NǓ E MƐ WÍNNYÁWÍNNYÁ LƐ́ NƆ KANBYƆ́ LƐ́ É
Nɛ̌ Biblu ka sixú d’alɔ mì gbɔn?: Akpáxwé 3: Ðu Biblu xixa towe sín le hú gǎn
Nú a kpɔ́n Biblu mɛ ɔ, nǔwlánwlán gěgé wɛ a ná mɔ. Ma nú énɛ́ gba hǔn dó nú we ó! É nyɔ́ wa ɔ, ɖɔ nú hwiɖée ɖɔ Biblu ɔ cí axi e mɛ nǔɖuɖu tɛnmɛ tɛnmɛ lɛ́ ɖe é ɖé ɖɔhun. A sixú ɖu nǔɖuɖu e a ná mɔ ɖo axi ɔ mɛ lɛ́ é bǐ ǎ. Amɔ̌, a sixú cyán ɖěɖěe a ná ɖu b’ɛ ná jɛmɛ nú we lɛ́ é.
Bónú a ná ɖu Biblu xixa towe sín le mlɛ́mlɛ́ ɔ, é byɔ́ ɖɔ a ní sɔ́ ayi towe bǐ ɖó nǔ e xa wɛ a ɖe é jí. Xóta élɔ́ ná d’alɔ we bɔ a ná wa mɔ̌.
Ðo xóta élɔ́ mɛ ɔ, mǐ ná ɖɔ xó dó nǔ élɔ́ lɛ́ jí:
Étɛ́wú a ka ɖó ná nɔ sɔ́ ayi towe bǐ ɖó nǔ e xa wɛ a ɖe ɖo Biblu mɛ é jí?
Lě do a nɔ dó gǎn ɖo Biblu xixa towe kɔn sɔ é ɔ, mɔ̌ do wɛ a ná mɔ le ɖ’é mɛ sɔ. Kpɔ́ndéwú ɖé ɖíe: Nú a sɔ́ tíima dó sin zozo mɛ nú hwenu kléwún ɖé kpowun ɔ, kpɛɖé jɛ́n é ná jó d’é mɛ. Amɔ̌, nú a sɔ́ d’é mɛ bo ná ɛ hwenu ɔ, é ná jó d’é mɛ ganjí.
Nǔ ɖokpó ɔ wɛ Biblu xixa nyí. Ma nɔ nɔ hwlɛndó jí ɖo Biblu xixa towe hwenu ó, é nyɔ́ wa ɔ, nɔ zán hwenu dó lin tamɛ dó nǔ e xa wɛ a ɖe é jí. Nǔ e Ðɛhan 119gɔ́ wlántɔ́ ɔ wa é nɛ́. É ɖɔ dó sɛ́n Mawu tɔn wú ɖɔ: “É wú wɛ un nɔ lin tamɛ dó hwebǐnu.”—Ðɛhan 119:97.
É ɖo wɛn ɖɔ é kún nyí ɖiɖɔ wɛ è ɖe ɖɔ a ní nɔ sɔ́ kéze blěbú ɖokpó ɖó te bo nɔ ɖo Biblu xa wɛ, lobo nɔ ɖo tamɛ lin d’é jí wɛ ó. Nǔ e ɖɔ wɛ è ɖe é ɖíe: Ðɛhanwlántɔ́ ɔ nɔ ba hwenu bo nɔ lin tamɛ dó Xó Mawu tɔn jí. Mɔ̌ wiwa d’alɔ ɛ b’ɛ wá gbeta ɖagbe lɛ́ kɔn.—Ðɛhan 119:98-100.
“Nɔ ce ɖɔ nú mì gbe ɖokpó ɖɔ: ‘Azǎn tɛ́nwe wɛ a ɖó ɖo aklúnɔzángbla ɔ mɛ bo nɔ wa nǔ gěgé nú hwiɖée. Étɛ́wú a ma ka ná ná hwenu kpɛɖé Jexóva ǎ? Nǔ e sɔgbe bɔ è ná wa é nɛ́!’”—Melanie.
Ényí a nɔ lin tamɛ dó nǔgbódodó Biblu tɔn lɛ́ jí ɔ, a ná ɖo gbesisɔmɛ hú gǎn bá wá gbeta ɖagbe lɛ́ kɔn, ɖi kpɔ́ndéwú ɔ, hwenu e a ná ɖo xɔ́ntɔn towe lɛ́ cyán wɛ, alǒ è ná tɛ́n we kpɔ́n bónú a ná wa nǔ e ma sɔgbe ǎ é ɖé é.
Nɛ̌ a ka sixú ɖu Biblu xixa sín le mlɛ́mlɛ́ gbɔn?
Blǒ tuto ɖé. Julia e nyí mɛ wínnyáwínnyá ɖé é ɖe wě élɔ́ xá mɛ: “Sɔ́ nǔ nú tuto Biblu xixa tɔn ɖé. Tuun nǔ e xa gbé a ja é, hwenu e a ná xa é, kpó fí e a ná xa ɖe é kpó.”
Ba fí e nyɔ́ bɔ a ná nɔ é. Gianna e nyí nyɔ̌nu wínnyáwínnyá ɖé é ɖe wě élɔ́ xá mɛ: “Ba fí e ɖo tóó é ɖé. Gɔ́ ná ɔ, nǔ mɛ e ɖo xwédo towe mɛ lɛ́ é ní tuun tuto towe, bónú yě ní má wá jɛ nǔ mɛ nú we ó.”
Ényí alǒkan, tablɛ́ti alǒ ɔdinatɛ́ɛ zán wɛ a ɖe hǔn, sɔ́ ɖó alɔ e jí é ná nɔ bɔ nǔɖé ma ná wá bo fɛ́ ayi towe ǎ é jí. A tlɛ sixú tɛ́n kpɔ́n bo zán Biblu e è zín é ɖé. Nǔgbó ɔ, dobanúnǔ lɛ́ ɖe xlɛ́ ɖɔ nǔxixa ɖo wěma e è zín é ɖé mɛ sixú zɔ́n bɔ nukúnnú mimɔ jɛ nǔ e xa wɛ è ɖe é mɛ ná bɔ wǔ hú gǎn. Amɔ̌, é sixú vɛ́ wǔ bɔ è ná sɔ́ ayi dó nǔ e xa wɛ è ɖe ɖo ekláan ɖé jí é jí.
“Nú un ɖo nǔ xa wɛ ɖo ekláan jí ɔ, ayi ce nɔ yá wǔ fɛ́ sín nǔ e xa wɛ un ɖe é jí. Nǔ e nɔ fɛ́ ayi mɛtɔn lɛ́ é nɔ wá xwetɔ́n, batelíi ɔ nɔ fá, alǒ Ɛntɛnɛ́ti nɔ gbɛ́ azɔ̌. Ényí un ka ɖo wěma e è zín é ɖé zán wɛ ɔ, nǔ ɖokpó e sín hudó un nɔ ɖó é jɛ́n nyí wěziza.”—Elena.
Nɔ xo ɖɛ jɛ nukɔn. Byɔ̌ Jexóva ɖɔ é ní d’alɔ we bónú a ná mɔ nukúnnú jɛ nǔ e a ko bló tuto bá xa é mɛ, flín bo lɛ́ ɖu le tɔn.—Jaki 1:5.
Bo ná dó wa nǔ sɔgbe xá ɖɛ towe hǔn, ba do nú nǔ yi gɔngɔn mɛ dó tan e xa wɛ a ɖe é jí. Nɛ̌ a ka sixú wa mɔ̌ gbɔn? Ényí JW Library zán wɛ a ɖe alǒ Biblu xa wɛ a ɖe ɖo Ɛntɛnɛ́ti jí ɔ, a sixú zín wěmafɔ ɖé bo ná ba do nú nǔ ɖěvo lɛ́ d’é jí, lobo lɛ́ mɔ xóta ɖěvo lɛ́ d’é wú.
Nɔ kan nǔ byɔ́. Kpɔ́ndéwú ɖé lɛ́ ɖíe: ‘Étɛ́ tan élɔ́ ka kplɔ́n mì dó Jexóva wú? É ka dó gesí jijɔ Jexóva tɔn ɖé bɔ un sixú xwedó a?’ (Efɛ́zinu lɛ́ 5:1) ‘Étɛ́ un ka kplɔ́n ɖo tan élɔ́ mɛ, bo sixú zán ɖo gbɛzán ce mɛ?’ (Ðɛhan 119:105) ‘Un ka sixú zán nǔ e un xa é dó d’alɔ mɛ ɖěvo lɛ́ ɖo ali ɖé nu a?’—Hlɔ̌manu lɛ́ 1:11.
Lɛ̌ kanbyɔ́ hwiɖée ɖɔ: ‘Nɛ̌ nǔ e un xa é ka cá kan xá xóta Biblu tɔn gbɔn?’ Nǔkanbyɔ́ énɛ́ ɖo tají tawun. Étɛ́wú? Ðó sín Bǐbɛ́mɛ wá yi Nǔɖexlɛ́mɛ ɔ, nǔ e ɖo Biblu mɛ lɛ́ é bǐ wɛ cá kan xá xóta tají ɖé ɖo ali ɖé nu, xóta énɛ́ wɛ nyí: Lěe Jexóva ná zán Axɔ́súɖuto tɔn jǐxwé tɔn ɔ dó klɔ́ cí sín nyǐkɔ tɔn wú, bo ɖe xlɛ́ ɖɔ émí ɖó acɛ bo ná kpa acɛ, lobɔ lěe émí nɔ kpa acɛ gbɔn é wɛ nyɔ́ hú gǎn gbɔn é.