Axɔ́sú Izlayɛ́li tɔn e yí wǎn nú Jexóva lɛ́ é nɔ sɛn ɛ kpó ayi e ɖo blěbú é ɖé kpó. Biblu ɖɔ xó élɔ́ dó Joziyási wú: ‘Axɔ́sú e ko kpa acɛ có Joziyási wá ɖu axɔ́sú lɛ́ é ɖě lɛ́ kɔ wá Jexóva gɔ́n kpó ayi tɔn bǐ kpó Joziyási ɖɔhun ǎ.’ (2 Axɔ́. 23:25) Bɔ Salomɔ́ɔ e ka wá wa nǔ nyanya ɖo kpikpoxɔmɛ é ka lo? ‘Ayixa tɔn bǐ sɔ́ ɖo Jexóva wú ǎ.’ (1 Axɔ́. 11:4) Gɔ́ ná ɔ, Biblu ɖɔ xó élɔ́ dó Abíya e nyí axɔ́sú gbejímanɔtɔ́ ɖěvo é wú: ‘É sɔ́ ayixa tɔn bǐ jó nú Jexóva ǎ.’ (1 Axɔ́. 15:3) Hwɛhwɛ ɔ, Biblu nɔ zán xókwín “ayi” dó tínmɛ nǔ e mɛɖé nyí ɖo xomɛ blěbú é, káká jɛ mɛ ɔ sín jlǒ lɛ́, linlin tɔn lɛ́, ninɔmɛ ayi mɛ tɔn e é ɖó é, nǔwalɔ tɔn lɛ́, nǔwúkpíkpé tɔn lɛ́, nǔ e nɔ sísɛ́ ɛ bɔ é nɔ wa nǔ lɛ́ é kpó nǔ e gbé nya wɛ é ɖe lɛ́ é kpó jí. Étɛ́ ka nyí tínmɛ Jexóva sinsɛn kpó ayi mɛtɔn bǐ kpó tɔn lo? Mɛ e ayi tɔn ma má ǎ é nɔ sɛn Mawu ɖó é ɖó ná wa mɔ̌ kpowun wú ǎ. É nyɔ́ wa ɔ, é nɔ sɛn Jexóva ɖó é yí wǎn n’i tawun bo lɛ́ ɖó sísí e gɔ́ngɔ́n é n’i ɖo gbɛzán tɔn bǐ mɛ wútu. w24.07 21 akpá. 4-5

Jexóva zán nǔjlɛ́dónǔwú ɖé dó tínmɛ lěe é nɔ súnsún hwɛ lɛ́ gbɔn é. É ɖɔ: “Un ná súnsún agɔ e a jɛ lɛ́ é akpɔ́kpɔ́ wɛ un dó súnsún yě ná ɖɔhun, bo ná súnsún hwɛ towe lɛ́ akpɔ́kpɔ́ tlitli wɛ un dó súnsún yě ɖɔhun.” (Eza. 44:22, nwt) Ényí Jexóva sɔ́ hwɛ mǐtɔn lɛ́ kɛ mǐ ɔ, é nɔ bló nǔ cí nǔ ɖɔ akpɔ́kpɔ́ tlitli ɖé wɛ é zán dó cyɔ́n nǔ dó yě, bónú mǐ kpó é kpó ɖě ní ma sɔ́ mɔ yě ó ɖɔhun. Étɛ́ nǔjlɛ́dónǔwú énɛ́ lɛ́ ka kplɔ́n mǐ? Ényí Jexóva sɔ́ hwɛ mǐtɔn lɛ́ kɛ mǐ ɔ, mǐ sɔ́ ɖó ná ɖo hwɛ dó mǐɖée wɛ nú gbɛhwenu mǐtɔn e kpo é ǎ. Vɔ̌sísá Jezu tɔn ko sú hwɛ mǐtɔn lɛ́ sín axɔ́ bǐ mlɛ́mlɛ́. Ényí Jexóva sɔ́ hwɛ ɖé kɛ mǐ ɔ, é nɔ cí ɖɔ mǐ kún hu hwɛ énɛ́ gbeɖé ó ɖɔhun. Ényí mǐ lɛ́ kɔ sín hwɛ mǐtɔn lɛ́ gúdo ɔ, lěe Jexóva nɔ sɔ́ hwɛ kɛ mǐ gbɔn é nɛ́. Nǔbláwǔkúnúmɛ Jexóva tɔn nɔ lɛ́ hun ali nú mǐ bɔ mǐ nɔ zun xɔ́ntɔn vívɛ́ xá ɛ, bo nɔ d’alɔ mǐ bɔ hwɛ dídó mɛɖée sín linlin lɛ́ sɔ́ nɔ ɖí bú mǐ ǎ. w25.02 10 akpá. 11-14

Mɛxó agun tɔn ɖěɖěe nɔ nɔ wěɖegbɛ́ mɛ lɛ́ é ɖó azɔ̌ tají ɖé ɖo Jexóva nukɔn, bo ná bló bɔ agun ɔ ná nɔ mǐmɛ́ jí. (1 Kɔ. 5:7) Yě nɔ lɛ́ ba ná d’alɔ nǔwanyidotɔ́ lɛ́, bɔ nú é nyɔ́ bló ɔ, hwɛ yětɔn lɛ́ ná vɛ́ nú yě. Énɛ́ wú ɔ, mɛxó agun tɔn lɛ́ nɔ ɖó linlin ɖagbe, bo nɔ kpo ɖo nukún ɖó wɛ ɖɔ mɛ ɔ ná húzú. Aniwú? Ðó yě nɔ ba ná xwedó kpɔ́ndéwú Jexóva, éé “nɔ kú nǔbláwǔ nú mɛ, bo nɔ lɛ́ yí wǎn nú mɛ titewungbe” é tɔn. (Ja. 5:11) Ð’ayi lěe mɛsɛ́dó mɛxómɔ Jaan wa nǔ gbɔn mɔ̌ gbɔn é wú. É wlán ɖɔ: “Vǐ ce vívɛ́ná lɛ́ mi, un ɖo nǔ élɔ́ lɛ́ wlán sɛ́dó mi wɛ bónú mi ní ma hu hwɛ ó. É ɖo mɔ̌ có, ényí mɛɖé ka wá hu hwɛ ɔ, mǐ ɖó alɔgɔ́númɛtɔ́ ɖokpó ɖo Tɔ́ ɔ gɔ́n, é wɛ nyí Jezu Klísu, mɛ e nɔ wa nǔ jlɔ́jlɔ́ ɖo Mawu nukúnmɛ é.” (1 Jaan 2:1) É blá wǔ ɖɔ hweɖélɛ́nu ɔ, è nɔ wa nǔ e wú è kpé é bǐ có, hwɛ klisánwun ɖé tɔn nɔ gɔn vǐvɛ́ n’i. Ényí nǔ mɔ̌hun jɛ ɔ, è ɖó ná sɔ́ ɛ ɖó kɛ́n nú agun ɔ. w24.08 25 akpá. 19-20