2 Kɔlɛ́ntinu lɛ́ 12:9: “Fɛ́nú ce ko kpé we”

“Fɛ́nú ce ko kpé we, ɖó hlɔ̌nhlɔ́n ce ɖo bǔte nyí wɛ ɖo gǎnmaɖó towe mɛ.”—2 Kɔlɛ́ntinu lɛ́ 12:9, Biblu gbɛ yɔ̌yɔ́ ɔ tɔn.

“Wǔjɔmɛ ce wɛ nyí nǔ e hudó we ɔ bǐ, ɖó hwenu e a ma kpé nǔ wú ǎ ɔ wɛ hlɔ̌nhlɔ́n ce nɔ ɖe nǔwiwa tɔn lɛ́ bǐ xlɛ́ dégbédégbé.”—2 Kɔlɛ́ntinu lɛ́ 12:9, MAWUXÓWÉMA.

Mɛsɛ́dó Pɔ́lu ɖó gǎnmaɖó lɛ́ có, Mawu d’akpá ɖɔ émí ná ná ɛ hlɔ̌nhlɔ́n e sín hudó é ɖó bá dɛ ɖo wǔvɛ́ tɔn lɛ́ nu é.

“Fɛ́nú ce ko kpé we.” È sixú lɛ́ tínmɛ sin e Mawu ná nú ɖɛ e Pɔ́lu xo azɔn mɔ̌kpán é dó “xomɛnyínyɔ́ ce wɛ nyí nǔ e hudó we ɔ bǐ.” Ðo xógbe ɖěvo mɛ ɔ, fɛ́nú Mawu tɔn ko kpé Pɔ́lu bɔ é ná dɛ ɖo wǔvɛ́ tɔn lɛ́ nu. Gbɔn nɛ̌ é? Xókwín e è tínmɛ bɔ é nyí “fɛ́nú,” alǒ “wǔjɔmɛ” é nɔ dó gesí nǔ e è ma jɛxá ǎ, bɔ Mawu hun alɔ bo ná mɛ vɔ̌nu é. Nǔ e Pɔ́lu wlán lɛ́ é xlɛ́ ɖɔ é ɖu fɛ́nú Mawu tɔn sín le tawun. Pɔ́lu nɔ dó ya nú klisánwun lɛ́ ɖ’ayǐ có, Mawu ná ɛ hlɔ̌nhlɔ́n bɔ é húzú walɔ tɔn, bo lɛ́ d’alɔ mɛ ɖěvo lɛ́ bɔ yě húzú klisánwun. (1 Kɔlɛ́ntinu lɛ́ 15:9, 10; 1 Timɔtée 1:12-14) Pɔ́lu sixú ɖeji dó Mawu wú ɖɔ é ná d’alɔ émí bɔ émí ná ɖu ɖo tagba alǒ wǔvɛ́ ɖěbǔ jí.

“Ðó hlɔ̌nhlɔ́n ce ɖo bǔte nyí wɛ ɖo gǎnmaɖó towe mɛ.” Aklúnɔ Jexóvaa flín Pɔ́lu ɖɔ hlɔ̌nhlɔ́n émítɔn nɔ jɛ wě hú gǎn hwenu e émí zán dó d’alɔ gbɛtɔ́ gǎnmaɖónɔ kpó hwɛhutɔ́ kpó lɛ́ é. (2 Kɔlɛ́ntinu lɛ́ 4:7; 12:8) Nú klisánwun lɛ́ nɔ yí gbe ɖɔ émí ɖó gǎnmaɖó lɛ́ ɔ, gbe yí wɛ yě ɖe nú hlɔ̌nhlɔ́n Mawu tɔn nú é ná d’alɔ yě bǐ mlɛ́mlɛ́ nɛ́. (Efɛ́zinu lɛ́ 3:16; Filípunu lɛ́ 4:13) Mɔ̌ wɛ hlɔ̌nhlɔ́n Mawu tɔn nɔ jɛ wě ɖo gǎnmaɖó gbɛtɔ́ lɛ́ tɔn mɛ gbɔn.

Pɔ́lu wlán wěma e Mawu sɔ́ d’ayi mɛ n’i é ɖé sɛ́dó klisánwun e ɖo Kɔlɛ́nti lɛ́ é ɖo 55 H.H. tɔn mɔ̌. Ðo akpáxwé gǔdo tɔn wěmasɛ́dómɛ énɛ́ tɔn mɛ ɔ, é tínmɛ ɖɔ émí ɖó acɛ bá nyí mɛsɛ́dó. É mɔ ɖɔ émí ɖó ná wa mɔ̌, ɖó mɛ e ylɔ́ yěɖée ɖɔ nǔkplɔ́nmɛtɔ́ lɛ́ é mɔ xó ɖɔ dó wǔtu tɔn, vlafo ɖó lěe é cí ɖo wěxo é alǒ nǔwúkpíkpé xóɖiɖɔ tɔn tɔn wútu.—2 Kɔlɛ́ntinu lɛ́ 10:7-10; 11:5, 6, 13; 12:11.

Bónú Pɔ́lu ná dó jɛ hun dó éɖée jí ɔ, é tínmɛ ɖɔ nú hlɔ̌nhlɔ́n émítɔn wú wɛ émí ko gán jɛ ɔ, émí kún ná wa sinsɛnzɔ́ émítɔn bo lɛ́ dɛ ɖo wǔvɛ́ gěgé nu ó. (2 Kɔlɛ́ntinu lɛ́ 6:4; 11:23-27; 12:12) Ðo wěmata 12​gɔ́ ɔ mɛ ɔ, é ɖɔ xó ɖo nǔjlɛ́dónǔwú linu dó ‘wun e ɖo lanmɛ n’i é ɖé’ wú, b’ɛ cí ɖɔ tagba ɖé wɛ bo ɖo wǔvɛ́ ɖó n’i wɛ magbokɔ ɖo agbaza kpó lěe nǔ nɔ cí nú mɛ é kpó linu. (2 Kɔlɛ́ntinu lɛ́ 12:7) Pɔ́lu tínmɛ nǔ e ɖo wǔvɛ́ ɖó n’i wɛ é ǎ có, é kú d’é jí bá dɛ, kpó alɔdó Mawu tɔn kpó.

Ðo égbé ɔ, klisánwun lɛ́ lɔ sixú ɖí xwi xa tagba lɛ́ kpó yadónúmɛ kpó. Tuun e yě tuun ɖɔ kpó hlɔ̌nhlɔ́n Mawu tɔn kpó ɔ, yě sixú dɛ ɖo tagba ɖěbǔ nu é nɔ dó gbɔ nú yě. Pɔ́lu ɖɔhun ɔ, yě sixú ɖeji bo ɖɔ: “Hwenu e un ma ɖó gǎn ǎ é ɔ, un nɔ mɔ hlɔ̌nhlɔ́n.”—2 Kɔlɛ́ntinu lɛ́ 12:10.

Kpɔ́n video kléwún élɔ́ bo ná dó mɔ nǔ tawun tawun e jí wěma 2 Kɔlɛ́ntinu lɛ́ tɔn ɖɔ xó dó lɛ́ é.