Mi nɔ zán nǔɖíɖó lɛ́ dó kplɔ́n nǔ vǐ mitɔn lɛ́ dó Jexóva wú

 1. Étɛ́ mɛjitɔ́ lɛ́ ka nɔ ba nú vǐ yětɔn lɛ́?

MƐJITƆ́ lɛ́ mi, mǐ tuun ɖɔ mi nɔ ba ná d’alɔ vǐ mitɔn lɛ́, bónú yě ná kplɔ́n bá tuun Jexóva, lobo lɛ́ yí wǎn n’i. È nɔ mɔ Mawu ǎ có, nɛ̌ mi ka sixú d’alɔ vǐ mitɔn lɛ́ bɔ yě ná tuun ɖɔ é tíin nǔgbó, bo lɛ́ zun xɔ́ntɔn vívɛ́ xá ɛ gbɔn?—Ja. 4:8.

 2. Nɛ̌ mɛjitɔ́ lɛ́ ka sixú kplɔ́n nǔ vǐ yětɔn lɛ́ dó jijɔ Jexóva tɔn lɛ́ wú gbɔn?

² Ali tají e nu è sixú d’alɔ vǐ lɛ́ bɔ yě zun xɔ́ntɔn vívɛ́ xá Jexóva ɖe é ɖokpó wɛ nyí ɖɔ è ní kplɔ́n Biblu xá yě. (2 Tim. 3:14-17) Amɔ̌, Biblu lɛ́vɔ́ ɖe ali ɖěvo e nu mɛ wínnyáwínnyá lɛ́ sixú kplɔ́n nǔ dó Jexóva wú ɖe é xlɛ́. Ðo wěma Nǔnywɛ́xó tɔn mɛ ɔ, vǐtɔ́ ɖé flín vǐ súnnu tɔn nyi wɛn ɖɔ é ní ma gɔn ayi ɖó jijɔ Jexóva tɔn e è nɔ mɔ ɖo nǔ e é dá lɛ́ é mɛ é wú gbeɖé ó. (Nǔx. 3:19-21) Mǐ ná gbéjé ali e nu mɛjitɔ́ lɛ́ sixú zán nǔɖíɖó lɛ́ dó d’alɔ vǐ yětɔn lɛ́ bɔ yě ná kplɔ́n nǔ dó jijɔ Jexóva tɔn lɛ́ wú ɖe é ɖé lɛ́ kpɔ́n.

 3. Alɔ tɛ́ mɛjitɔ́ lɛ́ ka ɖó ná dó vǐ yětɔn lɛ́?

³ Biblu ɖɔ ɖɔ “è nɔ mɔ jijɔ [Mawu] tɔn e gbɛtɔ́ ma sixú mɔ ǎ lɛ́ é gannaganna sín hwenu e é dá gbɛ ɔ é, ɖó yě jɛ wě ɖo nǔ e é bló lɛ́ é mɛ.” (Hlɔ̌. 1:20) Mɛjitɔ́ lɛ́ mi, mi sixú ɖu vǐví hwenu zínzán ɖó kpɔ́ xá vǐ mitɔn lɛ́ tɔn hwenu e mi kpó yě kpó tɔ́n é. Mi nɔ zán hwenu énɛ́ dó d’alɔ vǐ mitɔn lɛ́ bónú yě ní mɔ lěe “nǔ e [Jexóva] bló lɛ́ é” cá kan xá jijɔ tɔn ɖaaɖagbe lɛ́ gbɔn é. Mi nú mǐ ní kpɔ́n nǔ e kpɔ́ndéwú Jezu tɔn sixú kplɔ́n mɛjitɔ́ lɛ́ ɖo ali énɛ́ nu é.

 4. Nɛ̌ Jezu ka zán nǔɖíɖó lɛ́ dó kplɔ́n nǔ ahwanvú tɔn lɛ́ gbɔn? (Luki 12:24, 27-30)

⁴ Ð’ayi lěe Jezu zán nǔɖíɖó lɛ́ dó kplɔ́n nǔ mɛ gbɔn é wú. Ðo ninɔmɛ ɖé mɛ ɔ, é byɔ́ ahwanvú tɔn lɛ́ ɖɔ yě ní kpɔ́n avǔnsákɔwó lɛ́ kpó folówa lɛ́ kpó. (Xa Luki 12:24, 27-30.) Jezu hɛn ɔ, é ná ko ɖɔ xó dó kanlin, alǒ atín wú, amɔ̌, xɛ kpó folówa kpó e ahwanvú tɔn lɛ́ tuun ganjí é wú wɛ é ɖɔ xó dó. Ahwanvú lɛ́ sixú ko nɔ mɔ avǔnsákɔwó lɛ́ bɔ yě nɔ ɖo zinzɔn gbɔn ta yětɔn lɛ́ nu wɛ, lobo nɔ mɔ folówa lɛ́ bɔ yě nɔ ɖo zǐnzɔ́n wɛ ɖo zunkan mɛ. Dǒ nukún mɛ kpɔ́n ɖɔ Jezu ɖo alɔ dlɛ́n dó nǔ énɛ́ lɛ́ wɛ hwenu e é ɖo xó ɖɔ wɛ é. Ée é ná kpɔ́ndéwú énɛ́ lɛ́ gúdo é ɔ, étɛ́ é ka wa? É kplɔ́n nǔ agbɔ̌nnɔ ɖé ahwanvú tɔn lɛ́ dó alɔhundónánǔmɛ kpó xomɛnyínyɔ́ kpó Tɔ́ tɔn tɔn wú: Jexóva ná ná nǔɖuɖu kpó avɔ kpó mɛsɛntɔ́ tɔn gbejínɔtɔ́ lɛ́, lěe é nɔ kpé nukún dó avǔnsákɔwó lɛ́ kpó folówa lɛ́ kpó wú gbɔn é.

 5. Nɛ̌ mɛjitɔ́ lɛ́ ka sixú zán nǔɖíɖó lɛ́ dó kplɔ́n nǔ vǐ yětɔn dó Jexóva wú gbɔn?

⁵ Mɛjitɔ́ lɛ́ mi, mi ka ná kplɔ́n nǔ vǐ mitɔn lɛ́, lěe Jezu nɔ kplɔ́n nǔ mɛ gbɔn é a? Mi sixú nɔ ɖɔ xó nú vǐ mitɔn dó nǔ e Jexóva dá bɔ mi yí wǎn ná tawun é ɖé wú, é sixú nyí kanlin, alǒ atín. Nú mi ɖo xó ɖɔ nú vǐ mitɔn dó nǔ énɛ́ wú wɛ ɔ, mi ɖó ná tínmɛ nǔ e nǔ énɛ́ kplɔ́n mǐ dó Jexóva wú é n’i. Énɛ́ gúdo ɔ, mi sixú kan nǔ byɔ́ vǐ mitɔn dó kanlin, alǒ atín e é yí wǎn ná hú gǎn é wú. Ényí mi nɔ ɖɔ xó dó nǔɖíɖó e dɔn ɛ hú gǎn é ɖé wú, hwenu e mi ɖo xó ɖɔ dó jijɔ Jexóva tɔn lɛ́ wú wɛ é ɔ, é ná ɖibla ɖó tó mi hú gǎn.

 6. Étɛ́ kpɔ́ndéwú e Christopher sín nɔ sɔ́ ɖ’ayǐ é ka sixú kplɔ́n mǐ?

⁶ Mɛjitɔ́ lɛ́ ɖó ná zán hwenu gěgé dó ba kanlin, alǒ atín tawun ɖé lě cóbó ɖɔ xó dó nǔ e nǔɖíɖó Jexóva tɔn énɛ́ kplɔ́n yě dó wǔ tɔn é wú wɛ a? É nyí mɔ̌ dandan ǎ. Jezu tínmɛ nǔ káká ɖé dó lěe avǔnsákɔwó lɛ́ nɔ ɖu nǔ gbɔn é, alǒ lěe folówa lɛ́ nɔ su gbɔn é wú ǎ. Ényí vǐ mitɔn na bo nɔ ba ná tuun gǒflɛ́mɛ e kúnkplá nǔ e Jexóva dá lɛ́ é ɔ, xó kléwún ɖé ɖiɖɔ, alǒ nǔ kléwún ɖé kinkanbyɔ́ ko kpé bá d’alɔ ɛ bɔ é ná mɔ nukúnnú jɛ nǔ tají ɔ mɛ. Ð’ayi nǔ e nɔví súnnu e nɔ nyí Christopher é flín dó vǔhwenu tɔn wú é wú: “Xó kléwún ɖé jɛ́n mamáa mǐtɔn nɔ ɖɔ dó d’alɔ mǐ bɔ nǔ e Mawu dá bɔ yě lɛ́ lɛ̌ dó mǐ lɛ́ é nɔ su nukún mǐtɔn mɛ. Ði kpɔ́ndéwú ɔ, ényí mǐ ɖo só lɛ́ kpá gbɔn wɛ ɔ, é sixú ɖɔ nǔ lěhun ɖé: ‘Mi kpɔ́n lěe só énɛ́ lɛ́ s’avɔ, bo lɛ́ nyɔ́ ɖɛkpɛ sɔ é. Yě xlɛ́ ɖɔ Jexóva jí wǔ ǎ cé?’ Alǒ, ényí mǐ yi xutó ɔ, é sixú ɖɔ nǔ lěhun ɖé: ‘Mi kpɔ́n lěe aslɔkɛ́ énɛ́ lɛ́ ɖó hlɔ̌nhlɔ́n sɔ é. Yě xlɛ́ ɖɔ Mawu ɖó hlɔ̌nhlɔ́n ǎ cé?’” Christopher ɖɔ: “Xó kléwún mɔ̌hun lɛ́ e xwe ali é wɛ é nɔ ɖɔ, bɔ é ka nɔ zɔ́n tamɛ lin mǐ tawun.”

 7. Nɛ̌ mi ka sixú kplɔ́n vǐ mitɔn lɛ́ bɔ yě ná nɔ lin tamɛ dó nǔɖíɖó lɛ́ jí gbɔn?

⁷ Ényí vǐ mitɔn lɛ́ ɖo susu wɛ ɔ, mi sixú kplɔ́n lěe yě ná nɔ lin tamɛ dó nǔɖíɖó lɛ́ jí hú gǎn, bo ná nɔ kplɔ́n nǔ dó jijɔ Jexóva tɔn lɛ́ wú gbɔn é yě. Mi sixú nɔ tɛ ɖɛ̌ nǔ e Mawu dá lɛ́ é ɖokpó jí nú vǐ mitɔn lɛ́, bo nɔ kanbyɔ́ yě ɖɔ: “Étɛ́ nǔ énɛ́ ka kplɔ́n mi dó Jexóva wú?” Ényí a se nǔ e vǐ towe lɛ́ lin é ɔ, é sixú jí wǔ nú we, bo lɛ́ hun xomɛ nú we.—Mat. 21:16.

 8. Ali tɛ́ ka nɔ hun nú mɛjitɔ́ e ɖo Izlayɛ́li lɛ́ é hwenu e yě nɔ ɖo yiyi wɛ ɖo “ali jí” é?

⁸ È byɔ́ mɛjitɔ́ e ɖo Izlayɛ́li lɛ́ é ɖɔ yě ní nɔ kplɔ́n sɛ́n Jexóva tɔn lɛ́ vǐ yětɔn lɛ́ hwenu e yě ɖo “ali jí” é. (Sɛ́n. 11:19) Ali lɛ́ gbɔn gletoxo e ɖo Izlayɛ́li lɛ́ é mɛ. È sixú mɔ kanlin tɛnmɛ tɛnmɛ lɛ́, xɛ vovo lɛ́ kpó folówa alɔkpa alɔkpa lɛ́ kpó. Ényí xwédo Izlayɛ́li ví lɛ́ tɔn lɛ́ ɖo yiyi wɛ ɖo ali lɛ́ xo ɔ, ali nɔ hun nú mɛjitɔ́ lɛ́ bɔ yě nɔ ɖɔ xó nú vǐ yětɔn lɛ́ dó nǔ ɖěɖěe Jexóva dá lɛ́ é wú. Ali mɔ̌hun lɛ́ sixú hun nú mi mɛ mɛjitɔ́ lɛ́, bɔ mi ná zán nǔ e Jexóva dá lɛ́ é dó kplɔ́n nǔ vǐ mitɔn lɛ́. Ð’ayi lěe mɛjitɔ́ ɖé lɛ́ wa mɔ̌ gbɔn é wú.

 9. Étɛ́ nǔ e Punitha kpó Katya kpó ɖɔ é ka sixú kplɔ́n we?

⁹ Vǐnɔ ɖé nɔ nyí Punitha, bo nɔ nɔ toxo ɖaxó Inde tɔn ɖé mɛ bo ɖɔ: “Ényí mǐ yi ba jǒnɔ xwédo mǐtɔn e ɖo gletoxo mɛ é ɔ, mǐ nɔ mɔ ɖɔ ali ɖé wɛ hun nú mǐ bɔ mǐ ná d’alɔ vǐ mǐtɔn lɛ́ bónú yě ná kplɔ́n nǔ dó nǔjíwǔ e Jexóva dá lɛ́ é wú. Un nɔ mɔ ɖɔ vǐ ce lɛ́ nɔ mɔ nukúnnú jɛ nǔɖíɖó lɛ́ wú hú gǎn, ényí yě tɔ́n sín toxo hun nukún lɛ́ mɛ ɔ nɛ́.” Mɛjitɔ́ lɛ́ mi, vǐ mitɔn lɛ́ ná wɔn hwenu e mi nɔ zán ɖó kpɔ́ xá yě ɖo fí ɖɛkpɛ ɖɛkpɛ lɛ́ é gbeɖé ǎ. Katya, éé nyí nɔví nyɔ̌nu ɖé bo nɔ nɔ Moldavie é ɖɔ: “Nǔ e un flín dó vǔhwenu ce wú bɔ é dɔn mì tawun lɛ́ é wɛ nyí hwenu e un zán kpó mɛjitɔ́ ce lɛ́ kpó ɖo gletoxo mɛ é. É su nukún ce mɛ tawun ɖɔ yě kplɔ́n nǔ mì sín hwenu e un ɖo vǔ é ɖɔ nyi ní nɔ nɔ te, bo nɔ kpɔ́n nǔ e Jexóva dá lɛ́ é, bá dó mɔ jijɔ tɔn e è ma nɔ mɔ ǎ lɛ́ é gbɔn nǔ e é dá lɛ́ é gblamɛ.”

10. Ényí mɛjitɔ́ lɛ́ mɔ ɖɔ é ná vɛ́ wǔ nú émí bɔ émí ná sɛ tɛn bo tunta glekɔ́xwé ɖé ɔ, étɛ́ yě ka sixú wa? (Kpɔ́n gbǎví “Alɔdó nú mɛjitɔ́ lɛ́.”)

¹⁰ Ényí ali ɔ ma ka hun nú we bónú a ná yi gletoxo ɖé mɛ ǎ ɔ ka lo? Amol lɔmɔ̌ nɔ nɔ Inde, é ɖɔ: “Fí e un nɔ nɔ é ɔ, ɖibla nyí kéze ɔ bǐ wɛ mɛjitɔ́ lɛ́ nɔ w’azɔ̌ ná, gɔ́ ná ɔ, hǔn dídó yi gletoxo ɖé mɛ sixú lɛ́ vɛ́ axi tawun. Amɔ̌, è sixú mɔ nǔ ɖěɖěe Jexóva dá lɛ́ é, lobo lɛ́ ɖɔ xó dó jijɔ tɔn lɛ́ wú hwenu e è yi jikpá kpɛví ɖé mɛ, alǒ hwenu e è yi síngbó ɖé jí bo ɖo nǔ kpɔ́n sɛ́dó wɛ é.” Ényí a kpɔ́n ayǐ ganjí ɔ, a ná ɖibla lɛ́ mɔ nǔ e Jexóva dá lɛ́ é gěgé ɖo xwé towe kpá, bo sixú xlɛ́ vǐ towe lɛ́. (Ðɛh. 104:24) A ná ɖibla mɔ xɛ lɛ́, nǔvínúví lɛ́, atín lɛ́, gɔ́ nú nǔ ɖěvo lɛ́. Karina e gosín Allemagne é ɖɔ: “Mamáa ce yí wǎn nú folówa lɛ́, énɛ́ wú ɔ, hwenu e un ɖo vǔ é ɔ, é nɔ dlɛ́n alɔ dó folówa lɛ́ hweɖébǔnu e mǐ ɖo zɔnlin zun ɖó kpɔ́ wɛ é.” Mɛjitɔ́ lɛ́ mi, mi sixú lɛ́ zán video kpó wěma kpó ɖěɖěe ɖɔ xó dó nǔɖíɖó lɛ́ wú, bɔ tutoblónúnǔ ɔ ɖe tɔ́n lɛ́ é dó kplɔ́n nǔ vǐ mitɔn lɛ́. Nú a na bo tlɛ nɔ nɔ fí ɖěbǔ ɔ, a sixú d’alɔ vǐ towe lɛ́ bɔ yě ná nɔ kpɔ́n nǔ e Mawu ɖó lɛ́ é. Din ɔ, mi nú mǐ ní ɖɔ xó dó jijɔ Jexóva tɔn e jí a sixú tɛ ɖɛ̌ nú vǐ towe lɛ́ é ɖé lɛ́ wú.

11. Nɛ̌ mɛjitɔ́ lɛ́ ka sixú d’alɔ vǐ yětɔn lɛ́ bɔ yě ná ɖ’ayi wǎnyíyí Jexóva tɔn wú gbɔn?

¹¹ Bo ná dó d’alɔ vǐ towe lɛ́ bónú yě ná mɔ nǔ jɛ wǎnyíyí Jexóva tɔn wú ɔ, a sixú ɖɔ xó nú yě dó lěe kanlin gěgé nɔ kpé nukún dó vǐ yětɔn lɛ́ wú kpó wǎnyíyí kpó gbɔn é jí. (Mat. 23:37) A sixú lɛ́ tɛ ɖɛ̌ vogbingbɔn jí wǔ e ɖo nǔ ɖěɖěe Jexóva dá, bɔ mǐ nɔ ɖu vǐví tɔn lɛ́ é mɛ é jí. Karina e xó mǐ ɖɔ wá yi é ɖɔ: “Ényí mǐ tɔ́n bo ɖo sa ɖi wɛ ɔ, nɔ ce nɔ dó wǔsyɛ́n lanmɛ nú mì ɖɔ nyi ní nɔ te bo kpɔ́n lěe folówa lɛ́ ɖokpó ɖokpó gbɔn vo nú yěɖée gbɔn é kpó lěe ɖɛkpɛ yětɔn nɔ ɖe wǎnyíyí Jexóva tɔn xlɛ́ gbɔn é kpó. Xwe mɔ̌kpán gúdo ɔ, un lɛ́ kpo ɖo folówa lɛ́ kpɔ́n wɛ céɖécéɖé, ɖo xógbe ɖěvo mɛ ɔ, un nɔ kpɔ́n tɛnmɛ tɛnmɛ e ɖe lɛ́ é, lěe è bló yě gbɔn é kpó sinmɛ yětɔn lɛ́ kpó. Yě kpo ɖo lě do Jexóva yí wǎn nú mǐ sɔ é flín mì wɛ.”

12. Nɛ̌ mɛjitɔ́ lɛ́ ka sixú d’alɔ vǐ yětɔn lɛ́ bɔ yě ná ɖ’ayi nǔnywɛ́ Mawu tɔn wú gbɔn? (Ðɛhan 139:14) (Lɛ̌ kpɔ́n ɖiɖe ɔ.)

¹² D’alɔ vǐ towe lɛ́ bónú yě ní ɖ’ayi nǔnywɛ́ Mawu tɔn wú. É ɖo wɛn ɖɔ, Jexóva nyɔ́nǔi hú mǐ flaflá tɔn. (Hlɔ̌. 11:33) Ði kpɔ́ndéwú ɔ, a sixú ɖɔ lěe sin nɔ húzú akpɔ́kpɔ́, bɔ énɛ́ gúdo ɔ, akpɔ́kpɔ́ énɛ́ lɛ́ nɔ lɛ́ wa húzú jǐ bo nɔ ja ɖo fí vovo lɛ́ gbɔn é nú yě. (Jɔb. 38:36, 37) A sixú lɛ́ tɛ ɖɛ̌ ali jí wǔ e nu è bló agbaza gbɛtɔ́ tɔn ɖe é jí. (Xa Ðɛhan 139:14.) Ð’ayi lěe vǐtɔ́ e nɔ nyí Vladimir é wa énɛ́ gbɔn é wú. É ɖɔ: “Gbe ɖokpó ɔ, vǐ mǐtɔn j’ayǐ sín kɛkɛ́ tɔn jí bo gblé wǔ. Azǎn kléwún ɖé gúdo ɔ, akpa ɔ kú. Nyi kpó nɔ tɔn kpó tínmɛ n’i ɖɔ Jexóva bló agbaza mǐtɔn ɖó alɔ ɖé jí bɔ é nɔ vɔ́ éɖée jlá ɖó. Mǐ tɛ ɖɛ̌ jí n’i ɖɔ mǐ kún mɔ nǔ mɔ̌hun ɖě ɖo nǔ e gbɛtɔ́ bló lɛ́ é mɛ ó. Ði kpɔ́ndéwú ɔ, ényí mɔ̌to ɖé bló alitawoví ɔ, é nɔ jlá éɖée ɖó ǎ. Xó énɛ́ e mǐ ɖɔ nú vǐ mǐtɔn é d’alɔ ɛ bɔ é mɔ nǔ jɛ nǔnywɛ́ Jexóva tɔn wú.”

13. Nɛ̌ mɛjitɔ́ lɛ́ ka sixú d’alɔ vǐ yětɔn lɛ́ bɔ yě ná ɖ’ayi hlɔ̌nhlɔ́n Mawu tɔn wú gbɔn? (Ezayíi 40:26)

¹³ Jexóva byɔ́ mǐ ɖɔ mǐ ní kpɔ́n jǐxwé bo lin tamɛ dó lěe hlɔ̌nhlɔ́n jí wǔ émítɔn hɛn wɛ̌kɛ́ ɔ ɖó te gbɔn é jí. (Xa Ezayíi 40:26.) Mi sixú nɔ dó wǔsyɛ́n lanmɛ nú vǐ mitɔn lɛ́ ɖɔ yě ní nɔ kpɔ́n jǐxwé bo nɔ lin tamɛ dó nǔ e yě nɔ mɔ lɛ́ é jí. Ð’ayi nǔ e nɔví nyɔ̌nu e nɔ nyí Tingting bo gosín Taïwan é ɖɔ dó vǔhwenu tɔn wú é wú: “Mamáa ce kplá mì yi gletakɔ́xwé ɖé gbe ɖokpó, bɔ mǐ mɔ sunví gěgé ɖo jǐxwé zǎnmɛ, ɖó mǐ ɖo toxo hun nukún mɛ, bónú wěziza gbɔn kámɛ gomɛ ǎ wútu. Hwenu e ado nɔ hu mì tawun dó kɔ e gbɛ̌ ce lɛ́ nɔ gbídí nú mì é wú, bɔ un nɔ kanbyɔ́ nyiɖée ɖɔ un ka ná kpé wú bo kpo ɖo Jexóva sɛn wɛ kpó gbejíninɔ kpó a jí é wɛ. Mamáa ce byɔ́ mì ɖɔ nyi ní lin tamɛ dó hlɔ̌nhlɔ́n e Jexóva ná ko zán dó dá sunví énɛ́ lɛ́ bǐ é jí, bo flín ɖɔ É sixú zán hlɔ̌nhlɔ́n énɛ́ dó d’alɔ nyi lɔ, bɔ un ná ɖu ɖo mɛtɛ́nkpɔ́n ɖěbǔ jí. Ée un kpɔ́n nǔɖíɖó lɛ́ ɖo tomɛyiyi énɛ́ hwenu gúdo é ɔ, énɛ́ sísɛ́ mì, bɔ un ba ná kplɔ́n bo ná tuun Jexóva d’é jí, lobo ná hlɔ̌nhlɔ́n kán e un kán ɖ’é jí bo ná sɛn ɛ é.”

14. Nɛ̌ mɛjitɔ́ lɛ́ ka sixú zán nǔɖíɖó lɛ́ dó d’alɔ vǐ yětɔn lɛ́ bɔ yě ná mɔ ɖɔ Jexóva ɔ, Mawu awǎjijɛnɔ wɛ é nyí gbɔn?

¹⁴ Nǔ e Jexóva dá lɛ́ é xlɛ́ ɖɔ awǎjijɛnɔ wɛ n’i, bo ba ɖɔ mǐ lɔ ní ɖó awǎjijɛ. Nǔnywɛ́ xwítíxwítízɔ́watɔ́ lɛ́ ɖ’ayi wú ɖɔ kanlin lɛ́ gěgé nɔ d’ayihún, káká jɛ xɛ lɛ́ kpó hweví lɛ́ kpó jí. (Jɔb. 40:20) Vǐ mitɔn lɛ́ ka ko mɔ kanlin ɖé ɖo ayihún da wɛ, bɔ é hwɛ́n nú yě kpɔ́n a? Bóyá yě sixú ko mɔ awǐiví ɖé bɔ é ɖo ayihún da xá mɛɖé wɛ, alǒ cukúví lɛ́ bɔ yě ɖo ayihún da ɖó kpɔ́ wɛ kpɔ́n. Hwe ɖěvo nu e kanlin lɛ́ ná ɖo ayihún da wɛ, bɔ vǐ mitɔn lɛ́ ná ɖo kpínkpɔ́n wɛ, bo ná ɖo nǔ ko wɛ é ɔ, mi ní flín yě ɖɔ Mawu awǎjijɛnɔ ɖé sɛn wɛ mǐ ɖe.—1 Tim. 1:11, nwt.

15. Étɛ́ ka sixú d’alɔ mɛjitɔ́ lɛ́ bɔ yě ná mɔ nǔ jɛ nǔ e ɖo vǐ yětɔn lɛ́ sín ayi mɛ lɛ́ é wú? (Nǔnywɛ́xó 20:5) (Lɛ̌ kpɔ́n fɔtóo ɔ.)

¹⁵ Hweɖélɛ́nu ɔ, mɛjitɔ́ lɛ́ sixú mɔ ɖɔ xó ɖiɖɔ xá vǐ émítɔn lɛ́ dó tagba e ɖí xwi xá wɛ yě ɖe lɛ́ é wú kún nyí nǔ d’ayihún ó. Ényí mɔ̌ wɛ nǔ nɔ cí nú we hǔn, é byɔ́ ɖɔ a ní tuun nǔ e ɖo vǐ towe lɛ́ sín ayi mɛ é. (Xa Nǔnywɛ́xó 20:5.) Mɛjitɔ́ ɖé lɛ́ lin ɖɔ ényí émí ɖo nǔ e Mawu dá lɛ́ é sín vǐví ɖu ɖó kpɔ́ xá vǐ émítɔn lɛ́ wɛ ɔ, é nɔ bɔ wǔ nú émí bɔ émí nɔ kpé énɛ́ wú. Aniwú? Hwɛjijɔ e wú wɛ é ɖokpó wɛ nyí ɖɔ, nǔ káká ɖé sɔ́ nɔ fɛ́ ayi yě kpó vǐ yětɔn lɛ́ kpó tɔn ǎ. Vǐtɔ́ ɖé nɔ nɔ Taïwan bo nɔ nyí Masahiko bo kɛ nu dó hwɛjijɔ ɖěvo wú; é ɖɔ: “Ényí mǐ kpó vǐ mǐtɔn lɛ́ kpó tɔ́n sín xwégbe bo yi sa ɖi gbé, é sixú nyí bo yi fán só, alǒ ɖi sa gbɔn xutó ɔ, hwɛhwɛ wɛ yě nɔ vo hú gǎn. Mɔ̌ mɛ ɔ, é sɔ́ nɔ vɛ́ wǔ nú mǐ cóbónú mǐ nɔ tuun nǔ e ɖo ayi yětɔn mɛ é ǎ.” Katya e xó mǐ ɖɔ wá yi é ɖɔ: “Ényí un gosín azɔ̌mɛ ɔ, mamáa ce nɔ kplá mì yi jikpá ɖɛkpɛ ɖɛkpɛ ɖé mɛ. Ényí mǐ yi fí énɛ́ e ɖo tóó é ɔ, un nɔ vo bo nɔ ɖɔ nǔ e jɛ ɖo azɔ̌mɛ é, alǒ nǔ e ɖo adohu adohu ɖó nú mì wɛ é n’i.”

16. Nɛ̌ xwédo lɛ́ ka sixú ɖe ayi ɖ’ayǐ, bo lɛ́ d’ayihún hwenu e yě ɖo nǔɖíɖó Jexóva tɔn lɛ́ sín vǐví ɖu wɛ é gbɔn?

¹⁶ Ényí xwédo lɛ́ nɔ ɖu vǐví nǔ e Jexóva dá lɛ́ é tɔn ɔ, é ná zɔ́n bɔ yě ná d’ayihún ɖó kpɔ́ bo lɛ́ ɖe ayi ɖ’ayǐ; énɛ́ ná d’alɔ yě bɔ yě ná yí wǎn nú yěɖée lɛ́ d’é jí. Biblu ɖɔ ɖɔ “hwenu e è ná ko nǔ dó é ɖe,” bɔ “hwenu e è ná ɖú we dó é ɖe.” (Nǔt. 3:1, 4.) Jexóva bló fí ɖɛkpɛ ɖɛkpɛ lɛ́ ɖó ayǐkúngban jí, bɔ mǐ sixú bló nǔ e mǐ yí wǎn ná lɛ́ é ɖo fí énɛ́ lɛ́. Xwédo gěgé yí wǎn nú nǔ ɖu ɖó kpɔ́, sa ɖi yi tomɛ ɖó kpɔ́, só fínfán ɖó kpɔ́, alǒ xutó yiyi. Vǐ ɖé lɛ́ yí wǎn nú wezun kínkán kpó ayihún dida kpó ɖo jikpá mɛ; yě mɛ ɖěvo lɛ́ ka yí wǎn nú kanlin lɛ́ kpínkpɔ́n, alǒ tɔ linlin. Ali ɖaaɖagbe gěgé wɛ hun nú mǐ bɔ mǐ ná ɖe ayi ɖ’ayǐ, hwenu e mǐ gosín xwégbe bo ɖo nǔɖíɖó Jexóva tɔn e lɛ́ lɛ̌ dó mǐ lɛ́ é kpɔ́n wɛ é!

17. Étɛ́wú mɛjitɔ́ lɛ́ ka ɖó ná d’alɔ vǐ yětɔn lɛ́ bɔ yě ná ɖu vǐví nǔ e Mawu dá lɛ́ é tɔn?

¹⁷ Ðo gbɛ yɔ̌yɔ́ Mawu tɔn mɛ ɔ, mɛjitɔ́ lɛ́ kpó vǐ lɛ́ kpó ná ɖu vǐví nǔɖíɖó Jexóva tɔn lɛ́ tɔn, lěe yě ma ko ɖu gbɔn kpɔ́n ǎ é. Hwenɛ́nu ɔ, mǐ sɔ́ ná ɖi xɛsi nú kanlin lɛ́ ɖě ǎ; yě lɔ ka sɔ́ ná ɖi xɛsi nú mǐ lɔmɔ̌ ǎ. (Eza. 11:6-9) Mǐ ná ɖu vǐví nǔ e Jexóva dá lɛ́ é tɔn nú hwenu maxamaxa lɛ́. (Ðɛh. 22:27) Amɔ̌, mɛjitɔ́ lɛ́ mi, mi ma nɔ te kpɔ́n hwenɛ́nu cóbó d’alɔ vǐ mitɔn lɛ́ bónú yě jɛ nǔɖíɖó lɛ́ sín vǐví ɖu jí ó. Ényí mi nɔ zán nǔɖíɖó lɛ́ dó kplɔ́n nǔ vǐ mitɔn lɛ́ dó Jexóva wú ɔ, yě lɔ ná ɖibla ɖɔ axɔ́sú Davídi ɖɔhun ɖɔ: ‘Jexóva nǔmɛsɛn ɖě sixú wa azɔ̌ e a nɔ wa lɛ́ é ǎ.’—Ðɛh. 86:8.