“Nɔ xwedó” Jezu ɖo batɛ́mu towe gúdo

1-2. Nú mɛɖé bló batɛ́mu gúdo ɔ, nyɔ̌ná tɛ́ lɛ́ é ka nɔ mɔ?

AWǍJIJƐNÚ wɛ é nyí ɖɔ è ní bló batɛ́mu bo húzú xwédo Jexóva tɔn sín hǎgbɛ́. Mɛ ɖěɖěe è jɔ wǔ bɔ yě vɛ́ kpó Jexóva kpó gbɔn mɔ̌ lɛ́ é ná yí gbe nú xó élɔ́ e ɖɛhanwlántɔ́ Davídi ɖɔ é: “Nǔ nyɔ́ nú mɛ e a [Jexóva] sɔ́, bo dɔn dó wǔ, bɔ é ná nɔ xwé towe gbe é.”—Ðɛh. 65:5.

² Mɛ alɔkpa tɛ́ lɛ́ Jexóva ka nɔ kplá wá xwé tɔn gbe? Lěe è ko ɖɔ gbɔn ɖo xóta e wá yi é mɛ é ɔ, é nɔ sɛkpɔ́ mɛ ɖěɖěe nɔ xlɛ́ ɖɔ émí ba bo ná vɛ́ kpó é kpó lɛ́ é. (Ja. 4:8) Hwenu e a zé hwiɖée jó nú Jexóva bo bló batɛ́mu é ɔ, a sɛkpɔ́ ɛ hú gǎn ɖo ali bǔnɔ ɖé nu. A sixú ɖeji ɖɔ bɛ́sín fínɛ́ ɖidó ɔ, é ‘ná kɔn nyɔ̌ná dó jǐ we bɔ é ná túnflá.’—Mal. 3:10; Jel. 17:7, 8.

 3. Azɔ̌ tají tɛ́ klisánwun e zé yěɖée jó nú Jexóva bo bló batɛ́mu lɛ́ é ka ɖó? (Nǔnywɛ́tɔ́xó 5:4, 5)

³ É ɖo wɛn ɖɔ, bǐbɛ́ nǔwiwa lɛ́ tɔn kpowun wɛ batɛ́mu nyí. Ényí a ɖe afɔ énɛ́ gúdo ɔ, a ná ba ná wa nǔ e wú a kpé é bǐ bá zán gbɛ sɔgbe xá akpá e a dó é, é ná bo tlɛ nyí hwenu e nǔ ɖěɖěe ná wá tɛ́n nǔɖiɖi towe kpɔ́n lɛ́ é xwetɔ́n é ɔ nɛ́. (Xa Nǔnywɛ́tɔ́xó 5:4, 5.) Ðó a nyí ahwanvú Jezu tɔn wútu ɔ, a ná wa nǔ éɖɔhun, bo lɛ́ xwedó sɛ́n tɔn lɛ́ lěe a kpé wú gbɔn é bǐ mlɛ́mlɛ́. (Mat. 28:19, 20; 1 Pi. 2:21) Xóta élɔ́ ná d’alɔ we bɔ a ná wa mɔ̌.

MƐTƐ́NKPƆ́N LƐ́ NÁ BO ÐO FÍNƐ́ HǓN, “NƆ XWEDÓ” JEZU

 4. Ali tɛ́ nu ahwanvú Jezu tɔn lɛ́ ka nɔ sɔ́ “yatín” yětɔn lɛ́ ɖe? (Luki 9:23)

⁴ Batɛ́mu towe gúdo ɔ, gbɛ ná ɖo tɔnfinnɔɔ nú we ǎ. Nǔgbó ɔ, Jezu ɖɔ nyi wɛn nú ahwanvú tɔn lɛ́ ɖɔ, yě ní sɔ́ “yatín” yětɔn. Bɔ mɔ̌ wɛ yě ɖó ná wa “ayǐhɔ́ngbe ayǐhɔ́ngbe.” (Xa Luki 9:23.) Ðiɖɔ wɛ Jezu ɖe ɖɔ ahwanvú émítɔn lɛ́ ná nɔ mɔ wǔvɛ́ hwebǐnu a? Ðěbǔ ǎ. Ðɛ̌ tɛ jí wɛ é ɖe kpowun ɖɔ gbɔn vo nú nyɔ̌ná ɖěɖěe yě ná mɔ lɛ́ é ɔ, tagba ɖé lɛ́ ná wá ba yě. Tagba énɛ́ lɛ́ ɖé lɛ́ tlɛ sixú vɛ́ wǔ tawun.—2 Tim. 3:12.

 5. Nyɔ̌ná tɛ́ lɛ́ sín akpá Jezu ka dó nú mɛ ɖěɖěe sɔ́ nǔɖé lɛ́ dó sá vɔ̌ lɛ́ é?

⁵ Vlafo a ko ɖí xwi xá gbeklánxámɛ xwédo towe sín mɛ lɛ́ tɔn, alǒ vlafo a ko sɔ́ nǔ agbaza tɔn lɛ́ dó sá vɔ̌ bo ná dó nya nǔ Axɔ́súɖuto ɔ tɔn lɛ́ gbé jɛ nukɔn. (Mat. 6:33) Nú mɔ̌ wɛ ɔ, a sixú ɖeji ɖɔ Jexóva ɖ’ayi nǔ ɖěɖěe a wa kpó gbejíninɔ kpó lɛ́ é wú. (Ebl. 6:10) Vlafo a ko mɔ nǔgbó xó élɔ́ lɛ́ e Jezu ɖɔ é tɔn: “Má ɖɔ nǔgbó nú mi, mɛ ɖěbǔ e jó xwé, alǒ nɔví súnnu, alǒ nɔví nyɔ̌nu, alǒ nɔ, alǒ tɔ́, alǒ vǐ, alǒ gle dó, ɖó nyɛ kpó wɛn ɖagbe ɔ kpó wútu é, ná mɔ xwé, nɔví súnnu, nɔví nyɔ̌nu, nɔ, vǐ kpó gle kpó donu 100 ɖo hwe élɔ́ nu din, gɔ́ nú yadónúmɛ lɛ́; bɔ ɖo gbɛ e ja é mɛ ɔ, é ná mɔ gbɛ mavɔmavɔ.” (Mak. 10:29, 30) Nyɔ̌ná ɖěɖěe a ko mɔ lɛ́ é hú gǎn vɔ̌ ɖěbǔ a sá é flaflá tɔn.—Ðɛh. 37:4.

 6. Étɛ́wú é ka byɔ́ ɖɔ a ní kpo ɖo ahwan tɔ́n “jlǒ agbaza tɔn lɛ́” wɛ ɖo batɛ́mu towe gúdo?

⁶ É byɔ́ ɖɔ a ní kpo ɖo ahwan tɔ́n “jlǒ agbaza tɔn lɛ́” wɛ ɖo batɛ́mu towe gúdo. (1 Jaan 2:16) É ɖo wɛn ɖɔ, kúnkan Adámu e nyí hwɛhutɔ́ é tɔn nyí wɛ jɛ́n a kpo ɖe. Hweɖélɛ́nu ɔ, lěe nǔ cí nú mɛsɛ́dó Pɔ́lu é wɛ nǔ sixú nɔ cí nú hwi lɔ. É wlán ɖɔ: “Nǔgbó ɔ, sɛ́n Mawu tɔn nɔ dó xomɛhunhun nú mì ɖo ayi ce mɛ, amɔ̌, un nɔ mɔ sɛ́n ɖěvo ɖo agbaza ce mɛ bɔ é nɔ ɖo ahwan fun xá sɛ́n e ɖo linlin ce mɛ é wɛ, lobo nɔ sɔ́ mì dó ɖó gantɔ́ nú hwɛhuhu sín sɛ́n e ɖo agbaza ce mɛ é.” (Hlɔ̌. 7:22, 23) Jlǒ nyanya towe lɛ́ sixú nɔ kú awakanmɛ nú we. Amɔ̌, tamɛ linlin dó akpá e a dó nú Jexóva hwenu e a zé hwiɖée jó n’i é jí ná ná hlɔ̌nhlɔ́n kán e a kán ɖ’é jí bá tɔ́n ahwan mɛtɛ́nkpɔ́n lɛ́ é. È ná ɖɔ xójɔxó ɔ, hwenu e mɛtɛ́nkpɔ́n lɛ́ ná wá xwetɔ́n é ɔ, akpá énɛ́ e a dó é ná d’alɔ we. Gbɔn nɛ̌ é?

 7. Nɛ̌ zě e a zé hwiɖée jó nú Jexóva é ka ná d’alɔ we bɔ a ná nɔ gbejí n’i gbɔn?

⁷ Hwenu e a zé hwiɖée jó nú Jexóva é ɔ, a gbɛ́ hwiɖée. Tínmɛ énɛ́ tɔn wɛ nyí ɖɔ, a gbɛ́ nǔ e nɔ jló we bɔ Jexóva gbɛ́ wǎn ná lɛ́ é kpó nǔ e gbé a jló ná nya bɔ é lɛ́ gbɛ́ wǎn ná lɛ́ é kpó. (Mat. 16:24) Énɛ́ wú ɔ, ényí mɛtɛ́nkpɔ́n ɖé wá ba we ɔ, é ná byɔ́ ɖɔ a ní zán hwenu bo ɖo tamɛ lin dó nǔ e a ná wa é jí wɛ ǎ. A ná ko tuun nǔ e a ná wa é bá ɖo gbesisɔmɛ bá wa, énɛ́ wɛ nyí a ná nɔ gbejí nú Jexóva. A ná kán ɖ’é jí bǐ mlɛ́mlɛ́, bo ná nɔ wa nǔ e nɔ nyɔ́ Jexóva nukúnmɛ lɛ́ é. Mɔ̌ mɛ ɔ, a ná cí Jɔbu ɖɔhun. É gbɔn mɛtɛ́nkpɔ́n gěgé mɛ cóbó ka ɖɔ kpó jiɖiɖe kpó ɖɔ: “Un ná jó gbejíninɔ ce dó ǎ!”—Jɔb. 27:5, nwt.

 8. Nɛ̌ tamɛ linlin dó ɖɛ e a xó dó sɔ́ hwiɖée jó nú Jexóva é jí ka sixú d’alɔ we bɔ a ná gbí dɔn ɖo mɛtɛ́nkpɔ́n nukɔn gbɔn?

⁸ Ényí a nɔ lin tamɛ dó ɖɛ e a xo dó zé hwiɖée jó nú Jexóva é jí ɔ, a ná mɔ hlɔ̌nhlɔ́n bá ɖí hwi xá mɛtɛ́nkpɔ́n ɖěbǔ. Ði kpɔ́ndéwú ɔ, a ka ná jɛ alɔlwɛ́ ɖú xá mɛ ɖěvo si, alǒ mɛ ɖěvo sú jí wɛ a? Gbeɖé kpɔ́n! A ko d’akpá nú Jexóva ɖɔ émí kún ná wa nǔ mɔ̌hun ɖě gbeɖé ó. Ényí a ma jó jlǒ nyanya lɛ́ dó bónú yě dó ɖɔ do ɖo ayi towe mɛ ǎ ɔ, a ná wá jɛ lěe a ná ɖe yě síin gbɔn é kan xo jí ǎ. A ná “sɔ́ mɛdídá lɛ́ sín ali” ǎ.—Nǔx. 4:14, 15.

 9. Nɛ̌ tamɛ linlin dó ɖɛ e a xo dó sɔ́ hwiɖée jó nú Jexóva é jí ka sixú lɛ́ d’alɔ we bɔ a ná kpo ɖo nǔ gbigbɔ tɔn lɛ́ sɔ́ ɖó tɛn nukɔntɔn ɔ mɛ wɛ gbɔn?

⁹ Ényí è ka xwlé azɔ̌ ɖé we, bɔ é ná nɔ jɛ kplé agun tɔn e a nɔ yi ɖo gbesisɔmɛ lɛ́ é mɛ ɔ ka lo? A ná ko tuun nǔ e a ná wa é. Cóbónú è ná xwlé azɔ̌ ɖé we ɔ, a ko wá gbeta ɔ kɔn ɖɔ émí kún ná yí gbe nú azɔ̌ ɖěɖěe ná sú kplé lɛ́ domɛ yiyi sín ali dó émí é ó. Énɛ́ ɔ, é sɔ́ ná byɔ́ ɖɔ a ní jɛ tɛ́nkpɔ́n mɛ bo yí gbe nú azɔ̌ mɔ̌hun, bɔ énɛ́ gúdo wɛ a ná jɛ lěe a ná sɔ́ Jexóva ɖó tɛn nukɔntɔn ɔ mɛ gbɔn é ba jí ǎ. Tamɛ linlin dó lěe Jezu kán ɖ’é jí bá wa nǔ dó nyɔ́ Tɔ́ tɔn nukúnmɛ gbɔn é jí ná sísɛ́ mǐ, bɔ mǐ ná yá wǔ gbɛ́ nǔ ɖěbǔ e mǐ tuun ɖɔ é nɔ vɛ́ mɔ nú Mawu e mǐ sɔ́ mǐɖée jó ná é bǐ mlɛ́mlɛ́.—Mat. 4:10; Jaan 8:29.

10. Nɛ̌ Jexóva ka ná d’alɔ we ɖo batɛ́mu towe gúdo, bɔ a ná “nɔ xwedó” Jezu gbɔn?

¹⁰ Nǔ ɔ wɛ nyí ɖɔ, wǔvɛ́ lɛ́ kpó mɛtɛ́nkpɔ́n lɛ́ kpó nɔ hun ali nú we bɔ a nɔ xlɛ́ kán e a kán ɖ’é jí bo ná “nɔ xwedó” Jezu é. Nú a ɖo mɔ̌ wa wɛ ɔ, a sixú kú d’é jí ɖɔ Jexóva ná d’alɔ we. Biblu ɖɔ: “Mawu ɖo gbejí. É ná lɔn bónú mi ná gbɔn mɛtɛ́nkpɔ́n e hú gǎn mi é mɛ ǎ. Hwenu e mi ka ná ɖo mɛtɛ́nkpɔ́n mɛ é ɔ, é ná lɛ́ ɖe ali e mi ná gbɔn bo tɔ́n sín mɛ é, bónú mi ná dó sixú kpé wú bo dɛ ɖ’é nu.”—1 Kɔ. 10:13.

NǓ E A SIXÚ WA BO NÁ NƆ XWEDÓ JEZU LƐ́ É

11. Ðɔ ali ɖagbe hú gǎn e nu è ná nɔ xwedó Jezu ɖe é ɖokpó. (Kpɔ́n fɔtóo ɔ lɔmɔ̌.)

¹¹ Jezu sɛn Jexóva kpó ayi tɔn bǐ kpó, bo lɛ́ kpo ɖo xɔ́ntɔn vívɛ́ zun xá Jexóva wɛ gbɔn ɖɛ xixo sɛ́dó è hwɛhwɛ gblamɛ. (Luk. 6:12) Ényí è ná ɖɔ xójɔxó ɔ, ali ɖagbe hú gǎn e nu a ná nɔ xwedó Jezu ɖo batɛ́mu towe gúdo ɖe é ɖokpó wɛ nyí ɖɔ, a ní tɛ́n kpɔ́n bo kpo ɖo nǔ ɖěɖěe ná zɔ́n bɔ a ná kpo ɖo vǐvɛ́ xá Jexóva wɛ lɛ́ é wa wɛ. Biblu ɖɔ: “Ényí bǎ ɖěbǔ mɛ wɛ mǐ ná bo yi nukɔn yi ɖó hǔn, mi nú mǐ ní kpo ɖo zɔnlin ɖi wɛ tlélé ɖo ali ɖokpó énɛ́ ɔ jí.” (Filí. 3:16) Sín hweɖénu jɛ hweɖénu ɔ, a ná nɔ se nǔ ɖěɖěe nɔví ɖěɖěe ko wá gbeta ɔ kɔn, bo vlɔ́n kan nú sinsɛnzɔ́ mímɛ́ yětɔn lɛ́ é mɔ kpɔ́n lɛ́ é. Vlafo, yě yi Wěmaxɔmɛ nú wɛnɖagbejlátɔ́ Axɔ́súɖuto ɔ tɔn lɛ́, alǒ sɛ tɛn yi fí e hudó sukpɔ́ ɖe é. Ényí ali nǔ énɛ́ lɛ́ ɖě tɔn hun nú we hǔn, ma nú é gbɔ wǔ we gbeɖé ó. Akpakpa nɔ sɔ́ togun Jexóva tɔn bónú é ná vlɔ́n kan nú sinsɛnzɔ́ tɔn. (Mɛ. 16:9) Ényí a ma kpé wú bá wa mɔ̌ din ǎ ɔ ka lo? Ma lin ɖɔ émí hwedó nǔ wú ó. Nǔ e ɖo tají é wɛ nyí ɖɔ, a ní kpo ɖo didɛ wɛ. (Mat. 10:22) Flín ɖɔ, ényí a wa nǔ e wú a kpé é bǐ ɖo ninɔmɛ towe mɛ ɔ, xomɛ nɔ hun Jexóva dó wǔ we tawun. Ali tají e nu a sixú nɔ xwedó Jezu ɖo batɛ́mu towe gúdo ɖe é ɖokpó nɛ́.—Ðɛh. 26:1.

12-13. Ényí kanɖódónǔwú towe jɛ ɖiɖekpo jí ɔ, étɛ́ a ka sixú wa? (1 Kɔlɛ́ntinu lɛ́ 9:16, 17) (Kpɔ́n gbǎví “Nɔ gbɛli ɔ jí” ɔ lɔmɔ̌.)

¹² Ényí a mɔ ɖɔ nú hwenu ɖé ɔ, ɖɛ émítɔn lɛ́ kún sɔ́ nɔ gosín ayi mɛ ó, bɔ a kún sɔ́ nɔ ɖu vǐví sinsɛnzɔ́ ɔ tɔn lěe é ko nɔ nyí gbɔn ɖ’ayǐ é ó ɔ, étɛ́ a ka ɖó ná wa? Ényí a ma ka sɔ́ nɔ ɖu Biblu xixa towe sín vǐví lěe é ko nɔ nyí gbɔn ɖ’ayǐ é ǎ ɔ ka lo? Ényí a wá mɔ hwiɖée ɖo ninɔmɛ mɔ̌hun lɛ́ mɛ ɖo batɛ́mu towe gúdo hǔn, ma wá gbeta ɔ kɔn ɖɔ émí ba gbigbɔ mímɛ́ Jexóva tɔn kpo ó. Hwɛhutɔ́ wɛ nú we, bɔ lěe nǔ nɔ cí nú we é sixú húzú sín hweɖénu jɛ hweɖénu. Ényí kanɖódónǔwú towe jɛ ɖiɖekpo jí hǔn, lin tamɛ dó kpɔ́ndéwú mɛsɛ́dó Pɔ́lu tɔn jí. Nǔgbó wɛ ɖɔ é nɔ tɛ́n kpɔ́n bá wa nǔ Jezu ɖɔhun, amɔ̌, é tuun ɖɔ hweɖélɛ́nu ɔ, émí kún nɔ ɖó jlǒ syɛ́nsyɛ́n bá wa nǔ e é byɔ́ ɖɔ émí ní wa lɛ́ é ó. (Xa 1 Kɔlɛ́ntinu lɛ́ 9:16, 17.) É ɖɔ: “Ényí é ná bo ma tlɛ jló mì cóbónú un jlá ǎ ɔ, azɔ̌ wɛ é ka nyí bɔ è zɔ́n mì.” Ðo xógbe ɖěvo mɛ ɔ, Pɔ́lu kán ɖ’é jí bo ná wa sinsɛnzɔ́ tɔn, ényí gbɛ na bo gbɔn ɖěbǔ ɔ nɛ́.

¹³ Ðo ali ɖokpó ɔ nu ɔ, ma nɔ zɔn dó lěe nǔ nɔ cí nú we é wú bo wá gbeta towe lɛ́ kɔn ó. Ényí nǔ ná bo tlɛ cí ɖěbǔ nú we hǔn, kán ɖ’é jí bá wa nǔ ɖagbe. Nú a kpo ɖo nǔ e sɔgbe é wa wɛ ɔ, lěe nǔ nɔ cí nú we é sixú wá húzú. Din hwɛ̌ ɔ, Biblu kplɔ́nkplɔ́n mɛɖésúnɔ tɔn, ɖɛ xixo, kplé lɛ́ yiyi kpó wɛn ɖagbe ɔ jíjlá kpó ná d’alɔ we, bɔ a ná nɔ xwedó Jezu ɖo batɛ́mu towe gúdo. Ényí nɔví lɛ́ mɔ lěe a nɔ ɖó kan dó Jexóva sinsɛn wú gbɔn é ɔ, é ná dó wǔsyɛ́n lanmɛ nú yě lɔmɔ̌.—1 Tɛ. 5:11.

‘MI NÍ NƆ ÐO KPÍNKPƆ́N WƐ, MI NÍ NƆ ÐO GBÍGBÉJÉ KPƆ́N WƐ’

14. Étɛ́ a ka ɖó ná nɔ gbéjé kpɔ́n hwɛhwɛ? Étɛ́wú? (2 Kɔlɛ́ntinu lɛ́ 13:5)

¹⁴ Nǔ e ná lɛ́ d’alɔ we é wɛ nyí ɖɔ, a ní nɔ gbéjé hwiɖée kpɔ́n hwɛhwɛ ɖo batɛ́mu towe gúdo. (Xa 2 Kɔlɛ́ntinu lɛ́ 13:5.) Sín hweɖénu jɛ hweɖénu ɔ, é ná nyɔ́ ɖɔ a ní nɔ gbéjé hwiɖée kpɔ́n bo kpɔ́n ɖɔ a ka nɔ xo ɖɛ gbe bǐ gbe, nɔ xa Biblu bo nɔ lɛ́ kplɔ́n, nɔ yi kplé agun tɔn lɛ́ domɛ lobo nɔ lɛ́ ɖ’alɔ ɖo sinsɛnzɔ́ ɔ mɛ a jí. Tɛ́n kpɔ́n bo ba ali ɖěɖěe nu a ná nɔ ɖu vǐví nǔ énɛ́ lɛ́ tɔn lobo nɔ lɛ́ ɖu le yětɔn hú gǎn ɖe lɛ́ é. Ði kpɔ́ndéwú ɔ, kan nǔ lěhun lɛ́ byɔ́ hwiɖée: ‘Un ka sixú nɔ tínmɛ nǔkplɔ́nmɛ nukɔn nukɔntɔn e ɖo Biblu mɛ lɛ́ é nú mɛ ɖěvo lɛ́ a? Wlɛnwín ɖé lɛ́ ka ɖe bɔ un sixú zán bo ɖu vǐví sinsɛnzɔ́ ce tɔn hú gǎn a? Ðɛ ce lɛ́ ka nɔ ɖo tlɔlɔ, bo nɔ lɛ́ xlɛ́ ɖɔ un ɖeji dó Jexóva wú bǐ mlɛ́mlɛ́ a? Un ka nɔ yi kplé klisánwun tɔn lɛ́ ɖo gbesisɔmɛ a? Nɛ̌ un ka sixú wa gbɔn bo ná nɔ ɖó ayi te hú gǎn ɖo kplé lɛ́ jí, lobo ná nɔ lɛ́ ɖ’alɔ ɖo yě mɛ hú gǎn?’

15-16. Étɛ́ lěe nɔví súnnu ɖé ɖu ɖo mɛtɛ́nkpɔ́n ɖé jí gbɔn é ka kplɔ́n we?

¹⁵ É lɛ́ ɖo tají ɖɔ a ní tuun gǎnmaɖó towe lɛ́. Nɔví súnnu ɖé nɔ nyí Robert, bo ɖɔ nǔ e é mɔ kpɔ́n bɔ é kunkplá xó énɛ́ é gbɔn lě: “Un nɔ w’azɔ̌ hwenu kléwún tɔn ɖé hwenu e un ɖó xwe 20 mɔ̌ é. Gbe ɖokpó ɖo azɔ̌ gúdo ɔ, azɔ̌gbɛ́ nyɔ̌nu ɖé ylɔ́ mì ɖɔ nyi ní wá xwé émítɔn gbe. É ɖɔ ɖɔ mɛɖé kún ná ɖo fínɛ́ ó, bɔ émí kpó nyi kpó ná lɛ́ ‘ɖu gbɛ ganjí.’ Bǐbɛ́mɛ ɔ, un jɛ hwɛjijɔ ba jí, amɔ̌, ɖo gǔdo mɛ ɔ, un gbɛ́ bo tínmɛ nǔ e wú wɛ é n’i.” Robert ɖu ɖo mɛtɛ́nkpɔ́n ɔ jí, bɔ énɛ́ ka nyɔ́ tawun. Amɔ̌, é wá yá é ɔ, é dó nukún nǔ e jɛ wá yi é mɛ kpɔ́n bo mɔ ɖɔ, émí sixú ko ɖe ɖɛ ninɔmɛ ɔ bɔ é ná nyɔ́ hú mɔ̌. É ɖɔ: “Un yá wǔ gbɛ́ ylɔ̌ e é ylɔ́ mì é bǐ mlɛ́mlɛ́ lěe Jozɛ́fu hɔn nú Potifáa sín asi gbɔn é ǎ. (Bǐb. 39:7-9) Nǔgbó ɔ, lě do éǒ ɖiɖɔ vɛ́ wǔ nú mì sɔ é kpácá mì. Nǔ énɛ́ e jɛ é d’alɔ mì bɔ un mɔ ɖɔ é byɔ́ ɖɔ má ná hlɔ̌nhlɔ́n vɛ̌ e un vɛ́ xá Jexóva é.”

¹⁶ Ényí hwi lɔ nɔ gbéjé hwiɖée kpɔ́n lěe Robert wa gbɔn é ɔ, é sixú wa ɖagbe nú we. Ényí a na bo tlɛ ko ɖu ɖo mɛtɛ́nkpɔ́n ɖé jí wá yi ɔ, kanbyɔ́ hwiɖée ɖɔ: ‘Hwenu nabí é ka byɔ́ ɖo así ce có un ɖɔ éǒ?’ Ényí a mɔ ɖɔ é byɔ́ ɖɔ émí ní w’azɔ̌ ɖo émíɖée wú hǔn, ma nú awakanmɛ kú we ó. Xomɛ ní hun we ɖɔ a tuun gǎnmaɖó énɛ́ din. Nɔ xo ɖɛ sɛ́dó Jexóva dó gǎnmaɖó towe wú, bo ɖe afɔ ɖěɖěe ná ná hlɔ̌nhlɔ́n kán e a kán ɖ’é jí bo ná zán gbɛ sɔgbe xá nǔgbódodó walɔ ɖagbe tɔn Jexóva tɔn lɛ́ é.—Ðɛh. 139:23, 24.

17. Étɛ́ gbejíninɔ Robert tɔn ka wa nú nyǐkɔ Jexóva tɔn?

¹⁷ Tan Robert tɔn lɛ́ kplɔ́n nǔ ɖěvo mǐ. É ɖɔ gɔ́ ná ɖɔ: “Ée un gbɛ́ ylɔ̌ e azɔ̌gbɛ́ ce ylɔ́ mì é gúdo é ɔ, é ɖɔ nú mì ɖɔ: ‘A xo gló mɔ ɔ.’ Un kanbyɔ́ ɛ ɖɔ étɛ́ ɖɔ gbé é ka ja é jí. É tínmɛ nú mì ɖɔ, xɔ́ntɔn émítɔn súnnu e nyí Kúnnuɖetɔ́ ɖ’ayǐ é ɖokpó ɖɔ nú émí ɖɔ Kúnnuɖetɔ́ wínnyáwínnyá lɛ́ bǐ wɛ nɔ zán gbɛ we, lé ali tɔn ma vɛ́ ko hun nú yě ó wɛ, yě nɔ wa nǔ blíblí jɛ́n wɛ. Énɛ́ wú ɔ, é ɖɔ nú xɔ́ntɔn tɔn ɔ ɖɔ émí ná tɛ́n nyi lɔ kpɔ́n. Xomɛ hun mì tawun ɖɔ un sɔ́ nyǐkɔ Jexóva tɔn su.”

18. Étɛ́ a ka kán ɖ’é jí bo ná wa ɖo batɛ́mu towe gúdo? (Kpɔ́n gbǎví “Xóta ɖěbɔdóɖěwú ɖěɖěe sín vǐví a ná ɖu lɛ́ é” ɔ lɔmɔ̌.)

¹⁸ Ényí a sɔ́ hwiɖée jó nú Jexóva bo bló batɛ́mu hǔn, xlɛ́xlɛ́ wɛ a ɖe ɖɔ ényí gbɛ ná bo gbɔn ɖěbǔ ɔ, émí ná bló bɔ nyǐkɔ tɔn ná nyí nǔ mímɛ́. Gɔ́ ná ɔ, a sixú kú d’é jí ɖɔ Jexóva tuun wǔvɛ́ e mɛ gbɔn wɛ a ɖe lɛ́ é, bo lɛ́ tuun mɛtɛ́nkpɔ́n e ɖí xwi xá wɛ a ɖe lɛ́ é. É ná kɔn nyɔ̌ná dó gǎn ɖěɖěe dó wɛ a ɖe bo ná nɔ gbejí lɛ́ é jí. A sixú ɖeji ɖɔ, gbɔn gbigbɔ mímɛ́ tɔn gblamɛ ɔ, é sixú ná we hlɔ̌nhlɔ́n bɔ a ná wa mɔ̌. (Luk. 11:11-13) Kpó alɔdó Jexóva tɔn kpó ɔ, a ná kpé wú bo ná nɔ xwedó Jezu ɖo batɛ́mu towe gúdo.