‘Nyikɔ Towe Ni Nyí Nǔ Mímɛ́’

1-2. Xó taji tɛ lɛ ka ɖò atɛ jí bo kan Kúnnuɖetɔ́ Jehovah tɔn lɛ?

XÓ TAJI tawun e kan mǐ ɖò égbé é wɛ nyí Nǔbǐwukpétɔ́ e Mawu nyí é kpo nyikɔ tɔn e ɖó na nyí nǔ mímɛ́ é kpo. Mǐ mɛ Kúnnuɖetɔ́ Jehovah tɔn lɛ yí wǎn nú xóɖiɖɔ dó xóta enɛ lɛ e nɔ sɔ́ akpakpa mɛ é jí. Amɔ̌, Nǔbǐwukpétɔ́ e Mawu nyí é kpo nyikɔ tɔn e ɖó na nyí nǔ mímɛ́ é kpo ɔ, xóta ɖokpo ɔ lɛ wɛ.

² Mǐ bǐ wɛ wá mɔ ɖɔ è ɖó na klɔ́ cí sín nyikɔ Mawu tɔn wu. Mǐ lɛ́ kplɔ́n ɖɔ è ɖó na ɖexlɛ́ ɖɔ Nǔbǐwukpétɔ́ e Jehovah nyí é, alǒ lee é nɔ kp’acɛ gbɔn é wɛ nyɔ́ hugǎn. Enɛ wu ɔ, xóta we enɛ lɛ ɖò taji tawun.

 3. Etɛ lɛ nyikɔ Jehovah ɔ ka nɔ dó gesí?

³ Nǔgbo ɔ, nǔ e kúnkplá Mawu mǐtɔn lɛ é bǐ kaka jɛ lee é nɔ kp’acɛ gbɔn é jí wɛ nyikɔ Jehovah ɔ nɔ dó gesí. Enɛ wu ɔ, enyi mǐ ɖɔ ɖɔ cí kíklɔ́ sín nyikɔ Jehovah tɔn wu wɛ nyí xó taji hugǎn e ɖò atɛ jí é hǔn, ɖiɖɔ wɛ mǐ lɛ́ ɖè ɖɔ mǐ ɖó na nɔ ɖexlɛ́ ɖɔ lee Jehovah nɔ kp’acɛ gbɔn é wɛ nyɔ́ hugǎn nɛ. Nyikɔ Jehovah tɔn cá kan tawun xá lee é nɔ kp’acɛ gbɔn, bo nyí Nǔbǐwukpétɔ́ wɛkɛ ɔ tɔn é.—Kpɔ́n gbǎví “Nǔ E Ðò Xó Taji E Ðò Atɛ Jí É Mɛ lɛ É.”

 4. Etɛ Ðɛhan 135:13 ka ɖɔ dó Mawu sín nyikɔ wu? Nǔkanbyɔ tɛ lɛ mǐ ka na mɔ xósin na ɖò xóta elɔ mɛ?

⁴ Nyikɔ Jehovah ɔ nyí nyikɔ bǔnɔ ɖé. (Xà Ðɛhan 135:13.) Etɛ lɛ ka zɔ́n bɔ Mawu sín nyikɔ ɖò taji sɔmɔ̌? Nɛ è ka kɔn cí d’ewu azɔn nukɔntɔn ɔ gbɛn? Nɛ̌ Mawu ka nɔ klɔ́ cí sín wu gbɔn? Nɛ̌ mǐ ka sixu jɛhun dó nyikɔ tɔn jí gbɔn? Mǐ na na xósin nú nǔkanbyɔ enɛ lɛ dìn.

 5. Enyi mɛɖé lɛ sè ɖɔ Mawu sín nyikɔ ɖó na nyí nǔ mímɛ́ ɔ, etɛ ye ka sixu kanbyɔ?

⁵ “Nyikɔ towe ni nyí nǔ sísí, [alǒ nǔ mímɛ́.]” (Mat. 6:9) Nǔ taji hugǎn e tamɛ mǐ ɖó na xoɖɛ dó bɔ Jezu ɖɔ é ɖokpo nɛ. Etɛ ɖɔ gbé Jezu ka ja? È ni bló bonu nǔɖe ni nyí nǔ mímɛ́ sín tinmɛ wɛ nyí ɖɔ è ni bló bonu nǔ ɔ ni mɛ́, bo ɖò cekée, alǒ ni nyí nǔ ɖè ɖó vo. Amɔ̌, mɛɖé lɛ sixu kanbyɔ ɖɔ, ‘Nyikɔ Jehovah tɔn ko nyí nǔ mímɛ́ à cé?’ Bo na dó na xósin ɔ ɔ, mǐ ɖó na lin tamɛ dó nǔ e nyikɔ ɖé nɔ dó gesí é jí hwɛ̌.

 6. Etɛ ka nɔ zɔ́n bɔ nyikɔ ɖé nɔ xɔ akwɛ?

⁶ Nyikɔ ɖé nyí wekwín lɛ xixokplé bo wlan dó wema ɖé jí, alǒ ye xixa d’aga xó kpowun ǎ. Ðǒ ayi nǔ e Biblu ɖɔ é wu: “È mlá nyikɔ ɖagbe mɛɖé ɔ, é nyɔ́ hú mɛ ɔ jɛ dɔkun gbɔn tókɔ awɔnkɔ.” (Nǔx. 22:1; Nǔt. 7:1) Etɛwu nyikɔ ɖé ka xɔ akwɛ sɔmɔ̌? Ðó é nɔ dó gesí nǔ e wanú mɛɖé nyí é alǒ nǔ e mɛ ɖevo lɛ nɔ lin dó mɛ e ɖó nyikɔ ɔ é wu é. Enɛ wu ɔ, lee nyikɔ ɖé cí ɖò wema ɖé jí é, alǒ lee è nɔ ylɔ́ gbɔn é wɛ nyí nǔ taji hugǎn ɔ ǎ, loɔ, nǔ taji ɔ wɛ nyí nǔ e mɛ ɖevo lɛ nɔ lin hwenu e ye mɔ alǒ sè nyikɔ enɛ é.

 7. Nɛ̌ mɛ lɛ ka kɔn cí dó nyikɔ Mawu tɔn wu gbɔn?

⁷ Enyi mɛ lɛ ɖó adingban dó Jehovah kɔ hǔn, cí kɔn dó nyikɔ ɖagbe tɔn wu wɛ ye ɖè mɔ̌ nɛ. Enyi ye kɔn cí dó nyikɔ ɖagbe tɔn wu hǔn, ye jló na hɛn ɛ gblé nɛ. Bǐbɛ̌mɛ hwenuxó gbɛtɔ́ tɔn tɔn wɛ è kɔn cí dó Mawu kpo nyikɔ ɖagbe tɔn kpo wu azɔn nukɔntɔn ɔ. Kpɔ́n nǔ e cí enɛ e è kɔn dó wǔ tɔn é sixu kplɔ́n mǐ é.

 8. Etɛ lɛ Adamu kpo Ɛvu kpo ka tuùn? Nǔ ɖevo tɛ lɛ mǐ ka sixu kanbyɔ?

⁸ Adamu kpo Ɛvu kpo tuùn ɖɔ Mawu sín nyikɔ nɔ nyí Jehovah, bo lɛ́ tuùn nǔ taji gegě dó wǔtu tɔn. Ye tuùn ɖɔ é wɛ nyí Gbɛɖotɔ́ ɔ, bo na ye gbɛ̀, Palaɖisi e nyí xwé ɖɛkpɛɖɛkpɛ ɖé é bo lɛ́ bló bɔ ye da mɛ maɖóblɔ̌. (Bǐb. 1:26-28; 2:18) Amɔ̌, ye ka na zán tamɛfɔn maɖóblɔ̌ yetɔn bo lin tamɛ dó nǔ ɖěɖee Jehovah ko wà nú ye lɛ é bǐ jí sɔyi à? Ye ka na na hlɔnhlɔn wanyiyi yetɔn sɔyi à? Mɛ e ɖó nyikɔ enɛ é sín nǔ ka na sù nukún yetɔn mɛ sɔyi à? Xósin lɛ jɛ wě hwenu e kɛntɔ́ Mawu tɔn tɛ́n ye kpɔ́n é.

 9. Sɔgbe xá Bǐbɛ̌mɛ 2:16, 17 kpo 3:1-5 kpo ɔ, etɛ Jehovah ka ɖɔ nú asú kpo asì kpo nukɔntɔn ɔ? Nɛ̌ Satáan ka sló kɔ nú nǔgbo ɔ gbɔn?

⁹ Xà Bǐbɛ̌mɛ 2:16, 17 kpo 3:1-5 kpo. Satáan gbɔn dan ɖé jí bo kanbyɔ Ɛvu ɖɔ: “Mawu ɖɔ mi kún ɖó na ɖu atín sínsɛ́n e ɖò jikpá ɔ mɛ lɛ ɖebǔ ó nǔgbo à?” Adingban e ma jɛ wě ǎ é ɖé ɖò nǔkanbyɔ enɛ mɛ bo cí aɖǐnú e ɖò hwlahwlá é ɖé ɖɔhun. Nǔ e Mawu ɖɔ tawun é wɛ nyí ɖɔ ye sixu ɖu atín sínsɛ́n lɛ bǐ, ɖokpo jɛn ma ɖ’emɛ ǎ. Adamu kpo Ɛvu kpo sixu ɖu atín sínsɛ́n alɔkpa vovo gegě. (Bǐb. 2:9) Nǔgbo ɔ, Jehovah nyí alɔhundónanǔmɛtɔ́. Amɔ̌, Mawu gbɛ́ nú Adamu kpo Ɛvu kpo ɖɔ ye ni ma ɖu atín e Emi ɖè nyǐ é sín sínsɛ́n ó. Enɛ wu ɔ, nǔkanbyɔ Satáan tɔn sló kɔ nú nǔgbo ɔ. Satáan bló bɔ è na nɔ kpɔ́n Mawu dó mɔ gwěnɔ. Ɛvu sixu ko kanbyɔ éɖée ɖɔ, ‘Nǔ ɖagbe ɖé sɔ́ hwlá dó mì wɛ Mawu ka ɖè à?’

10. Nɛ̌ Satáan ka kɔn cí dó nyikɔ Mawu tɔn wu tlɔlɔ gbɔn? Etɛ mɛ é ka tɔ́n kɔ dó?

¹⁰ Kaka jɛ hwenɛnu ɔ, Ɛvu kpò ɖò Jehovah kpɔ́n wɛ dó mɔ Acɛkpatɔ́ tɔn. É ɖɔ nǔ e Mawu ɖɔ nyi wɛn é nú Satáan. É ɖɔ gɔ́ na ɖɔ ye kún ɖó na ɖ’alɔ atín ɔ wu lɔ vɔ́vɔ́ ó. É tuùn ɖɔ Mawu gb’akpá nú ye ɖɔ tónúmase na dɔn kú wá. Amɔ̌, Satáan ɖɔ: “Gbeɖé kpɔ́n, mi na kú ɖě ǎ.” (Bǐb. 3:2-4) Satáan ɖɔ linlin tɔn nyi wě lo. Dìn ɔ, é kɔn cí dó nyikɔ Mawu tɔn wu tlɔlɔ, bo ɖɔ nú Ɛvu ɖɔ Jehovah nyí adingbannɔ. Satáan wá huzu Awoví, alǒ jidómɛtɔ́. Satáan blɛ́ Ɛvu bǐ, bɔ é ɖi nǔ n’i. (1 Tim. 2:14) Ɛvu ɖeji dó Satáan wu hugǎn Jehovah. Enɛ zɔ́n bɔ é bɔwǔ nú Ɛvu bɔ é wá gbeta e nyla hú bǐ é kɔn. É tlitó nú Jehovah. É ɖu atín sínsɛ́n e Jehovah gbɛ́ n’i ɖɔ é ni ma ɖu ó é. Enɛ gudo ɔ, é na ɖě Adamu lɔ.—Bǐb. 3:6.

11. Etɛ mɛjitɔ́ mǐtɔn nukɔntɔn lɛ ka ɖó na ko wà? Amɔ̌, etɛ ye ma ka wà ǎ?

¹¹ Dǒ nukúnmɛ bo kpɔ́n nǔ e Ɛvu ɖó na ko ɖɔ nú Satáan é. Dǒ nukúnmɛ kpɔ́n ɖɔ é ɖɔ nǔ lěhun ɖé: “Un tuùn mɛ e a nyí é ǎ, amɔ̌, un tuùn Tɔ́ ce Jehovah, bo yí wǎn n’i, lobo lɛ́ ɖeji dó wǔtu tɔn. É wɛ na nǔ e Adamu kpo nyi kpo ɖó é bǐ mǐ. A glá kaka bo ɖɔ nǔ nyanya dó wǔtu tɔn. Bǔ dó mì!” Enyi Jehovah sè bɔ vǐ nyɔnu tɔn vívɛ́ ɔ dó xógbe gbejininɔ tɔn mɔhun lɛ ɔ, kpɔ́n lee é na ko víví n’i sɔ é! (Nǔx. 27:11) Amɔ̌, Ɛvu ɖó wanyiyi adodwé nú Jehovah ǎ; Adamu ɖesu ka ɖó ǎ. Wanyiyi mɔhun e Adamu kpo Ɛvu kpo ma ɖó nú Jehovah ǎ é zɔ́n bɔ ye kpéwú bo jɛhun dó nyikɔ tɔn jí hwenu e è kɔn cí d’ewu é ǎ.

12. Nɛ̌ Satáan ka bló gbɔn bɔ Ɛvu jɛ nǔ xò kpɔ́n jí? Etɛ Adamu kpo Ɛvu kpo ma ka wà ǎ?

¹² Bo na dó kɔn cí dó nyikɔ ɖagbe Jehovah tɔn wu ɔ, Satáan bló bɔ Ɛvu jɛ nǔ xò kpɔ́n jí ɖɔ Jehovah ka nyí Tɔ́ ɖagbe ɖé à jí. Enɛ gudo ɔ, Adamu kpo Ɛvu kpo sɔ́ kpéwú bo jɛhun dó nyikɔ Jehovah tɔn kpo mɛ alɔkpa e Jehovah nyí é kpo jí ǎ. Ye jó yeɖée dó nú byɔ e Satáan byɔ ye ɖɔ ye ni fɔ́n gǔ dó Tɔ́ yetɔn jí é. Satáan nɔ zán wlɛnwín mɔhun lɛ ɖò égbé. É nɔ dó jì Jehovah bo nɔ gbɔn mɔ̌ mɛ kɔn cí dó nyikɔ Tɔn wu. É nɔ bɔkun nú Satáan bonu é na blɛ́ mɛ e nɔ ɖi nǔ nú adingban tɔn lɛ é bonu ye na gbɛ́ acɛkpikpa jlɔjlɔ Jehovah tɔn.

13. Nɛ̌ Ezekiyɛli 36:23 ka tɛɖɛ̌ wɛn taji e ɖò Biblu mɛ é jí gbɔn?

¹³ Jehovah yí gbè nú jidómɛ mɔhun, bo gɔn hun jɛ dó éɖée jí wɛ à? Eǒ, é bló mɔ̌ ǎ! Biblu ɔ blebu ɖɔ xó dó nǔ e Jehovah ko wà bo na dó klɔ́ cí e è kɔn dó nyikɔ tɔn wu ɖò Edɛni é síìn é jí. (Bǐb. 3:15) Enɛ wu ɔ, mǐ sixu sɛ̀ sin xwè nú wɛn taji Biblu tɔn ɔ gbɔn lě: Jehovah bló bɔ nyikɔ tɔn na nyí nǔ mímɛ́ gbɔn Axɔ́suɖuto e Vǐ tɔn nyí Axɔ́su na é gblamɛ, bo na lɛ́ vɔ́ nǔjlɔjlɔwiwa kpo fífá kpo ɖó ayǐ ɖò ayikúngban ɔ jí. Enɛ wu ɔ, enyi mǐ xà Biblu ɔ, mǐ na mɔ nǔ jɛ lee Jehovah nɔ bló bɔ nyikɔ tɔn nɔ nyí nǔ mímɛ́ gbɔn é mɛ.—Xà Ezekiyɛli 36:23.

14. Nɛ̌ lee Jehovah ɖeɖɛ gǔfínfɔ́n Edɛni tɔn ɔ gbɔn é ka bló bɔ nyikɔ tɔn nyí nǔ mímɛ́ gbɔn?

¹⁴ Satáan ko wà nǔ e wu é kpé é bǐ bo na dó glɔ́n ali nú Jehovah bonu linlin Tɔn ma jɛnu ó. Amɔ̌, é ko kpa ɛ gbeɖé ǎ. Biblu xlɛ́ lee Jehovah ko wà nǔ gbɔn é, bo ɖexlɛ́ ɖɔ mɛ ɖebǔ kún cí Jehovah Mawu ɖɔhun ó. Nǔgbo wɛ ɖɔ gǔfínfɔ́n Satáan kpo mɛ e ɖò ahwan tɔn mɛ lɛ é kpo tɔn zɔ́n bɔ Jehovah mɔ wuvɛ̌ tawun. (Ðɛh. 78:40) Amɔ̌, é ɖeɖɛ xó enɛ kpo nǔnywɛ, suúlu gɔ́ nú hwɛjijɔ kpo. É lɛ́ ɖè hlɔnhlɔn tɔn aditi ɔ xlɛ́ ɖò ali gegě nu. Taji bǐ ɔ, wanyiyi tɔn nɔ tɔ́n ɖò nǔ e é nɔ bló lɛ é bǐ mɛ. (1 Jaan 4:8) Jehovah ɖò azɔ̌ wà wɛ magbokɔ, bonu nyikɔ tɔn na dó nyí nǔ mímɛ́.

15. Nɛ̌ Satáan ka nɔ kɔn cí dó Mawu sín nyikɔ wu ɖò égbé gbɛn? Etɛ lɛ mɛ é ka nɔ tɔ́n kɔ dó?

¹⁵ Satáan kpò ɖò cí kɔn dó Mawu sín nyikɔ wu wɛ égbé. É nɔ blɛ́ mɛ lɛ bɔ ye nɔ xò nǔ kpɔ́n ɖɔ Mawu ka nyí hlɔnhlɔnnɔ, hwɛjijɔnɔ, nǔnywɛtɔ́ kpo wanyiyinɔ kpo à jí. Ði kpɔ́ndéwú ɔ, Satáan nɔ tɛ́n kpɔ́n bo na bló bɔ mɛ lɛ na kúdeji ɖɔ Jehovah kún nyí Gbɛɖotɔ́ ɔ ó. Enyi mɛ lɛ yí gbè ɖɔ Mawu tíìn ɔ, Satáan nɔ tɛ́n kpɔ́n bo nɔ bló bɔ ye na ɖi ɖɔ Mawu syɛn nukún lobɔ nǔgbododó Tɔn lɛ syɛn dín, bɔ xó ɖò ye wu. É tlɛ nɔ kplɔ́n mɛ lɛ ɖɔ Jehovah kún nɔ kú nǔblawu nú mɛ ó, bo nɔ sɔ́ mɛ dó zojimací mɛ. Enyi ye ɖi nǔ nú jidómɛ enɛ ɔ, é nɔ bɔwǔ nú ye bonu ye na gbɛ́ acɛkpikpa jlɔjlɔ Jehovah tɔn. Enyi Jehovah ma ko sú kún dó nú Satáan ǎ jɛn wɛ ɔ, é na kpò ɖò jì dó è wɛ, bo na lɛ́ nya gbě hwi lɔ tɔn. É na ɖu ɖò jǐ we wɛ à?

16. Etɛ Adamu kpo Ɛvu kpo ka gɔn wiwa bɔ hwɛ sixu wà?

¹⁶ Jehovah hun ali nú gbɛtɔ́ hwɛhutɔ́ lɛ bonu ye na ɖ’alɔ ɖò blobló bonu nyikɔ tɔn na nyí nǔ mímɛ́ mɛ. Enɛ wu ɔ, a sixu wà nǔ e Adamu kpo Ɛvu kpo ma wà ǎ é. Mɛ e nɔ kɔn cí dó nyikɔ Mawu tɔn wu, bo nɔ lɛ́ nyla nu d’ewu lɛ é wɛ gɔ́ gbɛ̀ ɔ mɛ có, ali hun nú we bɔ a na zunfan nǔgbo ɔ bo lɛ́ ɖɔ nú mɛ ɖevo lɛ ɖɔ Jehovah nyí mɛ mímɛ́, nǔjlɔjlɔwatɔ́, ɖagbewatɔ́, kpo wanyiyinɔ kpo. (Eza. 29:23, nwt) A sixu nɔ gudo nú acɛkpikpa tɔn. A sixu jla ɖɔ acɛkpikpa tɔn kɛɖɛ wɛ sɔgbe hugǎn, bɔ é na bló bɔ fífá kpo awǎjijɛ kpo na tíìn nú nǔɖiɖó lɛ bǐ.—Ðɛh. 37:9, 37; 146:5, 6, 10.

17. Nɛ̌ Jezu ka ɖè nyikɔ Tɔ́ tɔn tɔn xlɛ́ gbɔn?

¹⁷ Enyi mǐ nɔ jɛhun dó nyikɔ Jehovah tɔn jí ɔ, kpɔ́ndéwú Jezu tɔn xwedó wɛ mǐ ɖè nɛ. (Jaan 17:26, nwt) Jezu ɖè nyikɔ Tɔ́ tɔn tɔn xlɛ́ gbɔn nyikɔ enɛ zinzan kpo hunjijɛ dó nyikɔ ɖagbe enɛ jí kpo gblamɛ. Ði kpɔ́ndéwú ɔ, Falizyɛn lɛ nɔ xlɛ́ ɖò ali gegě nu ɖɔ Jehovah nɔ syɛn nukún, nɔ byɔ nǔ gegě ɖò mɛ sí, kún nɔ kéya nú mɛ, bo nɔ lɛ́ kú nǔblawu nú mɛ ó, bɔ Jezu ka gbɛ́ nǔ nú ye. Jezu d’alɔ mɛ lɛ bɔ ye mɔ ɖɔ Tɔ́ emitɔn nɔ nɔ jlɛ̌ jí, nɔ ɖó suúlu, yí wǎn nú mɛ, bo nɔ lɛ́ sɔ́ hwɛ kɛ mɛ. É ɖè jijɔ Tɔ́ tɔn tɔn lɛ xlɛ́ bɔ nǔ bǐ vɔ ɖ’ewu ɖò gbɛzinzan tɔn gbè bǐ gbè tɔn mɛ, mɔ̌ mɛ ɔ, é lɛ́ d’alɔ mɛ lɛ bɔ ye tuùn Jehovah.—Jaan 14:9.

18. Nɛ̌ mǐ ka sixu ɖè adingban e è ɖó dó Jehovah nu lɛ é gbà gbɔn?

¹⁸ Jezu ɖɔhun ɔ, mǐ sixu má nǔ e mǐ tuùn dó Jehovah wu é xá mɛ ɖevo lɛ, bo nɔ lɛ́ kplɔ́n ye ɖɔ Mawu nyí wanyiyinɔ lobo lɛ́ nyí xomɛnyɔtɔ́. Enyi mǐ bló mɔ̌ ɔ, mǐ na ɖè adingban e è ɖó dó Jehovah nu lɛ é gbà. Mǐ nɔ bló bɔ nyikɔ Jehovah tɔn nɔ nyí nǔ mímɛ́, gbɔn alɔdidó mɛ lɛ bonu ye ni kpɔ́n dó mɔ nǔ mímɛ́ gblamɛ. Mǐ lɔ sixu wà nǔ Jehovah ɖɔhun. Mǐ nyí hwɛhutɔ́ có, mǐ na kpéwú. (Efɛ. 5:1, 2) Enyi xó mǐtɔn lɛ kpo nǔwalɔ mǐtɔn lɛ kpo nɔ xlɛ́ mɛ alɔkpa e é nyí tawun é mɛ lɛ ɔ, mǐ nɔ d’alɔ bɔ nyikɔ tɔn nɔ nyí nǔ mímɛ́. Mǐ nɔ klɔ́ cí sín nyikɔ enɛ wu gbɔn alɔdidó mɛ lɛ bonu ye na tuùn nǔgbo ɔ dó Mawu wu gblamɛ.b Mǐ nɔ lɛ́ ɖexlɛ́ ɖɔ gbɛtɔ́ hwɛhutɔ́ lɛ sixu nɔ gbeji.—Jɔb. 27:5, nwt.

19. Nɛ̌ Ezayíi 63:7 ka d’alɔ mǐ bɔ mǐ mɔ nǔ taji e gbé mǐ ɖó na nya hwenu e mǐ ɖò nǔ kplɔ́n mɛ wɛ é gbɔn?

¹⁹ Kpɔ́n nǔkplɔnmɛ xɔ akwɛ ɖevo e mǐ sixu zán é. Enyi mǐ ɖò nǔgbo Biblu tɔn lɛ kplɔ́n mɛ lɛ wɛ ɔ, hwɛhwɛ wɛ mǐ nɔ tɛɖɛ̌ Nǔbǐwukpétɔ́ e Mawu nyí é jí, ɖɔ Jehovah wɛ ɖ’acɛ bo na kp’acɛ dó wɛkɛ ɔ jí, enɛ ka sɔgbe tawun. Nǔgbo wɛ ɖɔ é ɖò taji ɖɔ mǐ ni kplɔ́n sɛ́n Mawu tɔn lɛ mɛ lɛ, amɔ̌, nǔ taji e gbé nya wɛ mǐ ɖè é wɛ nyí ɖɔ mǐ ni d’alɔ ye bonu ye ni yí wǎn nú Tɔ́ mǐtɔn Jehovah bo nɔ gbeji n’i. Enɛ wu ɔ, enyi mǐ na tɛɖɛ̌ Mɛ alɔkpa e Jehovah nyí é jí ɔ, mǐ ɖó na nɔ ɖè jijɔ Tɔn e dɔn mɛ lɛ é xlɛ́. (Xà Ezayíi 63:7.) Enyi mǐ nɔ kplɔ́n nǔ mɛ lɛ gbɔn mɔ̌ ɔ, mǐ na d’alɔ ye bɔ ye na yí wǎn nú Jehovah bo na lɛ́ setónú n’i, ɖó ye jló na nɔ gbeji n’i wutu.

20. Etɛ jí mǐ ka na ɖɔ xó dó ɖò xóta e bɔ d’ewu é mɛ?

²⁰ Amɔ̌, nɛ̌ mǐ ka sixu kúdeji ɖɔ nǔwalɔ mǐtɔn lɛ kpo mɛkplɔnkplɔn mǐtɔn kpo nɔ zɔ́n bɔ mɛ ɖevo lɛ nɔ ɖó linlin ɖagbe dó nyikɔ Jehovah tɔn wu, bo nɔ sɛkpɔ́ ɛ gbɔn? Xóta e bɔ d’ewu é na na xósin nú nǔkanbyɔ enɛ.