NǓKPLƆNKPLƆN 19
Kúnnuɖetɔ́ Jehovah Tɔn lɛ Wɛ Nyí Klisanwun Nǔgbo lɛ À?
Mǐ mɛ Kúnnuɖetɔ́ Jehovah tɔn lɛ ɖi nǔ ɖɔ mǐ nyí Klisanwun nǔgbo lɛ. Etɛwu? Mǐ ni ɖɔ xó dó nǔ e jí nǔ e mǐ ɖi nǔ na lɛ é jinjɔn é, nyikɔ e ɖè mǐ ɖó vo é, kpo lee mǐ nɔ ɖè wanyiyi xlɛ́ mǐɖée lɛ gbɔn é kpo jí.
1. Etɛ jí Kúnnuɖetɔ́ Jehovah tɔn lɛ ka nɔ sɔ́ nǔ e ye ɖi nǔ na lɛ é jinjɔn?
Jezu ɖɔ: “Xó [Mawu tɔn] nyí nǔgbo.” (Jaan 17:17) Jezu ɖɔhun ɔ, Kúnnuɖetɔ́ Jehovah tɔn lɛ nɔ sɔ́ nǔ e ye ɖi nǔ na lɛ é jinjɔn Xó Mawu tɔn jí hwebǐnu. Ði kpɔ́ndéwú ɔ, mǐ ni kpɔ́n lee mǐ wà mɔ̌ gbɔn ɖò hwenuxó mǐtɔn égbé tɔn sín bǐbɛ̌ é. Ðò xwè kanweko 19gɔ́ ɔ sín vivɔnu ɔ, Biblu kplɔntɔ́ lɛ sín gbɛ̌ta ɖé jɛ Biblu ɔ gbéjé kpɔ́n jí dó nǔjɔnǔ mɛ. Ye sɔ́ nǔ e ye ɖi nǔ na lɛ é jinjɔn nǔ e Biblu ɔ ɖɔ é jí, nú é tlɛ nyí ɖɔ nǔ enɛ lɛ e ye ɖi nǔ na é gbɔn vo nú nǔkplɔnmɛ sinsɛn tɔn lɛ ɔ nɛ. Enɛ gudo ɔ, ye jɛ nǔgbo Biblu tɔn enɛ lɛ má xá mɛ ɖevo lɛ jí.a
2. Etɛwu mǐ ka nɔ ylɔ́ mǐɖée ɖɔ Kúnnuɖetɔ́ Jehovah tɔn lɛ?
Jehovah nɔ ylɔ́ mɛ e nɔ sɛn ɛ lɛ é ɖɔ kúnnuɖetɔ́ tɔn lɛ, ɖó ye nɔ ɖɔ nǔgbo ɔ dó wǔtu tɔn. (Eblée lɛ 11:4–12:1) Ði kpɔ́ndéwú ɔ, Mawu ɖɔ nú togun tɔn ɖò hwexónu ɖɔ: “Midɛɛ lɛ wɛ nyí kúnnuɖetɔ́ ce.” (Xà Ezayíi 43:10.) È ylɔ́ Jezu ɖɔ “kúnnuɖetɔ́ gbejinɔtɔ́.” (Nǔɖexlɛ́mɛ 1:4, 5) Enɛ wu ɔ, ɖò 1931 ɔ, mǐ sɔ́ nyikɔ Kúnnuɖetɔ́ Jehovah tɔn lɛ ɔ. Mǐ nɔ gó ɖɔ nyikɔ enɛ ɖò ta nú mǐ.
3. Nɛ̌ Kúnnuɖetɔ́ Jehovah tɔn lɛ ka nɔ yí wǎn nú mɛ Jezu ɖɔhun gbɔn?
Jezu yí wǎn nú ahwanvu tɔn lɛ sɔmɔ̌ bɔ ye cí xwédo ɖé ɖɔhun n’i. (Xà Maki 3:35.) Mɔ̌ ɖokpo ɔ, Kúnnuɖetɔ́ Jehovah tɔn lɛ nyí xwédo e ɖò bǔ é ɖé gbɔn gbɛ̀ ɔ bǐ mɛ. Enɛ wu wɛ mǐ nɔ ylɔ́ mǐɖée lɛ ɖɔ nɔví sunnu kpo nɔví nyɔnu kpo. (Filemɔ́ɔ 1, 2) Mǐ nɔ lɛ́ setónú nú gbeɖiɖe elɔ: “Mi yí wǎn nú nɔví mitɔn ɖò nǔɖiɖi mɛ lɛ.” (1 Piyɛ́ɛ 2:17) Kúnnuɖetɔ́ Jehovah tɔn lɛ nɔ ɖè wanyiyi enɛ xlɛ́ ɖò ali gegě nu. Ali e nu mǐ nɔ wà mɔ̌ ɖè é dokpo wɛ nyí ɖɔ mǐ nɔ d’alɔ nǔɖitɔ́ hatɔ́ mǐtɔn e gbɔn gbɛ̀ ɔ bǐ mɛ lɛ é, hwenu e ye ɖò hudo mɛ é.
BA DÒ NÚ NǓ D’EJI
Kplɔ́n nǔ dó hwenuxó Kúnnuɖetɔ́ Jehovah tɔn lɛ tɔn wu d’eji, bo lɛ́ kpɔ́n kúnnuɖenú ɖevo e xlɛ́ ɖɔ mǐ nyí Klisanwun nǔgbo lɛ é.
Klisanwun nǔgbo lɛ nɔ sɔ́ nǔ e ye ɖi nǔ na lɛ é jinjɔn Biblu jí, bo nɔ lɛ́ má nǔ enɛ lɛ xá mɛ ɖevo lɛ
4. Nǔ e mǐ ɖi nǔ na lɛ é jinjɔn Biblu jí
Jehovah ɖɔ ɖ’ayǐ ɖɔ ɖò azǎn gudogudo tɔn lɛ mɛ ɔ, è na mɔ nukúnnú jɛ nǔgbo Biblu tɔn mɛ vaan. Xà Daniyɛli 12:4, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:
Nú togun Mawu tɔn kpò ɖò Biblu ɔ gbéjé kpɔ́n wɛ ɔ, etɛ ka “na jɛji” ɖò tɛntin yetɔn?
Kpɔ́n lee gbɛ̌ta Biblu kplɔntɔ́ lɛ tɔn e mɛ Charles Russell ɖè é kplɔ́n Xó Mawu tɔn gbɔn é. Xò VIDEO ɔ, enɛ gudo hǔn, mi ɖɔ xó ɖó kpɔ́ dó nǔkanbyɔ e bɔ d’ewu é jí.
Ðò video ɔ mɛ ɔ, nɛ̌ Charles Russell kpo Biblu kplɔntɔ́ gbɛ̌ tɔn lɛ kpo ka kplɔ́n Biblu ɔ gbɔn?
A ka tuùn à?
Hweɖelɛnu ɔ, mǐ jlá nǔ e mǐ ɖi nǔ na é ɖé lɛ ɖó. Etɛwu? Hwesivɔ sín tíntɔ́n nɔ kɔ́n sɛ̀ sín ayikúngban ɖé jí kpɛɖé kpɛɖé. Mɔ̌ ɖokpo ɔ, Mawu nɔ bló bɔ è nɔ mɔ nukúnnú jɛ Xó tɔn mɛ kpɛɖé kpɛɖé. (Xà Nǔnywɛxó 4:18.) Enɛ wu ɔ, Biblu ɔ ɖyɔ ǎ có, nú nukúnnúmɔjɛnǔmɛ e mǐ ɖó d’ewu é ɖò te kpɔ́n d’eji wɛ ɔ, mǐ nɔ jlá nǔ e mǐ ɖi nǔ na lɛ é ɖó.
5. Mǐ nɔ zán gbɛ̀ sɔgbe xá nyikɔ e ɖò ta nú mǐ é
Etɛwu mǐ ka sɔ́ nyikɔ Kúnnuɖetɔ́ Jehovah tɔn lɛ ɔ? Xò VIDEO ɔ, enɛ gudo hǔn, mi ɖɔ xó ɖó kpɔ́ dó nǔkanbyɔ e bɔ d’ewu é jí.
Etɛwu nyikɔ Kúnnuɖetɔ́ Jehovah tɔn lɛ ɔ ka sɔgbe?
Etɛwu Jehovah ka sɔ́ togun ɖé bɔ ye na nyí kúnnuɖetɔ́ tɔn? Ðó ye na ɖexlɛ́ ɖɔ é wɛ nyí Mawu nǔgbo ɔ, ɖó adingban gegě wɛ è ko ɖó dó kɔ tɔn. Mǐ ni ɖɔ xó dó adingban enɛ lɛ we kpowun wu.
Sinsɛn ɖé lɛ́ nɔ kplɔ́n sinsɛnví yetɔn lɛ ɖɔ Mawu ba ɖɔ ye ni nɔ zán ɖiɖe lɛ dó sɛn emi. Amɔ̌, xà Levíi ví lɛ 26:1, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:
Etɛ ka nyí nǔgbo ɔ? Etɛ Jehovah ka nɔ lin dó bocyɔ lɛ wu?
Sinsɛngán ɖé lɛ nɔ kplɔ́n mɛ ɖɔ Jezu nyí Mawu. Amɔ̌, xà Jaan 20:17, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:
Etɛ ka nyí nǔgbo ɔ? Mawu kpo Jezu kpo nyí mɛ ɖokpo ɔ wɛ à?
Nɛ̌ nǔ ka nɔ cí nú we dó tuùn e a tuùn ɖɔ Jehovah sɛ́ Kúnnuɖetɔ́ tɔn lɛ dó bonu ye na jlá nǔgbo ɔ dó é kpo Vǐ tɔn kpo wu é wu?
6. Mǐ nɔ yí wǎn nú mǐɖée Lɛ
Biblu ɖɔ ɖɔ Klisanwun lɛ ɖó na nɔ bǔ lee wǔjɔnú agbaza tɔn lɛ ɖò bǔ gbɔn é. Xà 1 Kɔlɛntinu lɛ 12:25, 26, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:
Nɛ̌ Klisanwun nǔgbo lɛ ka ɖó na wà nǔ gbɔn hwenu e Klisanwun ɖevo lɛ ɖò wuvɛ̌ mɛ é?
Etɛ wu a ka ɖ’ayi dó wanyiyi e ɖò Kúnnuɖetɔ́ Jehovah tɔn lɛ tɛntin é wu?
Nú Kúnnuɖetɔ́ Jehovah tɔn lɛ ɖò wuvɛ̌ mɛ ɖò akpá gbɛ̀ ɔ tɔn ɖé xwé ɔ, Kúnnuɖetɔ́ gbɛ̌ yetɔn e gbɔn gbɛ̀ ɔ bǐ mɛ lɛ é nɔ yawǔ d’alɔ. Nú a na mɔ kpɔ́ndéwú ɖokpo hǔn, xò VIDEO ɔ. Enɛ gudo hǔn, mi ɖɔ xó ɖó kpɔ́ dó nǔkanbyɔ e bɔ d’ewu é jí.
Nɛ̌ sɔhɛnmɛzɔ́ e Kúnnuɖetɔ́ Jehovah tɔn lɛ wà lɛ é ka ɖè wanyiyi yetɔn xlɛ́ gbɔn?
Klisanwun nǔgbo lɛ nɔ ɖè wanyiyi xlɛ́ mɛ e ɖò hudo mɛ lɛ é
MƐÐÉ LƐ ÐƆ: “Sinsɛn yɔyɔ̌ ɖé kpowun wɛ Kúnnuɖetɔ́ Jehovah tɔn lɛ nyí.”
Sín hwetɛnu Jehovah ka nɔ ylɔ́ mɛ e nɔ sɛn ɛ lɛ é ɖɔ kúnnuɖetɔ́ tɔn lɛ?
ETƐ LƐ A KA KPLƆ́N?
Klisanwun nǔgbo lɛ wɛ Kúnnuɖetɔ́ Jehovah tɔn lɛ nyí. Xwédo Mawusɛntɔ́ lɛ tɔn ɖé wɛ mǐ nyí gbɔn gbɛ̀ ɔ bǐ mɛ, nǔ e mǐ ɖi nǔ na lɛ é jinjɔn Biblu jí, bɔ mǐ nɔ jlá nǔgbo ɔ dó Jehovah wu.
Vɔ̌gbɔnji
Etɛwu mǐ ka sɔ́ nyikɔ Kúnnuɖetɔ́ Jehovah tɔn lɛ ɔ?
Nɛ̌ mǐ ka nɔ wà nǔ xá mǐɖée lɛ gbɔn?
A ka lin ɖɔ Klisanwun nǔgbo lɛ wɛ Kúnnuɖetɔ́ Jehovah tɔn lɛ nyí à?
KÍJÉ
Kplɔ́n nǔ dó hwenuxó mǐtɔn wu d’eji.
Kúnnuɖetɔ́ Jehovah Tɔn Lɛ: Wà Nǔ kpo Nǔɖiɖi Kpo, Akpáxwé 1: Ablu Mɛ Tíntɔ́n Sín (1:00:53)
Kpɔ́n lee Kúnnuɖetɔ́ Jehovah tɔn lɛ ko kɔ́n sɛ̀ sín adingban-núkplɔnmɛ lɛ jí gbɔn é sín kpɔ́ndéwú ɖokpo.
Mɔ xósin nú nǔkanbyɔ e a sixu ko ɖó dó Kúnnuɖetɔ́ Jehovah tɔn lɛ wu lɛ é.
“Nǔ E Mɛ lɛ Nɔ Yawǔ Kanbyɔ Dó Kúnnuɖetɔ́ Jehovah Tɔn lɛ Wu É” (akpáxwé Ɛntɛnɛti jí tɔn)
Stephen gbɛ́ wǎn nú mɛ e ma nyí akɔ tɔn ǎ lɛ é sɔmɔ̌ bo tɔ́n ahwan ye. Ba dò nú nǔ e é mɔ ɖò Kúnnuɖetɔ́ Jehovah tɔn lɛ tɛntin, bɔ enɛ sísɛ́ ɛ lobɔ é ɖyɔ é.
“Gbɛ̀ Ce Ðò Nylanylá D’eji Wɛ” (Atɔxwɛ [Gungbe] 1er juillet 2015)
a Xójlawema mǐtɔn taji ɔ, Atɔxwɛ, nɔ ɖè nǔgbo Biblu tɔn lɛ tɔ́n sín 1879.