A sixú ‘ɖe gbɛtɔ́ xóxó e a nyí ɖ’ayǐ ɔ nyi ayǐ’

 1. Cóbónú a ná jɛ Biblu kplɔ́n jí ɔ, nɛ̌ gbɛ towe ka cí?

CÓBÓNÚ a ná jɛ Biblu kplɔ́n xá Kúnnuɖetɔ́ Jehovah tɔn lɛ́ jí ɔ, nɛ̌ gbɛ towe ka cí? Mǐ mɛ gěgé sɔ́ nɔ ba ná lin nǔ jɛ jí ǎ. Nǔ e gbɛ ɔ nɔ ylɔ́ ɖɔ nǔ ɖagbe kpó nǔ nyanya kpó é wɛ sixú ko nɔ xlɛ́ ali linlin kpó mɛ alɔkpa e mǐ nyí é kpó. Ényí mɔ̌ hǔn, mǐ “tuun Mawu ǎ; [mǐ] ka ɖo nukún ɖó nǔɖé wɛ ǎ; [mǐ] ɖo gbɛ ɔ mɛ kpowun.” (Efɛ́. 2:12) Amɔ̌, ée mǐ jɛ Biblu kplɔ́n jí gúdo é ɔ, lěe mǐ nɔ zán gbɛ gbɔn é húzú!

 2. Ðɔ nǔ e a kplɔ́n hwenu e a jɛ Biblu kplɔ́n jí é ɖé lɛ́.

² Ée a jɛ Biblu kplɔ́n jí é ɔ, a mɔ ɖɔ émí ɖó Tɔ́ ɖé ɖo jǐxwé, bɔ é yí wǎn nú émí tawun. A ɖó ayi wú ɖɔ ényí nǔ émítɔn ná nyɔ́ Jehovah nukúnmɛ, bɔ émí ná lɛ́ nɔ mɛ e nɔ sɛn ɛ lɛ́ é mɛ ɔ, émí ɖó ná bló hǔzúhúzú tají lɛ́ ɖo gbɛzán émítɔn kpó lěe émí nɔ lin nǔ gbɔn é kpó mɛ. A ɖó ná kplɔ́n bá zán gbɛ sɔgbe xá nǔgbódodó jlɔ́jlɔ́ tɔn lɛ́.—Efɛ́. 5:3-5.

 3. Sɔgbe xá Kolósinu lɛ́ 3:9, 10 ɔ, étɛ́ Jehovah ka ba ɖɔ mǐ ní wa? Étɛ́ lɛ́ jí mǐ ka ná ɖɔ xó dó ɖo xóta élɔ́ mɛ?

³ Jehovah wɛ nyí Gbɛɖótɔ́ mǐtɔn, bó lɛ́ nyí Tɔ́ mǐtɔn jǐxwé tɔn ɔ, énɛ́ wú ɔ, é ɖ’acɛ bó ná ɖɔ lěe mɛsɛntɔ́ tɔn lɛ́ ɖó ná wa nǔ gbɔn é. Gɔ́ ná ɔ, é byɔ́ mǐ ɖɔ cóbónú mǐ ná bló batɛ́mu ɔ, mǐ ɖó ná dó gǎn syɛ́nsyɛ́n, bó “ɖe gbɛtɔ́ xóxó e [mǐ] nyí ɖ’ayǐ ɔ kpódó walɔ tɔn lɛ́ bǐ kpán nyi ayǐ.”b (Xa Kolósinu lɛ́ 3:9, 10.) Xóta élɔ́ ná d’alɔ mɛ ɖěɖěe ba ná bló batɛ́mu lɛ́ é, bɔ yě ná mɔ sinkɔn nú nǔkanbyɔ́ atɔn élɔ́ lɛ́: (1) Étɛ́ ka nyí “gbɛtɔ́ xóxó” ɔ? (2) Aniwú Jehovah ka byɔ́ mǐ ɖɔ mǐ ní ɖe è nyi ayǐ? (3) Nɛ̌ mǐ ka sixú wa mɔ̌ gbɔn? Xóta élɔ́ ná d’alɔ mǐ mɛ ɖěɖěe ko bló batɛ́mu lɛ́ é, bɔ mǐ ná ɖó wǔ zɔ nú gbɛtɔ́ xóxó ɔ sín jijɔ lɛ́, bɔ yě sɔ́ ná wá xwetɔ́n ɖo fɛn mǐtɔn nu ǎ.

 4. Ényí mɛɖé ɖo “gbɛtɔ́ xóxó” ɔ sín kannu ɔ, nɛ̌ é ka nɔ wa nǔ gbɔn?

⁴ Ðo kpaa mɛ ɔ, mɛ e ɖo “gbɛtɔ́ xóxó” ɔ kannu é nɔ lin nǔ, bó nɔ lɛ́ wa nǔ sɔgbe xá hwɛhuhu sín ninɔmɛ e mɛ é ɖe é. É sixú nyí cejɛ́nnábínɔ, nɔ yá wǔ sin xomɛ, nɔ d’alɔgúdokpɛ́ nú mɛ, bó nɔ lɛ́ yí go. É sixú yí wǎn nú fɔtóo nǔblíblíwiwa tɔn lɛ́, video blíblí lɛ́, alǒ fímu e mɛ adǎkaxixo ɖe lɛ́ é kpínkpɔ́n. É ɖo wɛn ɖɔ é ɖó jijɔ ɖagbe ɖé lɛ́, bɔ nú é ɖɔ alǒ wa nǔɖé bónú é ma sɔgbe ǎ ɔ, é sixú nɔ dó hwɛ éɖée. Amɔ̌, é ɖó jlǒ sɔmɔ̌ bá húzú linlin tɔn lɛ́ kpó nǔwalɔ tɔn lɛ́ kpó ǎ.—Ga. 5:19-21; 2 Tim. 3:2-5.

 5. Mǐ ka sixú ɖe gbɛtɔ́ xóxó ɔ nyi ayǐ bǐ mlɛ́mlɛ́ a? Tínmɛ. (Mɛsɛ́dó 3:19)

⁵ Hwɛhutɔ́ wɛ nú mǐ, énɛ́ wú ɔ, mǐ ɖě sixú ɖe linlin nyanya lɛ́ kpó jlǒ nyanya lɛ́ kpó sín ayi mǐtɔn mɛ bǐ mlɛ́mlɛ́ ǎ. É sixú wá su hweɖélɛ́nu bɔ mǐ ná ɖɔ nǔɖé, alǒ wa nǔɖé, b’ɛ ná wá vɛ́ nú mǐ. (Jel. 17:9; Ja. 3:2) Amɔ̌, ényí mǐ ɖe gbɛtɔ́ xóxó ɔ nyi ayǐ ɔ, jlǒ agbaza tɔn lɛ́ kpó nǔwalɔ ɖěɖěe cá kan xá ɛ lɛ́ é kpó sɔ́ ná ɖ’acɛ dó mǐ jí ǎ. Mǐ nɔ húzú mɛ alɔkpa ɖěvo.—Eza. 55:7; xa Mɛsɛ́dó 3:19.

 6. Aniwú Jehovah ka byɔ́ mǐ ɖɔ mǐ ní ɖe linlin masɔgbe kpó nǔwalɔ nyanya kpó gbɛtɔ́ xóxó ɔ tɔn lɛ́ nyi ayǐ?

⁶ Jehovah byɔ́ mǐ ɖɔ mǐ ní hɔn ɖɔ nú linlin masɔgbe kpó nǔwalɔ nyanya lɛ́ kpó, ɖó é yí wǎn nú mǐ tawun, bó ba ɖɔ mǐ ní ɖu gbɛ sín vǐví. (Eza. 48:17, 18) É tuun ɖɔ mɛ ɖěɖěe ma nɔ ɖí xwi xá jlǒ masɔgbe lɛ́ ǎ lɛ́ é nɔ wa nǔ dó yěɖée kpó mɛ e lɛ́ lɛ̌ dó yě lɛ́ é kpó wú. Ényí mǐ wa nǔ dó mǐɖée kpó mɛ ɖěvo lɛ́ kpó wú ɔ, é nɔ vɛ́ mɔ n’i.

 7. Sɔgbe xá Hlɔ̌manu lɛ́ 12:1, 2 ɔ, gbeta tɛ́ kɔn mǐ ka ɖó ná wá?

⁷ Xɔ́ntɔn mǐtɔn ɖé lɛ́ kpó mɛ e ɖo xwédo mǐtɔn mɛ é ɖé lɛ́ kpó sixú nɔ cá mǐ ko hweɖélɛ́nu ɖó mǐ ɖo tíntɛ́nkpɔ́n wɛ bá bló hǔzúhúzú lɛ́ ɖo mɛ alɔkpa e mǐ nyí é wú wútu. (1 Pi. 4:3, 4) Yě sixú ɖɔ nú mǐ ɖɔ mǐ ɖ’acɛ bá wa nǔ ɖěbǔ e jló mǐ é, bɔ mǐ kún ɖó ná ná tɛn mɛ ɖěbǔ bónú é ná ɖɔ nǔ e mǐ ná wa é nú mǐ ó. Amɔ̌, mɛ ɖěɖěe nɔ xo nǔgbódodó Jehovah tɔn lɛ́ nyi kɛ́n lɛ́ é ɖo yěɖée kannu ɖě dóó ǎ. Gbɛ e Satáan kpa acɛ ná é ná tɛn wɛ yě ɖe, b’ɛ ɖo nǔ wa dó yě wú wɛ. (Xa Hlɔ̌manu lɛ́ 12:1, 2.) Mǐ bǐ wɛ ɖó ná wá gbeta ɖé kɔn: Mǐ ná kpo ɖo gbɛtɔ́ xóxó e hwɛhuhu kpó gbɛ Satáan tɔn kpó ɖ’acɛ d’é jí é nyí wɛ, alǒ mǐ ná jó Jehovah dó b’ɛ ná húzú mǐ, bɔ mǐ ná nyí mɛ ɖagbe hú gǎn din.—Eza. 64:7.

 8. Étɛ́ ka ná d’alɔ mǐ bɔ mǐ ná nyi alɔ nú linlin masɔgbe lɛ́ kpó nǔwalɔ nyanya lɛ́ kpó?

⁸ Jehovah tuun ɖɔ é ná byɔ́ hwenu kpó gǎndídó kpó ɖo mǐ sí cóbɔ mǐ ná nyi alɔ nú linlin masɔgbe kpó nǔwalɔ nyanya lɛ́ kpó. (Ðɛh. 103:13, 14) É ɖo mɔ̌ có, Jehovah nɔ ná mǐ nǔnywɛ́, hlɔ̌nhlɔ́n kpó alɔdó kpó e sín hudó mǐ ɖó, bó ná dó bló hǔzúhúzú lɛ́ ɖo mɛ alɔkpa e mǐ nyí é wú, gbɔn Xó tɔn, gbigbɔ tɔn kpó tutoblónúnǔ tɔn kpó gblamɛ. É ɖo wɛn ɖɔ é ko d’alɔ we. Mǐ ní ɖɔ xó dó nǔ ɖěɖěe a sixú wa, bó ná dó ɖe gbɛtɔ́ xóxó ɔ nyi ayǐ, bó tlɛ sixú wa mɔ̌ hú gǎn bá jɛxá bá bló batɛ́mu é ɖé lɛ́ wú.

 9. Étɛ́ Xó Mawu tɔn ka sixú d’alɔ we bɔ a ná wa?

⁹ Nɔ zán Biblu dó gbéjé hwiɖée kpɔ́n ganjí. Xó Mawu tɔn cí nǔkpɛ́n ɖɔhun; é sixú d’alɔ we bɔ a ná gbéjé lěe a nɔ lin tamɛ, ɖɔ xó, bó nɔ lɛ́ wa nǔ gbɔn é kpɔ́n. (Ja. 1:22-25) Mɛ e nɔ kplɔ́n Biblu xá we é, gɔ́ nú Klisánwun ɖěvo e zin lɛ́ é sixú ɖe wě xá we. Ði kpɔ́ndéwú ɔ, yě sixú zán Biblu dó d’alɔ we bɔ a ná mɔ nǔ jɛ nǔwúkpíkpé towe lɛ́ kpó gǎnmaɖó towe lɛ́ kpó wú. Ényí lěe a ná ɖí xwí xá nǔwalɔ nyanya ɖé gbɔn é ba wɛ a ɖe ɔ, yě sixú kplɔ́n we lěe a ná mɔ wěma jínjɔ́n Biblu jí ɖěɖěe ɖe wě e nyɔ́ zán lɛ́ é xá mɛ gbɔn é. Gɔ́ ná ɔ, Jehovah ɖo gbesisɔmɛ hwebǐnu bó ná d’alɔ we. É wɛ nyí mɛ ɖagbe hú gǎn e sixú d’alɔ we é, ɖó é tuun nǔ e ɖo ayi towe mɛ lɛ́ é. (Nǔx. 14:10; 15:11) Énɛ́ wú ɔ, nɔ xo ɖɛ sɛ́dó è hwɛhwɛ, bó nɔ lɛ́ kplɔ́n Xó tɔn ayǐhɔ́ngbe ayǐhɔ́ngbe.

10. Étɛ́ kpɔ́ndéwú Elie tɔn ka kplɔ́n we?

¹⁰ Kú d’é jí ɖɔ nǔgbódodó Jehovah tɔn lɛ́ wɛ nyɔ́ hú gǎn. Mǐ sixú ɖu le nǔ ɖěɖěe Jehovah byɔ́ mǐ ɖɔ mǐ ní wa lɛ́ é bǐ tɔn. Mɛ ɖěvo lɛ́ nɔ ɖó sísí nú mɛ ɖěɖěe nɔ zán gbɛ sɔgbe xá nǔgbódodó Jehovah tɔn lɛ́ é, gbɛ yětɔn nɔ ɖó nu, bɔ yě nɔ lɛ́ ɖó awǎjijɛ adodwé ɔ. (Ðɛh. 19:8-12) Amɔ̌, mɛ ɖěɖěe nɔ xo nǔgbódodó Jehovah tɔn lɛ́ nyi kɛ́n lɛ́ é nɔ sún sin nǔ nyanya e yě nɔ wa lɛ́ é tɔn. Ð’ayi nǔ e nya e nɔ nyí Elie é ɖɔ dó nǔgbódodó Mawu tɔn lɛ́ xixo nyi kɛ́n wú é wú. Mɛjitɔ́ e yí wǎn nú Jehovah lɛ́ é wɛ kplɔ́n ɛ b’ɛ su. Amɔ̌, hwenu e Elie ɖo wǐnnyáwínnyá mɛ é ɔ, é jɛ gbɛ̌ nyanya lɛ́ dó jí. É jɛ gěe nu jí, bó wá húzú kannumɔ ná; é nɔ zán gbɛ blíblí, lobo lɛ́ jɛ ajo ja jí. Elie ɖɔ ɖɔ xomɛsin kpó adǎka kpó kɛ́ɖɛ́ wɛ émí wá kpo ná, bɔ ayǐ hɔ́n tɛgbɛ ɔ, jijɛjí wɛ jɛ́n é nɔ lɛ́ ɖe. É yí gbe ɖɔ: “Tají ɔ, un wa nǔ e è kplɔ́n mì ɖɔ Klisánwun kún ɖó ná wa ó lɛ́ é bǐ.” Amɔ̌, Elie wɔn nǔ ɖěɖěe é kplɔ́n ɖo wǐnnyáwínnyá mɛ lɛ́ é ǎ. Gǔdo mɛ ɔ, é lɛ́ wá jɛ Biblu kplɔ́n jí. É wa azɔ̌ syɛ́nsyɛ́n bó hɔn ɖɔ nú nǔwalɔ nyanya e é ɖó lɛ́ é, bó bló batɛ́mu ɖo 2 000. Nɛ̌ é ka ɖu le gbɛ zínzán sɔgbe xá nǔgbódodó Jehovah tɔn lɛ́ tɔn gbɔn? Elie ɖɔ: “Din ɔ, un ɖó fífá ayi mɛ tɔn kpó ayixa mímɛ́ ɖé kpó.”c Kpɔ́ndéwú Elie tɔn xlɛ́ mǐ ɖɔ mɛ ɖěɖěe nɔ xo nǔgbódodó Jehovah tɔn lɛ́ nyi kɛ́n lɛ́ é nɔ wa nǔ dó yěɖée wú. Nǔ ná bó tlɛ nyí mɔ̌ ɔ, Jehovah ɖo gbesisɔmɛ bó ná d’alɔ yě bɔ yě ná húzú.

11. Étɛ́ lɛ́ Jehovah ka gbɛ́ wǎn ná?

¹¹ Kplɔ́n bó nɔ gbɛ́ wǎn nú nǔ e Jehovah gbɛ́ wǎn ná lɛ́ é. (Ðɛh. 97:10) Biblu ɖe xlɛ́ ɖɔ Jehovah gbɛ́ wǎn nú “nyiɖokpónɔ wɛ tíin, adingban, xomɛvɔ́nɔ huhu.” (Nǔx. 6:16-19) É lɛ́ “gbɛ́ wǎn nú gbɛtɔ́ e nɔ kɔn hun kɔn nyi ayǐ é, gbɛtɔ́ e nɔ ɖó sísɛ́ nukɔn nú mɛ é.” (Ðɛh. 5:7) Jehovah gbɛ́ wǎn nú linlin kpó nǔwalɔ kpó mɔ̌hun lɛ́ tawun, énɛ́ zɔ́n bɔ é sú kún dó nú mɛ nyanya lɛ́ ɖo Nɔwée hwenu ɖó yě ɖo adǎka xo gbɔn ayǐkúngban ɔ bǐ jí wɛ wútu. (Bǐb. 6:13) Kpɔ́ndéwú ɖěvo ɖíe. Jehovah gbɔn gbeyíɖɔ Malacíi jí bó ɖɔ ɖɔ émí gbɛ́ wǎn nú mɛ ɖěɖěe asú, alǒ asi yětɔn lɛ́ ma nɔ wa nǔɖé nú yě ǎ bɔ yě nɔ gbɛ́ yě lɛ́ é. Mawu gbɛ́ lěe sɛn ɛ gbɔn wɛ yě ɖe é, bó ná ɖó hwɛ nú yě ɖó nǔwalɔ yětɔn wútu.—Mal. 2:13-16; Ebl. 13:4.

12. Étɛ́ ka nyí tínmɛ è ní “gbɛ́ wǎn nú nǔnyanyawiwa” tɔn?

¹² Jehovah ba ɖɔ mǐ ní “gbɛ́ wǎn nú nǔnyanyawiwa.” (Hlɔ̌. 12:9) Xógbe “gbɛ́ wǎn nú” ɔ nɔ ɖe lě do nǔɖé nɔ vɛ́ mɔ nú mɛ sɔ é, alǒ lě do nǔɖé sín wǎn ma nɔ jɛ mɛtɔn jí ǎ sɔ é xlɛ́. Ényí è byɔ́ we ɖɔ hwi ní ɖu nǔɖuɖu gblégblé ɖé ɔ, dǒ nukún lěe nǔ ná cí nú we é mɛ kpɔ́n. Tamɛ linlin d’é jí yǎyá sixú d’azɔn we. Ðo ali ɖokpó ɔ nu ɔ, tamɛ linlin bó ná wa nǔ e Jehovah ɖɔ é nylá é ɖé ɖó ná xyɔ́ wǔ nú mǐ.

13. Étɛ́wú mǐ ka ɖó ná nɔ nya linlin nyanya lɛ́ dó gbě?

¹³ Nɔ nyi alɔ nú linlin nyanya lɛ́. Linlin mǐtɔn lɛ́ sixú zɔ́n bɔ mǐ ná wa nǔ ɖagbe, alǒ nyanya. Nǔ e wú Jezu kplɔ́n mǐ ɖɔ mǐ ní nya linlin ɖěɖěe sixú dɔn mǐ dó hwɛhuhu mɛ lɛ́ é dó gbě é nɛ́. (Mat. 5:21, 22, 28, 29) É ɖo wɛn ɖɔ mǐ ba ɖɔ nǔ mǐtɔn ní nyɔ́ Tɔ́ mǐtɔn jǐxwé tɔn ɔ nukúnmɛ. Énɛ́ wú ɔ, é ɖo tají tawun ɖɔ mǐ ní nɔ yá wǔ nya linlin nyanya ɖěbǔ e nɔ wá ayi mɛ nú mǐ é dó gbě.

14. Étɛ́ xó e mǐ nɔ ɖɔ lɛ́ é ka nɔ ɖe xlɛ́ dó mǐ wú? Nǔkanbyɔ́ tɛ́ lɛ́ mǐ ka ɖó ná ná xósin ná?

¹⁴ Nɔ cɔ́ xó towe lɛ́. Jezu ɖɔ: “Nǔ e tɔ́n sín gbɛtɔ́ nu mɛ ɔ, ayi tɔn mɛ wɛ é gosín.” (Mat. 15:18) Nǔgbó ɔ, xó e mǐ nɔ ɖɔ lɛ́ é nɔ ɖe nǔ gěgé xlɛ́ dó nǔ e mǐ nyí ɖo xomɛ é wú. Énɛ́ wú ɔ, nɔ kan nǔ élɔ́ lɛ́ byɔ́ hwiɖée: ‘É ná bó tlɛ nyí ɖɔ nǔgbóɖiɖɔ ná wa nǔ dó wǔ ce ɔ, un ka nɔ gbɛ́ ɖɔ un kún ná ɖó adingban ó a? Ðó un ko wlí alɔ wú ɔ, un ka nɔ cɔ́ nyiɖée bó ma wá jɛ alɔlwɛ́ ɖú xá mɛ e kpó nyi kpó ma ɖó mɛ̌ ɖokpó ɔ ǎ é jí ó a? Un ka nɔ nyi alɔ nú xó blíblí lɛ́ ɖiɖɔ bǐ mlɛ́mlɛ́ a? Un ka nɔ ɖɔ xó kpó gbe fífá kpó, hwenu e mɛɖé dó xomɛsin nú mì é a?’ A ná mɔ ɖɔ tamɛ linlin dó nǔkanbyɔ́ énɛ́ lɛ́ jí ná d’alɔ we tawun. Xó towe lɛ́ sixú cí gbǒví e ɖo awu ɖé wú lɛ́ é ɖɔhun. Ényí a hun gbǒví éé ɖo awu towe wú lɛ́ é ɔ, a ná mɔ ɖɔ ɖiɖe tɔn ná bɔ wǔ nú we. Mɔ̌ ɖokpó ɔ, ényí a nɔ wa nǔ e wú a kpé lɛ́ é bǐ, bó nɔ nyi alɔ nú mɛzunzun, adingbanɖíɖó kpó xó blíblí lɛ́ ɖíɖɔ́ kpó ɔ, a ná mɔ ɖɔ gbɛtɔ́ xóxó ɔ ɖiɖe nyi ayǐ bɔkun tawun.

15. Étɛ́ ka nyí tínmɛ mǐ ní xwe gbɛtɔ́ xóxó e mǐ nyí é ‘nyi yatín wú’ tɔn?

¹⁵ Ðo gbesisɔmɛ, bá wa nǔ ɖěbǔ e ɖo dandan é. Mɛsɛ́dó Pɔ́lu zán nǔjlɛ́dónǔwú agbɔ̌nnɔ ɖé dó xlɛ́ ɖɔ é ɖo tají tawun ɖɔ mǐ ní húzú gbɛ zínzán mǐtɔn. É wlán ɖɔ mǐ ɖó ná xwe “gbɛtɔ́ e mǐ ko nyí ɖ’ayǐ ɔ” ‘nyi yatín wú.’ (Hlɔ̌. 6:6) Jezu yí gbe bɔ è xwe e nyi yatín wú, bónú nǔ tɔn ná mɔ tɛn dó nyɔ́ Mawu nukúnmɛ. Ðo ali ɖokpó ɔ nu ɔ, bónú nǔ mǐtɔn ná nyɔ́ Jehovah nukúnmɛ ɔ, mǐ ɖó ná ɖo gbesisɔmɛ bá sú linlin kpó nǔwalɔ kpó ɖěɖěe é gbɛ́ wǎn ná lɛ́ é sín kún dó. Afɔ énɛ́ lɛ́ jɛ́n mǐ sixú ɖe bó ná ɖó ayixa mímɛ́, lobo lɛ́ ɖó nukúnɖíɖó ɔ bó ná ɖu vǐví gbɛ mavɔmavɔ tɔn. (Jaan 17:3; 1 Pi. 3:21) Flín ɖɔ Jehovah kún ná húzú nǔgbódodó tɔn lɛ́ bó ná dó hɛn xomɛ hun mǐ ó. É nyɔ́ wa ɔ, mǐ wɛ ɖó ná húzú mɛ alɔkpa e mǐ nyí é, bá mɔ tɛn dó se tónú nú nǔgbódodó tɔn lɛ́.—Eza. 1:16-18; 55:9.

16. Aniwú a ka ɖó ná kán ɖ’é jí bó ná kpo ɖo xwi ɖí xá jlǒ agbaza tɔn lɛ́ wɛ?

¹⁶ Kpo ɖo jlǒ masɔgbe lɛ́ ɖí xwi xá wɛ. É ná bó tlɛ nyí ɖo batɛ́mu towe gúdo ɔ, é ná byɔ́ ɖɔ a ní kpo ɖo jlǒ agbaza tɔn lɛ́ ɖí xwi xá wɛ. Ð’ayi kpɔ́ndéwú nya e nɔ nyí Maurício é tɔn wú. Hwenu e é ɖo wǐnnyáwínnyá mɛ é ɔ, é jɛ kancícá wǎnyíyí tɔn ɖó xá súnnu étɔn ɖɔhun jí. Gǔdo mɛ ɔ, é xo go Kúnnuɖetɔ́ Jehovah tɔn lɛ́ bó jɛ Biblu kplɔ́n jí. Ée é bló hǔzúhúzú lɛ́ ɖo gbɛzán tɔn mɛ gúdo é ɔ, é bló batɛ́mu ɖo 2002. Maurício ko sɛn Jehovah nú xwe gěgé din có, é ɖɔ: “Un ná ɖɔ xójɔxó ɔ, un nɔ lɛ́ ɖí xwi xá jlǒ masɔgbe lɛ́ hweɖélɛ́nu.” É lɔn nú énɛ́ kú awakanmɛ n’i ǎ. É nyɔ́ wa ɔ, é ɖɔ: “Xɛsi nɔ ɖi mì ǎ, ɖó un tuun ɖɔ ényí un ma wá gbeta ɔ kɔn bá wa nǔ sɔgbe xá jlǒ masɔgbe énɛ́ lɛ́ ǎ ɔ, nǔ ce ná kpo ɖo nukún Jehovah tɔn mɛ nyɔ́ wɛ.”d

17. Étɛ́ ka dó wǔsyɛ́n lanmɛ nú we ɖo tan Nabiha tɔn mɛ?

¹⁷ Nɔ xo ɖɛ dó byɔ́ alɔdó Jehovah tɔn, bó nɔ ɖeji dó gbigbɔ tɔn wú, ní ma nyí dó hlɔ̌nhlɔ́n hwiɖésúnɔ tɔn wú ó. (Ga. 5:22; Filí. 4:6) Ényí mǐ ba ná ɖe gbɛtɔ́ xóxó ɔ nyi ayǐ bǐ mlɛ́mlɛ́ ɔ, mǐ ɖó ná w’azɔ̌ syɛ́nsyɛ́n. Ð’ayi kpɔ́ndéwú nǎwe e nɔ nyi Nabiha é tɔn wú. Tɔ́ tɔn jó è dó hwenu e é ɖo xwe ayizɛ́n kpowun ɖó wɛ é. É ɖɔ: “Énɛ́ zɔ́n bɔ un se wǔvɛ́ ɖo lěe nǔ nɔ cí nú mɛ é linu tawun.” Ée Nabiha ɖo susu wɛ é ɔ, xomɛsin kpó dǎka kpó wɛ é wá kpo ná, b’ɛ fɔ́n ɔ, é nɔ lɛ́ ɖo jijɛjí wɛ. É jɛ gěe sa jí bɔ è wlí i, b’ɛ nɔ ganmɛ nú xwe ɖé lɛ́. Kúnnuɖetɔ́ ɖěɖěe nɔ yi gankpá ɔ mɛ lɛ́ é jɛ Biblu kplɔ́n xá ɛ jí. Nabiha jɛ hǔzúhúzú bló dó nǔjɔnǔ mɛ jí. É ɖɔ: “Nǔwalɔ nyanya e un ɖó é ɖé lɛ́ jíjódó bɔ wǔ nú mì tawun. Amɔ̌, azɔ nunu jíjódó vɛ́ wǔ nú mì ɖésú.” Nabiha dó gǎn nú xwe ɖokpó jɛjí, bó wá kpé wú bó jó azɔ nunu dó. Nɛ̌ é ka kpé énɛ́ wú gbɔn? É ɖɔ: “Tají hú gǎn ɔ, ɖɛxixo sɛ́dó Jehovah wɛ d’alɔ mì bɔ un jó dó.” Din ɔ, é nɔ ɖɔ nú mɛ ɖěvo lɛ́ ɖɔ: “Un kú d’é jí ɖɔ ényí un kpé wú bó bló hǔzúhúzú lɛ́ bɔ nǔ ce nyɔ́ Jehovah nukúnmɛ ɔ, mɛ ɖěbǔ sixú kpé wú!”e

18. Sɔgbe xá 1 Kɔlɛ́ntinu lɛ́ 6:9-11 ɔ, étɛ́ mɛsɛntɔ́ Mawu tɔn gěgé ka kpé wú bó bló?

¹⁸ Ðo xwe kanweko nukɔntɔn ɔ mɛ ɔ, súnnu kpó nyɔ̌nu kpó ɖěɖěe Jehovah sɔ́ bɔ yě ná kp’acɛ xá Klísu lɛ́ é ko dó nǔ baɖabaɖa lɛ́ sin kpɔ́n. Ði kpɔ́ndéwú ɔ, yě mɛ ɖé lɛ́ nɔ lɛ aga, súnnu nɔ ɖó xó xá súnnu étɔn ɖɔhun, bɔ mɛ ɖěvo lɛ́ nɔ lɛ́ j’ajo. Amɔ̌, kpó alɔdó gbigbɔ mímɛ́ Mawu tɔn tɔn kpó ɔ, yě kpé wú, bó bló hǔzúhúzú lɛ́ ɖo mɛ alɔkpa e yě nyí é wú. (Xa 1 Kɔlɛ́ntinu lɛ́ 6:9-11.) Mɔ̌ ɖokpó ɔ ɖo égbé ɔ, Biblu ko d’alɔ gbɛtɔ́ lǐvi mɔ̌kpán, bɔ yě bló hǔzúhúzú lɛ́ ɖo gbɛzán yětɔn mɛ.f Yě jó nǔwalɔ nyanya e é vɛ́ wǔ ɖɔ è ní jó dó lɛ́ é dó. Kpɔ́ndéwú yětɔn xlɛ́ ɖɔ hwi lɔ sixú húzú mɛ alɔkpa e a nyí é, bó jó zǐnzán nyanya e a ɖó lɛ́ é dó, lobo jɛxá bá bló batɛ́mu.

19. Étɛ́ lɛ́ jí mǐ ka ná ɖɔ xó dó ɖo xóta e bɔ d’é wú é mɛ?

¹⁹ Gɔ́ nú azɔ̌wiwa bá ɖe gbɛtɔ́ xóxó ɔ nyi ayǐ ɔ, mɛ ɖěɖěe jló ná bló batɛ́mu lɛ́ é ɖó ná dó gǎn, bá sɔ́ gbɛtɔ́ yɔ̌yɔ́ ɔ dó. Xóta e bɔ d’é wú é ná ɖɔ xó dó lěe mǐ sixú wa mɔ̌ gbɔn é kpó lěe mɛ ɖěvo lɛ́ sixú d’alɔ mǐ gbɔn é kpó wú.