NǓKPLƆNKPLƆN 42
Etɛ Biblu ka Ðɔ Dó Tlɛnmɛninɔ kpo Alɔwliwli kpo Wu?
Ðò aca ɖé lɛ mɛ ɔ, mɛ lɛ nɔ lin ɖɔ nú mɛɖé ma da asú alǒ asì ǎ ɔ, é kún sixu ɖó awǎjijɛ ó. Amɔ̌, mɛ e wlí alɔ lɛ é bǐ wɛ nɔ ɖó awǎjijɛ ǎ, mɔ̌ jɛn mɛ e ɖò tlɛnmɛ lɛ é lɔ bǐ ma ka nɔ ba awǎjijɛ kpò ǎ é nɛ. Nǔgbo ɔ wɛ nyí ɖɔ, Biblu ɖɔ ɖɔ tlɛnmɛninɔ kpo alɔwliwli kpo bǐ wɛ nyí nǔnina sín Jehovah gɔ́n.
1. Lè tɛ lɛ mɔ̌ tlɛnnɔ nyínyí ka nɔ hɛn wá?
Biblu ɖɔ: “Mɛ e da [asì alǒ asú] ɔ, nǔ ɖagbe wɛ é wà; mɛ e ma ka da . . . ǎ ɔ, é wà nǔ ɖagbe hú mɛ ɖě ɔ.” (Xà 1 Kɔlɛntinu lɛ 7:32, 33, 38.) Ali tɛ lɛ nu tlɛnnɔ ɖé ka sixu “wà nǔ ɖagbe hú” ɖè? Klisanwun tlɛnnɔ ɖé da mɛ ɖě, bo ja hudo mɛ enɛ tɔn lɛ wu kpé nukún dó gbé ǎ. Enɛ wu ɔ, ɖò kpaa mɛ ɔ, é nɔ ɖó vivo hugǎn. Ði kpɔ́ndéwú ɔ, é sixu kpéwú bo vlɔ́nkan nú sinsɛnzɔ́ tɔn ɖò ali e dɔn mɛ lɛ é nu, ɖi tɛn sisɛ yì to ɖevo mɛ bá jlá wɛnɖagbe ɔ. Taji bǐ ɔ, é sixu zán hwenu gegě dó sɛkpɔ́ Jehovah d’eji.
2. Lè tɛ lɛ mɔ̌ alɔwliwli ɖò sɛ́n linu ka nɔ hɛn wá?
Tlɛnmɛninɔ ɖɔhun ɔ, alɔwliwli lɔ ɖó lè tɔn lɛ. Biblu ɖɔ ɖɔ “mɛ we . . . nyɔ́ hú . . . mɛ ɖokpo géé.” (Nǔnywɛtɔ́xó 4:9) Xó enɛ nyí nǔgbo, ɖò taji ɔ, ɖò Klisanwun ɖěɖee nɔ xwedó nǔgbododó Biblu tɔn lɛ ɖò alɔwliwli yetɔn mɛ lɛ é gɔ́n. Asú kpo asì kpo ɖěɖee wlí alɔ ɖò sɛ́n linu lɛ é nɔ d’akpá ɖɔ emi na yí wǎn nú emiɖée lɛ, ɖó sísí nú emiɖée lɛ, bo na nɔ lɛ́ wlí yɛ̌yi nú emiɖée lɛ. Enɛ nɔ zɔ́n bɔ ye nɔ mɔ hwɛhwɛ ɖɔ emi ɖò ayijayǐ mɛ hú asú kpo asì kpo e jɛ kpɔ́ kpowun lɛ é. Gɔ́ na ɔ, alɔ e ye wlí é nɔ zɔ́n bɔ vǐ yetɔn lɛ lɔ nɔ nɔ ayijayǐ mɛ hugǎn.
3. Linlin tɛ Jehovah ka nɔ ɖó dó alɔwliwli wu?
Hwenu e Jehovah ɖó alɔwliwli nukɔntɔn ɔ ayǐ é ɔ, é ɖɔ: “Sunnu na jó tɔ́ tɔn kpo nɔ tɔn kpo dó, bo na jɛ kpɔ́ xá asì tɔn.” (Bǐbɛ̌mɛ 2:24) Jehovah ba ɖɔ asú kpo asì kpo ɖé ni yí wǎn nǔ yeɖée, bo nɔ kpɔ́ nú táan nabi e ye na nɔ gbɛ̀ na é bǐ. É yí gbè ɖɔ hwenu e mɛ ɖokpo ɖò ye mɛ d’afɔ gbě, alǒ ba nyɔnu ɖevo é kɛɖɛ jɛn ye sixu gbɛ́ yeɖée. Ðò ninɔmɛ mɔ̌hun mɛ ɔ, Jehovah na acɛ asú alǒ asì xomɛvɔnɔ ɔ bɔ é sixu gbɛ́ mɛ e é da é alǒ gbɔ.a (Matie 19:9) Jehovah yí gbè ɖɔ Klisanwun lɛ ni da asì gegě ǎ.—1 Timɔtée 3:2.
BA DÒ NÚ NǓ D’EJI
Nú a na bo nyí tlɛnnɔ alǒ a ko wlí alɔ wɛ nyí ɔ, mǐ ni kpɔ́n lee a sixu ɖ’awǎjijɛ bo na lɛ́ hɛn xomɛ Jehovah tɔn hun gbɔn é.
4. Zǎn nǔnina tlɛnmɛninɔ tɔn towe ganji
Jezu mɔ ɖɔ tlɛnmɛninɔ ɔ, nǔnina ɖé wɛ. (Matie 19:11, 12) Xà Matie 4:23, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:
Nɛ̌ Jezu ka zán tlɛnmɛninɔ tɔn dó sɛn Tɔ́ tɔn, bo lɛ́ zán dó d’alɔ mɛ ɖevo lɛ gbɔn?
Klisanwun tlɛnnɔ lɛ sixu ɖu tlɛnmɛninɔ yetɔn zínzán sín vivǐ Jezu ɖɔhun. Xò VIDEO ɔ, enɛ gudo hǔn, mi ɖɔ xó ɖó kpɔ́ dó nǔkanbyɔ e bɔ d’ewu é jí.
Ali e na hɛn nyɔna wá é tɛ lɛ nu Klisanwun lɛ ka sixu zán tlɛnmɛninɔ yetɔn ɖè?
A ka tuùn à?
Biblu ɖɔ ɖɔ é hwe bǐ ɔ, xwè nabi lě jɛn è na ɖó cobo wlí alɔ ǎ. É ɖò mɔ̌ có, é dó wusyɛn lanmɛ nú mɛ ɖɔ, è ni tó “zɛ winnyawinnya xwè wu” hwɛ̌. Táan ɖé wɛ é nɔ nyí bɔ jlǒ xóɖóxámɛ tɔn nɔ syɛn tawun, bo sixu zɔ́n b’ɛ na vɛwǔ nú mɛ winnyawinnya ɖé b’ɛ na wá gbeta e nǔnywɛ kpé lɛ é kɔn.—1 Kɔlɛntinu lɛ 7:36, nwt.
5. Ba mɛ e a na da é kpo nǔnywɛ kpo
Mɛ e a na da é biba nyí gbeta taji hugǎn e kɔn a na wá ɖò gbɛzán towe mɛ lɛ é ɖokpo. Xà Matie 19:4-6, 9, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:
Etɛwu Klisanwun ɖé ma ka ɖó na zɔn kplakpla jí bo wlí alɔ ǎ?
Biblu sixu d’alɔ we bɔ a na tuùn nǔ ɖěɖee a na kpɔ́n ɖò mɛ e a jló na wlí alɔ xá é gɔ́n é. Nǔ taji bǐ ɔ wɛ nyí ɖɔ, mɛ ɔ ni yí wǎn nú Jehovah.b Xà 1 Kɔlɛntinu lɛ 7:39 kpo 2 Kɔlɛntinu lɛ 6:14 kpo. Enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:
Etɛwu mǐ ka ɖó na wlí alɔ xá Klisanwun hatɔ́ ɖé kɛɖɛ?
Nú mǐ wá gbeta ɔ kɔn bá wlí alɔ xá mɛ e ma yí wǎn nú Jehovah ǎ é ɖé ɔ, nɛ̌ nǔ ka na cí nú Jehovah bɔ a lin?
Nú è dɔn kanlin e gbɔn vovo nú yeɖée lɛ tawun é we cá ɔ, ye na sè wuvɛ̌ tawun. Mɔ̌ ɖokpo ɔ, Klisanwun e da nǔmaɖitɔ́ ɖé é na mɔ wuvɛ̌ gegě
6. Nɔ ɖó linlin ɖokpo ɔ dó alɔwliwli wu Jehovah ɖɔhun
Ðò Izlayɛli hwexónu tɔn ɔ, sunnu ɖé lɛ gbɛ́ asì yetɔn lɛ ɖó hwɛjijɔ cejɛnnabi tɔn lɛ wu. Xà Malacíi 2:13, 14, 16, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:
Etɛwu Jehovah ka gbɛ́ wǎn nú mɛgbigbɛ́ dó acɛ jí?
Afɔdógbě alǒ nyɔnu ɖevo biba nɔ wà nǔ dó asú alǒ asì xomɛvɔnɔ ɔ kpo vǐ lɛ kpo wu tawun
Xò VIDEO ɔ, enɛ gudo hǔn, mi ɖɔ xó ɖó kpɔ́ dó nǔkanbyɔ e bɔ d’ewu é jí.
Nú nǔmaɖitɔ́ ɖé wɛ asì towe alǒ asú towe nyí ɔ, etɛ a ka sixu wà bɔ alɔwliwli mitɔn na ɖó awǎjijɛ?
7. Nɔ xwedó nǔgbododó Jehovah tɔn e kúnkplá alɔwliwli lɛ é
É sixu byɔ ɖɔ mɛɖé ni dó gǎn tawun cobá xwedó nǔgbododó Jehovah tɔn e kúnkplá alɔwliwli lɛ é.c Amɔ̌, Jehovah nɔ kɔn nyɔna dó mɛ ɖěɖee nɔ wà mɔ̌ lɛ é jí. Xò VIDEO ɔ.
Xà Eblée lɛ 13:4, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:
A ka lin ɖɔ nǔgbododó Jehovah tɔn e kúnkplá alɔwliwli lɛ é ɖò jlɛ̌ jí à? Etɛwu?
Jehovah nɔ ba ɖɔ Klisanwun lɛ ni nɔ dó alɔwliwli yetɔn kpo alɔtúntún yetɔn kpo wema mɛ ɖò axɔ́suxwé, ɖó ɖò to gegě mɛ ɔ, acɛkpikpa lɛ nɔ byɔ ɖó mɔ̌. Xà Titu 3:1, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:
Nú a ko wlí alɔ wɛ nyí ɔ, a ka mɔ nǔ jɛ wu ɖɔ ɖò sɛ́n linu ɔ, axɔ́su tuùn ɖɔ hwi wlí alɔ à?
MƐÐÉ SIXU KANBYƆ ÐƆ: “Dandan jɛn è ka na wlí alɔ à? È sixu jɛ kpɔ́ kpowun ǎ wɛ à?”
Xósin tɛ hwɛ ka na na mɛ mɔ̌hun?
ETƐ LƐ A KA KPLƆ́N?
Nǔnina wɛ tlɛnmɛninɔ kpo alɔwliwli kpo nyí sín Jehovah gɔ́n. Tlɛnnɔ kpo mɛ e wlí alɔ é kpo bǐ hɛn ɔ, ye na ɖó awǎjijɛ bo na lɛ́ ɖu gbɛ̀ e jɛmɛ nú mɛ é sín vivǐ, nú ye zán gbɛ̀ sɔgbe xá jlǒ Jehovah tɔn ɔ nɛ.
Vɔ̌gbɔnji
Nɛ̌ mɛɖé ka sixu zán tlɛnmɛninɔ tɔn ganji gbɔn?
Etɛwu Biblu ka ɖɔ ɖɔ è ni wlí alɔ xá Klisanwun hatɔ́ ɖé kɛɖɛ?
Hwɛjijɔ e jinjɔn Mawuxówema ɔ jí é kɛɖɛ tɛ jí è ka sixu zɔ́n dó bo gbɛ́ mɛ e è da é?
KÍJÉ
Etɛ ka nyí tinmɛ è ni wlí alɔ “ɖò bǔ e [è] ɖè xá Aklunɔ ɔ mɛ” é, alǒ ɖò Aklunɔ mɛ kɛɖɛ tɔn?
“Nǔ E Nǔxatɔ́ lɛ Kanbyɔ lɛ É” (Atɔxwɛ [Gungbe], 1er juillet 2004)
Kpɔ́n video kpɛví kpɛví atɔn elɔ lɛ e sixu d’alɔ we, bɔ a na wá gbeta ɖagbe lɛ kɔn dó xɔ́ntɔn mɛ ninɔ kpo alɔwliwli kpo wu é.
Kpɔ́n nǔ e wu nɔví sunnu ɖé mɔ ɖɔ nǔ e Jehovah na emi é, xɔ akwɛ tawun hú nǔ ɖebǔ e emi sɔ́ dó savɔ̌ é.
Etɛ lɛ mɔ̌ mɛɖé ka ɖó na gbéjé kpɔ́n hwɛ̌, cobá ɖɔ mɛgbigbɛ́ alǒ kínklán xó?
a Kpɔ́n Tinmɛ E Ðò Vivɔnu É 4gɔ́ ɔ. É ɖɔ xó dó kínklán wu, hwenu e afɔdógbě alǒ nyɔnu ɖevo biba sín xó ma ko wá xwetɔ́n ǎ é.
b Ðò aca ɖé lɛ mɛ ɔ, mɛjitɔ́ lɛ nɔ ba asì nú vǐ sunnu yetɔn alǒ asú nú vǐ nyɔnu yetɔn. Ðò ninɔmɛ mɔ̌hun mɛ ɔ, nǔ nukɔntɔn e mɛjitɔ́ wanyiyinɔ lɛ nɔ kpɔ́n é wɛ nyí ɖɔ mɛ ɔ ka yí wǎn nú Jehovah à jí; ye nɔ kpɔ́n ɖɔ é ka ɖó akwɛ alǒ ɖò tɛn nukúnɖeji ɖé mɛ à jí ǎ.
c Nú a ɖò kpɔ́ xá mɛ e a ma wlí alɔ xá ǎ é ɖé ɔ, a na jó è dó kpo a na wlí alɔ xá ɛ kpo ɔ, gbeta hwiɖesunɔ tɔn wɛ.