NǓKPLƆNKPLƆN 41
Etɛ Biblu ka Ðɔ Dó Xóɖóxámɛ Wu?
Xó ɖiɖɔ dó xóɖóxámɛ wu nɔ cí ɖě nú mɛ gegě. É ɖò mɔ̌ có, Biblu ɖɔ xó dó xóɖóxámɛ wu nyi wɛn, b’ɛ ka nyí ɖò ali e wlí yɛ̌yi é nu. Mǐ nɔ ɖu lè nǔ e é ɖɔ é tɔn. Enɛ ka sɔgbe, ɖó Jehovah e nyí Gbɛɖotɔ́ mǐtɔn é gɔ́n wɛ Biblu ɔ gosin. Enɛ wu ɔ, é tuùn nǔ e na wà ɖagbe nú mǐ hugǎn é. É ɖè lee nǔwiwa mǐtɔn lɛ sixu nyɔ́ nukún tɔn mɛ gbɔn é, kpo nǔ e na d’alɔ mǐ bɔ mǐ na ɖu gbɛ̀ víví kaka sɔyi é kpo xlɛ́ mǐ.
1. Linlin tɛ Jehovah ka nɔ ɖó dó xóɖóxámɛ wu?
Xóɖóxámɛ ɔ, nǔnina ɖé wɛ é nyí sín Jehovah gɔ́n. É ba ɖɔ sunnu kpo nyɔnu kpo e wlí alɔ xá yeɖée é ni ɖu vivǐ tɔn. Nǔnina enɛ nɔ zɔ́n bɔ asú kpo asì kpo lɛ nɔ kpéwú bo nɔ jì vǐ, é nɔ lɛ́ zɔ́n bɔ ye nɔ ɖè wanyiyi xlɛ́ yeɖée lɛ ɖò jɔwamɔ linu. Enɛ wu wɛ Xó Mawu tɔn ɖɔ: “Nyɔnu e a da ɖò dɔnkpɛ mɛ ɔ ni nyí awǎɖonú towe.” (Nǔnywɛxó 5:18, 19) Jehovah nɔ ɖó nukún ɖɔ Klisanwun e wlí alɔ lɛ é ni nɔ gbeji nú mɛ e ye da é, mɔ̌ mɛ ɔ, ye na dó afɔ gbě, alǒ ba nyɔnu ɖevo gbeɖé ǎ.—Xà Eblée lɛ 13:4.
2. Etɛ ka nyí agalilɛ?
Biblu ɖɔ nú mǐ ɖɔ: “Agalɛtɔ́ lɛ . . . ɖě na mɔ tɛn ɖò axɔ́suɖuɖu Mawu tɔn mɛ ǎ.” (1 Kɔlɛntinu lɛ 6:9, 10) Xókwín Glɛkigbe tɔn pornéïa wɛ Biblu wlantɔ́ lɛ zán dó dó gesí agalilɛ. Nǔ ɖěɖee ɖò xókwín enɛ mɛ lɛ é wɛ nyí (1) xóɖóxámɛa ɖò mɛ ɖěɖee ma wlí alɔ xá yeɖée ǎ lɛ é tɛntin, (2) sunnu na ɖóxó xá sunnu alǒ nyɔnu na ɖóxó xá nyɔnu, kpo (3) xó ɖiɖó xá kanlin kpo. Nú mǐ “ma nɔ lɛ aga” ǎ ɔ, mǐ nɔ hɛn xomɛ Jehovah tɔn hun b’ɛ nɔ lɛ́ nyí lè nú mǐɖesunɔ.—1 Tɛsalonikinu lɛ 4:3.
BA DÒ NÚ NǓ D’EJI
Mǐ ni kpɔ́n lee a sixu nyi alɔ nú agalilɛ gbɔn é, kpo lee mimɛ̌jininɔ ɖò walɔ lixo na hɛn lè wá nú we gbɔn é kpo.
3. Hɔn nú agalilɛ
Nya gbejinɔtɔ́ e nɔ nyí Jozɛfu é dó gǎn syɛnsyɛn bo nɔ mimɛ̌ jí ɖò walɔ lixo. Xà Bǐbɛ̌mɛ 39:1-12, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:
Etɛ ka sísɛ́ Jozɛfu b’ɛ hɔn? —Kpɔ́n wemafɔ 9.
A ka lin ɖɔ Jozɛfu wá gbeta ɖagbe ɔ kɔn à? Etɛwu?
Nɛ̌ mɛ winnyawinnya lɛ ka sixu wà nǔ Jozɛfu ɖɔhun, bo na hɔn nú agalilɛ gbɔn ɖò égbé? Xò VIDEO ɔ.
Jehovah ba ɖɔ mǐ mɛ bǐ ni hɔn nú nǔbliblíwiwa. Xà 1 Kɔlɛntinu lɛ 6:18, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:
Ninɔmɛ tɛ lɛ ka sixu sísɛ́ mɛɖé b’ɛ na lɛ̀ aga?
Nɛ̌ a ka sixu hɔn nú nǔbliblíwiwa gbɔn?
4. A hɛn ɔ, a na ɖu ɖò mɛtɛnkpɔn jí
Etɛ ka sixu zɔ́n bɔ é na vɛwǔ bɔ è na ɖu ɖò mɛtɛnkpɔn agalilɛ tɔn jí? Xò VIDEO ɔ, enɛ gudo hǔn, mi ɖɔ xó ɖó kpɔ́ dó nǔkanbyɔ e bɔ d’ewu é jí.
Hwenu e nɔví sunnu e ɖò video ɔ mɛ é mɔ ɖɔ linlin emitɔn lɛ kpo nǔwalɔ emitɔn lɛ kpo sixu zɔ́n bɔ emi na gɔn gbeji nɔ nú asì emitɔn é ɔ, etɛ é ka wà?
É tlɛ nɔ vɛwǔ nú Klisanwun gbejinɔtɔ́ lɛ hweɖelɛnu bonu ye na kpò ɖò linlin mímɛ́ lɛ ɖó wɛ. Nɛ̌ a ka sixu nyi alɔ nú tamɛ linlin dó nǔbliblí lɛ jí gbɔn? Xà Filipunu lɛ 4:8, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:
Nǔ alɔkpa tɛ lɛ jí mǐ ka ɖó na nɔ lin tamɛ dó?
Nɛ̌ Biblu xixa kpo alɔnu mǐtɔn hinhɛn ján ɖò sinsɛnzɔ́ Jehovah tɔn mɛ kpo ka sixu d’alɔ mǐ, bɔ mǐ na ɖu ɖò mɛtɛnkpɔn e na dɔn mǐ dó hwɛhuhu mɛ lɛ é jí gbɔn?
5. Nǔgbododó Jehovah tɔn lɛ nɔ hɛn lè wá nú mǐ
Jehovah tuùn nǔ e na wà ɖagbe nú mǐ hugǎn é. É ɖɔ lee mǐ na nɔ mimɛ̌ jí ɖò walɔ lixo gbɔn é, kpo lè ɖěɖee mɔ̌ wiwa na hɛn wá nú mǐ lɛ é kpo nú mǐ. Xà Nǔnywɛxó 7:7-27 alǒ xò VIDEO ɔ, enɛ gudo hǔn, mi ɖɔ xó ɖó kpɔ́ dó nǔkanbyɔ e bɔ d’ewu lɛ é jí.
Nɛ̌ nyaví ɔ ka wá mɔ éɖée ɖò ninɔmɛ tɛnkpɔn tɔn ɖé mɛ gbɔn?—Kpɔ́n Nǔnywɛxó 7:8, 9.
Sɔgbe xá Nǔnywɛxó 7:23, 26 ɔ, nǔ e agalilɛ sixu jì lɛ é nɔ syɛn tawun. Nú mǐ nɔ mimɛ̌ jí ɖò walɔ lixo ɔ, tagba tɛ lɛ mǐ ka sixu nyi alɔ na?
Nú mǐ zán gbɛ̀ mímɛ́ ɔ, nyɔna tɛ lɛ mǐ ka na mɔ ɖò sɔgudo?
Mɛɖé lɛ lin ɖɔ nǔ e Biblu ɖɔ dó xó ɖiɖó xá mɛ e kpo mɛ kpo ɖó mɛ̌ ɖokpo ɔ é wu é nyla tawun. Amɔ̌ Jehovah, ee nyí Mawu wanyiyinɔ ɔ é, ba ɖɔ gbɛtɔ́ lɛ bǐ ni ɖu gbɛ̀ víví kaka sɔyi. Bo na dó jɛxa gbɛ̀ enɛ ɔ, mǐ ɖó na nɔ zán gbɛ̀ sɔgbe xá nǔgbododó tɔn lɛ. Xà 1 Kɔlɛntinu lɛ 6:9-11, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:
Xó ɖiɖó xá mɛ e kpo mɛ kpo ɖó mɛ̌ ɖokpo ɔ é kɛɖɛ wɛ nyí nǔ e Mawu gbɛ́ wǎn na é à?
Cobonu nǔ mǐtɔn na nyɔ́ Mawu nukúnmɛ ɔ, mǐ mɛ bǐ wɛ ɖó na bló huzuhuzu lɛ. Gǎndidó e é na byɔ lɛ é ka na sɔ mɔ̌ ɖò kɔ à? Xà Ðɛhan 19:9, 12, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:
A ka lin ɖɔ nǔgbododó walɔ ɖagbe tɔn Jehovah tɔn lɛ ɖò jlɛ̌ jí à? Etɛwu?
Jehovah ko d’alɔ mɛ gegě bɔ ye nɔ setónú nú nǔgbododó tɔn walɔ ɖagbe tɔn lɛ. É hɛn ɔ, é na d’alɔ hwi lɔmɔ̌
MƐÐÉ LƐ ÐƆ: “Nǔɖe nyla ɖ’emɛ ɖɔ mɛ we ni ɖóxó xá yeɖée lɛ ǎ. Ye ni vɛ́ ko yí wǎn nú yeɖée lɛ kpowun jɛn nyí xó ɔ.”
Xósin tɛ hwɛ ka na na mɛ mɔ̌hun?
ETƐ LƐ A KA KPLƆ́N?
Nǔnina ɖé wɛ xóɖóxámɛ nyí sín Jehovah gɔ́n, bonu asú kpo asì kpo ɖé na ɖu vivǐ tɔn.
Vɔ̌gbɔnji
Nǔ ɖětɛ lɛ mɔ̌ ka ɖò agalilɛ mɛ?
Etɛ ka na d’alɔ mǐ bɔ mǐ na nyi alɔ nú agalilɛ?
Nú mǐ nɔ xwedó nǔgbododó walɔ ɖagbe tɔn Jehovah tɔn lɛ ɔ, lè tɛ lɛ mǐ ka na mɔ?
KÍJÉ
Gbéjé nǔ e wu Mawu ba ɖɔ sunnu kpo nyɔnu kpo e jló na nɔ kpɔ́ é ni wlí alɔ é kpɔ́n.
“Etɛ Biblu ka Ðɔ Dó Kpɔ́jijɛ Ma Wlí Alɔ Wu?” (Xóta Ɛntɛnɛti jí tɔn)
Biblu ɖɔ ɖɔ xó ɖiɖó xá mɛ e kpo mɛ kpo ɖó mɛ̌ ɖokpo ɔ é nyla. Tinmɛ enɛ tɔn wɛ nyí ɖɔ mǐ na gbɛ́ wǎn nú mɛ e nɔ wà mɔ̌ lɛ é ǎ. Kpɔ́n nǔ e wu wɛ é.
“Xó Ðiɖó Xá Mɛ E kpo Mɛ kpo Ðó Mɛ̌ Ðokpo ɔ É Nyla Wɛ À?” (Xóta Ɛntɛnɛti jí tɔn)
Kpɔ́n lee sɛ́n Mawu tɔn ɖěɖee kúnkplá xóɖóxámɛ é nɔ nya xɛ ɖò mǐ jí gbɔn é.
“Xóɖóxámɛ Nu Mɛ Tɔn ka Nyí Xóɖóxámɛ Dóo À?” (Xóta Ɛntɛnɛti jí tɔn)
Ðò tan gbɛzán tɔn “Ye Wà Nǔ Xá Mì kpo Yɛ̌yi Kpo” mɛ ɔ, kpɔ́n nǔ e sísɛ́ mɛ e nɔ ɖóxó xá mɛ e kpo é kpo ɖó mɛ̌ ɖokpo ɔ é ɖé, b’ɛ huzu jijɔ bo nyɔ́ Mawu nukúnmɛ é.
“Biblu Nɔ Huzu Gbɛzán Mɛtɔn” (Atɔxwɛ [Gungbe], 1er juillet 2011)
a Xóɖóxámɛ tlɔtlɔ, xóɖóxámɛ nu mɛ tɔn, xóɖóxámɛ yonu tɔn, alɔ bliblí mɛ̌ mɛ ɖevo tɔn wu kpo linlin xóɖóxámɛ tɔn kpo ɖò xóɖóxámɛ enɛ lɛ e è gbɛ́ lɛ é mɛ.