Etɛ ka Nyí Fínfɔ́n Sín Kú?

Ðò Biblu mɛ ɔ, xókwín Glɛkigbe tɔn anastasis wɛ è lilɛ dó “fínfɔ́n sín kú,” bɔ tinmɛ tɔn nyí “è ni site.” Mɛ e è fɔ́n sín kú é ɔ, mɛ e fɔ́n wá gbɛ̀ é wɛ, bo nyí mɛ e é nyí ɖ’ayǐ é.—1 Kɔlɛntinu lɛ 15:12, 13.

Xógbe “fínfɔ́n sín kú” ɔ ɖò Akpáxwé Biblu Tɔn E È Wlan Dó Ebléegbe Mɛ bɔ è nɔ ylɔ́ hwɛhwɛ ɖɔ Alɛnuwema Xóxó ɔ é mɛ ǎ có, nǔkplɔnmɛ ɔ ka tɔ́n ɖò finɛ. Ði kpɔ́ndéwú ɔ, Mawu d’akpá gbɔn gbeyiɖɔ Ozée jí ɖɔ: “Un na xɔ ye sín hlɔnhlɔn Yɔdo tɔn sí; Un na yí ye sín kú sí.”—Ozée 13:14, nwt; Jɔbu 14:13-15; Ezayíi 26:19; Daniyɛli 12:2, 13.

Fitɛ è ka na fɔ́n mɛ lɛ sín kú dó? È fɔ́n mɛɖé lɛ sín kú dó jixwé, bɔ ye na kpa acɛ xá Klisu. (2 Kɔlɛntinu lɛ 5:1; Nǔɖexlɛ́mɛ 5:9, 10) Biblu ylɔ́ enɛ ɖɔ “fínfɔ́n sín kú nukɔn nukɔntɔn”; xógbe enɛ ɖò xlɛ́xlɛ́ wɛ ɖɔ fínfɔ́n sín kú ɖevo na bɔ d’ewu. (Nǔɖexlɛ́mɛ 20:6; Filipunu lɛ 3:11) Ayikúngban jí wɛ fínfɔ́n sín kú enɛ e j’awě é na tíìn ɖè, bɔ mɛ e è na fɔ́n wá gbɛ̀ lɛ é na ɖu vivǐ ayikúngban ɔ tɔn.—Ðɛhan 37:29.

Nɛ̌ è ka na fɔ́n mɛ lɛ sín kú gbɔn? Mawu na acɛ Jezu b’ɛ na fɔ́n mɛkúkú lɛ. (Jaan 11:25) Jezu na fɔ́n “mɛ e ɖò yɔdo flǐn tɔn mɛ lɛ é bǐ” wá gbɛ̀, bɔ ye mɛ ɖokpo ɖokpo na ɖó nukúnmɛ e ye ɖó ɖ’ayǐ é, nyí mɛ e ye nyí ɖ’ayǐ é, bo na lɛ́ ɖó taglomɛ e ye ɖó ɖ’ayǐ é. (Jaan 5:28, 29, nwt) Mɛ ɖěɖee è na fɔ́n dó jixwé lɛ é na ɖó agbaza gbigbɔ tɔn ɖé, bɔ mɛ ɖěɖee è na fɔ́n dó ayikúngban jí lɛ é na ɖó lanmɛ syɛn hunsin ɖagbe bɔ nǔ bǐ na vɔ ɖ’ewu.—Ezayíi 33:24; 35:5, 6; 1 Kɔlɛntinu lɛ 15:42-44, 50.

Mɛ̌ mɛ̌ e è ka na fɔ́n sín kú? Biblu ɖɔ ɖɔ “Mawu na wá fɔ́n mɛ ɖagbe lɛ, kpodo mɛ nyanya lɛ kpo sín kú.” (Mɛsɛ́dó 24:15) Gbɛtɔ́ gbejinɔtɔ́ lɛ ɖò mɛ ɖagbe lɛ mɛ, ɖi Nɔwée, Sala kpo Ablaxamu kpo. (Bǐbɛ̌mɛ 6:9; Eblée lɛ 11:11; Jaki 2:21) Mɛ ɖěɖee ma kpéwú bo wà nǔ sɔgbe xá nǔgbododó Mawu tɔn lɛ ǎ, ɖó ali hun nú ye bonu ye na kplɔ́n bo xwedó ǎ lɛ é ɖò mɛ nyanya lɛ mɛ.

Amɔ̌, è na fɔ́n mɛ ɖěɖee syɛn ɖò nǔnyanyawiwa mɛ bo gbɛ́ ta bo gbɛ́ abɔ̌ lɛ é sín kú ǎ. Nú mɛ mɔ̌hun lɛ kú ɔ, nukúnɖiɖó fínfɔ́n sín kú tɔn ɖebǔ ɖè nú ye ǎ.—Matie 23:33; Eblée lɛ 10:26, 27.

Hwetɛnu fínfɔ́n sín kú ka na bɛ́? Biblu ɖɔ ɖ’ayǐ ɖɔ mɛ fínfɔ́n sín kú dó jixwé na bɛ́ ɖò fí ɖiɖe Klisu tɔn hwenu, enɛ bɛ́ ɖò 1914. (1 Kɔlɛntinu lɛ 15:21-23) È na fɔ́n mɛ lɛ sín kú dó ayikúngban jí ɖò Axɔ́suɖuɖu Xwè Afatɔ́n Tɔn Jezu Klisu Tɔn hwenu, hwenu e ayikúngban ɔ na huzu palaɖisi ɖé é.—Luki 23:43, nwt; Nǔɖexlɛ́mɛ 20:6, 12, 13.

Etɛwu é ka sɔgbe ɖɔ è ni ɖi nǔ nú fínfɔ́n sín kú? Biblu kpi fínfɔ́n sín kú e è gbajɛ̌mɛ na é tɛnnɛ sín tan, bɔ mɛ e mɔ tlɔlɔ lɛ é dó zǒgbe jí. (1 Axɔ́su lɛ 17:17-24; 2 Axɔ́su lɛ 4:32-37; 13:20, 21; Luki 7:11-17; 8:40-56; Jaan 11:38-44; Mɛsɛ́dó 9:36-42; Mɛsɛ́dó 20:7-12; 1 Kɔlɛntinu lɛ 15:3-6) Fɔ́n e Jezu fɔ́n Lazáa sín kú é ɔ, nǔ manawɔn ɖé wɛ é nyí, ɖó Lazáa kú b’ɛ ko bló azǎn ɛnɛ cobɔ Jezu lɛ́ bló nǔjiwǔ enɛ ɖò mɛ wɔbuwɔbu ɖé nukúnmɛ. (Jaan 11:39, 42) Mɛ ɖěɖee tlɛ klán gbè xá Jezu lɛ é sixu gbɛ́ xó enɛ ǎ, enɛ wu ɔ, ye bla gbě bo na hú Jezu kpo Lazáa kpo bǐ.—Jaan 11:47, 53; 12:9-11.

Biblu xlɛ́ ɖɔ Mawu ɖó nǔwukpíkpé ɔ kpo jlǒ ɔ kpo bo na fɔ́n mɛkúkú lɛ. Gbɔn hlɔnhlɔn tɔn aditi ɔ gblamɛ ɔ, é hɛn nǔ ɖěɖee kúnkplá mɛ ɖěɖee na fɔ́n wɛ é ɖè lɛ é bǐ tɛnwin lɛnwin dó flǐn tɔn e ma ɖó dogbó ǎ é mɛ. (Jɔbu 37:23; Matie 10:30; Luki 20:37, 38) Mawu kpéwú bo na fɔ́n mɛkúkú lɛ wá gbɛ̀, é ka jló è tawun! Hwenu e Biblu ɖò xó ɖɔ dó fínfɔ́n sín kú e ɖò nukɔn ja é wu wɛ é ɔ, é ɖɔ dó Mawu wu ɖɔ: “A na ba na mɔ nyɛ mɛ e a ɖó é!”—Jɔbu 14:15.

Nukúnnúmɔjɛnǔmɛ agɔ lɛ dó fínfɔ́n sín kú wu

Xɛxó: Fínfɔ́n sín kú ɔ, lindɔ̌n kpo agbaza kpo dindɔn cá wɛ.

Nǔgbo: Biblu kplɔ́n mɛ ɖɔ gbɛtɔ́ ɔ blebu wɛ nyí lindɔ̌n, é kún nyí nǔɖe bo nɔ nɔ gbɛ̀ ɖò kú gudo ó. (Bǐbɛ̌mɛ 2:7; Ezekiyɛli 18:4, nwt) Mɛ e è fɔ́n sín kú é nyí mɛ e è dɔn cá kpo lindɔ̌n tɔn kpo é ǎ; mɛ e è vɔ́ dá b’ɛ nyí lindɔ̌n gbɛɖe ɖé é wɛ.

Xɛxó: È fɔ́n mɛɖé lɛ sín kú bo lɛ́ sú kún dó nú ye tlolo.

Nǔgbo: Biblu ɖɔ ɖɔ “Mawu na ɖó hwɛ nú” “mɛ e [nɔ] wà nǔ nyanya lɛ” é. (Jaan 5:29) Amɔ̌, hwɛɖónúmɛ enɛ na jinjɔn nǔ e ye wà ɖò fínfɔ́n sín kú yetɔn gudo lɛ é jí, é na jinjɔn ee ye wà ɖ’ayǐ lɛ é jí ǎ. Jezu ɖɔ: “Mɛkúkú lɛ na sè Mawu ví ɔ sín gbè; enɛ ɔ, mɛ e na sè gbè tɔn lɛ na mɔ gbɛ̀.” È na wlan mɛ ɖěɖee xwedó, alǒ setónú nú nǔ ɖěɖee ye kplɔ́n ɖò fínfɔ́n yetɔn gudo lɛ é sín nyikɔ dó “wema-mlámlá gbɛ̀ tɔn ɔ” mɛ.—Nǔɖexlɛ́mɛ 20:12, 13, nwt.

Xɛxó: Nú è fɔ́n mɛɖé sín kú ɔ, é nɔ ɖó agbaza e é ko ɖó ɖ’ayǐ cobo kú é pɛ́pɛ́pɛ́.

Nǔgbo: Nú mɛɖé kú gudo ɔ, agbaza tɔn nɔ nyɔ bo nɔ gblé.—Nǔɖexlɛ́mɛ 3:19, 20.