Nɛ̌ Jehovah ka Nɔ Cyɔn Alɔ Jǐ We Gbɔn?

 1. Etɛwu Jezu ka byɔ Jehovah ɖɔ é ni hwlɛn ahwanvu emitɔn lɛ?

ÐÒ ZǍN e jɛ nukɔn nú kú Jezu tɔn é mɛ ɔ, é ɖò tamɛ lin dó wuvɛ̌ ɖěɖee ahwanvu tɔn lɛ na mɔ lɛ é jí wɛ. Ðó Jezu yí wǎn nú ahwanvu tɔn lɛ wutu ɔ, é byɔ Tɔ́ tɔn ɖɔ é ni “hwlɛn ye ɖò awoví sí.” (Jaan 17:14, 15) Jezu tuùn ɖɔ enyi emi lɛkɔ yì jixwé ɔ, Satáan Awoví na kpò ɖò za li xá mɛ ɖebǔ e ba na sɛn Jehovah é wɛ. É ɖò wɛn ɖɔ mɛsɛntɔ́ Jehovah tɔn lɛ na ɖó hudo alɔcyɔnmɛji tɔn.

 2. Etɛwu mǐ ka sixu kúdeji ɖɔ Jehovah na na sinkɔn nú ɖɛ mǐtɔn lɛ?

² Jehovah na sinkɔn nú ɖɛ e Jezu xò é ɖó wǎn e É yí nú Vǐ Tɔn é wutu. Enyi mǐ dó gǎn e wu mǐ kpé é bǐ bonu nǔ mǐtɔn nyɔ́ Jehovah nukúnmɛ ɔ, é na yí wǎn nú mǐ lɔ, bo na na sinkɔn nú ɖɛ e mǐ nɔ xò dó byɔ alɔdó kpo alɔcyɔnmɛji kpo lɛ é. Lee nǔ xwédo ɖé tɔn nɔ ɖu ayi mɛ nú Tatɔ́ xwédo tɔn ɖé gbɔn é ɔ, Jehovah na kpò ɖò nukún kpé dó vǐ tɔn lɛ wu wɛ kpo wanyiyi kpo. Nyikɔ tɔn, alǒ mɛ alɔkpa e é nyí é wɛ ɖò atɛ jí.

 3. Etɛwu mǐ ka ɖó hudo alɔcyɔnmɛji Jehovah tɔn tɔn égbé?

³ Mǐ ɖó hudo alɔcyɔnmɛji Jehovah tɔn tɔn dìn, hú ɖ’ayǐ tɔn. È ko nya Satáan sín jixwé, bɔ é ɖò “xomɛsin ɖaxó” ɖé jí. (Nǔɖe. 12:12) É ko bló bɔ mɛɖé lɛ lin ɖɔ enyi emi ɖò ya dó nú mǐ wɛ hǔn, “Mawu sín azɔ̌ wà wɛ emi ɖè.” (Jaan 16:2) Mɛ ɖevo e ma ɖi nǔ nú Mawu ǎ lɛ é nɔ dóya nú mǐ, ɖó mǐ nɔ wà nǔ mɛ e ɖò gbɛ̀ ɔ mɛ lɛ é ɖɔhun ǎ. Ye na bo tlɛ nɔ dóya nú mǐ gbɔn ɖebǔ ɔ, xɛsi nɔ ɖi mǐ ǎ. Etɛwu? Ðó Mawuxó ɔ ɖɔ: “Aklunɔ ɔ, gbejinɔtɔ́ wɛ; é na na hlɔnhlɔn mi, bo na cyɔn alɔ mi jí, bɔ awoví na kpé mi wu ǎ.” (2 Tɛ. 3:3) Nɛ̌ Jehovah ka nɔ cyɔn alɔ mǐ jí gbɔn? Mǐ ni ɖɔ xó dó nǔ e é na mǐ é we jí.

 4. Sɔgbe xá Efɛzinu lɛ 6:13-17 ɔ, etɛ Jehovah ka na mǐ b’ɛ na cyɔn alɔ mǐ jí?

⁴ Jehovah na mǐ ahwanfunnú ɖé lɛ, bɔ ye sixu d’alɔ mǐ ɖò ahwantɔ́nmɛ Satáan tɔn lɛ nukɔn. (Xà Efɛzinu lɛ 6:13-17.) Ahwanfunnú agbɔ̌nnɔ lɛ wɛ Mawu na mǐ, bɔ ye nɔ lɛ́ w’azɔ̌ tawun. Amɔ̌, enyi mǐ ba ɖɔ ahwanfunnú enɛ lɛ ni cyɔn alɔ mǐ jí ɔ, mǐ ɖó na zán ye mɛ ɖokpo ɖokpo. Etɛ ahwanfunnú lɛ ɖokpo ɖokpo ka nɔte na? Mǐ ni ɖɔ xó dó ye mɛ ɖokpo ɖokpo wu.

 5. Etɛ ka nyí gǒjiblanú nǔgbo ɔ tɔn? Etɛwu mǐ ka ɖó na sin?

⁵ Gǒjiblanú nǔgbo ɔ tɔn nɔte nú nǔgbo ɖěɖee ɖò Xó Mawu tɔn Biblu ɔ mɛ lɛ é. Etɛwu mǐ ka ɖó na sin gǒjiblanú enɛ? Ðó Satáan wɛ nyí “adingbannɔ lɛ sín tɔ́.” (Jaan 8:44) É ko ɖò adingban te sín xwè afatɔ́n mɔ̌kpan ɖíe, bo ko “flú gbɛ̀ ɔ bǐ.” (Nǔɖe. 12:9) Nǔgbo e ɖò Biblu mɛ lɛ é nɔ cyɔn alɔ mǐ jí, bo nɔ zɔ́n bɔ è nɔ flú mǐ ǎ. Nɛ̌ mǐ ka nɔ sin gǒjiblanú nǔjlɛdonǔwu tɔn enɛ gbɔn? Mǐ nɔ wà mɔ̌ gbɔn nǔ elɔ lɛ wiwa gblamɛ: nǔkplɔnkplɔn dó nǔgbo e kúnkplá Jehovah lɛ é wu, sɛn e mǐ nɔ sɛn ɛ ‘gbɔn hlɔnhlɔn gbigbɔ ɔ tɔn mɛ, bo nɔ sɛn ɛ ɖò nǔgbo mɛ é,’ kpo nǔgbo e mǐ nɔ ɖɔ ɖò nǔ bǐ mɛ é kpo.—Jaan 4:24; Efɛ. 4:25; Ebl. 13:18.

 6. Etɛ ka nyí ganwu hwɛjijɔ tɔn? Etɛwu mǐ ka ɖó na sɔ́ dó?

⁶ Ganwu hwɛjijɔ tɔn nɔte nú nǔgbododó jlɔjlɔ Jehovah tɔn lɛ. Etɛwu mǐ ka ɖó na sɔ́ ganwu ɔ sɔ́ dó? Lee ganwu ɖé nɔ cyɔn alɔ ayi sɔja ɖé tɔn jí gbɔn é ɔ, ganwu hwɛjijɔ tɔn ɔ nɔ cyɔn alɔ mǐ jí bonu nǔ nyanya ɖěɖee ɖò gbɛ̀ ɔ mɛ lɛ é má wá wà nǔ dó mǐ wu ó. (Nǔx. 4:23) Jehovah nɔ ɖó nukún ɖɔ mǐ ni yí wǎn nú emi, bo lɛ́ sɛn emi kpo ayi mǐtɔn bǐ kpo. (Mat. 22:36, 37) Amɔ̌, Satáan nɔ tɛ́n kpɔ́n bo na bló bɔ mǐ na gɔn Jehovah sɛn kpo ayi mǐtɔn bǐ kpo, gbɔn blobló bonu mǐ na yí wǎn nú nǔ ɖěɖee Jehovah gbɛ́ wǎn na, bɔ ye ɖò gbɛ̀ ɔ mɛ lɛ é gblamɛ. (Ja. 4:4; 1 Jaan 2:15, 16) Enyi wlɛnwín enɛ ma w’azɔ̌ ǎ ɔ, é nɔ tɛ́n kpɔ́n bo na dó jɔngwín jɔngwín nú mǐ bonu mǐ na wà nǔ ɖěɖee ma sɔgbe xá nǔgbododó Jehovah tɔn ǎ lɛ é.

 7. Nɛ̌ mǐ ka nɔ dó ganwu hwɛjijɔ tɔn ɔ gbɔn?

⁷ Enyi mǐ nɔ yí gbè nú nǔgbododó Jehovah tɔn e kúnkplá nǔ ɖagbe kpo nǔ nyanya kpo lɛ é, bo nɔ lɛ́ zán gbɛ̀ sɔgbe xá ye ɔ, ganwu hwɛjijɔ tɔn ɔ wɛ mǐ dó mɔ̌ nɛ. (Ðɛh. 97:10) Mɛɖé lɛ sixu lin ɖɔ nǔgbododó Jehovah tɔn lɛ nɔ ɖó dogbó nú mɛɖesúsíninɔ mǐtɔn. Amɔ̌, enyi mǐ ma nɔ zán gbɛ̀ sɔgbe xá nǔgbododó Biblu tɔn lɛ ǎ ɔ, mǐ na cí sɔja e ahwan wá dó ahwan bǐ, bɔ é ɖè ganwu tɔn hɛn bo ɖɔ é kpɛn dín é ɖɔhun. Xlonɔnú ɖaxó wɛ enɛ na nyí! Mɛ ɖěɖee yí wǎn nú Jehovah lɛ é nɔ mɔ ɖɔ ‘sɛ́n tɔn lɛ kún vɛ́ nyi ó,’ gbɛ̀ wɛ é nɔ nyí nú mɛ.—1 Jaan 5:3.

 8. Etɛ ka nyí tinmɛ wɛnɖagbe ɔ jlájlá ni nyí afɔkpa ɖò afɔ nú mǐ tɔn?

⁸ Pɔlu dó wusyɛn lanmɛ nú mǐ ɖɔ wɛnɖagbe e nɔ na fífá mɛ ɔ jlájlá ni nyí afɔkpa ɖò afɔ nú mǐ. Ðò xógbe ɖevo mɛ ɔ, mǐ ɖó na ɖò gbesisɔmɛ hwebǐnu bo na nɔ jlá wɛnɖagbe Axɔ́suɖuto ɔ tɔn. Enyi mǐ má nǔgbo e ɖò Biblu mɛ lɛ é xá mɛ ɖevo lɛ ɔ, é nɔ na hlɔnhlɔn nǔɖiɖi mǐtɔn. Lee togun Jehovah tɔn e gbɔn gbɛ̀ ɔ bǐ mɛ é nɔ zán ali e hun n’i é dó jlá wɛnɖagbe ɔ gbɔn é nɔ dó wusyɛn lanmɛ nú mɛ tawun. Ði kpɔ́ndéwú ɔ, ye nɔ ɖekúnnu ɖò azɔ̌ jí, ɖò wemaxɔmɛ, sín xwé ɖé gbè jɛ xwé ɖé gbè, ɖò ajɔ̌watɛn lɛ, hwenu e ye yì axi xwlé gbé é, hwenu e ye yì ba hɛ̌nnumɔ yetɔn e ma nyí nǔɖitɔ́ ǎ lɛ é kpɔ́n é, alǒ ye nɔ ɖɔ xó nú mɛ ɖěɖee ye tuùn lɛ é. Enyi xɛsi zɔ́n bɔ mǐ gɔn wɛnɖagbe ɔ jlá ɔ, mǐ na cí sɔja e ɖè afɔkpa tɔn lɛ ɖò ahwangbenu é ɖé ɖɔhun; blewun jɛn é na gblewǔ d’afɔ. É na vɛwǔ n’i ɖɔ é ni jɛhun dó éɖée jí, bo ka sɔ́ na kpéwú bo wà nǔ sɔgbe xá gbè e gǎn tɔn ɖè é ǎ.

 9. Etɛwu é ka byɔ ɖɔ mǐ ni hɛn gǎglónú nǔɖiɖi tɔn mǐtɔn?

⁹ Gǎglónú nǔɖiɖi tɔn ɔ nɔte nú nǔ e mǐ ɖi nú Jehovah é. Mǐ ɖi nǔ ɖɔ é na ɖè akpá tɔn lɛ bǐ. Nǔɖiɖi enɛ na d’alɔ mǐ bɔ mǐ na “xò gǎ myɔnɔ e kɛntɔ́ na da dó [mǐ] ɔ cí.” Etɛwu mǐ ka ɖó na hɛn gǎglónú enɛ? É nɔ cyɔn alɔ mǐ jí bonu nǔkplɔnmɛ gǔfɔndómawujitɔ́ lɛ tɔn ni ma wá wà nǔ dó mǐ wu, alǒ xó e mɔ ɖɔ dó mǐ wu wɛ mɛ lɛ ɖè é ni ma wá kú awakanmɛ nú mǐ ó. Nǔɖiɖi mɛvo ɔ, mǐ na ɖó hlɔnhlɔn e sín hudo mǐ ɖó bo na setónú nú Jehovah, hwenu e mɛ ɖevo lɛ na gbidí kɔ nú mǐ ɖɔ mǐ ni tlitó n’i é ǎ. Ðò alɔ ɖevo mɛ ɔ, hweɖebǔnu e mǐ jɛhun dó nǔɖiɖi mǐtɔn jí ɖò azɔ̌ jí, alǒ ɖò wemaxɔmɛ ɔ, gǎglónú mǐtɔn zán wɛ mǐ ɖè mɔ̌ nɛ. (1 Pi. 3:15) Hweɖebǔnu e mǐ gbɛ́ azɔ̌ e kpé kwɛ, bo na wà nǔ dó aca gbigbɔ tɔn mǐtɔn lɛ wu é ɖé é ɔ, gǎglónú mǐtɔn zán wɛ mǐ ɖè mɔ̌ nɛ. (Ebl. 13:5, 6) Gɔ́ na ɔ, enyi gbeklánxámɛ lɛ ɖò finɛ có mǐ ka ɖò Jehovah sɛn wɛ hǔn, gǎglónú mǐtɔn wɛ ɖò alɔ cyɔn mǐ jí wɛ mɔ̌ nɛ.—1 Tɛ. 2:2.

10. Etɛ ka nyí gangbákún hwlɛngán tɔn? Etɛwu mǐ ka ɖó na sɔ́ cyɔn?

¹⁰ Gangbákún hwlɛngán tɔn wɛ nyí nukúnɖiɖó e Jehovah na mǐ é; enɛ wɛ nyí hwlɛn e na hwlɛn mǐ wɛ é ɖè sín kú sí é. Mɛ ɖěɖee wà jlǒ tɔn lɛ é bǐ wɛ é na na ajɔ enɛ. (1 Tɛ. 5:8; 1 Tim. 4:10; Ti. 1:1, 2) Lee gangbákún ɖé nɔ cyɔn alɔ sɔja ɖé sín ta jí gbɔn é ɔ, mɔ̌ wɛ nukúnɖiɖó hwlɛngán tɔn mǐtɔn nɔ cyɔn alɔ nǔwukpíkpé tamɛ linlin tɔn mǐtɔn jí gbɔn. Ðò ali tɛ nu? Nukúnɖiɖó enɛ nɔ d’alɔ mǐ, bɔ mǐ nɔ zé ayi ɖó akpá e Mawu dó nú mǐ lɛ é jí, enɛ nɔ d’alɔ mǐ bɔ ado nɔ hu mǐ dín ɖó wuvɛ̌ mǐtɔn lɛ wu ǎ. Nɛ̌ mǐ ka nɔ cyɔn gangbákún enɛ gbɔn? Enyi lee mǐ nɔ lin nǔ gbɔn é nɔ sɔgbe xá lee Mawu nɔ lin nǔ gbɔn é hǔn, gangbákún enɛ sɔ́ cyɔn wɛ mǐ ɖè mɔ̌ nɛ. Ði kpɔ́ndéwú ɔ, nukúnɖiɖó mǐtɔn jinjɔn dɔkun ma ɖó jiɖe lɛ jí ǎ, loɔ, Mawu jí wɛ é jinjɔn.—Ðɛh. 26:2; 104:34; 1 Tim. 6:17.

11. Etɛ ka nyí hwǐ gbigbɔ ɔ tɔn? Nɛ̌ mǐ ka ɖó na zán gbɔn?

¹¹ Hwǐ gbigbɔ ɔ tɔn wɛ nyí Xó Mawu tɔn Biblu ɔ. Hwǐ enɛ ɖó hlɔnhlɔn, bo nɔ ɖu ɖò awakanmɛkúmɛ alɔkpa lɛ bǐ jí, lobo ɖè gbɛtɔ́ lɛ sín adingban-núkplɔnmɛ kpo nǔwalɔ blíblí lɛ kpo kannu. (2 Kɔ. 10:4, 5; 2 Tim. 3:16, 17; Ebl. 4:12) Nǔkplɔnkplɔn mɛɖesunɔ tɔn kpo azɔ̌ e tutoblonunu Mawu tɔn nɔ kplɔ́n mǐ é kpo nɔ zɔ́n bɔ mǐ nɔ nyɔ́ hwǐ enɛ zán ganji. (2 Tim. 2:15) Gɔ́ nú ahwanfunnú enɛ lɛ e Jehovah nɔ na mǐ é ɔ, é nɔ lɛ́ na mǐ nǔ e na cyɔn alɔ mǐ jí é agbɔ̌nnɔ ɖevo. Etɛ ka wɛ?

12. Nǔ ɖevo tɛ sín hudo mǐ ka ɖó? Etɛwu?

¹² Sɔja e ko mɔ nǔ kpɔ́n é ɖé tuùn ɖɔ emi kún sixu kpé ahwan xá ahwankpá ɖaxó ɖé emiɖokpo b’ɛ na kpa emi ó, é ɖó hudo alɔdó ahwanfuntɔ́ gbɛ̌ tɔn lɛ tɔn. Mɔ̌ ɖokpo ɔ, mǐɖokpo sixu gbí dɔn ɖò Satáan kpo ahwan tɔn lɛ kpo nukɔn b’ɛ na kpa mǐ ǎ, mǐ ɖó hudo alɔdó nɔví sunnu kpo nɔví nyɔnu kpo mǐtɔn lɛ tɔn. Jehovah bló bɔ ‘nɔví ɖò nǔɖiɖi mɛ mǐtɔn lɛ’ ɖò finɛ, bo na d’alɔ mǐ.—1 Pi. 2:17.

13. Sɔgbe xá Eblée lɛ 10:24, 25 ɔ, ɖagbe tɛ kplé lɛ ka nɔ wà nú mǐ?

¹³ Kplé lɛ yiyi nyí ali e nu mǐ nɔ gbɔn, bo nɔ mɔ alɔdó é ɖokpo. (Xà Eblée lɛ 10:24, 25.) Mǐ bǐ wɛ awakanmɛ nɔ wá kú hweɖelɛnu, enyi nǔ ka nyí mɔ̌ ɔ, kplé lɛ sixu dó wusyɛn lanmɛ nú mǐ. Xósin e nɔví mǐtɔn lɛ nɔ na kpo ayi bǐ kpo lɛ é nɔ dó wusyɛn lanmɛ nú mǐ. Xóɖiɖɔ jinjɔn Biblu jí lɛ kpo nǔxwlémɛ sín kpɔ́ndéwú e nɔ dín lɛ é kpo nɔ na hlɔnhlɔn mǐ bɔ mǐ nɔ kpò ɖò Jehovah sɛn wɛ. Xó e mǐ nɔ ɖɔ ɖó kpɔ́ xá nɔví mǐtɔn lɛ ɖò bǐbɛ̌mɛ kpo vivɔnu kplé lɛ tɔn kpo lɛ é nɔ dó wusyɛn lanmɛ nú mǐ. (1 Tɛ. 5:14) Gɔ́ na ɔ, kplé lɛ nɔ hun ali nú mǐ, bɔ mǐ nɔ mɔ awǎjijɛ e alɔdidó mɛ ɖevo lɛ nɔ hɛn wà lɛ é. (Mɛ. 20:35; Hlɔ. 1:11, 12) Kplé mǐtɔn lɛ nɔ lɛ́ d’alɔ mǐ ɖò ali ɖevo lɛ nu. Ye nɔ bló bɔ Mawuxóɖiɖɔzɔ́ ɔ kpo mɛkplɔnkplɔnzɔ́ ɔ kpo nɔ lɛ́ bí alɔ nú mǐ d’eji. Ði kpɔ́ndéwú ɔ, mǐ nɔ kplɔ́n lee mǐ nɔ zán azɔ̌wanú e ɖò Azɔ̌wanúgbá Mɛkplɔnkplɔn tɔn mǐtɔn mɛ lɛ é ganji gbɔn é. Enɛ wu ɔ, nɔ sɔnǔ nú kplé lɛ ganji. Nɔ tɛ́tó ganji ɖò kplé lɛ hwenu. Kplé lɛ fó hǔn, nɔ zán nǔ e a kplɔ́n lɛ é. Nú a nɔ wà nǔ enɛ lɛ ɔ, a na huzu “ahwanfuntɔ́ ɖagbe Klisu Jezu tɔn.”—2 Tim. 2:3.

14. Alɔdó ɖevo tɛ ka tíìn nú mǐ?

¹⁴ Wɛnsagun hlɔnhlɔnnɔ wɔ̌bliwɔ̌va lɛ wɛ nɔ lɛ́ nɔ gudo nú mǐ. Dǒ nukún nǔ e wɛnsagun ɖokpo kpowun sixu wà é mɛ kpɔ́n! (Eza. 37:36) Dìn ɔ, bo wá yì dó nukún nǔ e ahwankpá hlɔnhlɔnnɔ wɛnsagun lɛ tɔn ɖé sixu wà é mɛ kpɔ́n lo! Gbɛtɔ́ ɖě, alǒ awoví lɛ ɖě sixu kpé ahwan xá ahwankpá hlɔnhlɔnnɔ Jehovah tɔn, bo ɖuɖ’eji ǎ. Enyi kɛntɔ́ mǐtɔn lɛ na bo lɛ sukpɔ́ gbɔn ɖebǔ, bonu Jehovah ɖò ahwan mǐtɔn mɛ ɔ, mǐ nɔ hugǎn ye jɛn wɛ. (Hwɛ. 6:16) Enɛ ɖò wɛn! Hɛn nǔ enɛ lɛ d’ayi mɛ hwenu e azɔ̌gbɛ́ ɖé, wemaxɔmɛvígbɛ́ ɖé, alǒ hɛ̌nnumɔ e nyí nǔmaɖitɔ́ é ɖé ɖɔ alǒ wà nǔ e na kú awakanmɛ nú we é ɖé é. Flín ɖɔ é kún nyí hwiɖokpo wɛ ɖò ahwan ɔ fun wɛ ó. Alixlɛ́mɛ Jehovah tɔn lɛ xwédo wɛ a ɖè, enɛ wu ɔ, É ɖò gudo nú we.

15. Sɔgbe xá Ezayíi 54:15, 17 ɔ, etɛwu è ma ka na xwè nu togun Jehovah tɔn tɔn dó xɔ gbeɖé ǎ?

¹⁵ Gbɛ̀ ɔ e ɖò Satáan sín acɛ glɔ́ é ɖó hwɛjijɔ gegě bo na gbɛ́ wǎn nú mǐ. Mǐ nɔ ɖó nu ɖò toxóɖiɖɔ mɛ alǒ ɖ’alɔ ɖò ahwan mɛ ɖò ali ɖebǔ nu ǎ. Mǐ nɔ jlá nyikɔ Mawu tɔn, bo nɔ ɖɔ ɖɔ Axɔ́suɖuto tɔn kɛɖɛ jɛn na bló bɔ fífá na tíìn. Mǐ nɔ lɛ́ setónú nú nǔgbododó jlɔjlɔ tɔn lɛ. Mǐ nɔ ɖexlɛ́ mɛ lɛ ɖɔ adingbannɔ kpo mɛhutɔ́ kpo wɛ nú gǎn gbɛ̀ ɔ tɔn. (Jaan 8:44) Mǐ nɔ lɛ́ jlá ɖɔ è na sú kún dó nú gbɛ̀ Satáan tɔn ɖò malin-malin mɛ. É ɖò mɔ̌ có, Satáan kpo ahwan tɔn lɛ kpo na xwè nu mǐtɔn dó xɔ gbeɖé ǎ. É nyɔ́ wà ɔ, mǐ na kpò ɖò susu kpa nú Jehovah wɛ, bo na nɔ zán ali e hun nú mǐ lɛ é bǐ dó wà mɔ̌. Satáan ɖ’agbɔ̌n tawun có, é ka ko kpéwú bo sú ali dó wɛn Axɔ́suɖuto ɔ tɔn e ɖò kan vun wɛ gbɔn gbɛ̀ ɔ bǐ mɛ é ǎ. Nǔ ɖokpo e wu nǔ nyí mɔ̌ é wɛ nyí ɖɔ Jehovah ɖò xɛ nya ɖò mǐ jí wɛ.—Xà Ezayíi 54:15, 17.

16. Nɛ̌ Jehovah ka na hwlɛn togun tɔn ɖò ya ɖaxó ɔ hwenu gbɔn?

¹⁶ Etɛ ka ɖò nukɔn ja? Ðò ya ɖaxó ɔ hwenu ɔ, Jehovah na hwlɛn mǐ ɖò ali jiwǔ we nu. Nukɔntɔn ɔ, é na hwlɛn mɛsɛntɔ́ tɔn gbejinɔtɔ́ lɛ hwenu e é na zé dó ayi mɛ nú axɔ́su e ɖò ayikúngban jí lɛ é, bɔ ye na sú kún dó nú Babilɔnu Ðaxó ɔ, ee nyí kplékplé sinsɛn nǔvú lɛ tɔn é. (Nǔɖe. 17:16-18; 18:2, 4) Enɛ gudo ɔ, hwenu e é na sú kún dó nú akpáxwé gbɛ̀ Satáan tɔn tɔn e kpò é ɖò Haamagedɔni é ɔ, é na hwlɛn togun tɔn.—Nǔɖe. 7:9, 10; 16:14, 16.

17. Enyi mǐ kpò ɖò vivɛ̌ kpo Jehovah kpo wɛ ɔ, nɛ̌ mǐ ka sixu ɖu lè tɔn gbɔn?

¹⁷ Enyi mǐ kpò ɖò vivɛ̌ kpo Jehovah kpo wɛ jɛn wɛ ɔ, Satáan sixu wà nǔ ɖebǔ nǔ mǐ, bɔ é na wà nǔ dó mǐ wu kaka sɔyi ǎ. Nǔgbo ɔ, kún tɔn wɛ è na sú dó kaka sɔyi. (Hlɔ. 16:20) Enɛ wu ɔ, fɔ ahwanfunnú lɛ bǐ kplá, bo nɔ zán ye. Hwiɖokponɔ ni ma tɛ́n kpɔ́n bo na fun ahwan xá Satáan kpo gbɛ̀ tɔn kpo ó. Nɔ gudo nú nɔví sunnu kpo nɔví nyɔnu kpo towe lɛ. Gɔ́ na ɔ, nɔ xwedó alixlɛ́mɛ Jehovah tɔn lɛ. Enyi a nɔ wà mɔ̌ ɔ, a sixu kúdeji ɖɔ Tɔ́ wanyiyinɔ towe jixwé tɔn ɔ na na we hlɔnhlɔn, bo na lɛ́ cyɔn alɔ jǐ towe.—Eza. 41:10.