Kúnnuɖetɔ́ Jehovah Tɔn lɛ ka Nɔ Hɛn Sɔ Mɛ Ðò Adla Hwenu À?

Ganji, hwɛhwɛ bonu adla j’ayǐ ɔ, Kúnnuɖetɔ́ Jehovah tɔn lɛ nɔ d’alɔ mɛ. Mǐ nɔ wà nǔ sɔgbe xá alixlɛ́mɛ e ɖò Galatinu lɛ 6:10 mɛ é, bo nɔ hɛn sɔ mɛ e nyí Kúnnuɖetɔ́ lɛ é kpo mɛ e ma nyí ǎ lɛ é kpo ɖò ali tawun tawun ɖé lɛ nu; wemafɔ enɛ ɖɔ: “Enyi mɔ̌ hǔn nɔví lɛ mi, enyi mǐ mɔ ɖagbewiwa sín ali hweɖebǔnu hǔn, mǐ ni nɔ wà nú mɛ bǐ, ɖò taji ɔ, nú nɔví ɖò nǔɖiɖi mɛ lɛ.” Adla lɛ hwenu ɔ, mɛ e nǔ wà lɛ é nɔ ɖó hudo alɔdó tɔn ɖò lee nǔ nɔ cí nú mɛ é kpo gbigbɔ kpo lixo tawun. Mǐ nɔ lɛ́ tɛ́n kpɔ́n bo nɔ nɔ gudo nú ye ɖò ali enɛ lɛ nu.—2 Kɔlɛntinu lɛ 1:3, 4.

Enyi adla j’ayǐ ɖò fí ɖé ɔ, mɛxo agun tɔn agun e ɖò xá ɔ mɛ lɛ é tɔn lɛ nɔ tɛ́n kpɔ́n bo nɔ ylɔ́ mɛ ɖěɖee nɔ dó gbɛ̌ xá agun enɛ lɛ é bǐ, bo nɔ kpɔ́n ɖɔ ye ɖò ayijayǐ mɛ alǒ ɖó hudo alɔdó alɔkpa ɖebǔ tɔn wɛ à jí. Enɛ gudo ɔ, mɛxo agun tɔn lɛ nɔ ɖó nǔdobiba yetɔn kpo gǎn klewun e ye yawǔ dó lɛ é kpo sín gbè sɛ́dó alaxɔ Kúnnuɖetɔ́ Jehovah tɔn lɛ tɔn xá ɔ mɛ tɔn.

Enyi nǔ e sín hudo è ɖó lɛ é zɛ nǔwukpíkpé agun e ɖò xá ɔ mɛ lɛ é tɔn wu ɔ, Hagbɛ̌ Alixlɛ́mɛtɔ́ Kúnnuɖetɔ́ Jehovah tɔn lɛ tɔn nɔ bló tuto bɔ è nɔ mɔ nǔ lɛ. Lee Klisanwun nukɔntɔn lɛ kpé nukún dó yeɖée lɛ wu ɖò adɔ sín táan mɛ gbɔn é nɛ. (1 Kɔlɛntinu lɛ 16:1-4) Alaxɔ xá ɔ mɛ tɔn nɔ ɖó Wěɖegbɛ́ Sɔhɛnmɛ tɔn lɛ ayǐ, bonu ye na bló tuto lee è na d’alɔ mɛ gbɔn é tɔn, lobo nɔ lɛ́ kpé nukún dó tuto lɛ wu. Kúnnuɖetɔ́ e ɖò xá ɖevo lɛ mɛ lɛ é nɔ zán hwenu yetɔn kpo nǔɖokan yetɔn lɛ kpo dó d’alɔ.—Nǔnywɛxó 17:17.

Ali e nu è nɔ zán nǔnina ɖěɖee è nɔ sɛ́dó alaxɔ Kúnnuɖetɔ́ Jehovah tɔn lɛ tɔn lɛ ɖè lɛ é ɖokpo wɛ nyí ɖɔ è nɔ zán dó hɛn sɔ mɛ ɖěɖee wu adla lɛ hɛn nǔ gblé dó lɛ é. (Mɛsɛ́dó 11:27-30; 2 Kɔlɛntinu lɛ 8:13-15) Mɛɖéezejotɔ́ lɛ wɛ nɔ wà sɔhɛnmɛzɔ́ ɔ. Akwɛ ɖěɖee è nɔ xokplé dó sɔhɛnmɛzɔ́ ɔ kanta lɛ é ɔ, sɔhɛnmɛzɔ́ ɔ kɛɖɛ wu wɛ è nɔ zán dó, é nɔ nyí dó akwɛzinzan tutoblonunu ɔ tɔn ɖevo lɛ tamɛ ǎ. Ayi mǐtɔn nɔ ɖò te dó nǔnina lɛ bǐ wu.—2 Kɔlɛntinu lɛ 8:20.