Ayǐkúngban dán wǔ syɛ́nsyɛ́n ɖo Turquie kpó Syrie kpó: Étɛ́ Biblu ka ɖɔ?

È VƆ́ JLÁ ÐÓ ÐO: 10 février 2023

Káká jɛ jeudi 9 février 2023 ɔ, mɛ nabí e ayǐkúngban dán wǔ e gba nǔ lundi ɖo Turquie kpó Syrie kpó é hu lɛ́ é sín kɛ́n zɛ 20000 wú. Gbɛtɔ́ afatɔ́n mɔ̌kpán wɛ gblé wǔ, bɔ mɛ afatɔ́n donu kanweko mɔ̌kpán ba adɔ̌tɛn yětɔn lɛ́ kpo.

Wěɖegbɛ́ sɔhɛnmɛ tɔn we e Kúnnuɖetɔ́ Jexóva tɔn lɛ́ ɖó ayǐ lɛ́ é kpo ɖo alɔ dó wɛ ɖo ali tawun tawun lɛ́ nu, bo lɛ́ ɖo alɔ ɖó wɛ ɖo gǎn e dó wɛ è ɖe bo ɖo mɛ lɛ́ ba wɛ, bo lɛ́ ɖo yě hwlɛ́n gán wɛ é mɛ. (Galátinu lɛ́ 6:10) Ayǐkúngban dán wǔ ɔ gba nǔ bɔ é ná bló ganxixo 24 mɔ̌ é ɔ, ninɔmɛ ayǐ mɛ tɔn nylá tawun bɔ ali lɛ́ lɛ́vɔ́ vɛ́ gbɔn tawun có, alaxɔ xá ɔ mɛ tɔn sín afɔsɔ́ɖótetɔ́ lɛ́ kpé wú bo wá nɔ gǔdo nú mɛ e awě xo lɛ́ é ɖo lěe nǔ nɔ cí nú mɛ é kpó gbigbɔ kpó linu. (1 Piyɛ́ɛ 5:2) Sɔhɛnmɛzɔ́ e wa wɛ mǐ ɖe lɛ́ é sín gbeɖíɖó ná tɔ́n ɖo Nǔ e jɛ lɛ́ é sín agbasá.

Biblu ná gǎnjɛwú mǐ ɖɔ “[Jexóva]a ɖo kpɔ́ xá mɛ e ayi yětɔn gbadó lɛ́, é nɔ hwlɛ́n mɛ e nǔ jɛ akɔ́n jí ná lɛ́.” (Ðɛhan 34:19) Video kpó xóta kpó jínjɔ́n Biblu jí élɔ́ lɛ́ sixú d’alɔ we ɖo hwenu vɛ́ wǔ élɔ́ lɛ́ mɛ.

• Video Gbɔ dídó nú mɛ e ɖo aluwɛ mɛ lɛ́ é ɖe wě tawun tawun lɛ́ xá mɛ ɖěɖěe mɛvívɛ́ kú dó lɛ́ é.

• Xóta “D’alɔ vǐ towe lɛ́ bónú yě ná ɖí xwi xá xójɛɖoto e nɔ gba ayi dó nú mɛ lɛ́ é” ɖɔ nǔgbódodó Biblu tɔn e sixú d’alɔ vǐ towe lɛ́ bɔ wɛn nyanya lɛ́ ma ná zɛ hǔn nú yě ǎ é ɖé lɛ́.

Ðo lundi 6 février 2023 ɔ, ayǐkúngban dán wǔ syɛ́nsyɛ́n, bo gba nǔ tawun ɖo Turquie kpó Syrie kpó.

“Ðo lundi ɔ, ayǐkúngban dán wǔ syɛ́nsyɛ́n ɖé hu gbɛtɔ́ 3700 jɛjí ɖo Turquie sín xá ɖaxó ɖé mɛ, kpódó totaligbé-gbadahwe jí Syrie tɔn kpán. Ayǐ mɛ fá tawun hwenu e nǔ énɛ́ jɛ é; énɛ́ zɔ́n bɔ mɛ ɖěɖěe gblé wǔ alǒ xwé yětɔn kíjá ɖó ayǐkúngban dán wǔ ɔ wútu lɛ́ é sín ninɔmɛ lɛ́ nylá tawun. É lɛ́ sín ayǐ mɛ e fá é wútu bɔ é vɛ́ wǔ tawun bónú è ná mɔ mɛ e gán ɖo ayǐkúngban dán wǔ ɔ mɛ lɛ́ é.”—Xójláwéma Reuters, 6 février 2023.

Ényí mǐ xa nǔ baɖabaɖa mɔ̌hun lɛ́ ɔ, é nɔ blá wǔ nú mǐ tawun. Ðo ninɔmɛ mɔ̌hun lɛ́ mɛ ɔ, mǐ sixú mɔ alɔdó ɖo Jexóva e nyí “Mawu e nɔ dó gbɔ nú mɛ ɖo ali bǐ nu é” gɔ́n. (2 Kɔlɛ́ntinu lɛ́ 1:3) É nɔ bló bɔ gbɔn “gbɔ e Nǔwlánwlán mímɛ́ lɛ́ nɔ dó nú mɛ é . . . gblamɛ ɔ, mǐ ní dó sixú ɖó nukún nǔ.”—Hlɔ̌manu lɛ́ 15:4.

Biblu kplɔ́n mǐ:

Nǔ e è ɖɔ ɖ’ayǐ dó ayǐkúngban dán wǔ lɛ́ wú é.
Fí e mǐ sixú mɔ gbɔdónúmɛ kpó nukúnɖíɖó kpó ɖe é.
Lěe Mawu ná ɖe wǔvɛ́ mimɔ bǐ síin gbɔn é.

Nú a ná mɔ nǔ e Biblu ɖɔ dó xóta énɛ́ lɛ́ wú é hǔn, xa xóta élɔ́ lɛ́:

a Nyǐkɔ Mawu tɔn wɛ nɔ nyí Jexóva.—Ðɛhan 83:18, nwt.