É Nɔ Gbeji Ðò Mɛtɛnkpɔn lɛ Mɛ

1, 2. Etɛ ɖó nukún wɛ Piyɛ́ɛ ka sixu ko ɖè hwenu e Jezu ɖò xó ɖɔ wɛ ɖò Kapɛnawumu é? Amɔ̌, etɛ ka jɛ?

PIYƐ́Ɛ kpɔ́n mɛ ɖěɖee lɛlɛ̌ dó Jezu bo ɖò tó ɖó é wɛ lɛ é nukúnmɛ kpo nǔkpacamɛ kpo. Kplɔ́ngbasá Jwifu lɛ tɔn wɛ ye ɖè ɖò Kapɛnawumu. Toxo enɛ mɛ wɛ Piyɛ́ɛ nɔ nɔ, bo nɔ wà hwehuhuzɔ́ tɔn ɖò Galilée Xù sín totaligbé finɛ; xɔ́ntɔn tɔn lɛ, hɛnnumɔ tɔn lɛ kpo mɛ e kpo é kpo nɔ hu hwe lɛ é kpo gègě nɔ nɔ finɛ. Piyɛ́ɛ ɖò nukún ɖó wɛ ɖɔ Kapɛnawumunu lɛ lɔmɔ̌ na ɖi nǔ ɖɔ Jezu wɛ nyí Mɛsiya ɔ, lobo na hun xomɛ ɖesu ɖɔ nùkplɔnmɛtɔ́ ɖaxó hugǎn ɔ ni kplɔ́n nú emi dó Axɔsuɖuto Mawu Tɔn wu. Nùɖé ka sɔ́ nyí mɔ̌ gbè enɛ gbè ǎ.

² Ye mɛ gègě sɔ́ ɖò tó ɖó Jezu wɛ ǎ. Mɛɖé lɛ ɖò nǔhlunɖɔ d’aga wɛ, bo gbɛ́ ɖɔ wɛn Jezu tɔn kún ɖó jiɖe ó. Amɔ̌, nǔ e ɖó linkpɔ́n nú Piyɛ́ɛ hugǎn é wɛ nyí lee ahwanvu Jezu ɖesunɔ tɔn ɖé lɛ wà nǔ gbɔn é. Xomɛ ɖebǔ sɔ́ hun ye dó nugbǒ yɔyɔ̌ ɖěɖee kplɔ́n ye wɛ Jezu ɖè lɛ é wu ǎ. Akpɔ̀ ɖó ye bɔ ye tlɛ lɛ́ sìn xomɛ. Ye mɛ ɖé lɛ gbɔ bo ɖɔ ɖɔ nǔ e ɖɔ wɛ Jezu ɖè lɛ é syɛn dódó. Ðó ye ma sɔ́ jló na ɖótó Jezu ǎ wutu ɔ, ye tɔ́n sín kplɔ́ngbasá ɔ, lobo sɔ́ nɔ xwedó Jezu ɖě ǎ.—Xà Jaan 6:60, 66.

 3. Etɛ nùɖiɖi Piyɛ́ɛ tɔn ka d’alɔ ɛ bɔ é wà azɔn gègě?

³ Hwenu vɛwǔ ɖé wɛ nyí hwenu enɛ nú Piyɛ́ɛ kpo mɛsɛ́dó gbɛ̌ tɔn lɛ kpo. É mɔ nukúnnú jɛ nǔ e ɖɔ wɛ Jezu ɖè gbè nɛ gbè é mɛ ganji ǎ. Enyi è jó xó e ɖɔ wɛ Jezu ɖè é dó nyì mɔ̌ kpowun ɔ, xó syɛnsyɛn ɖé jɛn è sixu dó mɔ. Etɛ Piyɛ́ɛ ka na wà? Azɔn nukɔntɔn ɔ nɛ nǔ lɛ tɛ́n gbeji e é ɖè nǔ Gǎn tɔn é kpɔ́n nɛ ǎ; é ka na lɛ́ nyí azɔn gudo tɔn ɔ ǎ. Mi nú mǐ ni kpɔ́n lee nùɖiɖi Piyɛ́ɛ tɔn d’alɔ ɛ bɔ é nɔ gbeji ɖò wuvɛ̌ enɛ lɛ mɛ gbɔn é.

4, 5. Etɛ lɛ mɛ lɛ ma ka ɖ’ayi tɔn ǎ bɔ Jezu wà bo lɛ́ ɖɔ?

⁴ Nǔ e Jezu nɔ ɖɔ lɛ é kpo nǔ e é nɔ wà lɛ é kpo nɔ kpaca Piyɛ́ɛ hwɛhwɛ. Hweɖelɛnu ɔ, nǔ e mɛ lɛ ma ɖ’ayi tɔn ǎ é wɛ Gǎn tɔn nɔ wà bo nɔ lɛ́ ɖɔ. Azǎn e jɛ nukɔn nú gbè nɛ gbè é jí ɔ, Jezu ko bló nùjiwǔ bo na nùɖuɖu gbɛtɔ́ afatɔ́n donu mɔkpan. É sín enɛ wu bɔ mɛ lɛ jló na sɔ́ ɛ axɔsu. Amɔ̌, nǔ e é wà é kpaca mɛ gègě, é wɛ nyí ɖɔ é bú sín tɛntin yetɔn bo ɖɔ nú ahwanvu tɔn lɛ ɖɔ ye ni byɔ tɔjihun ɖé mɛ bo kun ɖido Kapɛnawumu. Hwenu e ahwanvu lɛ ɖò yiyi wɛ ɖò tɔ̀ ɔ jí é ɔ, Jezu lɛ́ wà nǔ ɖevo bɔ é kpaca ye: É ɖi zɔnlin gbɔn Galilée Xù e ɖò adǎn jí é jí, lobo gbɔn mɔ̌ mɛ kplɔ́n nǔ taji ɖé Piyɛ́ɛ dó nùɖiɖi wu.

⁵ É sù zǎnzǎn é ɔ, ye ɖ’ayi wu ɖɔ mɛ lɛ dó tɔjihun bo wá mɔ ye. Amɔ̌, mɛ lɛ jló ɖɔ Jezu ni na nùɖuɖu ye gbɔn nùjiwǔ gblamɛ wutu wɛ ye wá mɔ ɛ, é nyí nùkplɔnmɛ tɔn lɛ wɛ mya nukún nú ye ǎ. Jezu gbɛ́ nǔ nú ye, ɖó nǔ agbaza tɔn e nɔ mya nukún nú ye mɔ̌ lɛ é wu. (Jaan 6:25-27) Jezu lɛ́ wá ɖɔ xó xá ye dó nǔ enɛ jí ɖò kplɔ́ngbasá ɔ ɖò Kapɛnawumu. Finɛ ɔ, Jezu lɛ́ kplɔ́n nugbǒ titewungbe ɖé ye bɔ mɛ lɛ mɔ ɖɔ é syɛn dódó.

 6. Nùjlɛdonǔwu tɛ Jezu ka na? Nɛ̌ tóɖóétɔ́ lɛ ka wà nǔ gbɔn?

⁶ Jezu ba ɖɔ mɛ lɛ ni nɔ tɔ́n nùɖuɖu gbé kpowun bo nɔ wá gɔ̌n emitɔn ǎ. É ba ɖɔ ye ni mɔ nukúnnú jɛ wu ɖɔ cobonu Mawu na na ye gbɛ̀ mavɔmavɔ ɔ, ye ɖó na ɖi nǔ nú vɔsisa emitɔn bo lɛ́ xwedó kpɔ́ndéwú emitɔn. Enɛ wu ɔ, é na kpɔ́ndéwú ɖé ye bo sɔ́ éɖée jlɛ́ dó wɔxúxú e jɛte sín jixwé Mɔyizi hwenu bɔ è nɔ ylɔ ɖɔ mana é wu. Hwenu e mɛɖé lɛ ma yí xó enɛ ǎ é ɔ, é zán nùjlɛdonǔwu gbɛɖe gbɛɖe ɖé, bo tinmɛ ɖɔ cobonu ye na mɔ gbɛ̀ ɔ, ye ɖó na ɖu agbaza emitɔn bo nu hun emitɔn. Finɛ wɛ xó ɔ jɛ bɔ xomɛ lɛ́ sìn ye tawun. Ye mɛ ɖé lɛ ɖɔ: “Xó elɔ syɛn dódó; mɛ̌ ka sixu yí gbè nú xó enɛ ɔ?” Jezu ɖesunɔ sín ahwanvu gègě tlɛ lɛkɔ sín gudo tɔn ɖó xó enɛ wu.a—Jaan 6:48-60, 66.

7, 8. (a) Nǔ ɖětɛ wu Piyɛ́ɛ ma ka ko mɔ nukúnnú jɛ dó Jezu wu ǎ? (b) Xósin tɛ Piyɛ́ɛ ka na nú nǔ e Jezu kanbyɔ mɛsɛ́dó lɛ é?

⁷ Etɛ Piyɛ́ɛ ka na wà? Xó e Jezu ɖɔ é ɖó na ko hu ado nú é lɔmɔ̌. É mɔ nǔ jɛ wu hwenɛnu ɖɔ Jezu ɖó na kú bonu jlǒ Mawu tɔn na dó nyí wiwa ǎ. Piyɛ́ɛ ka gbɔ bo lɛkɔ sín Jezu gudo ahwanvu ɖěɖee wà mɔ̌ gbè nɛ gbè lɛ é ɖɔhun wɛ à? Eǒ; Piyɛ́ɛ ɖó jijɔ taji ɖé b’ɛ zɔ́n bɔ nǔwiwa tɔn gbɔn vo nú mɛ enɛ lɛ tɔn.

⁸ Jezu lilɛ kpannukɔn mɛsɛ́dó tɔn lɛ bo ɖɔ: “Mi lɔmɔ̌ mi jló na yì à?” (Jaan 6:67) Ye mɛ 12 lɛ wɛ é kàn nǔ byɔ, amɔ̌, Piyɛ́ɛ wɛ kɛnu. Mɔ̌ jɛn é ka ko nɔ bló gbɔn hwɛhwɛ. É sixu ko nyí ɖɔ éyɛ wɛ wà ɖaxó ye bǐ. Ðebǔ wɛ é na bo nyí gbɔn ɔ, é wɛ nɔ yawu ɖɔ nǔ e ɖò ayi tɔn mɛ é ɖò ye mɛ; é yá bonu Piyɛ́ɛ xò nǔ kpɔ́n dó nǔ e ɖò ayi tɔn mɛ é ɖiɖɔ wu ǎ. Ðò ninɔmɛ elɔ mɛ ɔ, nǔ e ɖò ayi tɔn mɛ é wɛ nyí xó manawɔn ɖagbeɖagbe elɔ lɛ: “Aklunɔ! Mɛ̌ gɔ́n mǐ ka na lɛ́ yì? É ma nyí nu towe mɛ wɛ è nɔ sè xó e nɔ na gbɛ̀ mavɔmavɔ mɛ ɔ ɖè à cé?”—Jaan 6:68.

 9. Nɛ̌ Piyɛ́ɛ ka nɔ gbeji nú Jezu gbɔn?

⁹ Xó enɛ lɛ e Piyɛ́ɛ ɖɔ é byɔ ayi mɛ nú we à cé? Nùɖiɖi e é ɖó nú Jezu é d’alɔ ɛ bɔ é ɖó jijɔ taji ɖé, é wɛ nyí gbejininɔ. Piyɛ́ɛ mɔ vaàn ɖɔ Jezu wɛ nyí Mɛhwlɛngantɔ́ ɖokpo géé e Jehovah na é, bo lɛ́ mɔ ɖɔ nǔ e Jezu nɔ kplɔ́n mɛ dó Axɔsuɖuto Mawu Tɔn wu lɛ é gblamɛ wɛ é nɔ hwlɛn mɛ gbɔn. Piyɛ́ɛ tuùn ɖɔ enyi emi na bo ma tlɛ mɔ nukúnnú jɛ nùɖé lɛ wu ǎ ɔ, fí ɖevo ɖebǔ kún ɖè bonu emi na yì bo mɔ fɛ́nú Mawu tɔn kpo gbɛ̀ mavɔmavɔ kpo ó.

10. Nɛ̌ mǐ ka sixu nɔ gbeji Piyɛ́ɛ ɖɔhun gbɔn égbé?

¹⁰ Hwi lɔ ka nɔ ɖó linlin enɛ e Piyɛ́ɛ ɖó é à? É blawu ɖɔ mɛ gègě ɖò gbè ɔ mɛ égbé bo ɖɔ ɖɔ emi yí wǎn nú Jezu, loɔ, ye ka nɔ nɔ gbeji n’i ǎ. Bo na dó nɔ gbeji nú Jezu ɔ, mǐ ɖó na yí wǎn nú nùkplɔnmɛ tɔn lɛ Piyɛ́ɛ ɖɔhun. Mǐ ɖó na kplɔ́n ye, bo mɔ nukúnnú jɛ ye mɛ, lobo zán gbɛ̀ sɔgbe xá ye, enyi mǐ na bo ma tlɛ tuùn doyidoslɔ́ yetɔn ǎ alǒ ye na bo ma tlɛ jɛji nú mǐ ǎ ɔ nɛ. Gbeji jɛn mǐ na nɔ cobo sixu ɖó nukún gbɛ̀ mavɔmavɔ e Jezu ba nú mǐ é.—Xà Ðɛhan 97:10.

11. Fitɛ Jezu ka kplá ahwanvu tɔn lɛ xwè?

¹¹ Nǔ enɛ jɛ b’ɛ na nɔ zaan é ɔ, Jezu kplá mɛsɛ́dó tɔn lɛ kpo ahwanvu ɖé lɛ kpo bɔ ye wlí ali ɖido totaligbé. Hweɖelɛnu ɔ, è nɔ ɖò Galilée Xù ɔ tó cobo ka nɔ mɔ sìngǒ e cyɔn Ɛmɔ́ɔ Só bo ɖò kaka totaligbé nú Akpádídó Yikúngban ɔ é sɛ́dó. Gletoxo ɖěɖee sɛkpɔ Sezalée ɖò Filipu lɛ é mɛ wɛ Jezu kpo ahwanvu tɔn lɛ kpo xwè bo ko ɖò sisɛkpɔ Ɛmɔ́ɔ Só ɔ wɛ. Ye hɛn dìn ɔ, ye na mɔ fí gègě sɛ́dó ɖò tofɔligbé Akpádídó Yikúngban ɔ tɔn; finɛ wɛ Jezu kàn nǔ taji ɖé byɔ ahwanvu tɔn lɛ ɖè.

12, 13. (a) Etɛwu Jezu ka jló na tuùn mɛ e é nyí bɔ mɛ lɛ nɔ lin é? (b) Nɛ̌ Piyɛ́ɛ ka ɖè nùɖiɖi nugbǒ ɔ xlɛ́ ɖò xó e é ɖɔ nú Jezu é mɛ gbɔn?

¹² Jezu kanbyɔ ahwanvu tɔn lɛ kpo xomɛnyínyɔ́ kpo ɖɔ: “Mɛ̌ un ka nyí bɔ mɛ lɛ nɔ ɖɔ?” Mɛ e é nyí bɔ mɛ lɛ nɔ lin é ba na tuùn wɛ é ɖè. Ahwanvu Jezu tɔn lɛ na nùkanbyɔ ɔ sín sìn, bo vɔ́ nǔ agɔ e mɛ gègě nɔ lin dó mɛ alɔkpa e é nyí é wu é ɖɔ. Jezu ka ko mɔ nǔ e ba wɛ é ɖè é bǐ ǎ. Ahwanvu tɔn e sɛkpɔ ɛ hugǎn lɛ é lɔmɔ̌ ɖó linlin agɔ ɖokpo ɔ lɛ wɛ à? É kanbyɔ ye ɖɔ: “Midɛɛ lɛ ló, mɛ̌ un ka nyí bɔ mi nɔ ɖɔ?”—Luk. 9:18-20.

¹³ Piyɛ́ɛ ko lɛ́ yawu kɛnu. É ɖɔ nǔ e lin wɛ ye mɛ gègě ɖè d’ayi mɛ é nyì wɛn kpo jiɖiɖe kpo. “Hwi wɛ nyí Klisu Mawu gbɛɖe ɔ sín Vǐ,” wɛ é ɖɔ. Jezu na ko ko nǔ ɖò nu kpá dó yí gbè nú xósin Piyɛ́ɛ tɔn hwenu e é ɖò kpikpa ɛ wɛ kpo akpàkpà sɔ́ mɛ kpo é. Jezu flín Piyɛ́ɛ ɖɔ Jehovah Mawu wɛ ɖè nugbǒ taji enɛ xlɛ́ mɛ ɖěɖee ɖó nùɖiɖi nugbǒ nugbǒ lɛ é, lé é kún nyí gbɛtɔ́ ɖebǔ ó. Piyɛ́ɛ mɔ nukúnnú jɛ nugbǒ taji hugǎn ɖěɖee Jehovah ko ɖexlɛ́ lɛ é ɖokpo mɛ, é wɛ nyí mɛ e na wá nyí Mɛsiya alǒ Klisu e sín akpá è dó sín tɛgbɛ é!—Xà Matie 16:16, 17.

14. Azɔ̌ taji tɛ lɛ Jezu ka fɔ d’alɔ mɛ nú Piyɛ́ɛ?

¹⁴ Klisu enɛ wɛ nyí mɛ e nǔɖɔɖ’ayǐ xóxó ɖé ylɔ ɖɔ awinnya e xɔmɛtɔ́ lɛ na xò nyì kɛ́n é. (Ðɛh. 118:22; Luk. 20:17) Nǔɖɔɖ’ayǐ enɛ dó gesí wɛ Jezu ɖè bo ɖɔ ɖɔ Jehovah na dó agun ɖé dò ɖó awinnya enɛ jí, bɔ Piyɛ́ɛ mɔ ɖɔ Klisu wɛ nyí awinnya enɛ. Enɛ gudo ɔ, é fɔ azɔ̌ titewungbe ɖé lɛ dó alɔ mɛ nú Piyɛ́ɛ ɖò agun ɔ mɛ. É nyí tɛn ɖé mɛ wɛ é sɔ́ Piyɛ́ɛ ɖó bonu é hugǎn mɛsɛ́dó ɖě lɛ tɔn lee sinsɛn ɖé lɛ kplɔ́n mɛ gbɔn é ǎ. “Axɔsuɖuɖu [jixwé] tɔn sín cavi lɛ” wɛ é fɔ n’i. (Mat. 16:19) Piyɛ́ɛ wɛ è jɔwu bɔ é na hun Axɔsuɖuto Mawu Tɔn mɛ byɔbyɔ sín ali nú gbɛtɔ́ hǔnmɛ atɔn; ye mɛ nukɔntɔn lɛ wɛ nyí Jwifu lɛ, bɔ d’ewu ɔ Samalíinu lɛ, lobɔ Kosi lɛ alǒ mɛ e ma nyí Jwifu ǎ lɛ é wá sú ta na.

15. Aniwu Piyɛ́ɛ ka gbɛ́ nǔ nú Jezu? Xó tɛ lɛ é ka ɖɔ dó gbɛ́ nǔ ɔ n’i?

¹⁵ Jezu wá ɖɔ ɖò nukɔn mɛ ɖɔ mɛ e è na nǔ gègě lɛ é ɔ, è na ɖó nǔ gègě nukún ɖò ye sí. Piyɛ́ɛ lɔ ɖò mɛ enɛ lɛ mɛ. (Luk. 12:48) Jezu lɛ́ ɖè nugbǒ taji ɖevo lɛ xlɛ́ dó Mɛsiya ɔ wu, kaka jɛ ya kpo kú kpo e ɖò te kpɔ́n ɛ ɖò Jeluzalɛmu é jí. Xó enɛ lɛ e Piyɛ́ɛ sè é hu ado n’i, lobɔ é kplá Jezu jɛ vo bo gbɛ́ nǔ n’i ɖɔ: “Mawu ma lɔn ó Aklunɔ; nǔ mɔhunkɔtɔn na jɛ dó jǐ we gbeɖé ǎ.”—Mat. 16:21, 22.

16. Nɛ̌ Jezu ka jla linlin Piyɛ́ɛ tɔn ɖó gbɔn? Nǔ taji tɛ xógbe Jezu tɔn lɛ ka sixu kplɔ́n mǐ bǐ?

¹⁶ Piyɛ́ɛ lin ɖɔ ɖagbe Jezu tɔn ɖɔ wɛ emi ɖè, enɛ wu ɔ, gbè e Jezu yí n’i é ɖó na ko kpaca ɛ. Jezu huzu kpannukɔn Piyɛ́ɛ, bo kpɔ́n ahwanvu e kpò lɛ é (ye lɔ sixu ko ɖò nǔ ɖokpo ɔ lin wɛ) bo ɖɔ: “Bǔ dó mì Satáan! Mɛdɔndónǔnyanyamɛtɔ́ wɛ nú we; ɖó linlin towe sɔgbe xá jlǒ Mawu tɔn ǎ; gbɛtɔ́ sín linlin wɛ a ɖó.” (Mat. 16:23; Mak. 8:32, 33) Mǐ bǐ wɛ xógbe Jezu tɔn enɛ lɛ kplɔ́n nǔ taji ɖé. Enyi è ma nyɔ́ bló ǎ ɔ, blewun jɛn è na lɔn bɔ gbɛtɔ́ sín linlin na yí ta sín linlin Mawu tɔn sí. Enyi mǐ bló mɔ̌ ɔ, mǐ na ɖò ɖiɖɔ wɛ ɖɔ mǐ ɖò alɔ dó mɛɖé wɛ bɔ é ka na nyí ɖɔ jlǒ Satáan tɔn wiwa kɔn sísɛ́ ɛ dó wɛ mǐ ko ɖè. Amɔ̌, nɛ̌ Piyɛ́ɛ ka wà nǔ gbɔn?

17. Etɛ ka nyí tinmɛ “bǔ dó mì” e Jezu ɖɔ nú Piyɛ́ɛ é tɔn?

¹⁷ Piyɛ́ɛ ɖó na ko mɔ ɖɔ é kún nyí ɖiɖɔ wɛ Jezu ɖè ɖɔ emi nyí Satáan Awovi ó. É nyí mɛsɛ́dó enɛ e ɖó jijɔ ɖagbe gègě bɔ Jezu ɖ’ayi wu é gbɛ́ wɛ é ɖè ǎ, loɔ, linlin tɔn e ma sɔgbe ǎ é jla ɖó wɛ é ɖè kpowun ɖò ninɔmɛ enɛ mɛ. Piyɛ́ɛ ɖó na gbɔ afɔklɛ́nnú nyí nú Jezu bo ɖó na nɔ gudo tɔn.

18. Nɛ̌ Piyɛ́ɛ ka xlɛ́ ɖɔ emi ɖò gbeji gbɔn? Nɛ̌ mǐ ka sixu xwedó kpɔ́ndéwú tɔn gbɔn?

¹⁸ Piyɛ́ɛ ka tɛ́ hwɛ xá Jezu, sìn xomɛ, alǒ nyla nukúnmɛ wɛ à? Eǒ; é sɔ́ éɖée hwe, bo yí gbè nú linlin tɔn e è jla ɖó é. Mɔ̌ mɛ ɔ, é lɛ́ ɖè gbejininɔ xlɛ́. Mɛ e ɖò afɔdomɛ Klisu tɔn xwedó wɛ lɛ é bǐ wɛ na ɖó hudo nǔgbɛnúmɛ tɔn hweɖelɛnu. Cobonu mǐ na kpó ɖò vìvɛ́ xá Jezu Klisu kpo Tɔ́ tɔn Jehovah kpo wɛ bɔ nùɖiɖi mǐtɔn na ɖò dǒ li wɛ ɔ, mǐ ɖó na nɔ sɔ́ mǐɖée hwe hwenu e è kplɔ́n nǔ alǒ gbɛ́ nǔ nú mǐ é.—Xà Nùnywɛxó 19:20.

19. Xó e è ma ɖ’ayi tɔn ǎ é ɖevo tɛ Jezu ka ɖɔ? Etɛ Piyɛ́ɛ ka sixu ko kanbyɔ éɖée?

¹⁹ É na nɔ zaan é ɔ, Jezu lɛ́ ɖɔ xó e è ma ɖ’ayi tɔn ǎ é ɖevo. É ɖɔ: “Ma ɖɔ nugbǒ nú mi: mɛɖé lɛ ɖò mi mɛ fí dìn, bo na ko kú cobo na mɔ nyɛ Gbɛtɔ́ví ɔ wá ɖu axɔsu ɖò gbɛtɔ́ lɛ nu ǎ.” (Mat. 16:28) É ɖò gaàn ɖɔ tinmɛ xógbe enɛ lɛ tɔn tuùntuùn na ko ɖu ayi mɛ nú Piyɛ́ɛ. Etɛ ɖɔ wɛ Jezu na ko ɖè? Bɔya Piyɛ́ɛ sixu ko kanbyɔ éɖée ɖɔ wǔjɔmɛ bunɔ mɔhun enɛ lɛ ka na zɛ ali gbɔn jɛ emitɔn jí à jí, ɖó zaanɖé dìn jɛn Jezu gbɛ́ nǔ n’i syɛnsyɛn.

20, 21. (a) Tinmɛ nǔ e Piyɛ́ɛ mɔ é. (b) Nɛ̌ xó e mɛ e wá tɔ́n ɖò Jezu kpá lɛ é ɖɔ xá ɛ é ka d’alɔ Piyɛ́ɛ b’ɛ jla linlin tɔn ɖó gbɛn?

²⁰ Aklunɔzán gblamɛ ɖokpo mɔ̌ gudo ɔ, Jezu kplá Jaki, Jaan kpo Piyɛ́ɛ kpo bɔ ye yì “só ɖaxó ɖé” jí. Vlafo Ɛmɔ́ɔ Só ɔ na ko wɛ, ɖó é sɔ́ lín dó finɛ dín ǎ. É cí ɖɔ zǎnmɛ wɛ ɖɔhun, ɖó amlɔ ko ɖò ya dó nú ye mɛ atɔn e Jezu kplá lɛ é wɛ. Amɔ̌, ee Jezu ɖò ɖɛ xò wɛ é ɔ, nùɖé jɛ bɔ amlɔ hɔ́n nú ye bǐ.—Mat. 17:1; Luk. 9:28, 29, 32.

²¹ Jezu jɛ huzuhuzu jí ɖò nukɔn yetɔn. Nukúnmɛ tɔn jɛ kínkɔ́n jí, kaka bo wá hɔ́n bǐ hwe ɖɔhun. Awu e é dó é lɔ huzu wewé tété bo nɔ kɔ́n. Enɛ gudo ɔ, mɛ wè wá tɔ́n ɖò Jezu kpá, mɛ ɖokpo nɔte nú Mɔyizi bɔ mɛ ɖě ɔ nɔte nú Elíi. Ye ɖɔ xó xá ɛ dó “lee é na gosin gbɛmɛ fí gbɔn ɖò Jeluzalɛmu ɔ wu.” Kú tɔn kpo fínfɔ́n sín kú tɔn kpo sín xó ɖɔ wɛ ye ɖè. Piyɛ́ɛ mɔ dìn ɖɔ linlin e emi ɖó ɖɔ Jezu kún na jiya bo kú ó é kún sɔgbe ó!—Luk. 9:30, 31.

22, 23. (a) Nɛ̌ Piyɛ́ɛ ka ɖexlɛ́ ɖɔ emi nɔ nyɔ́ xomɛ bɔ akpàkpà nɔ sɔ́ emi gbɔn? (b) Ajɔ ɖevo tɛ Piyɛ́ɛ, Jaki kpo Jaan kpo ka lɛ́ mɔ zǎn enɛ mɛ?

²² Piyɛ́ɛ mɔ ɖɔ emi ɖó na ɖ’alɔ ɖò nǔmimɔ jiwǔ enɛ mɛ, bɔya bo lɛ́ bló bonu é ni ma fó ɖó finɛ ó. É cí nǔ ɖɔ Mɔyizi kpo Elíi kpo ɖò na yì wɛ. Enɛ wu ɔ, Piyɛ́ɛ ɖɔ: “Mɛ̌si, fí e mǐ wá dìn ɔ nyɔ́ mɛ! Mǐ na gbá goxɔ atɔn: towe ɖokpo, Mɔyizi tɔn ɖokpo, Elíi tɔn ɖokpo.” É ɖò gaàn ɖɔ Jehovah sɛntɔ́ wè enɛ lɛ e ko kú b’ɛ lín é kún ɖó hudo goxɔ tɔn ó. Piyɛ́ɛ lin tamɛ kpɔ́n ganji cobo ɖɔ xó ǎ. É ɖò mɔ̌ có, a yí wǎn nú nya enɛ, ɖó xomɛnyínyɔ́ tɔn kpo akpàkpà e nɔ sɔ́ ɛ é kpo wu à cé?—Luk. 9:33.

²³ Piyɛ́ɛ, Jaki kpo Jaan kpo lɛ́vɔ mɔ ajɔ ɖevo zǎn enɛ mɛ. Akpɔ́kpɔ́ ɖé wá cyɔn ye jí ɖò só ɔ jí, lobɔ gbè ɖé ɖi sín mɛ. Jehovah Mawu sín gbè wɛ! É ɖɔ: “Mɛ elɔ ɔ, [Vǐ] ce e un sɔ́ é wɛ; mi ɖótó é.” Nǔmimɔ ɔ fó ɖó finɛ bɔ é wá kpò ye kpo Jezu kpo kɛɖɛ ɖò só ɔ jí.—Luk. 9:34-36.

24. (a) Lè tɛ nǔmimɔ enɛ ka hɛn wá nú Piyɛ́ɛ? (b) Nɛ̌ é ka sixu ɖó lè nú mǐ lɔ gbɔn ɖò égbé?

²⁴ Wǔjɔmɛ ɖaxó ɖé wɛ nǔ enɛ e Piyɛ́ɛ mɔ é nyí n’i, mɔ̌ jɛn é ka nyí nú mǐ lɔ! È jɔwu Piyɛ́ɛ zǎn enɛ mɛ b’ɛ mɔ Jezu sɛ́dó ɖi Axɔsu susunɔ jixwé tɔn ɖé, lobɔ é lɛ́ ɖò mɛ ɖěɖee “mɔ susu ɖaxó e é ɖó ɔ kpo nukún [ye]ɖesunɔ tɔn kpo” é mɛ. Xwè mɔkpan gudo ɔ, Piyɛ́ɛ ɖɔ xó dó wǔ enɛ e è jɔ ɛ é wu. Nǔmimɔ enɛ tɛɖɛ̌ nǔɖɔɖ’ayǐ e ɖò Xó Mawu Tɔn mɛ é gègě jí, lobo hɛn nùɖiɖi Piyɛ́ɛ tɔn lidǒ bɔ é dó sixu dɛ ɖò mɛtɛnkpɔn ɖevo lɛ nu ɖò sɔgudo. (Xà 2 Piyɛ́ɛ 1:16-19.) Enyi mǐ nɔ gbeji nú Gǎn e Jehovah sɔ́ ɖó mǐ nu é, kplɔ́n nǔ dó wǔ tɔn, yí gbè nú nǔgbɛnúmɛ tɔn, lobo sɔ́ mǐɖée hwe bo xwedó kpɔ́ndéwú tɔn hwebǐnu ɔ, nùɖiɖi mǐ lɔ tɔn na lidǒ Piyɛ́ɛ ɖɔhun bɔ mǐ na ɖu nyɔna Axɔsuɖuto ɔ tɔn lɛ sín vivǐ.