Hwetɛnu Nyɔnu Klisanwun ɖé ka Ðó Na Cyɔn Nǔ Ta? Etɛwu?

Hwetɛnu nyɔnu Klisanwun ɖé ka ɖó na sɔ́ nǔ cyɔn ta ɖò sinsɛn-biblo tɔn mɛ? Etɛwu é ka ɖó na wà mɔ̌? Mi nú mǐ ni ba dò nú nǔ e Mawu sɔ́ d’ayi mɛ nú mɛsɛ́dó Pɔlu b’ɛ wlan ɖò ali enɛ nu é. É na mǐ alixlɛ́mɛ e sín hudo mǐ ɖó bo na dó sixu wà nǔ e sɔgbe bo nɔ sɔ́ Mawu sù lɛ é. (1 Kɔlɛntinu lɛ 11:3-16) Pɔlu ɖɔ xó dó nǔ atɔn jí bɔ mǐ ɖó na gbéjé kpɔ́n: (1) nǔwiwa e hwenu nyɔnu ɖó na sɔ́ nǔ cyɔn ta lɛ é, (2) ninɔmɛ e mɛ é ɖó na wà mɔ̌ ɖè lɛ é, (3) hwɛjijɔ e wu é ɖó na wà mɔ̌ lɛ é.

Nǔwiwa lɛ. Nǔwiwa wè jí wɛ Pɔlu ɖɔ xó dó: ɖɛxixo hwenu kpo hwenu e Mawu sɔ́ xó dó nu nú mɛ bɔ è ɖò ɖiɖɔ wɛ é kpo. (Wemafɔ 4, 5) Xóɖiɖɔ nú Jehovah kpo sísí kpo wɛ ɖɛxixo nyí. Égbé ɔ, nùkplɔnmɛ jinjɔn Biblu jí ɖebǔ e Klisanwun ɖé xwlé mɛ é cí xó wɛ Mawu sɔ́ dó nu n’i b’ɛ ɖɔ ɖɔhun. Amɔ̌, ɖiɖɔ wɛ Pɔlu ɖè ɖɔ nyɔnu ɖé ɖó na sɔ́ nǔ cyɔn ta hweɖebǔnu e é ɖò ɖɛ xò wɛ alǒ Biblu kplɔ́n mɛ wɛ é à? Eǒ. Ninɔmɛ e mɛ nyɔnu ɖé xoɖɛ alǒ kplɔ́n mɛ ɖè é wɛ na ɖexlɛ́ ɖɔ é ɖó na wà mɔ̌ alǒ gbɔ.

Ninɔmɛ lɛ. Ninɔmɛ wè jí wɛ xógbe Pɔlu tɔn lɛ ɖɔ xó dó, ye wɛ nyí xwédo mɛ kpo agun mɛ kpo. É ɖɔ: “Asisúnɔ nyí gǎn nú asì tɔn . . . Enyi nyɔnu ɖé ɖè nǔ e é cyɔn ta ɔ síìn, hwenu e é ɖò ɖɛ xò wɛ, abǐ hwenu e Mawu sɔ́ xó ɖé dó nu n’i, bɔ é ɖò ɖiɖɔ wɛ ɔ, asú tɔn ɖekpo wɛ é ɖè.” (Wemafɔ 3, 5) Ðò tuto xwédo tɔn mɛ ɔ, asú wɛ nyí mɛ e Jehovah sɔ́ b’ɛ nyí gǎn alǒ ta nú asì tɔn é. Enyi ɖɔ nyɔnu ɔ ma nɔ ɖó sísí e jɛ é nú asú tɔn ǎ, bo nɔ wà azɔ̌ e Jehovah sɔ́ d’alɔ mɛ nú asú tɔn lɛ é ɔ, asú tɔn ɖekpo wɛ é ɖè. Ði kpɔ́ndéwú ɔ, enyi é byɔ ɖɔ é ni kpé nukún dó Biblu kplɔnkplɔn ɖé wu bonu asú tɔn ɖò finɛ ɔ, é na sɔ́ nǔ cyɔn ta bo dó xlɛ́ ɖɔ emi ɖó sísí nú acɛkpikpa asú emitɔn tɔn. Enyi asú tɔn ko bló baptɛm kpo é gbɔ kpo ɔ, é ɖó na bló mɔ̌, ɖó asú ɔ wɛ nyí gǎn xwédo ɔ tɔn.a Enyi é byɔ ɖɔ é ni xoɖɛ alǒ kplɔ́n Biblu mɛ bonu vǐ tɔn sunnu kpɛví e ko bló baptɛm é ɖò finɛ ɔ, é na lɛ́ sɔ́ nǔ cyɔn ta, é nyí vǐ ɔ nyí gǎn xwédo ɔ tɔn wutu wɛ ǎ, amɔ̌, ɖó acɛkpikpa e sunnu e ko bló baptɛm lɛ é ɖó ɖò agun Klisanwun tɔn mɛ é wutu wɛ.

Pɔlu ɖɔ xó dó ninɔmɛ agun tɔn jí bo ɖɔ: “Nú mɛɖé ka jló na lɛ́ dɔn nǔ dó xó enɛ ɔ wu ɔ, nǔ ɖokpo e é na tuùn ɔ wɛ nyí ɖɔ: mǐdɛɛ lɛ ɖó walɔ ɖevo ǎ; agun Mawu tɔn lɛ lɔ ka ɖó walɔ ɖevo ǎ.” (Wemafɔ 16) Ðò agun Klisanwun tɔn mɛ ɔ, sunnu e ko bló baptɛm lɛ é wɛ sixu nyí tatɔ́. (1 Timɔtée 2:11-14; Eblée lɛ 13:17) Sunnu lɛ kɛɖɛ wɛ è nɔ ɖè bɔ ye nɔ nyí mɛxo agun tɔn alǒ devizɔwatɔ́ sinsɛnzɔ́wiwa tɔn, bɔ Mawu zɔ́n azɔ̌ ye bɔ ye na nɔ kpé nukún dó lɛngbɔ̌ tɔn lɛ wu. (Mɛsɛ́dó 20:28) Amɔ̌, ninɔmɛ ɖé lɛ sixu wá byɔ ɖɔ Klisanwun nyɔnu ɖé ni kpé nukún dó azɔ̌ e nɔví sunnu e ko bló baptɛm bo jɛxa é ɖé wɛ ɖó na bló é wu. Ði kpɔ́ndéwú ɔ, é sixu byɔ ɖɔ é ni kpé nukún dó kplé kúnnuɖegbe tɔn ɖé wu, ɖó nɔví sunnu e ko bló baptɛm bo jɛxa é ɖé ɖè ǎ alǒ wá ǎ wutu. Alǒ é sixu byɔ ɖɔ é ni kpé nukún dó Biblu kplɔnkplɔn e sín tuto è ko bló jɛ nukɔn é ɖé wu bɔ nɔví sunnu e ko bló baptɛm é ɖé na ɖò finɛ.b Ðó azɔ̌ mɔhun lɛ nyí azɔ̌ agun Klisanwun tɔn tɔn sín akpáxwé wutu ɔ, é na sɔ́ nùɖé cyɔn ta bo dó ɖexlɛ́ ɖɔ azɔ̌ e nɔví sunnu ɖé wɛ ɖó na wà é wà wɛ emi ɖè.

Ðò alɔ ɖevo mɛ ɔ, ninɔmɛ sinsɛn-biblo tɔn gègě tíìn b’ɛ byɔ ɖɔ nɔví nyɔnu ɖé ni sɔ́ nǔ cyɔn ta dandan ǎ. Ði kpɔ́ndéwú ɔ, hwenu e é ɖò xósin na wɛ ɖò kplé Klisanwun tɔn lɛ jí wɛ é, ɖò kúnnu ɖè wɛ sín xwé ɖé gbè jɛ xwé ɖé gbè xá asú tɔn alǒ nɔví sunnu e ko bló baptɛm é ɖé wɛ é, alǒ ɖò nǔ kplɔ́n xá vǐ tɔn e ma ko bló baptɛm ǎ lɛ é abǐ ɖò ɖɛ xò xá ye wɛ é ɔ, é byɔ ɖɔ é ni sɔ́ nǔ cyɔn ta ǎ. É ɖò gaàn ɖɔ nùkanbyɔ ɖevo lɛ sixu wá tíìn, lobɔ enyi nɔví nyɔnu ɖé xò nǔ kpɔ́n dó ninɔmɛ ɖé wu ɔ, é sixu ba dò nú nǔ.c Enyi é ba dò nú nǔ bo lɛ́ kpó ɖò nǔ xò kpɔ́n wɛ lobonu ayixa tɔn ma ka dó hwɛ ɛ ǎ hǔn, é nyla ɖɔ é ni sɔ́ nǔ cyɔn ta ǎ, lee è xlɛ́ gbɔn ɖò fɔtóo ɔ mɛ é.

Hwɛjijɔ lɛ. Ðò wemafɔ 10gɔ́ ɔ mɛ ɔ, mǐ mɔ hwɛjijɔ e wu Klisanwun nyɔnu ɖé na sɔ́ nǔ cyɔn ta é wè; wemafɔ ɔ ɖɔ: “Nyɔnu e ɖò asúxwé ɔ, wuntun e ɖexlɛ́ ɖɔ é ɖò asú tɔn sín acɛ mɛ ɔ ɖó na ɖò ta tɔn ɖó wɛnsagun lɛ wu.” Nukɔntɔn ɔ, ɖǒ ayi xógbe “wuntun e ɖexlɛ́ ɖɔ é ɖò asú tɔn sín acɛ mɛ ɔ” wu. Gbɔn nùɖé sísɔ́ cyɔn ta gblamɛ ɔ, nyɔnu ɖé nɔ xlɛ́ ɖɔ emi tuùn acɛ e Jehovah zé d’alɔ mɛ nú sunnu e ko bló baptɛm ɖò agun ɔ mɛ lɛ é é. Mɔ̌ mɛ ɔ, é nɔ xlɛ́ ɖɔ emi yí wǎn nú Jehovah Mawu bo lɛ́ ɖò gbeji n’i. Xógbe “ɖó wɛnsagun lɛ wu” mɛ wɛ hwɛjijɔ wegɔ ɔ tɔ́n ɖè. Nɛ̌ nǔ sísɔ́ cyɔn ta nyɔnu ɖé tɔn ka kàn nùɖíɖó gbigbɔ tɔn hlɔnhlɔnnɔ enɛ lɛ gbɔn?

Enyi wɛnsagun lɛ mɔ bɔ è ɖò sísí ɖó nú tuto acɛkpikpa tɔn e Jehovah zé ɖ’ayǐ ɖò tutoblonunu tɔn mɛ, ɖò jixwé kpo ayikúngban jí kpo é wɛ ɔ, xomɛ nɔ hun ye tawun. Gbɛtɔ́ lɛ nyí hwɛhutɔ́ có, kpɔ́ndéwú e ye nɔ zé ɖ’ayǐ ɖò ali enɛ nu é nɔ lɛ́ ɖó lè nú wɛnsagun lɛ. Mǐ tuùn ɖɔ ye lɔ ɖó na hwìhwɛ́ yeɖée ɖó tuto e Jehovah zé ɖ’ayǐ lɛ é glɔ, lobɔ ye mɛ ɖé lɛ ka hwe d’ewu wá yì. (Judi 6) Wɛnsagun lɛ nɔ mɔ bɔ Klisanwun nyɔnu e mɔ nǔ kpɔ́n hú sunnu e ko bló baptɛm ɖò agun ɔ mɛ é ɖé, bo mɔ nukúnnú jɛ nǔ mɛ hú i, lobo lɛ́ nyɔ̌nùí hú i é ɖé nɔ sɔ́ jlǒ dó hwíhwɛ́ éɖée dó acɛkpikpa sunnu enɛ tɔn glɔ. Ðò ninɔmɛ ɖé lɛ mɛ ɔ, nyɔnu ɔ nɔ nyí Klisanwun yí ami dó ɖè ee na wá ɖu gǎn xá Klisu é ɖé. Gudo mɛ ɔ, tɛn e mɛ nyɔnu mɔhun na wá nɔ ɖò jixwé é ɖó kpinkpɛn hú ee mɛ wɛnsagun lɛ ɖè é tawun. Kpɔ́ndéwú mɛɖée hwíhwɛ́ hwíhwɛ́ tɔn ɖagbe tawun ɖé wɛ enɛ nyí nú wɛnsagun lɛ dìn. Nugbǒ ɔ, wǔjɔmɛ ɖaxó ɖé wɛ é nyí nú nɔví nyɔnu lɛ bǐ ɖɔ ye ni ɖè tónúsíse kpo mɛɖesɔhwe kpo xlɛ́ gbɔn gbejininɔ kpo mɛɖée hwíhwɛ́ hwíhwɛ́ kpo sín gblamɛ ɖò wɛnsagun gbejinɔtɔ́ livi mɔkpan lɛ sín nukúnmɛ.