ́ mɛ nú mì ó.” Énɛ́ gúdo ɔ, é ɖɔ n’i ɖɔ é ní yi.

23 É ylɔ́ sɔ́jakanwekogán we bo ɖɔ nú yě ɖɔ: “Mi nú sɔ́ja 200, sɔ́xátɔ́ 70 kpó hwǎndatɔ́ 200 kpó ní ɖo gbesisɔmɛ, bo ná zɔn ali yi Sezalée ɖo gan tɛ́nnɛ mɛ zǎnmɛ mɔ̌.* 24 Gɔ́ ná ɔ, mi blá akpa nú sɔ́ ɖé lɛ́ nú Pɔ́lu, bónú é ná yi tokpɔngán Felísi gɔ́n wǔyɛ́yɛ́ afɔyɛ́yɛ́.” 25 Ahwangán ɖaxó ɔ lɛ́ wlán wěma ɖokpó bo ɖɔ:

26 “Nyɛ Klódu Lisiyási wɛ ɖo wěma élɔ́ sɛ́ dó Sísíjɛxá tokpɔngán Felísi wɛ: Un dó gbe we! 27 Jwifu lɛ́ wɛ wlí nya élɔ́ bo ja huhu i gbé, amɔ̌, nyi kpó sɔ́ja ce lɛ́ kpó yá wǔ wá, bo hwlɛ́n ɛ, ɖó un se ɖɔ Hlɔ̌manu wɛ n’i. 28 Bɔ ɖó un jló ná tuun nǔ e wú yě ɖo hwɛ dó è wɛ é wútu ɔ, un kplá ɛ yi Hwɛɖɔxɔsá ɖaxó Jwifu lɛ́ tɔn. 29 Un wá mɔ ɖɔ nǔ e kunkplá Sɛ́n yětɔn lɛ́ é sín hwɛ dó è wɛ yě ɖe, amɔ̌, é wa nǔ e jɛxá kú alǒ gankpá mɛ yiyi é kwín ɖokpó ǎ. 30 Un ka wá se ɖɔ yě blá gbě tɔn bo ná hu i, énɛ́ wú wɛ un yá wǔ sɛ́ ɛ dó gɔ̌n towe, bo ɖɔ nú mɛ e ɖo hwɛ dó è wɛ lɛ́ é ɖɔ yě ní wá ylɔ́ hwɛ ɛ ɖo gɔ̌n towe.”

31 Sɔ́ja lɛ́ bló nǔ e è zɔ́n yě é, bo kplá Pɔ́lu yi Antipatlísi zǎnmɛ. 32 Ayǐhɔ́ngbe tɔn ɔ, yě jó sɔ́xátɔ́ lɛ́ dó bɔ yě kplá ɛ yi, amɔ̌, yědɛɛ lɛ́ lɛ́ kɔ wá ahwansla ɔ mɛ. 33 Sɔ́xátɔ́ lɛ́ byɔ́ Sezalée, bo sɔ́ wěmasɛ́dómɛ ɔ nú tokpɔngán ɔ, lobo lɛ́ sɔ́ Pɔ́lu d’alɔ mɛ n’i. 34 Tokpɔngán ɔ xa wěmasɛ́dómɛ ɔ, bo kan tokpɔn e mɛ nu Pɔ́lu nyí é byɔ́, bɔ è ɖɔ n’i ɖɔ Silisíinu wɛ n’i. 35 É ɖɔ: “Un ná ɖótó we ganjí, hwenu e mɛ e ɖo hwɛ dó we wɛ lɛ́ é ná wá é.” Énɛ́ gúdo ɔ, é ɖe gbe ɖɔ è ní sɔ́ ɛ dó Elódu sín hɔnmɛ, bo nɔ cɔ́ ɛ.