NǓKPLƆNKPLƆN 40
Nɛ̌ Mǐ ka Sixu Nyí Mɛ Mímɛ́ Ðò Mawu Nukúnmɛ Gbɔn?
Mǐ ni ɖɔ ɖɔ nɔ wanyiyinɔ ɖé ɖò nǔ sɔ́ nú vǐ sunnu tɔn kpɛví wɛ bonu é na yì wemaxɔmɛ. É lɛwǔ n’i lobo dó nǔ e mɛ́ ganji lɛ é n’i. Enɛ na zɔ́n bɔ lanmɛ vǐ ɔ tɔn na ɖò ganji, bo na lɛ́ xlɛ́ mɛ ɖevo lɛ ɖɔ mɛjitɔ́ tɔn lɛ ɖò nukún kpé dó wǔtu tɔn wɛ ganji. Mɔ̌ ɖokpo ɔ, Tɔ́ mǐtɔn jixwé tɔn ɔ, Jehovah, jló ɖɔ mǐ ni nɔ mimɛ̌ jí ɖò agbaza lixo, bo lɛ́ nɔ mimɛ̌ jí ɖò lee mǐ nɔ lin nǔ, ɖɔ xó, bo lɛ́ wà nǔ gbɔn é lixo. Nú mǐ nɔ mimɛ̌ jí ɔ, é nɔ hɛn lè wá nú mǐɖesunɔ bo nɔ lɛ́ wlí yɛ̌yi n’i.
1. Nɛ̌ mǐ ka sixu nɔ mimɛ̌ jí ɖò agbaza lixo gbɔn?
Jehovah byɔ mǐ ɖɔ: “Mi nyí mɛ mímɛ́.” (1 Piyɛ́ɛ 1:16) Nú mǐ na nyí mɛ mímɛ́ ɔ, walɔ mǐtɔn kpo agbaza mǐtɔn kpo bǐ ɖó na mɛ́. Bo na dó mɛ́ ɖò agbaza lixo ɔ, mǐ ɖó na nɔ lɛwǔ hwɛhwɛ, bɔ avɔ mǐtɔn lɛ, xwé mǐtɔn kpo mɔ̌to alǒ kɛkɛ mǐtɔn kpo ɖó na fɛ́wǔ bo ɖò mimɛ̌ jí. Mǐ sixu lɛ́ ɖ’alɔ ɖò Kpléxɔ Axɔ́suɖuto ɔ tɔn mǐtɔn hinhɛn ɖó mimɛ̌ jí mɛ. Enyi mǐ nɔ mimɛ̌ jí ɖò agbaza lixo ɔ, mǐ nɔ wlí yɛ̌yi nú Jehovah.—2 Kɔlɛntinu lɛ 6:3, 4.
2. Bo na dó nyí mɛ mímɛ́ ɔ, zinzán tɛ lɛ mǐ ka ɖó na nyi alɔ na?
Biblu byɔ mǐ vɛ́návɛ́ná ɖɔ mǐ ni “slá wǔ nú agbaza kpo [gbigbɔ] kpo.” (2 Kɔlɛntinu lɛ 7:1) Tinmɛ enɛ tɔn wɛ nyí ɖɔ mǐ ɖó na nyi alɔ nú nǔ ɖebǔ e na hɛn nǔ gblé dó agbaza mǐtɔn alǒ taglomɛ mǐtɔn wu é. Linlin mǐtɔn lɛ ɖó na nɔ nyɔ́ Jehovah nukúnmɛ. Enɛ wu ɔ, mǐ ɖó na wà nǔ e wu mǐ kpé é bǐ bo na nyi alɔ nú linlin masɔgbe lɛ. (Ðɛhan 19:15) Mǐ nɔ lɛ́ dó gǎn bɔ xó e nɔ tɔ́n sín nu mǐtɔn mɛ lɛ é nɔ nyí xó mímɛ́ lɛ.—Xà Kolosinu lɛ 3:8.
Nǔ ɖevo tɛ lɛ ka sixu hɛn mǐ kwiji ɖò agbaza alǒ walɔ lixo? Nǔɖe lɛ tíìn bo sixu hɛn agbaza mǐtɔn gblé. Enɛ wu ɔ, mǐ nɔ nyi alɔ nú nǔ mɔ̌hun lɛ, ɖi azɔ nunu, noix de bétel alǒ ama coca tɔn ɖuɖu, kpo gěe zinzán nyi dò kpo. Nú mǐ nyi alɔ nú nǔ enɛ lɛ ɔ, lanmɛ mǐtɔn nɔ nɔ ganji, bɔ mǐ nɔ ɖexlɛ́ ɖɔ mǐ ɖó sísí nú nǔnina e gbɛ̀ nyí é. Mǐ nɔ lɛ́ dó gǎn bo nɔ nɔ mimɛ̌ jí ɖò walɔ lixo, gbɔn xwi ɖiɖí xá mɛ̌ sísɔ́ dó d’ayihun kpo fɔtóo nǔbliblíwiwa tɔn kpinkpɔn kpo gblamɛ. (Ðɛhan 119:37; Efɛzinu lɛ 5:5) É vɛwǔ bɔ è na ɖu ɖò zinzán enɛ lɛ jí, amɔ̌, Jehovah sixu d’alɔ mǐ bɔ mǐ na wà mɔ̌.—Xà Ezayíi 41:13.
BA DÒ NÚ NǓ D’EJI
Ba dò nú lee mimɛ̌jininɔ ɖò agbaza lixo nɔ wlí yɛ̌yi nú Jehovah gbɔn é, bo lɛ́ kpɔ́n lee è sixu ɖu ɖò nǔwalɔ kwijikwiji lɛ jí gbɔn é.
3. Mimɛ̌jininɔ ɖò agbaza lixo nɔ wlí yɛ̌yi nú Jehovah
Enyi mǐ gbéjé sɛ́n e Jehovah na Izlayɛli hwexónu tɔn lɛ é kpɔ́n ɔ, mǐ sixu mɔ linlin e é nɔ ɖó dó mimɛ̌jininɔ wu é. Xà Tíntɔ́n 19:10 kpo 30:17-19 kpo, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:
Etɛ wemafɔ enɛ lɛ ka ɖexlɛ́ dó linlin e Jehovah nɔ ɖó dó mimɛ̌jininɔ ɖò agbaza lixo wu é wu?
Aca ɖagbe tɛ lɛ ka na d’alɔ we bɔ a na nɔ mimɛ̌ jí ɖò agbaza lixo?
Mimɛ̌jininɔ ɖò agbaza lixo nɔ byɔ hwenu kpo gǎndidó kpo. Amɔ̌, nú mǐ na bo nɔ nɔ fí ɖebǔ, nyí dɔkunnɔ alǒ wamamɔnɔ ɔ, é sixu kpa mǐ. Xò VIDEO ɔ, enɛ gudo hǔn, mi ɖɔ xó ɖó kpɔ́ dó nǔkanbyɔ e bɔ d’ewu é jí.
Nɛ̌ nǔɖokan mǐtɔn lɛ hinhɛn ɖó tito jí kpo mimɛ̌ jí kpo ka nɔ sɔ́ Mawuxóɖiɖɔzɔ́ mǐtɔn sù gbɔn?
4. Ðu ɖò nǔwalɔ nyanya lɛ jí bǐ mlɛ́mlɛ́
Jehovah kpéwú bá d’alɔ mǐ bɔ mǐ na ɖu ɖò aca nyanya ɖebǔ jí mlɛ́mlɛ́
Enyi a nɔ nu azɔ alǒ gěe dó ɖè ayi ɖ’ayǐ na ɔ, a sixu ko tuùn lee é vɛwǔ ɖɔ è ni ɖu ɖò nǔwalɔ enɛ jí mlɛ́mlɛ́ sɔ é. Etɛ ka sixu d’alɔ? Lin tamɛ dó nǔ ɖěɖee nǔwalɔ enɛ sixu hɛn gblé dó wǔtu towe lɛ é jí. Xà Matie 22:37-39, enɛ gudo hǔn, mi ɖɔ xó ɖó kpɔ́ dó lee azɔ nunu alǒ gěe zinzán nyi dò nɔ hɛn nǔ gblé dó nǔ elɔ lɛ wu gbɔn é jí:
Kancica e è ɖó xá Jehovah é.
Xwédo mɛtɔn kpo mɛ ɖevo e lɛlɛ̌ dó mɛ lɛ é kpo.
Blǒ tuto bá ɖu ɖò nǔwalɔ nyanya ɖé jí mlɛ́mlɛ́.a Xò VIDEO ɔ.
Xà Filipunu lɛ 4:13, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:
Nɛ̌ ɖɛxixo, Biblu kplɔnkplɔn kpo kplé lɛ yiyi kpo hwɛhwɛ ka sixu na hlɔnhlɔn mɛɖé bɔ é na ɖu ɖò nǔwalɔ nyanya ɖé jí mlɛ́mlɛ́ gbɔn?
5. Ðǐ xwi xá linlin kpo nǔwalɔ kpo kwijikwiji lɛ
Xà Kolosinu lɛ 3:5, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:
Nɛ̌ mǐ ka wà gbɔn bo tuùn ɖɔ fɔtóo nǔbliblíwiwa tɔn lɛ, nǔbliblí lɛ sísɛ́dó mɛ kpo mɛ̌ sísɔ́ dó d’ayihun kpo nyí nǔ kwijikwiji ɖò Jehovah nukúnmɛ?
A ka lin ɖɔ é sɔgbe ɖɔ Jehovah ni ɖó nukún ɖɔ walɔ mǐtɔn ni mɛ́ à? Etɛwu?
Kpɔ́n lee a sixu ɖí xwi xá linlin kwijikwiji lɛ gbɔn é. Xò VIDEO ɔ.
Jezu zán nǔjlɛdonǔwu ɖé dó xlɛ́ ɖɔ mǐ ɖó na kánɖeji bo na wà nǔ e ɖò dandan é bo na dó nɔ mimɛ̌ jí ɖò walɔ lixo. Xà Matie 5:29, 30, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:
Jezu ɖò ɖiɖɔ wɛ ɖɔ mǐ ni gblewǔ mǐɖée ǎ có, é ɖexlɛ́ ɖɔ mǐ ɖó na ɖè afɔ ɖé. Afɔ alɔkpa tɛ mɔ̌ mɛɖé ka sixu ɖè bo na dó nyi alɔ nú linlin kwijikwiji lɛ?b
Enyi a ɖò xwi ɖí wɛ bo na ɖu ɖò linlin kwijikwiji lɛ jí wɛ ɔ, gǎndidó towe lɛ nɔ xɔ akwɛ nú Jehovah. Xà Ðɛhan 103:13, 14, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:
Enyi a ɖò xwi ɖí xá aca kwijikwiji ɖé wɛ wɛ ɔ, nɛ̌ wemafɔ enɛ ka dó wusyɛn lanmɛ nú we bɔ a na kpò ɖò xwi ɔ ɖí wɛ gbɔn?
Ma jó gbè ó!
É bɔwǔ bɔ è na ɖɔ: ‘É kpa mì ǎ, na gbɔ bo gbɔjɛ.’ Amɔ̌, lin tamɛ dó nǔ elɔ jí: Enyi wezunkantɔ́ ɖé klɛ́n afɔ bo j’ayǐ ɔ, enɛ ko xlɛ́ ɖɔ é xò wezun kínkán ɔ kpò ǎ, mɔ̌ jɛn é ma ɖó na lɛ́vɔ bɛ́ wezun ɔ kínkán sín dò ǎ é nɛ. Mɔ̌ ɖokpo ɔ, nú a ɖò xwi ɖí xá walɔ kwijikwiji ɖé wɛ, bo klɛ́n afɔ ɖokpo hǔn, nǔ bǐ ko fó ǎ. Mɔ̌ jɛn enɛ ma súnsún nukɔnyiyi e a ko ɖó lɛ é ǎ é nɛ. Nú è ɖò huzuhuzu lɛ bló wɛ ɔ, è nɔ klɛ́n afɔ jɛn wɛ. Ma jó gbè ó! Kpo alɔdó Jehovah tɔn kpo ɔ, a sixu ɖu ɖò aca nyanya ɖé jí bǐ mlɛ́mlɛ́.
MƐÐÉ LƐ ÐƆ: “É ko yí hun ce. Un sixu jó dó ǎ.”
Wemafɔ tɛ a ka sixu zán dó xlɛ́ mɛ ɔ ɖɔ kpo alɔdó Jehovah tɔn kpo ɔ, é sixu jó aca nyanya ɖé dó?
ETƐ LƐ A KA KPLƆ́N?
Enyi mǐ hɛn agbaza mǐtɔn, linlin mǐtɔn kpo walɔ mǐtɔn kpo ɖó mimɛ̌ jí ɔ, mǐ nɔ hɛn xomɛ Jehovah tɔn hun.
Vɔ̌gbɔnji
Etɛwu é ka ɖò taji tawun ɖɔ mǐ ni nyí mɛ mímɛ́?
Nɛ̌ a ka sixu nyí mɛ mímɛ́ ɖò agbaza lixo gbɔn?
Nɛ̌ a ka sixu hɛn linlin towe lɛ kpo walɔ towe kpo ɖó mimɛ̌ jí gbɔn?
KÍJÉ
Nú a na bo tlɛ nyí wamamɔnɔ ɔ, nǔ klewun klewun tɛ lɛ a ka sixu wà bo na dó nyí mɛ mímɛ́ ɖò agbaza lixo?
Kpɔ́n afɔ tawun tawun e a sixu ɖè bo na ɖó azɔ nunu te lɛ é.
“Lee È Sixu Ðó Azɔ Nunu Te Gbɔn É” (Réveillez-vous!, mai 2010)
Gbějé nǔ e fɔtóo nǔbliblíwiwa tɔn nɔ jì lɛ é kpɔ́n.
“Fɔtóo Nǔbliblíwiwa Tɔn Lɛ: Ye Nyí Awovínú Ǎ Wɛ À Alǒ Ye Nyí?” (Atɔxwɛ [Flansegbe], 1er août 2013)
Kpɔ́n lee nya ɖé kpéwú bo ɖó fɔtóo nǔbliblíwiwa tɔn lɛ kpinkpɔn te gbɔn é.
a Xóta “Lee È Sixu Ðó Azɔ Nunu Te Gbɔn É,” ee ɖò akpáxwé Kíjé glɔ́ ɖò nǔkplɔnkplɔn elɔ mɛ é tinmɛ afɔ tawun tawun ɖěɖee è sixu ɖè bo na ɖu ɖ’eji bǐ mlɛ́mlɛ́ lɛ é.
b Nú a na mɔ alɔdó bo na dó ɖu ɖò mɛ̌ sísɔ́ dó d’ayihun jí hǔn, kpɔ́n xóta “Comment arrêter de me masturber?” ɖò wema Les jeunes s’interrogent. Réponses pratiques, Akpáxwé 1, wemata 25 mɛ.