Ðo Jonási hwenu ɔ, ali hun nú Ninívunu lɛ́ bɔ yě ná ɖe xlɛ́ ɖɔ hwɛ émítɔn lɛ́ vɛ́ nú émí. Gɔ́ ná ɔ, flín nǔ e Jezu ɖɔ dó mɛ e “è ná fɔ́n [sín kú] bo ná ɖɔ hwɛ xá yě” lɛ́ é wú é. “Mɛ e wa nǔ nyanya lɛ́ é” wɛ nú yě. (Jaan 5:29) Énɛ́ wú ɔ, é cí ɖɔ nukúnɖíɖó ɖe nú Sodɔ́munu lɛ́ kpó Gomɔ́ɔnu lɛ́ kpó lɔmɔ̌ ɖɔhun. É sixú nyɔ́ bló bɔ é hwe bǐ ɔ, yě mɛ ɖé lɛ́ ná fɔ́n sín kú, bɔ ali sixú hun nú mǐ bɔ mǐ ná kplɔ́n nǔ yě dó Jexóva kpó Jezu Klísu kpó wú. Hwebǐnu wɛ Jexóva “nɔ tuun nǔ e lin wɛ gbɛtɔ́ ɖe ɖo ayi tɔn mɛ é. Nǔ e ɖo mɛ xomɛ ɔ, [é] nɔ mɔ bo nɔ da kpɔ́n.” Nú nǔ e kan fínfɔ́n sín kú ɖo sɔgúdo é ɔ, é ná “wa nǔ nú mɛ lěe walɔ mɛ ɔ tɔn byɔ́ gbɔn é.” Ényí hwɛjijɔ e wú Jexóva ná kú nǔbláwǔ nú mɛ é ɖé ma tíin ǎ ɔ, é nɔ wa mɔ̌ ǎ, amɔ̌, nú é byɔ́ ɖɔ é ní kú nǔbláwǔ nú mɛ hweɖébǔnu ɔ, é nɔ wa mɔ̌. Énɛ́ wú ɔ, nú mǐ ma kú d’é jí ɖɔ Biblu ɖɔ ɖɔ è ná fɔ́n mɛɖé sín kú ǎ ɔ, mǐ ɖó ná ɖɔ gbeɖé ɖɔ è ná fɔ́n mɛ ɔ sín kú ǎ! w24.05 5-6 akpá. 15-16

É ná bo tlɛ nyí ɖo hwexónu ɔ, wɛn e gosín Mawu gɔ́n é ná hlɔ̌nhlɔ́n mɛsɛntɔ́ tɔn lɛ́ hwenu e yě ɖó azɔ̌ syɛ́nsyɛ́n ɖé bá wa é. Mǐ ní kpɔ́n kpɔ́ndéwú gbeyíɖɔ Jelemíi tɔn. É xo nǔ kpɔ́n hwenu e Jexóva zɔ́n azɔ̌ ɛ ɖɔ é ní jlá wɛn ɔ é. Jelemíi ɖɔ: “Un ma nyɔ́ xó ɖɔ nɛ́! Yɔkpɔ́vú wɛ nú mì.” (Jel. 1:6) Nɛ̌ é ka ɖu ɖo jiɖe e é ma nɔ ɖó dó éɖée wú ǎ é jí gbɔn? Xó e Mawu ɖɔ n’i é wɛ ná ɛ hlɔ̌nhlɔ́n. É ɖɔ: “É nɔ cí ɖɔ myɔ wɛ ɖo xo ce mɛ, bo ɖo jiji wɛ ɖɔhun, bɔ un nɔ tɛ́n kpɔ́n bo ná dɛ ɖ’é nu, un ka nɔ kpé wú ǎ.” (Jel. 20:8, 9) Mɛ e Jelemíi ná jlá wɛn ɔ lɛ́ é nyí mɛ fífá ɖé ǎ có, wɛn e è zɔ́n ɛ ɖɔ é ní jlá é ná ɛ hlɔ̌nhlɔ́n e sín hudó é ɖó bo ná wa azɔ̌ ɔ é. Wɛn Mawu tɔn e ɖo Xó Mawu tɔn mɛ é wɛ nɔ ná hlɔ̌nhlɔ́n e sín hudó klisánwun lɛ́ ɖó é yě. Mɛsɛ́dó Pɔ́lu ɖɔ ɖɔ nukúnnúmɔjɛnǔmɛ e sɔgbe é ɖíɖó ná sísɛ́ nɔví émítɔn lɛ́ bɔ yě ná “zán gbɛ lěe é jɛxá Jexóva gbɔn é,” mɔ̌ mɛ ɔ, yě ná kpo ɖo “sínsɛ́n ná wɛ ɖo nǔɖagbewiwa bǐ mɛ.”—Koló. 1:9, 10. w24.04 14-15 akpá. 2-4

Vɔ̌sánúxwlémawutɔ́ ɖaxó Abiyatáa wá gbeta ɔ kɔn bá nɔ gǔdo nú Davídi sín vǐ Adoniyási e bló tuto bá yí axɔ́súzinkpo ɔ é; é ɖo mɔ̌ có, Sadɔ́ki kpo ɖo gbejí nɔ nú Jexóva wɛ. Davídi xo nǔ kpɔ́n dó gbejíninɔ Sadɔ́ki tɔn wú kpɔ́n ǎ. Hwenu e wě e ɖe wɛ Adoniyási ɖe é gba é ɔ, Davídi sɔ́ Sadɔ́ki, Natáan kpó Benayáhu kpó ɖɔ yě ní yi kɔn ami dó ta nú Salomɔ́ɔ dó sɔ́ ɛ axɔ́sú. (1 Axɔ́. 1:32-34) Kpɔ́ e Sadɔ́ki nɔ xá Jexóva sɛntɔ́ gbejínɔtɔ́ lɛ́, ɖi Natáan kpó mɛ ɖěvo e nɔ gǔdo nú axɔ́sú Davídi lɛ́ é kpó é ɖó ná ko ná hlɔ̌nhlɔ́n kpó akɔ́nkpinkpan kpó è. Ée Salomɔ́ɔ húzú axɔ́sú é ɔ, é “sɔ́ vɔ̌sánúxwlémawutɔ́ Sadɔ́ki dó Abiyatáa tɛnmɛ.” (1 Axɔ́. 2:35) Nɛ̌ a ka sixú xwedó kpɔ́ndéwú Sadɔ́ki tɔn gbɔn? Ényí mɛ e a vɛ́ xá é ɖé wá gbeta ɔ kɔn bo jó Jexóva dó hǔn, nǔ gbeta e kɔn a wá é ní za wě. (Joz. 24:15) Jexóva ná ná hlɔ̌nhlɔ́n kpó akɔ́nkpinkpan kpó e sín hudó a ɖó é we. Gǎn jɛ wǔ tɔn gbɔn ɖɛxixo kpó mawusɛntɔ́ gbejínɔtɔ́ hǎtɔ́ towe lɛ́ kpó wú títɛ́dó gblamɛ. Gbejíninɔ towe xɔ akwɛ́ nú Jexóva tawun, bɔ é ná dó ajɔ tɔn we.—2 Sam. 22:26. w24.07 6-7 akpá. 16-17