Ee ye wá fí ɖagbeɖagbe enɛ e ɖò olivutín lɛ tɛntin é ɔ, Jezu jó mɛsɛ́dó lɛ tantɔn dó. Vlafo ye na ko cí jikpá ɔ sín ali nu, ɖó é ɖɔ nú ye ɖɔ: “Mi jinjɔn fí, bonu ma yì dɔ̌n bo yì xoɖɛ bo wá.” Jezu kplá mɛsɛ́dó lɛ atɔn, Piyɛ́ɛ, Jaki kpo Jaan kpo, bɔ ye sɛyi nukɔn ɖò jikpá ɔ mɛ. Ado jɛ huhu i jí tawun bɔ é ɖɔ nú ye mɛ atɔn lɛ ɖɔ: “Aluwɛ e nɔ dɔn mɛ yì kú é mɛ wɛ un ɖè; mi nɔ fí, bo nɔ wunzɛn xá mì.”​—Matie 26:36-38.

Sín jixwé ɔ, Jezu ko mɔ lee mɛ e Hlɔmanu lɛ nɔ hu é nɔ sè wuvɛ̌ gbɔn é. Dìn e é nyí gbɛtɔ́, bo sixu kú nǔblawu nú mɛ bo lɛ́ sè wuvɛ̌ ɖò lanmɛ é ɔ, nǔ e ɖò te kpɔ́n ɛ é jí wɛ ayi tɔn ɖè ǎ. É nyɔ́ wà ɔ, ɖò taji hú mɔ̌ ɔ, é ɖò kúsukpɔ xò wɛ ɖó é mɔ ɖɔ kú e emi na kú adakaxotɔ́ baɖabaɖa ɖé ɖɔhun é sixu kɔn cí dó Tɔ́ emitɔn sín nyikɔ wu. Ðò ganxixo yɔywɛ ɖé mɛ dìn ɔ, è na xwè é nyì atín wu mɛ e nyla nu dó Mawu wu é ɖé ɖɔhun.