Wěmasɛ́dómɛ Hǎgbɛ́ alixlɛ́mɛtɔ́ ɔ tɔn

Wɛnjlátɔ́ vívɛ́ Axɔ́súɖuto ɔ tɔn:

Dǒ nukún mɛ kpɔ́n ɖɔ a ɖo mɛsɛ́dó e ɖo te ɖo Olívutín só ɔ jí lɛ́ é mɛ. Jezu xwetɔ́n ɖo nukɔn mitɔn. Cóbónú é ná ɖidó jǐxwé ɔ, é ɖɔ: “Mi ná mɔ hlɔ̌nhlɔ́n yí, hwenu e gbigbɔ mímɛ́ ná wá jǐ mitɔn é, bɔ mi ná nyí kúnnuɖetɔ́ ce ɖo Jeluzalɛ́mu, Judée kpó Samalíi kpó, káká yi fí e lín hú gǎn ɖo ayǐkúngban jí é.” (Mɛ. 1:8) Nɛ̌ nǔ ka cí nú we?

Vlafo agbadidó azɔ̌ ɔ tɔn zɔ́n bɔ a mɔ ɖɔ é hú agbɔ̌n émí. A sixú kanbyɔ́ hwiɖée ɖɔ: ‘Nɛ̌ mǐ mɛ ahwanvú kpɛ élɔ́ ka sixú kpé wú bo ɖe kúnnu “káká yi fí e lín hú gǎn ɖo ayǐkúngban jí é” gbɔn?’ A sixú ko flín akpá élɔ́ e Jezu gba nú mɛ ɖo zǎn e jɛ nukɔn nú kú tɔn é mɛ é: “Mɛsɛntɔ́ ɖé nɔ hú gǎn gǎn tɔn ǎ. Nú yě dó ya nú mì ɔ, yě ná dó ya nú mi lɔmɔ̌; ényí yě xwedó xó ce ɔ, yě ná xwedó mi lɔmɔ̌ tɔn. Amɔ̌, yě ná wa nǔ énɛ́ lɛ́ bǐ nú mi ɖó nyǐkɔ ce wútu, ɖó yě tuun Mɛ e sɛ́ mì dó é ǎ.” (Jaan 15:20, 21) Nú a lin tamɛ dó xó énɛ́ lɛ́ jí ɔ, a sixú kanbyɔ́ hwiɖée ɖɔ: ‘Nɛ̌ un ka sixú ɖe kúnnu mlɛ́mlɛ́ ɖo gbeklánxámɛ kpó yadónúmɛ kpó mɔ̌hun nukɔn gbɔn?’

Mǐ lɔ nɔ kan nǔ ɖokpó ɔ lɛ́ byɔ́ mǐɖée ɖo égbé. Azɔ̌ e mǐ mɛ Kúnnuɖetɔ́ Jexóva tɔn lɛ́ ɖó é byɔ́ ɖɔ mǐ ní ɖe kúnnu mlɛ́mlɛ́ “káká yi fí e lín hú gǎn ɖo ayǐkúngban jí é” nú mɛ e “ɖo akɔta lɛ́ bǐ mɛ” é. (Mat. 28:19, 20) Nɛ̌ mǐ ka sixú kpé azɔ̌ énɛ́ wú bo wa, tají ɔ, ɖo gbeklánxámɛ e xó è ɖɔ ɖ’ayǐ é nukɔn gbɔn?

Wěma Mɛsɛ́dó tɔn kpi tan e dɔn mɛ é ɖé dó lěe Jexóva d’alɔ mɛsɛ́dó lɛ́ kpó klisánwun hǎtɔ́ yětɔn lɛ́ kpó, bɔ yě kpé wú bo wa azɔ̌ yětɔn ɖo xwe kanweko nukɔntɔn H.M. tɔn mɛ gbɔn é wú. È sɔ́ nǔ nú wěma élɔ́ e xa wɛ a ɖe din é bónú é ná d’alɔ we nú a ná gbéjé tan énɛ́ kpɔ́n lobo ná lɛ́ ɖu nǔ ɖěɖěe jɛ bo sɔ́ akpakpa mɛ bɔ è wlán d’é mɛ lɛ́ é sín le. Nǔ ɖěɖěe mɛsɛntɔ́ Mawu tɔn xwe kanweko nukɔntɔn ɔ tɔn lɛ́ kpó égbé tɔn lɛ́ kpó ɖó ɖo bǔ lɛ́ é sixú jí wǔ nú we tawun. A ná mɔ ɖɔ nǔ énɛ́ lɛ́ e mǐ ɖó ɖo bǔ lɛ́ é kún kunkplá azɔ̌ e mǐ nɔ wa é kɛ́ɖɛ́ kpowun ó, loɔ, yě lɛ́ kunkplá lěe è bló tuto nú mǐ bɔ mǐ nɔ wa azɔ̌ énɛ́ gbɔn é. É ɖo wɛn ɖɔ tamɛ linlin dó nǔ énɛ́ lɛ́ e mǐ ɖó ɖo bǔ é jí ná ná hlɔ̌nhlɔ́n nǔɖiɖi e a ɖó ɖɔ Jexóva Mawu kpo ɖo ali xlɛ́ tutoblónúnǔ tɔn sín akpáxwé e ɖo ayǐkúngban jí é wɛ é.

Jlǒ mǐtɔn kpó ɖɛ mǐtɔn kpó wɛ nyí ɖɔ wěma Mɛsɛ́dó tɔn gbígbéjé kpɔ́n ní ná hlɔ̌nhlɔ́n jiɖe e a ɖó ɖɔ Jexóva ná d’alɔ we, bɔ gbigbɔ mímɛ́ tɔn agbɔ̌nnɔ ɔ lɔ ná nɔ gǔdo nú we é. Énɛ́ ní bo dó wǔsyɛ́n lanmɛ nú we bónú a ní kpo ɖo ‘kúnnu ɖe dó Axɔ́súɖuto Mawu tɔn wú’ wɛ bo kpo ɖo alɔ dó mɛ ɖěvo lɛ́ wɛ bónú yě ná wlí hwlɛngán sín ali ɔ.—Mɛ. 28:23; 1 Tim. 4:16.