Wěma nukɔntɔn e è wlán sɛ́dó Kɔlɛ́ntinu lɛ́ é

4 Gbɛtɔ́ lɛ́ ɖó ná nɔ kpɔ́n mǐ dó mɔ azɔ̌watɔ́ Klísu tɔn lɛ́* kpó mɛ e ɖo nǔbúdo Mawu tɔn lɛ́ jí kpɔ́n wɛ lɛ́ é kpó. 2 Ðo ali énɛ́ nu ɔ, nǔ e è nɔ ɖó nukún ɖo nǔjíkpɔ́ntɔ́ lɛ́ sí é wɛ nyí ɖɔ yě ní nɔ gbejí. 3 Din ɔ, nú midɛɛ lɛ́ alǒ hwɛɖɔxɔsá gbɛtɔ́ lɛ́ tɔn ɖé ɖɔ hwɛ xá mì ɔ, é ɖɔ nǔ káká ɖé nú mì ǎ. Nǔgbó ɔ, un tlɛ nɔ ɖɔ hwɛ dó nyiɖée ǎ. 4 Ðó un wa nǔɖé nyi do bo tuun ǎ, amɔ̌, énɛ́ ko xlɛ́ ɖɔ un nyí nǔjlɔ́jlɔ́watɔ́ ǎ; mɛ e nɔ ɖɔ hwɛ xá mì é wɛ nyí Jexóva.* 5 Énɛ́ wú ɔ, mi ma ɖɔ hwɛ dó nǔ ɖěbǔ jɛ nukɔn nú hwenu e è ɖó dó é ó, é nyɔ́ wa ɔ, mi nɔ te káká jɛ hwenu e Aklúnɔ ná wá é. É ná ɖe nǔ e ɖo hwlǎhwlá ɖo ablu mɛ lɛ́ é nyi wěziza nu, bo ná bló bɔ linlin e ɖo gbɛtɔ́ sín ayi mɛ lɛ́ é ná jɛ wě, énɛ́ gúdo ɔ, Mawu ná xɔ susu e mɛ ɖokpó ɖokpó jɛxá é n’i.

6 Nɔví lɛ́ mi, un ɖɔ xó énɛ́ lɛ́ nú mi dó nyi kpó Apolósu kpó wú nú ɖagbe mitɔn, bónú gbɔn kpɔ́ndéwú mǐtɔn gblamɛ ɔ, mi ní dó sixú kplɔ́n nǔ élɔ́: “Mi ma wa nǔ zɛ nǔ e è wlán lɛ́ é wú ó,” énɛ́ ɔ, mi ná húzú goyítɔ́ bo ná nɔ wlí yɛ̌yi nú mɛ ɖě, bo gɔn yɛ̌yi wlí nú mɛ ɖěvo ǎ. 7 Ðó mɛ̌ ka bló bɔ a gbɔn vo nú mɛ ɖěvo? Nǔgbó ɔ, étɛ́ a ka ɖó bɔ é ma nyí ɖɔ nǎ wɛ è ná we ǎ? Ée é nyí ɖɔ nǎ wɛ è ná we é ɔ, étɛ́wú a ka nɔ yí nugo, nǎ wɛ è ná we ǎ ɖɔhun?

8 Mi ko ɖó nǔ b’ɛ kpé mi, kabǐ? Mi ko jɛ dɔkun, kabǐ? Mi ko jɛ axɔ́sú ɖu jí mǐdɛɛ lɛ́ mɛvo, kabǐ? É ná ko jló mì tawun ɖɔ mi ní jɛ axɔ́sú ɖu jí bónú mǐ lɔ ní dó sixú ɖu axɔ́sú xá mi. 9 Ðó é cí nú mì ɖɔ mǐ mɛ mɛsɛ́dó lɛ́ ɔ, Mawu sɔ́ mǐ ɖó mɛ bǐ nukɔn gbɔn gǔdo, bɔ mǐ cí mɛ e è ɖó kúhwɛ ná lɛ́ é ɖɔhun, ɖó mǐ húzú nǔkpínkpɔ́n nú gbɛ ɔ, wɛnsagun lɛ́ kpó gbɛtɔ́ lɛ́ kpó. 10 Mǐ nyí xlonɔ ɖó Klísu wú, bɔ midɛɛ lɛ́ ka nyí ayiɖotenánɔ ɖo Klísu mɛ; mǐ ɖó gǎn ǎ, midɛɛ lɛ́ ka ɖó hlɔ̌nhlɔ́n; è nɔ wlí yɛ̌yi nú midɛɛ lɛ́, bo ka nɔ dó hɛ̌n mǐdɛɛ lɛ́. 11 Káká jɛ gan élɔ́ mɛ ɔ, xovɛ́ kpo ɖo mǐ sin wɛ bɔ sinnugblá kpo ɖo mǐ sin wɛ, avɔ hán mǐ,* è ɖo mǐ xo wɛ,* mǐ ɖó xɔ ɖo ta ǎ, 12 bɔ mǐ nɔ lɛ́ xo kan, bo nɔ w’azɔ̌ kpó alɔ mǐɖésúnɔ tɔn lɛ́ kpó. È ɖo mǐ zun wɛ ɔ, mǐ nɔ byɔ́ nyɔ̌ná nú mɛ; è ɖo ya dó nú mǐ wɛ ɔ, mǐ nɔ dɛ kpó suúlu kpó; 13 è ɖo ji dó mǐ wɛ ɔ, mǐ nɔ ná xósin kpó gbe fífá kpó;* káká jɛ din ɔ, è nɔ kpɔ́n mǐ dó mɔ zunkɔ́ gbɛ ɔ tɔn, bo nɔ lɛ́ kpɔ́n mǐ dó mɔ nǔ kwíji nǔ bǐ tɔn.

14 Bo ná dó dó winnyá mi wútu wɛ un ɖo nǔ élɔ́ lɛ́ wlán wɛ ǎ, loɔ, bo ná dó ɖe wě xá mi, vǐ vívɛ́ná ce lɛ́ ɖɔhun wú wɛ. 15 Ðó mi sixú ɖó alɔcyɔ́nmɛjítɔ́* 10 000 ɖo Klísu mɛ có, é ɖo wɛn ɖɔ mi kún ɖó tɔ́ gěgé ó; ɖó un ko húzú tɔ́ nú mi ɖo Klísu Jezu mɛ gbɔn wɛn ɖagbe ɔ gblamɛ. 16 Énɛ́ wú ɔ, un ɖo wǔsyɛ́n dó lanmɛ nú mi wɛ ɖɔ mi ní nɔ wa nǔ nyiɖɔhun. 17 Nǔ e wú un ɖo Timɔtée sɛ́ dó mi wɛ é nɛ́, ɖó vǐ vívɛ́ná ce wɛ é nyí ɖo Aklúnɔ mɛ bo lɛ́ ɖo gbejí. É ná flín wlɛnwín e un nɔ zán* ɖo sinsɛnzɔ́ Klísu Jezu tɔn mɛ lɛ́ é mi, wlɛnwín ɖokpó ɔ e un nɔ kplɔ́n mɛ gbɔn fí bǐ ɖo agun lɛ́ bǐ mɛ é.

18 Mɛɖé lɛ́ ɖo mi mɛ bo jɛ go yí jí, cí nǔ ɖɔ un kún ja gɔ̌n mitɔn ó ɖɔhun. 19 Amɔ̌, ényí é jló Jexóva* ɔ, un ná wá gɔ̌n mitɔn ɖo malínmálín mɛ, bo ná mɔ nǔ jɛ hlɔ̌nhlɔ́n e yě mɛ énɛ́ lɛ́ e jɛ go yí jí é ɖó é wú, é nyí bo ná mɔ nǔ jɛ xó yětɔn lɛ́ wú wɛ ǎ. 20 Ðó Axɔ́súɖuto Mawu tɔn nyí xó ɖiɖɔ sín xó ǎ, loɔ, hlɔ̌nhlɔ́n sín xó wɛ. 21 Étɛ́ ka jló mi hú gǎn? Má hɛn kpo wá gɔ̌n mitɔn wɛ a, alǒ má wá kpó wǎnyíyí kpó, kpódó xomɛfífá kpán?