Klisu Ðò Ðisixwé nú Mawu

Ee Jezu ɖido akpɔ́kpɔ́ mɛ b’ɛ ɖó azǎn wǒ gudo é ɔ, gbigbɔ mímɛ́ wá ahwanvu lɛ jí ɖò Pantekotu sín azǎn gbè bɔ enɛ xlɛ́ ɖɔ é yì jixwé nugbǒ. É sɔ́ lɛ́ nɔ lìnlín mɛ cobonu nǔ ɖevo e xlɛ́ mɔ̌ é jɛ bɔ d’ewu ǎ. Cobonu è na nyì awinnyaglo dó Etyɛni ɖó é ɖò kúnnu ɖè wɛ kpo gbejininɔ kpo wutu ɔ, é súxó ɖɔ: “Mi ɖótó! Un mɔ [jixwé] ɖò hunhun, bo mɔ Gbɛtɔ́ví ɔ ɖò te ɖò ɖisixwé nú Mawu.”​—Mɛsɛ́dó 7:56.

Hwenu e Jezu ɖò kpɔ́ xá Tɔ́ tɔn ɖò jixwé é ɔ, é na nɔte bɔ xó e è ɖɔ ɖ’ayǐ ɖò Xó Mawu Tɔn mɛ é ɖé na jɛ. Mawu sɔ́ d’ayi mɛ nú Davidi bɔ é wlan ɖɔ: “Mawu Mavɔmavɔ ɖɔ nú [Aklunɔ] ce [Jezu] ɖɔ: ‘Jinjɔn aɖisi ce xwé fí kaka jɛ hwenu e un na sɔ́ kɛntɔ́ towe lɛ dó huzu nǔ e jí a na nɔ bɛ́ afɔ dó é.’” Hwenu e táan e é na nɔte na é na wá vivɔnu é ɔ, é na “kpa acɛ nú kɛntɔ́ [tɔn] lɛ.” (Ðɛhan 110:1, 2) Amɔ̌, etɛ wà wɛ Jezu ka na ɖè sín jixwé hwenu e é na ɖò te kpɔ́n táan e mɛ é na huzu kpannukɔn kɛntɔ́ tɔn lɛ é?

È ɖó agun Klisanwun tɔn ayǐ ɖò Pantekotu xwè 33 H.M. tɔn. Jezu jɛ gǎn ɖu dó ahwanvu yí ami dó ɖè tɔn lɛ jí sín jixwé. (Kolosinu lɛ 1:13) É xlɛ́ ali ye ɖò wɛnɖagbejijlazɔ́ yetɔn kɔn, bo lɛ́ sɔnǔ nú ye nú azɔ̌ yetɔn e ɖò sɔgudo é. Azɔ̌ tɛ? È na fɔ́n ye mɛ e nɔ gbeji kaka bo kú lɛ é, bɔ ye na ɖu axɔsu xá Jezu ɖò Axɔsuɖuto ɔ mɛ.

Kpɔ́ndéwú nukúnɖeji mɛ e na wá nyí axɔsu ɖò sɔgudo lɛ é tɔn ɖokpo wɛ nyí Solu, Hlɔma nyikɔ tɔn Pɔlu wɛ è nɔ dó yawu tuùn i. Jwifu ɖé wɛ bo ko ɖókan dó Mawu Sɛ́n ɔ wu nú hwenu gègě, amɔ̌, sinsɛngán Jwifu lɛ bú i, b’ɛ tlɛ yí gbè bɔ è nyì awinnyaglo dó Etyɛni. Enɛ gudo ɔ, Solu ɖò “kúdán gblɔ́n nú Jezu sín ahwanvu lɛ wɛ” bo tunta Damasi. Vɔsanúxwlémawutɔ́ Ðaxó Kayifu na gbè è ɖɔ é ni yì wlí Jezu sín ahwanvu lɛ bo kplá ye wá Jeluzalɛmu. (Mɛsɛ́dó 7:58; 9:1) É ɖò mɔ̌ có, hwenu e Solu ɖò ali jí é ɔ, weziza ɖé hɔ́n lɛlɛ̌ d’é, bɔ é j’ayǐ.

Gbè ɖé kanbyɔ ɛ ɖɔ: “Solu, Solu, etɛwu a ka ɖò ya dó nú mì wɛ?” Solu ka ɖɔ: “Hwi mɛ̌ ka wɛ Aklunɔ?” Bɔ gbè ɔ ɖɔ n’i ɖɔ: “Nyɛ Jezu e doya na a ɖè ɔ wɛ.”—Mɛsɛ́dó 9:4, 5.

Jezu ɖɔ nú Solu ɖɔ é ni yì Damasi bo nɔte nú è na ɖɔ nǔ e é na wà ɔ n’i, amɔ̌, mɛɖé ɖó na kplá ɛ yì toxo ɔ mɛ, ɖó weziza jiwǔ ɔ tɔ́n nukún i. Ðò nǔmimɔ ɖevo mɛ ɔ, Jezu ɖè éɖée xlɛ́ Ananiyasi e nyí ɖokpo ɖò ahwanvu tɔn lɛ mɛ ɖò Damasi é. Jezu jlɛ́ fí e Solu ɖè é nú Ananiyasi bo ɖɔ é ni yì mɔ ɛ. Ananiyasi xò nǔ kpɔ́n dó mɔ̌ wiwa wu, amɔ̌, Jezu na jiɖe è bo ɖɔ: “Nya enɛ ɔ, alyannu ɖé wɛ é nyí, bɔ un sɔ́, bo na dó wà azɔ̌ na, nú é na jla nyikɔ ce mɛ e ma nyí Jwifu ǎ lɛ, bo na jla axɔsu yetɔn lɛ, kpodo Izlayɛli togun ɔ kpo.” Solu sín nukún hun, bɔ ‘é jɛ Jezu sín xó ɖɔ nú mɛ lɛ jí ɖɔ Mawu ví wɛ é nyí’ ɖò Damasi finɛ.—Mɛsɛ́dó 9:15, 20.

Jezu nɔ gudo nú Pɔlu kpo wɛnɖagbejlatɔ́ ɖevo lɛ kpo bɔ ye wà Mawuxóɖiɖɔzɔ́ e Jezu bɛ́ é. Mawu xoɖɛ dó ye jí bɔ azɔ̌ ɔ yì nukɔn b’ɛ jiwǔ. Ee Jezu sɔ́ éɖée xlɛ́ Pɔlu ɖò Damasi sín ali jí, b’ɛ ɖó xwè 25 mɔ̌ gudo é ɔ, Pɔlu wlan ɖɔ è ko ‘dó Wɛnɖagbe ɔ nǔ e Mawu bló ɖò gbɛ̀ ɔ mɛ lɛ é bǐ.’—Kolosinu lɛ 1:23.

Xwè lɛ gudo ɔ, Jezu bló bɔ mɛsɛ́dó vívɛ́ tɔn Jaan mɔ nǔmimɔ ɖebɔdoɖewu ɖé lɛ; ye wɛ ɖò wema Biblu tɔn e nɔ nyí Nǔɖexlɛ́mɛ é mɛ. Ðò nǔmimɔ enɛ lɛ mɛ ɔ, Jaan nɔ gbɛ̀ bo mɔ Jezu lɛkɔ wá ɖò hlɔnhlɔn Axɔsuɖuto tɔn mɛ. (Jaan 21:22) Gbigbɔ mímɛ́ d’alɔ Jaan bɔ é mɔ éɖée ɖò ‘Aklunɔ sín azǎn gbè.’ (Nǔɖexlɛ́mɛ 1:10) Hwetɛnu azǎn enɛ ka na bɛ́?

Sɔxwixwe dó gbéjé xóɖɔɖ’ayǐ Biblu tɔn lɛ kpɔ́n xlɛ́ ɖɔ hwe mǐtɔn nu wɛ ‘Aklunɔ sín azǎn’ ɔ bɛ́. Ðò 1914 ɔ, ahwan e è wá ylɔ ɖɔ Wɛkɛ Hwan I é bɛ́. Bɔ sín hwenɛnu ɔ, ahwan, jɛmɛji, adɔ, ayikúngban danwǔ kpo nǔ ɖevo lɛ kpo sukpɔ́, bo zɔ́n bɔ ‘xlɛ̌’ e Jezu na ahwanvu tɔn lɛ dó ‘hwenu e é na lɛkɔ wá ɔ [alǒ “fí ɖiɖe” tɔn, NW]’ kpo “hwenu e gbɛ̀ elɔ na vɔ dó ɔ” kpo wu é wá tíìn hugǎn. (Matie 24:3, 7, 8, 14) È ɖò wɛnɖagbe Axɔsuɖuto ɔ tɔn jla wɛ dìn, gbɔn gbɛ̀ ɔ bǐ mɛ, é nyí ɖò fí e ɖò Hlɔma sín acɛ mɛ lɛ é kɛɖɛ ǎ.

Mawu sɔ́ d’ayǐ mɛ nú Jaan bɔ é ɖɔ tinmɛ e nǔ enɛ ɖó é: “Hwlɛngán sín hwenu sù lo! Mawu ɖè axɔsuɖuɖu tɔn kpo hlɔnhlɔn tɔn kpo xlɛ́ lo! Klisu tɔn ɖè acɛkpikpa e nyí étɔn ɔ xlɛ́ lo!” (Nǔɖexlɛ́mɛ 12:10) Nugbǒ ɔ, Axɔsuɖuto Mawu Tɔn e ɖò jixwé, bɔ Jezu jla gbɔn fí gègě é ɔ, è ko ɖó ayǐ!

Wɛnɖagbe jiwǔ ɖé wɛ é nyí nú ahwanvu Jezu tɔn lɛ bǐ. Ye sixu hɛn xó Jaan tɔn elɔ lɛ d’ayi mɛ: “Enɛ wu ɔ, [jixwé] kpo mi mɛ e ɖò [jixwé] lɛ kpo ni jɛ awǎ. Amɔ̌ heelu ayikúngban kpo xù kpo. Ðó awovi jɛte wá mi gɔ́n kpodo xomɛsin ɖaxó ɖé kpo, ɖó é tuùn ɖɔ hwenu kpɛɖé jɛn wɛ kpò nú emi.”​—Nǔɖexlɛ́mɛ 12:12.

Enɛ wu ɔ, Jezu sɔ́ kpó ɖò ayijinjɔn ɖò ɖisixwé nú Tɔ́ tɔn bo ɖò te ǎ. É ko ɖò axɔsu ɖu wɛ, bɔ malin-malin mɛ ɔ, é na sú kɛntɔ́ tɔn lɛ bǐ sín kún dó. (Eblée lɛ 10:12, 13) Huzuhuzu ɖagbeɖagbe tɛ ka ɖò te kpɔ́n mǐ lo?