Etɛ ka Nɔ Jɛ Ðò Kú Gudo?

Mɛvívɛ́ towe ɖé ka ko kú kpɔ́n à? Ðò hwenu vɛwǔ mɔ̌hun ɖé mɛ ɔ, a sixu kanbyɔ hwiɖée ɖɔ: ‘Etɛ ka nɔ jɛ ɖò kú gudo? Nukúnɖiɖó ɖé ka ɖè ɖɔ mǐ na lɛ́ wá mɔ mɛvívɛ́ mǐtɔn lɛ à?’ Ðò nǔkplɔnkplɔn elɔ kpo ee na bɔ d’ewu é kpo mɛ ɔ, mǐ na gbéjé xósin gbɔdónúmɛ tɔn Biblu tɔn lɛ kpɔ́n.

1. Etɛ ka nɔ jɛ ɖò kú gudo?

Jezu jlɛ́ kú dó sɛnmlɔ wu. Mɛ e ɖò sɛnmlɔ mɛ é ɖé nɔ tuùn nǔ e ɖò jijɛ wɛ ɖò akpá tɔn é ǎ. Nɛ̌ kú ka cí amlɔ ɖɔhun gbɔn? Nú mɛɖé kú gudo ɔ, é nɔ sè wuvɛ̌ ǎ. É ka nɔ mɔ ɖɔ emi ɖò emiɖokpo ǎ, nú é tlɛ yí wǎn nú xɔ́ntɔn tɔn lɛ kpo xwédo tɔn kpo gbɔn ɖebǔ ɔ nɛ. “Mɛ e ko kú lɛ sɔ́ tuùn nǔɖe ǎ,” wɛ Biblu ɖɔ.—Xà Nǔnywɛtɔ́xó 9:5.

2. Nɛ̌ nǔgbo ɔ tuùntuùn dó kú wu ka nɔ hɛn lè wá nú mǐ gbɔn?

Mɛ gegě nɔ ɖi xɛsi nú kú, bo tlɛ nɔ lɛ́ ɖi nú mɛkúkú lɛ! Amɔ̌, nǔ e Biblu ɖɔ dó kú wu é sixu dó gbɔn nú we. Jezu ɖɔ: “Nǔgbo ɔ na ɖè mi sín kannumɔgbenu.” (Jaan 8:32) Sinsɛn ɖé lɛ nɔ kplɔ́n mɛ ɖɔ nǔɖe nɔ nɔ gbɛ̀ ɖò kú mɛɖé tɔn gudo, amɔ̌, Biblu kplɔ́n enɛ mɛ ǎ. Hǔn, mɛ ɖě nɔ mɔ wuvɛ̌ ɖò kú gudo ǎ. Gɔ́ na ɔ, ɖó mɛkúkú lɛ sɔ́ tuùn nǔtí ǎ wutu ɔ, ye sixu wà nǔ dó mǐ wu ǎ. Enɛ wu ɔ, é byɔ ɖɔ mǐ ni fɔ yɛsu nú mɛkúkú lɛ alǒ wà nǔ e na zɔ́n bɔ ye ma na sin xomɛ dó mǐ ǎ lɛ é ǎ; é ka lɛ́ byɔ ɖɔ mǐ ni xoɖɛ nú ye ǎ.

Mɛɖé lɛ ɖɔ ɖɔ emi sixu ɖɔ xó xá mɛkúkú lɛ. Amɔ̌, enɛ sixu nyɔ́ bló ǎ. Lee mǐ ko mɔ gbɔn zaanɖé dìn é ɔ, mɛkúkú lɛ “tuùn nǔɖe ǎ.” Mɛ ɖěɖee lin ɖɔ emi ɖò xó ɖɔ xá mɛvívɛ́ emitɔn e kú lɛ é wɛ é ɔ, é sixu wá nyí ɖɔ awoví ɖěɖee sɔ́ mɛ e kú lɛ é sín gbè lɛ é ɖɔ xó xá wɛ ye ɖè. Enɛ wu ɔ, nǔgbo ɔ tuùntuùn dó kú wu nɔ cyɔn alɔ mǐ jí sín awoví lɛ sí. Jehovah gb’akpá nú mǐ dó tintɛnkpɔn bo na ɖɔ xó xá mɛkúkú lɛ wu, ɖó é tuùn ɖɔ nǔwaɖókpɔ́ xá awoví lɛ na wà nǔ dó mǐ wu.—Xà Sɛ́nflínmɛ 18:10-12.

3. Kplɔ́n nǔ dó ninɔmɛ e mɛ mɛkúkú lɛ ɖè nǔgbo nǔgbo é wu

Gbɔn gbɛ̀ ɔ bǐ mɛ ɔ, nǔ vovo wɛ mɛ lɛ ɖi nǔ na dó nǔ e nɔ jɛ ɖò kú gudo é wu. É ɖò wɛn ɖɔ nǔ enɛ lɛ e ye ɖi nǔ na lɛ é bǐ kún sixu nyí nǔgbo ó.

• Nǔ tɛ lɛ mɛ lɛ ka ɖi nǔ na ɖò kpaa mɛ dó ninɔmɛ mɛkúkú lɛ tɔn wu ɖò xá towe mɛ?

VIDEO: Etɛ ka Nyí Ninɔmɛ Mɛkúkú lɛ Tɔn?: Kpɛví Ɔ (1:19)

Xà Nǔnywɛtɔ́xó 3:20, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:

• Sɔgbe xá wemafɔ enɛ ɔ, etɛ ka nɔ jɛ ɖò kú mɛɖé tɔn gudo?

• Nǔɖe nɔ tɔ́n sín mɛ ɔ mɛ bo nɔ nɔ gbɛ̀ ɖò kú tɔn gudo wɛ à?

Biblu ɖɔ xó nú mǐ dó kú xɔ́ntɔn vívɛ́ Jezu tɔn Lazáa tɔn wu. Xà Jaan 11:11-14. Ee a na ɖò xixa wɛ é ɔ, ɖ’ayi nǔ e Jezu ɖɔ dó ninɔmɛ Lazáa tɔn wu é wu. Enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:

• Etɛ wu Jezu ka jlɛ́ kú dó?

• Etɛ nǔjlɛdonǔwu enɛ ka kplɔ́n mǐ dó ninɔmɛ mɛkúkú lɛ tɔn wu?

• Nɛ̌ nǔ ka cí nú we dó nǔ e Biblu ɖɔ dó kú wu é wu?

4. Nǔgbo ɔ tuùntuùn dó kú wu nɔ hɛn lè wá nú mǐ

Nǔgbo ɔ tuùntuùn dó kú wu nɔ tún kan nú mǐ sín xɛsiɖiɖi nú mɛkúkú lɛ sí. Xà Nǔnywɛtɔ́xó 9:10, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:

• Mɛkúkú lɛ ka sixu wà nǔ dó mǐ wu à?

Nǔgbo Biblu tɔn nɔ lɛ́ nya xɛ ɖò mǐ jí sín nǔɖiɖi e ɖɔ ɖɔ è ɖó na fɔ yɛsu nú mɛkúkú lɛ, alǒ wà nǔ e na zɔ́n bɔ ye ma na sin xomɛ dó mǐ ǎ lɛ é sí. Xà Ezayíi 8:19 kpo Nǔɖexlɛ́mɛ 4:11 kpo, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:

• Nɛ̌ nǔ ka nɔ cí nú Jehovah dó mɛ e nɔ fɔ yɛsu nú mɛkúkú lɛ alǒ ba alɔdó yetɔn é wu bɔ a lin?

5. Nǔgbo ɔ tuùntuùn dó kú wu nɔ dó gbɔ nú mǐ

È kplɔ́n mɛ gegě ɖɔ nú ye kú ɔ, è na dɔn tó nú ye ɖó nǔ nyanya e ye wà wá yì lɛ é wu. Amɔ̌, é dó gbɔ nú mǐ ɖɔ mǐ tuùn ɖɔ è kún nɔ dɔn tó nú mɛ ɖě ɖò kú tɔn gudo ó, nú mɛ ɔ na bo tlɛ dó nǔ baɖabaɖa lɛ sin ɔ nɛ. Xà Hlɔmanu lɛ 6:7, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:

• Biblu ɖɔ ɖɔ nú mɛɖé kú ɔ, Mawu kún sɔ́ nɔ lɛ́n hwɛ tɔn lɛ dó kɔ n’i ó. Kpo enɛ kpo ɔ, a lin ɖɔ mɛ e ko kú é ɖé nɔ ɖò nǔ e é wà nyi dò wá yì lɛ é sín sin sún wɛ wɛ à?

Bǎ e mɛ mǐ tuùn Jehovah yì ɖó é ɔ, bǎ enɛ mɛ wɛ mǐ na mɔ nǔ jɛ wu ɖɔ é kún na dɔn tó nú mɛkúkú lɛ gbeɖé ó yì ɖó. Xà Sɛ́nflínmɛ 32:4 kpo 1 Jaan 4:8 kpo, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:

• Mawu e ɖó jijɔ ɖěɖee xó wemafɔ enɛ lɛ ɖɔ lɛ é ka na yí gbè bɔ è na dɔn tó nú mɛkúkú lɛ wɛ à?

• Nǔgbo ɔ tuùntuùn dó kú wu ka dó gbɔ nú we à? Etɛwu?

ETƐ LƐ A KA KPLƆ́N?

Nú mɛɖé kú ɔ, gbɛ̀ tɔn nɔ wá vivɔnu. Mɛkúkú lɛ nɔ mɔ wuvɛ̌ ǎ, mɔ̌ jɛn ye ma ka sixu lɛ́ wà nǔ dó mɛ e ɖò gbɛ̀ lɛ é wu ǎ é nɛ.

Vɔ̌gbɔnji

• Etɛ ka nɔ jɛ ɖò kú gudo?

• Nɛ̌ nǔgbo ɔ tuùntuùn dó kú wu ka nɔ hɛn lè wá nú mǐ gbɔn?

• Nɛ̌ nǔgbo ɔ tuùntuùn dó kú wu ka nɔ dó gbɔ nú mǐ gbɔn?

KÍJÉ

Kpɔ́n nǔ e xókwín “lindɔ̌n” ɔ sín tinmɛ nyí tawun é ɖò Biblu mɛ.

“Etɛ ka Nɔ Nyí Lindɔ̌n?” (Xóta Ɛntɛnɛti jí tɔn)

Kpɔ́n ɖɔ Mawu nɔ zán zo dó dóya nú mɛ nyanya lɛ wɛ à jí.

Zomɛ ɔ Fí ɖé Wɛ Bɔ È Nɔ Dóya nú Mɛ Ðè Nǔgbo À?

Mǐ ka ɖó na ɖi xɛsi nú mɛkúkú lɛ wɛ à?

Gbigbɔ Mɛkúkú lɛ Tɔn: Ye ka Sixu D’alɔ We Alǒ Wà Nǔ Dó Wǔ We À? Ye ka Tíìn Nǔgbo À? (alɔnuwema)

Ee nya ɖé kplɔ́n nǔgbo ɔ dó nǔ e nɔ jɛ ɖò kú gudo é wu é ɔ, é dó gbɔ n’i tawun. Kpɔ́n lee nǔ nyí mɔ̌ gbɔn é.

“Xósin Biblu Tɔn Ðěɖee Ðò Wɛn Bo Lɛ́ Xwè Ali lɛ É Jiwǔ nú Mì” (Atɔxwɛ [Flansegbe] 1^er février 2015)