Wěma nukɔntɔn e è wlán sɛ́dó Kɔlɛ́ntinu lɛ́ é

13 Ényí un nɔ ɖɔ xó dó gbe e gbɛtɔ́ lɛ́ se é kpó ée wɛnsagun lɛ́ se é kpó mɛ, bo ma ka ɖó wǎnyíyí ǎ hǔn, un cí gankwékwé alǒ ajogan e ɖo nǔ ɖɔ wɛ é ɖɔhun. 2 Ényí un ɖó nǔníná gbeyíɖɔzɔ́wiwa tɔn, bo nɔ lɛ́ mɔ nukúnnú jɛ nǔbúdo Mawu tɔn lɛ́ bǐ mɛ, lobo nɔ tuun nǔ bǐ ɔ, ényí un ɖó nǔɖiɖi sɔmɔ̌ bo sixú sɛ tɛn nú só lɛ́, bo ma ka ɖó wǎnyíyí ǎ hǔn, un nyí nǔtí* ǎ. 3 Ényí un sɔ́ nǔ e un ɖó lɛ́ é bǐ dó ná nǔɖuɖu mɛ ɖěvo lɛ́ ɔ, ényí un sɔ́ agbaza ce jó bo ná dó sixú gó, bo ma ka ɖó wǎnyíyí ǎ hǔn, é nyí le ɖěbǔ nú mì ǎ.

4 Wǎnyíyí nɔ ɖó suúlu* bo nɔ lɛ́ nyɔ́ xomɛ. Wǎnyíyí nɔ hwan wǔ ǎ. É nɔ jlá ajɔ̌ nú éɖée ǎ, é nɔ yí go ǎ, 5 é nɔ wa winnyánú* ǎ, é nɔ ba ɖagbe éɖésúnɔ tɔn ǎ, é nɔ yá wǔ sin xomɛ ǎ. É nɔ sɔ́ nǔ nyanya* e è wa n’i lɛ́ é sín kɛ́n ǎ. 6 É nɔ j’awǎ ɖó nǔagɔwiwa wú ǎ, é nyɔ́ wa ɔ, nǔgbó wú wɛ é nɔ j’awǎ. 7 É nɔ jó gbe ɖo ninɔmɛ ɖě mɛ ǎ, é nɔ ɖi nǔ nú nǔ bǐ, nɔ ɖó nukún nǔ bǐ, bo nɔ dɛ ɖo nǔ bǐ nu.

8 Wǎnyíyí nɔ vɔ gbeɖé ǎ. Amɔ̌, nǔníná gbeyíɖɔzɔ́wiwa tɔn lɛ́ ná blí bú; xó ɖiɖɔ dó gbe vovo lɛ́ mɛ* ná nɔ te; nǔtuuntuun ná blí bú. 9 Ðó nǔ e mǐ tuun din é ɖó dogbó, bɔ gbeyíɖɔzɔ́ e mǐ nɔ wa é lɔ ɖó dogbó, 10 amɔ̌, hwenu e nǔ e ɖo blěbú é ná wá é ɔ, nǔ e ɖó dogbó é ná blí bú. 11 Hwenu e un nyí yɔkpɔ́vú é ɔ, un nɔ ɖɔ xó yɔkpɔ́vú ɖɔhun, bo nɔ lin tamɛ yɔkpɔ́vú ɖɔhun, lobo nɔ gbéjé tínmɛ e nǔ lɛ́ ɖó é kpɔ́n yɔkpɔ́vú ɖɔhun; amɔ̌, din e un húzú mɛxó é ɔ, un jó jijɔ e yɔkpɔ́vú nɔ ɖó lɛ́ é dó. 12 Ðó din ɔ, mǐ nɔ mɔ nǔ vlivli cí nǔ ɖɔ ganwékpɛ́n mɛ kpɔ́n wɛ mǐ ɖe ɖɔhun, amɔ̌, é wá yá ɔ, nǔ lɛ́ bǐ ná za wě. Din ɔ, nǔ e un tuun é ɖó dogbó, amɔ̌, é wá yá ɔ, un ná tuun nǔ mlɛ́mlɛ́, lěe Mawu tuun mì mlɛ́mlɛ́ gbɔn é ɖɔhun. 13 É ɖo mɔ̌ có, din ɔ, nǔ atɔn élɔ́ lɛ́ kpo ɖo te: nǔɖiɖi, nukúnɖíɖó, wǎnyíyí; amɔ̌, éé hú gǎn bǐ ɖo nǔ énɛ́ lɛ́ mɛ é wɛ nyí wǎnyíyí.