Xomɛfífá: Nɛ̌ Mǐ ka Nɔ Ðu Lè Tɔn Gbɔn?

Saraa tinmɛ ɖɔ: “Un nyí mɛɖé bo nɔ kú winnya, bo nɔ lɛ́ ɖeji dó nyiɖée wu ganji ǎ. Enɛ wu ɔ, enyi un ɖò kpɔ́ xá mɛ e nɔ ganjɛ yeɖée wu dín, bo nɔ lɛ́ nylahun lɛ é ɔ, un nɔ vo ǎ. Amɔ̌, un nɔ vo ɖò mɛ e nɔ fá xomɛ bo nɔ lɛ́ zé éɖée hwe é kpá. Un sixu ɖɔ lee nǔ cí nú mì é nú mɛ mɔhun, bo lɛ́ ɖɔ xó dó tagba ce lɛ wu n’i. Mɛ mɔhun lɛ wɛ un nɔ zun xɔ́ntɔn vívɛ́ xá.”

Xó e Sara ɖɔ lɛ é xlɛ́ ɖɔ enyi mǐ nɔ fá xomɛ ɔ, mɛ ɖevo lɛ na ba na nyí xɔ́ntɔn mǐtɔn. Jehovah lɔ yí wǎn nú xomɛfífá. Xó tɔn dó wusyɛn lanmɛ nú mǐ ɖɔ mǐ ni ‘sɔ́ xomɛfífá dó awu ɖɔhun.’ (Kolo. 3:12) Etɛ ka nyí xomɛfífá? Nɛ̌ Jezu ka ɖè xomɛfífá xlɛ́ gbɔn? Nɛ̌ jijɔ enɛ ka sixu bló bɔ mǐ na ɖó awǎjijɛ hugǎn gbɔn?

Xomɛfífá ɔ, jijɔ ɖé wɛ bɔ fífá gbɛ́tɔ́ lɛ wɛ nɔ ɖexlɛ́. Xomɛfátɔ́ nɔ wà nǔ xá mɛ ɖevo lɛ kpo xomɛnyínyɔ́ kpo, bo nɔ kpéwú bo nɔ fá xomɛ bo nɔ lɛ́ ɖu ɖò éɖée jí, hwenu e ninɔmɛ e nɔ dó xomɛsin nú mɛ lɛ é kpannukɔn ɛ é.

Ðò Biblu mɛ ɔ, è zán xókwín Glɛkigbe tɔn e è lilɛ dó “xomɛfífá” é dó dó gesí sɔ́ gbě mɛ tɔn e è kplɔ́n b’ɛ nɔ ɖu ɖò éɖée jí é ɖé. È kplɔ́n sɔ́ ɔ wu wɛ é na vɔ́da ǎ. É kpò ɖò hlɔnhlɔn ɖó wɛ. Mɔ̌ ɖokpo ɔ, é nyí da wɛ xomɛfátɔ́ ɖé vɔ̌ ǎ; é nyɔ́ wà ɔ, é ɖó hlɔnhlɔn fɛɛ. Etɛwu mǐ ka sixu ɖɔ mɔ̌? Ðó é kpéwú bo sixu ɖu ɖò jlǒ hwɛhuhu tɔn e é ɖó lɛ é jí, bo na lɛ́ nɔ fífá mɛ xá mɛ ɖevo lɛ wutu.

Mǐ sixu lin nǔ gbɔn lě, ‘Un nyí xomɛfátɔ́ ɖò jɔwamɔ linu ǎ.’ Gbɛ̀ e mɛ xomɛ sinsin kpo suúlumaɖó kpo gɔ́ é mɛ wɛ mǐ ɖè, enɛ wu ɔ, é sixu vɛwǔ nú mǐ bɔ mǐ na fá xomɛ. (Hlɔ. 7:19) É ɖò wɛn ɖɔ é nɔ byɔ gǎndidó tawun cobɔ è nɔ sɔnǔ nú xomɛfífá, amɔ̌, gbigbɔ mímɛ́ Jehovah tɔn na d’alɔ mǐ bɔ mǐ na kánɖeji bo na nɔ fá xomɛ. (Ga. 5:22, 23, nwt) Etɛwu mǐ ka ɖó na dó gǎn bo sɔnǔ nú xomɛfífá?

Xomɛfífá nyí jijɔ ɖé bo nɔ dɔn gbɛtɔ́ lɛ. Lee Sara e xó mǐ ɖɔ wá yì é ɖó ayi wu gbɔn é ɔ, è nɔ vo ɖò xomɛfátɔ́ lɛ kpá. Jezu nyí kpɔ́ndéwú nukúnɖeji mɛ e nɔ fá xomɛ bo nɔ lɛ́ nyɔ́ xomɛ é tɔn ɖé. (2 Kɔ. 10:1) Yɔkpɔvu e ma tuùn i ǎ lɛ é tlɛ nɔ ba na sɛkpɔ́ ɛ.—Mak. 10:13-16.

Xomɛfífá nɔ cyɔn alɔ mǐ kpo mɛ e lɛlɛ̌ dó mǐ lɛ é kpo jí. Enyi mǐ nɔ fá xomɛ ɔ, mǐ na nɔ yawǔ sin xomɛ ǎ. (Nǔx. 16:32) Mǐ na dó xomɛsin nú mɛ ɖevo lɛ ǎ, kaka jɛ mɛ e mǐ yí wǎn na lɛ é jí, enɛ na zɔ́n bɔ mǐ na nɔ dóhwɛ mǐɖée ǎ. Xomɛfífá nɔ cyɔn alɔ mɛ e lɛlɛ̌ dó mǐ lɛ é jí bɔ ye nɔ sè wuvɛ̌ ǎ, ɖó mǐ nɔ ɖu ɖò mǐɖée jí wutu.

Jezu ɖó azɔ̌ syɛnsyɛn lɛ bo na wà bɔ alɔnu tɔn lɛ́ ján tawun có, é nɔ fá xomɛ dó mɛ bǐ wu. Mɛ gegě ɖò xwi ɖí xá wuvɛ̌ lɛ wɛ ɖò hwetɔnnu bɔ è lɛ́ dó agban kpinkpɛn nú ye, bɔ ye ɖó hudo kɔfánúmɛ tɔn. Hwenu e Jezu ɖɔ “mi wá gɔ̌n ce; . . . ɖó mɛfífá wɛ un nyí, bo nyí xomɛnyɔtɔ́” é ɔ, kpɔ́n lee enɛ na ko dó gbɔ nú ye sɔ é!—Mat. 11:28, 29.

Nɛ̌ mǐ ka sixu kplɔ́n bo nɔ fá xomɛ Jezu ɖɔhun gbɔn? Mǐ nɔ kplɔ́n Xó Mawu tɔn bá dó tuùn lee Jezu wà nǔ xá gbɛtɔ́ lɛ gbɔn é kpo lee é wà nǔ gbɔn ɖò ninɔmɛ vɛwǔ lɛ mɛ é kpo. Mɔ̌ mɛ ɔ, enyi ninɔmɛ e nɔ tɛ́n xomɛfífá mǐtɔn kpɔ́n lɛ é kpannukɔn mǐ ɔ, mǐ nɔ tɛ́n kpɔ́n bo nɔ wà nǔ Jezu ɖɔhun. (1 Pi. 2:21) Mǐ ni gbéjé nǔ e d’alɔ Jezu bɔ é fá xomɛ é atɔn kpɔ́n.

Jezu nɔ sɔ́ éɖée hwe. Jezu nyí mɛfífá, bo nɔ lɛ́ sɔ́ éɖée hwe. Biblu ɖɔ xó dó jijɔ we enɛ lɛ wu ɖó bǔ, ɖó xomɛfífá cá kan tlɔlɔ xá mɛɖéesɔ́hwe. (Efɛ. 4:1-3) Etɛwu nǔ ka nyí mɔ̌?

Mɛɖéesɔ́hwe na d’alɔ mǐ bɔ nǔ e mɛ ɖevo lɛ nɔ ɖɔ dó mǐ wu é na nɔ zɔ́n bɔ mǐ na nɔ yawǔ sin xomɛ ǎ. Nɛ̌ Jezu ka wà nǔ gbɔn hwenu e mɛ lɛ mɔ xó ɖɔ dó wǔ tɔn ɖò ali agɔ nu bo ɖɔ ɖɔ é nyí “adɔtɔ́nɔ” bo lɛ́ nyí “vɛ̌ɛnutɔ́” é? É xlɛ́ ɖɔ adingban wɛ nyí xó enɛ gbɔn gbɛzinzan tɔn gblamɛ. Kpo xomɛnyínyɔ́ kpo wɛ é ɖɔ ɖɔ “nǔnywɛ Mawu tɔn ɖè hwɛjijɔ éɖesunɔ tɔn xlɛ́ gbɔn nǔwiwa tɔn lɛ mɛ.”—Mat. 11:19.

Enyi mɛɖé ma lin tamɛ kpɔ́n cobo mɔ xó ɖɔ dó sinmɛ agbaza towe tɔn, mɛ̌ e a ɖó é, alǒ fí e a gosin é wu ǎ hǔn, dǒ gǎn bo wà nǔ kpo xomɛnyínyɔ́ kpo. Peter e nyí mɛxo agun tɔn ɖé ɖò Afrique du Sud é ɖɔ: “Enyi mɛɖé ɖɔ xó ɖé b’ɛ ɖ’akpɔ nú mì ɔ, un nɔ kanbyɔ nyiɖée ɖɔ, ‘Nɛ̌ Jezu ka na ko wà nǔ gbɔn?’” É ɖɔ gɔ́ na ɖɔ: “Un kplɔ́n bɔ akpɔ nɔ yawǔ ɖó mì ǎ.”

Jezu tuùn ɖɔ gbɛtɔ́ lɛ nyí hwɛhutɔ́. Ahwanvu Jezu tɔn lɛ nɔ jló na wà nǔ e sɔgbe é, amɔ̌ hwɛhutɔ́ e ye nyí é nɔ zɔ́n bɔ ye nɔ kpéwú hwebǐnu ǎ. Ði kpɔ́ndéwú ɔ, ɖò zǎn e jɛ nukɔn nú kú Jezu tɔn é mɛ ɔ, Piyɛ́ɛ, Jaki kpo Jaan kpo nɔ wunzɛn xá Jezu, lee é byɔ ye gbɔn é ǎ. Jezu tuùn ɖɔ ‘gbɛtɔ́ ɖó jlǒ ɖagbe, agbaza tɔn kún ka ɖó gǎn ɖé ó.’ (Mat. 26:40, 41) Hwɛjijɔ enɛ zɔ́n bɔ mɛsɛ́dó tɔn lɛ sín akpɔ nɔ yawǔ ɖó è ǎ.

Mandy nyí nɔví nyɔnu ɖé bo ɖó aca bo nɔ mɔ xó ɖɔ dó mɛ ɖevo lɛ wu tawun, amɔ̌ dìn ɔ, é ɖò gǎn dó wɛ tawun bo na fá xomɛ Jezu ɖɔhun. É ɖɔ: “Un nɔ tɛ́n kpɔ́n bo nɔ flín ɖɔ gbɛtɔ́ lɛ bǐ wɛ nyí hwɛhutɔ́, bo nɔ sɔ́ ayi ɖó jijɔ ɖagbe yetɔn lɛ jí Jehovah ɖɔhun.” Wuvɛ̌ e Jezu nɔ sè xá gbɛtɔ́ hwɛhutɔ́ lɛ é ni bo d’alɔ hwi lɔ bonu a ni nɔ wà nǔ xá mɛ ɖevo lɛ kpo xomɛfífá kpo.

Jezu nɔ jó ninɔmɛ lɛ bǐ dó nyi Mawu lɔ mɛ. Jezu dɛ ɖò nǔagɔwaxámɛ nu, hwenu e é ɖò ayikúngban jí é. È ɖó linlin agɔ dó wǔ tɔn, gbɛ́ wǎn n’i, bo lɛ́ xò daka wǔ tɔn. Nǔ ɖò mɔ̌ có, é kpò ɖò xomɛ fá wɛ ɖó é ɖeji dó “Mawu e nɔ ɖɔhwɛ kpo hwɛjijɔ kpo é” wu. (1 Pi. 2:23) Jezu tuùn ɖɔ Tɔ́ emitɔn jixwé tɔn ɔ na kpé nukún emi wu, bo na ɖeɖɛ nǔ agɔ e wà xá emi wɛ è ɖè lɛ é ɖò hwetɔnnu.

Enyi è wà nǔ agɔ xá mǐ bonu mǐ wà nǔ kpo xomɛsin kpo ɔ, ninɔmɛ ɔ sixu lɛ́ nyla d’eji. Enɛ wɛ zɔ́n bɔ Mawuxówema ɔ flín mǐ ɖɔ: “Mɛ e sin xomɛ ɔ nɔ wà nǔ e sɔgbe ɖò Mawu nukúnmɛ é ǎ.” (Ja. 1:20) Enyi mǐ tlɛ sin xomɛ kpo hwɛjijɔ kpo ɔ, hwɛhutɔ́ e mǐ nyí é sixu zɔ́n bɔ mǐ sixu wà nǔ e ma sɔgbe ǎ é.

Nɔví nyɔnu ɖé nɔ nɔ Allemagne bo nɔ nyí Cathy, bo ɖó aca bo nɔ lin nǔ gbɔn lě, ‘Enyi a ma jɛhun dó hwiɖée jí ǎ ɔ, mɛ ɖevo ɖě na wà mɔ̌ ɖó tɛn towe mɛ ǎ.’ Amɔ̌, hwenu e é kplɔ́n bo nɔ ɖeji dó Jehovah wu é ɔ, linlin tɔn ɖyɔ. É ɖɔ: “É sɔ́ byɔ ɖɔ má nɔ jɛhun dó nyiɖée jí ǎ. Ðó un tuùn ɖɔ Jehovah mɔ nǔ jɛ ninɔmɛ lɛ bǐ wu ganji wutu ɔ, un nɔ vo bo nɔ wà nǔ kpo xomɛfífá kpo.” Enyi mɛɖé wà nǔ agɔ dó we kpɔ́n ɔ, kpɔ́ndéwú Jezu tɔn xwixwedó bo ɖeji dó Mawu wu na d’alɔ hwi lɔ bɔ a na kpò ɖò xomɛ fá wɛ.

Jezu xlɛ́ ɖɔ enyi mǐ jló na ɖó awǎjijɛ ɔ, mǐ ɖó na nɔ fá xomɛ. É ɖɔ, “Nǔ nyɔ́ nú mɛfífá lɛ.” (Mat. 5:5) Ðǒ ayi lee xomɛfífá d’alɔ ɖò ninɔmɛ e bɔ d’ewu lɛ é mɛ gbɔn é wu.

Xomɛfífá nɔ ɖu ɖò xomɛsin jí ɖò alɔwliwli mɛ. Robert e nyí nɔví sunnu ɖé bo nɔ nɔ Australie é ɖɔ: “Gbè vɛ́sin e un ma nɔ jló na dó nú asì ce ǎ lɛ é gegě wɛ un dó n’i. Amɔ̌, è sɔ́ sixu súnsún xó e è ko ɖɔ kpo xomɛsin kpo lɛ é ǎ. É vɛ́ nú mì tawun hwenu e un mɔ lě dò xó lɛ gblewǔ i sɔ é.”

“Mǐ mɛ bǐ wɛ nɔ wà nǔ nyi dò gbɔn alɔkpa gegě mɛ” ɖò xóɖiɖɔ mɛ, bɔ xó e mǐ ma lin tamɛ kpɔ́n cobo ɖɔ ǎ lɛ é sixu dɔn tagba wá alɔwliwli mǐtɔn mɛ. (Ja. 3:2) Ðò ninɔmɛ enɛ lɛ mɛ ɔ, xomɛfífá na d’alɔ mǐ bɔ mǐ na cí xwíi bo hɛn nu mǐtɔn.—Nǔx. 17:27.

Robert dó gǎn tawun bo na dó nɔ fá xomɛ bo na nɔ lɛ́ ɖu ɖò éɖée jí. Etɛ mɛ é ka tɔ́n kɔ dó? É ɖɔ: “Égbé ɔ, nú gbemanɔkpɔ́ ɖé wá xwetɔ́n ɔ, un nɔ dó gǎn bo nɔ ɖótó asì ce kpo sɔxwixwe kpo, bo nɔ ɖɔ xó kpo xomɛfífá kpo, lobo nɔ lɛ́ sin xomɛ ǎ. Kancica e ɖò nyi kpo asì ce kpo tɛntin é lɛ́ kpɔ́n te hugǎn.”

Xomɛfífá nɔ d’alɔ mǐ bɔ mǐ nɔ nɔ ayǐ xá mɛ ɖevo lɛ ganji. Mɛ ɖěɖee nɔ yawǔ sin xomɛ lɛ é nɔ ɖó xɔ́ntɔn gegě ǎ. Amɔ̌, xomɛfífá ka nɔ d’alɔ mǐ bɔ mǐ nɔ “hɛn bǔténinɔ [mǐtɔn] ɖó te.” (Efɛ. 4:2, 3) Cathy e xó mǐ ɖɔ wá yì é ɖɔ: “Xomɛfífá nɔ d’alɔ mì bɔ un nɔ nɔ kpɔ́ xá mɛ ɖevo lɛ, enyi é na bo tlɛ vɛwǔ bonu è na nɔ kpɔ́ xá ye mɛɖé lɛ ɔ nɛ.”

Xomɛfífá nɔ zɔ́n bɔ è nɔ ɖó fífá ayi mɛ tɔn. Biblu cá “nǔnywɛ e gosin Mawu gɔ́n ɔ” ɖó kpɔ́ xá xomɛfífá kpo fífá kpo. (Ja. 3:13, 17) Xomɛfátɔ́ sín ‘ayi nɔ j’ayǐ.’ (Nǔx. 14:30) Martin e dó gǎn tawun bo sɔnǔ nú xomɛfífá é ɖó ayi wu ɖɔ, “Dìn ɔ, un sɔ́ nɔ zyan vǎ d’eji hwebǐnu ɖɔ è ɖó na wà nǔ lɛ lee un lin gbɔn é ǎ, bo nɔ lɛ́ ɖu vivǐ fífá ayi mɛ tɔn kpo awǎjijɛ kpo tɔn hugǎn.”

Nǔgbo wɛ ɖɔ é sixu byɔ ɖɔ mǐ ni dó gǎn tawun cobo sɔnǔ nú xomɛfífá. Nɔví sunnu ɖé ɖɔ: “Nú è na ɖɔ xó jɔ xó ɔ, kaka jɛ égbé ɔ, xomɛ nɔ sin mì tawun ɖò ninɔmɛ ɖé lɛ mɛ.” Amɔ̌, Jehovah e dó wusyɛn lanmɛ nú mǐ ɖɔ mǐ ni nya xomɛfífá gbé é, na gɔ́ alɔ nú mǐ bɔ mǐ na kpéwú. (Eza. 41:10; 1 Tim. 6:11) É sixu “wà azɔ̌ ɖò [mǐ] wu, bɔ [mǐ] na nyɔ́ yì fó”; é sixu “na hlɔnhlɔn [mǐ].” (1 Pi. 5:10) É jɛ hwetɔnnu ɔ, mǐ sixu ɖè “xomɛfífá kpo xomɛnyínyɔ́ Klisu tɔn kpo” xlɛ́ mɛsɛ́dó Pɔlu ɖɔhun.—2 Kɔ. 10:1.