Haamagedɔni ɔ, Wɛnɖagbe Wɛ!

1-2. (a) Etɛwu Haamagedɔni ka nyí wɛnɖagbe ɖé nú gbɛtɔ́ lɛ? (b) Nǔkanbyɔ tɛ lɛ jí mǐ ka na ɖɔ xó dó ɖò xóta elɔ mɛ?

A KO sè bɔ mɛ lɛ zán xókwín “Haamagedɔni” ɔ dó dó gesí ahwan e na vívá nǔ é ɖé alǒ adla j’ayǐ ɖé kpɔ́n à? Amɔ̌, nǔ e Biblu ɖɔ dó Haamagedɔni wu é xlɛ́ ɖɔ wɛnɖagbe ɖé, alǒ nǔ e na dó awǎjijɛ nú mɛ é ɖé wɛ! (Nǔɖe. 1:3) Ahwan Haamagedɔni tɔn na vívá nǔ ǎ, loɔ, é na hwlɛn gbɛtɔ́ lɛ wɛ! Gbɔn nɛ̌ é?

² Biblu xlɛ́ ɖɔ ahwan Haamagedɔni tɔn na ɖó nǔ acɛkpikpa gbɛtɔ́ lɛ tɔn lɛ nu dó hwlɛn mǐ. Ahwan enɛ na sú kún dó nú mɛ nyanya lɛ, bo na jó hwɛjijɔnɔ lɛ dó, bá gbɔn mɔ̌ mɛ dó hwlɛn gbɛtɔ́ lɛ. É na cyɔn alɔ ayikúngban ɔ jí, bɔ è na hɛn gblé ǎ, bá dó hwlɛn gbɛtɔ́ lɛ. (Nǔɖe. 11:18) Bo na dó d’alɔ mǐ bonu mǐ na mɔ nǔ jɛ nǔ enɛ lɛ mɛ hugǎn ɔ, mǐ ni ɖɔ xó dó nǔkanbyɔ ɛnɛ elɔ lɛ jí: Etɛ ka nyí Haamagedɔni? Nǔ tɛ lɛ ka na jɛ jɛ nukɔn na? Nɛ̌ mǐ ka sixu ɖò mɛ e na gán ɖò Haamagedɔni hwenu lɛ é mɛ gbɔn? Nɛ̌ mǐ ka sixu kpó ɖò gbeji dìn e Haamagedɔni ɖò sisɛkpɔ wɛ é gbɔn?

 3. (a) Etɛ ka nyí tinmɛ xókwín “Haamagedɔni” ɔ tɔn? (b) Sɔgbe xá Nǔɖexlɛ́mɛ 16:14, 16 ɔ, etɛwu mǐ ka sixu ɖɔ ɖɔ Haamagedɔni kún nyí nɔtɛn tawun ɖé ó?

³ Xà Nǔɖexlɛ́mɛ 16:14, 16. Azɔn ɖokpo géé wɛ xókwín “Haamagedɔni” ɔ tɔ́n ɖò Biblu mɛ; xókwín Ebléegbe tɔn e tinmɛ tɔn nyí “Só Mɛgido tɔn” é mɛ wɛ é gosin. (Nǔɖe. 16:16) Mɛgido ɔ, toxo ɖé wɛ nyí mɔ̌ ɖò Izlayɛli hwexónu tɔn. (Joz. 17:11) Amɔ̌, Haamagedɔni nɔ dó gesí nɔtɛn ɖé tawun ɖò ayikúngban jí ǎ. È na ɖɔ tawun ɔ, é nɔ dó gesí ninɔmɛ e mɛ “axɔ́su e ɖò ayikúngban ɔ bǐ jí lɛ” é kplé bo na klán gbè xá Jehovah ɖè é. (Nǔɖe. 16:14) Amɔ̌ ɖò xóta elɔ mɛ ɔ, mǐ na lɛ́ zán xókwín Haamagedɔni ɔ dó dó gesí ahwan e na bɔ dó kplékplé ɖó kpɔ́ axɔ́su e ɖò ayikúngban ɔ jí lɛ é tɔn wu é. Nɛ̌ mǐ ka wà gbɔn bo tuùn ɖɔ Haamagedɔni nɔ dó gesí nɔtɛn nǔjlɛdonǔwu tɔn ɖé? Nukɔntɔn ɔ, só ɖě tíìn tawun ɖò égbé bo nyí só Mɛgido tɔn ǎ. Wegɔ́ ɔ, fí ɖěɖee lɛlɛ̌ dó Mɛgido ɔ é hwe tawun, bo sixu hɛn “axɔ́su e ɖò ayikúngban ɔ bǐ jí lɛ” é, ahwangɔnu yetɔn lɛ kpo ahwanfunnú yetɔn lɛ kpo ǎ. Atɔngɔ́ ɔ, lee mǐ na wá mɔ gbɔn ɖò xóta elɔ mɛ é ɔ, ahwan Haamagedɔni tɔn na bɛ́ hwenu e “axɔ́su” gbɛ̀ ɔ tɔn lɛ na tɔ́n ahwan togun Mawu tɔn e gbakpé ayikúngban ɔ bǐ jí é é.

 4. Etɛwu Mawu ka sɔ́ ahwan tɔn gudo tɔn ɖaxó ɔ cá xá Mɛgido?

⁴ Etɛwu Jehovah ka sɔ́ ahwan gudo tɔn ɖaxó ɔ cá xá Mɛgido? Mɛgido kpo Tɔdo Izleyɛli tɔn e sɛkpɔ finɛ é kpo nyí fí ɖěɖee è fun ahwan gegě ɖè ɖò hwexónu é. Hweɖelɛnu ɔ, Jehovah nɔ ɖ’alɔ ɖò ahwan enɛ lɛ mɛ tlɔlɔ. Ði kpɔ́ndéwú ɔ, Mawu zán “tɔjɔtɛn Mɛgido tɔn” dó d’alɔ Hwɛɖɔtɔ́ Izlayɛli tɔn Baláaki, bɔ é ɖu ɖò ahwangɔnu Kanáa tɔn e nu ahwangán Sisela ɖè é jí. Baláaki kpo nyɔnu gbeyiɖɔ Debola kpo dókú nú Jehovah, ɖó ɖuɖeji e ye ɖó gbɔn nǔjiwǔ gblamɛ é wu. Ye jihan ɖɔ: “Sunví lɛ lɔmɔ̌ fun ahwan ɔ sín jixwé . . . xá Sisela. . . . Kicɔni tɔ̀ ɔ, kplɔ́ kɛntɔ́ lɛ yì.”—Hwɛ. 5:19-21.

 5. Ali taji tɛ nu ahwan Haamagedɔni tɔn ka na gbɔn vo nú ahwan e Baláaki fun é ɖè?

⁵ Baláaki kpo Debola kpo fó han yetɔn gbɔn lě: ‘Jehovah, kɛntɔ́ towe lɛ bǐ ni kú lee Sisela kú gbɔn é; loɔ, xɔ́ntɔn towe lɛ ni cí hwe ɖɔhun. Hwe e tɔ́n kpo weziza tɔn bǐ kpo é ɖɔhun.’ (Hwɛ. 5:31) Ðò Haamagedɔni hwenu ɔ, kɛntɔ́ Mawu tɔn lɛ na kú gbɔn mɔ̌, bɔ xɔ́ntɔn tɔn lɛ ka na gán. Amɔ̌, vogbingbɔn taji ɖé tíìn ɖò ahwan we lɛ mɛ. Ðò Haamagedɔni hwenu ɔ, togun Mawu tɔn na fun ahwan ǎ. Ye tlɛ na sɔ́ ahwannú lɔ ǎ! ‘Hlɔnhlɔn yetɔn wɛ na nyí ɖɔ ye ni fá xomɛ, bo ɖeji dó’ Jehovah kpo ahwangɔnu tɔn jixwé tɔn lɛ kpo wu.—Eza. 30:15; Nǔɖe. 19:11-15.

 6. Nɛ̌ Jehovah ka na ɖu ɖò kɛntɔ́ tɔn lɛ jí ɖò Haamagedɔni hwenu gbɔn?

⁶ Nɛ̌ Jehovah ka na ɖu ɖò kɛntɔ́ tɔn lɛ jí ɖò Haamagedɔni hwenu gbɔn? É sixu zán wlɛnwín ɖebǔ. Ði kpɔ́ndéwú ɔ, é sixu zán ayikúngban dánwǔ, kɛ́njí kpo jǐ kɛwun kpo. (Jɔb. 38:22, 23; Ezek. 38:19-22) É sixu bló bɔ kɛntɔ́ tɔn lɛ na huzu kpannukɔn yeɖée. (2 Tan 20:17, 22, 23) É sixu lɛ́ zán wɛnsagun tɔn lɛ dó hu mɛ nyanya lɛ. (Eza. 37:36) Mawu na bo zán wlɛnwín ɖebǔ ɔ, é na ɖó ɖuɖeji bǐ mlɛ́mlɛ́. É na sú kún dó nú kɛntɔ́ tɔn lɛ bǐ, bɔ hwɛjijɔnɔ lɛ na gán.—Nǔx. 3:25, 26.

7-8. (a) Sɔgbe xá 1 Tɛsalonikinu lɛ 5:1-6 ɔ, nǔ e è ma nɔ jla gbɔn mɔ̌ ǎ é tɛ gǎn gbɛ̀ ɔ tɔn lɛ ka na jla? (b) Etɛwu enɛ ka na nyla ɖesu?

⁷ “Fífá tíìn, bɔ ayi jɛ ayǐ” jijla na jɛ nukɔn nú “Aklunɔzán ɔ.” (Xà 1 Tɛsalonikinu lɛ 5:1-6.) “Ya ɖaxó ɔ” dó gesí wɛ “Aklunɔzán” e xó è ɖɔ ɖò 1 Tɛsalonikinu lɛ 5:2 mɛ é ɖè. (Nǔɖe. 7:14) Nɛ̌ mǐ ka na tuùn hwenu e ya ɖaxó ɔ ja bǐbɛ̌ gbé é gbɔn? Biblu ɖɔ nú mǐ ɖɔ gǎn gbɛ̀ ɔ tɔn lɛ na jla ɖɔ “fífá tíìn, bɔ ayi jɛ ayǐ.” Enɛ na nyí wuntun ɔ ɖɔ ya ɖaxó ɔ ja bǐbɛ̌ gbé.

⁸ Etɛwu gǎn gbɛ̀ ɔ tɔn lɛ ka na ɖɔ mɔ̌? Mǐ tuùn tawun ǎ. Sinsɛngán lɛ na ɖ’alɔ ɖ’emɛ wɛ à? Nǔ sixu nyí mɔ̌. Amɔ̌, nǔjlajla enɛ na nyí adingban ɖevo sín awoví lɛ gɔ́n. Adingban enɛ na nyla tawun, ɖó é na zɔ́n bɔ mɛ lɛ na lin ɖɔ emi ɖò ayijayǐ mɛ, loɔ, ya ɖaxó ee ma ko tíìn ɖò hwenuxó gbɛtɔ́ tɔn mɛ kpɔ́n ǎ é wɛ ka ja bǐbɛ̌ gbé. Nǔgbo ɔ, “nǔ e na vívá kún yetɔn ɔ na zɔn ye jí ajijimɛ lee nyɔnu e ɖò xò ɔ nɔ jɛ flú mɛ ajijimɛ é ɖɔhun.” Nɛ̌ Jehovah sɛntɔ́ gbejinɔtɔ́ lɛ tɔn ka na nyí gbɔn? Lee azǎn Jehovah tɔn na bɛ́ gbɔn ajijimɛ é sixu kpaca ye, amɔ̌, ye na ko ɖò gbesisɔmɛ nɛ.

 9. Jehovah na sú kún dó nú gbɛ̀ Satáan tɔn ɔ tɛndo ɖokpo mɛ wɛ à? Tinmɛ.

⁹ Jehovah na sú kún dó nú gbɛ̀ Satáan tɔn ɔ bǐ blebu ɖò tɛndo ɖokpo mɛ, lee é wà gbɔn ɖò Nɔwée hwenu é ǎ. É nyɔ́ wà ɔ, é na sú kún dó na ɖó gbɛ̌nu we jí. É na sú kún dó nú Babilɔnu Ðaxó ɔ, ee nyí kplékplé sinsɛn nǔvú lɛ tɔn é hwɛ̌. Enɛ gudo ɖò Haamagedɔni hwenu ɔ, é na sú kún dó nú gbɛ̀ Satáan tɔn e kpò é, enɛ wɛ nyí tuto toxóɖiɖɔ tɔn, ahwan tɔn kpo ajɔ̌wiwa tɔn kpo. Mi nú mǐ ni ɖɔ xó dó nǔ taji we enɛ lɛ jí ganji.

10. Sɔgbe xá Nǔɖexlɛ́mɛ 17:1, 6 kpo 18:24 kpo ɔ, etɛwu Jehovah ka na sú kún dó nú Babilɔnu Ðaxó ɔ?

¹⁰ È “na dɔn tó nú agalɛtɔ́ ɖaxó . . . ɔ.” (Xà Nǔɖexlɛ́mɛ 17:1, 6; 18:24.) Babilɔnu Ðaxó ɔ kɔn cí gegě dó nyikɔ Mawu tɔn wu. É kplɔ́n adingbannú gegě mɛ lɛ dó Mawu wu. É lɛ̀ aga ɖò gbigbɔ lixo, ɖó é jɛ akɔ xá gǎn gbɛ̀ ɔ tɔn lɛ. É zán hlɔnhlɔn tɔn kpo acɛ tɔn kpo dó xò agunví tɔn lɛ ɖu. É lɛ́ kɔn hun gegě kɔn nyi ayǐ kaka jɛ Mawu sɛntɔ́ lɛ tɔn lɛ jí. (Nǔɖe. 19:2) Nɛ̌ Jehovah ka na sú kún dó nú Babilɔnu Ðaxó ɔ gbɔn?

11. Etɛ ka nyí “kanlin vɔvɔ cɛ́cɛ́ ɔ”? Nɛ̌ é ka na ɖ’alɔ ɖò linlin Mawu tɔn e kúnkplá Babilɔnu Ðaxó ɔ é sín jijɛnu mɛ gbɔn?

¹¹ Jehovah na zán “kanlin vɔvɔ cɛ́cɛ́ ɔ” sín “zo wǒ” lɛ dó sú kún dó nú ‘agalɛtɔ́ ɖaxó ɔ.’ Kanlin nǔjlɛdonǔwu tɔn enɛ nɔte nú Kplékplé Akɔta lɛ tɔn. Zo wǒ lɛ nɔte nú acɛkpikpa ɖěɖee nɔ nɔ gudo nú tutoblonunu enɛ é. Hwenu e Mawu ɖó dó é sù ɔ, acɛkpikpa enɛ lɛ na huzu kpannukɔn Babilɔnu nǔjlɛdonǔwu tɔn ɔ. Ye “na fɔ nǔ e é ɖó lɛ bǐ; ye na ɖè è nyi mɛ̌”; é wɛ nyí ɖɔ ye na yí dɔkun tɔn lɛ, bo na ɖè nǔ nyanya e é nɔ wà lɛ é gbà. (Nǔɖe. 17:3, 16) Lee ye na sú kún dó n’i gbɔn blewun, cí nǔ ɖɔ kéze ɖokpo mɛ wɛ nǔ nyí mɔ̌ ɖè é na cí kliwun nú mɛ e nɔ nɔ gudo n’i lɛ é. Ðó é ko nɔ yí nugo sín hwenu línlín ɖíe ɖɔ: “Un ɖò ayijinjɔn fí, axɔ́su nyɔnu ɖɔhun; un nyí asúkúsi ǎ; un ka na nɔ aluwɛ mɛ gbeɖé ǎ.”—Nǔɖe. 18:7, 8.

12. Etɛ Jehovah ma ka na lɔn nú akɔta lɛ na wà ǎ? Etɛwu?

¹² Mawu na lɔn nú akɔta lɛ na sú kún dó nú togun tɔn ǎ. Togun tɔn nɔ gó ɖó nyikɔ tɔn e é ɖó ta é wu; é setónú nú gbeɖiɖe e ɖɔ ɖɔ è ni tɔ́n sín Babilɔnu Ðaxó ɔ mɛ é. (Mɛ. 15:16, 17; Nǔɖe. 18:4) É lɛ́ dó gǎn tawun bo d’alɔ mɛ ɖevo lɛ bonu ye na tɔ́n sín mɛ. Enɛ wu ɔ, Jehovah sɛntɔ́ lɛ na “ɖó mimǎ ɖò awě e na xò è lɛ mɛ [ǎ].” É ɖò mɔ̌ có, nǔɖiɖi yetɔn ka na gbɔn tɛnkpɔn mɛ.

13. (a) Mɛ̌ ka nyí Gɔgu? (b) Sɔgbe xá Ezekiyɛli 38:2, 8, 9 ɔ, hwetɛnu Gɔgu ka na yì tɔ́n ɖò nɔtɛn nǔjlɛdonǔwu tɔn e è nɔ ylɔ́ ɖɔ Haamagedɔni é?

¹³ Ahwantɔ́nmɛ Gɔgu tɔn. (Xà Ezekiyɛli 38:2, 8, 9.) È sú kún dó nú sinsɛn nǔvú lɛ bǐ gudo ɔ, togun Mawu tɔn na cí atín e éɖokpo xò jɔhɔn syɛnsyɛn ɖé zlɛ́ é ɖɔhun. É ɖò wɛn ɖɔ Satáan na jɛma. É na zán nǔjlajla awoví lɛ tɔn; enɛ wɛ nyí “yɛ nyanya” lɛ sín nǔjlajla bliblí lɛ dó ɖè xomɛsin tɔn xlɛ́, b’ɛ na zɔ́n bɔ kplékplé akɔta lɛ tɔn na huzu kpannukɔn Jehovah sɛntɔ́ lɛ. (Nǔɖe. 16:13, 14) Kplékplé akɔta lɛ tɔn enɛ wɛ è nɔ ylɔ́ ɖɔ ‘Gɔgu Magɔgi tɔn tɔn.’ Nú akɔta lɛ tɔ́n ahwan mǐ mɔ̌ hǔn, nɔtɛn nǔjlɛdonǔwu tɔn e è nɔ ylɔ́ ɖɔ Haamagedɔni é wɛ ye yì nɛ.—Nǔɖe. 16:16.

14. Etɛ mɛ Gɔgu ka na wá mɔ nǔ jɛ?

¹⁴ Gɔgu na ɖeji dó “gbɛtɔ́” alǒ ahwangɔnu tɔn hlɔnhlɔnnɔ ɔ wu. (2 Tan 32:8) Mǐ na ɖeji dó Jehovah Mawu mǐtɔn wu. Mɔ̌ wiwa na cí xlonɔnú ɖɔhun ɖò akɔta lɛ nukúnmɛ. Ðó nǔmɛsɛn Babilɔnu Ðaxó ɔ, ee nyí hlɔnhlɔnnɔ wá yì é tɔn lɛ kpéwú bo hwlɛn ɛ sín “kanlin” ɔ kpo “zo wǒ” lɛ kpo sí ǎ wutu. (Nǔɖe. 17:16) Enɛ wu ɔ, Gɔgu na mɔ ɖɔ é na bɔkun bɔ ahwan ɔ na kpa emi. É na tɔ́n ahwan togun Jehovah tɔn lee ahǔn nɔ cyɔn ayikúngban gbɔn é. (Eze 38:16) Amɔ̌, Gɔgu na mɔ tlolo ɖɔ emi jɛ mɔ mɛ. Lee é nyí gbɔn nú Falawɔ́ɔn ɖò Xù Vɔvɔ ɔ mɛ é ɔ, Gɔgu na wá mɔ ɖɔ Jehovah fun ahwan xá wɛ emi ɖè.—Tín. 14:1-4; Eze 38:3, 4, 18, 21-23.

15. Nɛ̌ Klisu ka na ɖu ɖ’eji bǐ mlɛ́mlɛ́ gbɔn?

¹⁵ Klisu kpo ahwangɔnu tɔn jixwé tɔn lɛ kpo na jɛhun dó togun Mawu tɔn jí, bo na nyínyɛ́ kɛntɔ́ Mawu tɔn lɛ. (Nǔɖe. 19:11, 14, 15) Amɔ̌, nɛ̌ kɛntɔ́gán Jehovah tɔn Satáan ee adingban sín nǔjlajla tɔn lɛ zɔ́n bɔ akɔta lɛ tɔ́n ahwan mǐ é tɔn ka na nyí gbɔn? Jezu na bɛ́ é kpo awoví tɔn lɛ kpo dó domaɖó-azan ɔ mɛ, bo na sú ye dó finɛ kaka nú xwè afatɔ́n.—Nǔɖe. 20:1-3.

16. (a) Nɛ̌ mǐ ka nɔ xlɛ́ ɖɔ mǐ “tuùn Mawu” gbɔn? (b) Etɛwu Jehovah tuùntuùn ka na hɛn nyɔna wá nú mǐ ɖò Haamagedɔni hwenu?

¹⁶ Bo na dó gán ɖò Haamagedɔni hwenu ɔ, mɛ e nyí mɛ yɔyɔ̌ ɖò nǔgbo ɔ mɛ é kpo mɛ e ɖ’emɛ b’ɛ ko lín é kpo bǐ ɖó na “tuùn Mawu,” bo na nɔ lɛ́ “setónú nú Wɛnɖagbe e ɖɔ xó dó Aklunɔ mǐtɔn Jezu wu” é. (2 Tɛ. 1:7-9) Mǐ nɔ “tuùn Mawu” hwenu e mǐ tuùn nǔ e é yí wǎn na lɛ é, nǔ e é gbɛ́ wǎn na lɛ é kpo nǔgbododó tɔn lɛ kpo é. Mǐ nɔ lɛ́ xlɛ́ ɖɔ mǐ tuùn i, hwenu e mǐ yí wǎn n’i, setónú n’i, bo lɛ́ sɛn éɖokponɔ é. (1 Jaan 2:3-5; 5:3) Nú mǐ xlɛ́ ɖɔ mǐ tuùn Mawu ɔ, Mawu lɔ nɔ jɔwǔ mǐ, bo nɔ tuùn mǐ; enɛ ka na hwlɛn gbɛ̀ mǐtɔn ɖò Haamagedɔni hwenu. (1 Kɔ. 8:3) Gbɔn nɛ̌ é? Ðó nú “Mawu tuùn” mǐ dìn ɔ, nǔ mǐtɔn na nyɔ́ nukún tɔn mɛ.

17. Etɛ è ni “setónú nú Wɛnɖagbe e ɖɔ xó dó Aklunɔ mǐtɔn Jezu wu” é ka nɔ byɔ?

¹⁷ Nǔgbo ɖěɖee Jezu kplɔ́n mɛ bɔ ye ɖò Xó Mawu tɔn mɛ lɛ é bǐ wɛ ɖò “Wɛnɖagbe e ɖɔ xó dó Aklunɔ mǐtɔn Jezu wu” é mɛ. Mǐ nɔ setónú nú wɛnɖagbe ɔ hwenu e mǐ zán ɖò gbɛzán mǐtɔn mɛ é. Tónúsíse enɛ nɔ byɔ ɖɔ mǐ ni sɔ́ nǔ Axɔ́suɖuto ɔ tɔn lɛ ɖó tɛn nukɔntɔn mɛ, zán gbɛ̀ sɔgbe xá nǔgbododó jlɔjlɔ Mawu tɔn lɛ, bo jla Axɔ́suɖuto Mawu tɔn. (Mat. 6:33; 24:14) É nɔ lɛ́ byɔ ɖɔ mǐ ni nɔ gudo nú nɔví yí ami dó ɖè Klisu tɔn lɛ ɖò azɔ̌ ɖaxó e wu kpé nukún dó wɛ ye ɖè lɛ é kɔn.—Mat. 25:31-40.

18. Nɛ̌ nɔví yí ami dó ɖè Klisu tɔn lɛ ka na d’ajɔ mɛ wɔbuwɔbu ɔ nú alɔ e ye dó ye lɛ é bǐ gbɔn?

¹⁸ Mɛsɛntɔ́ Mawu tɔn yí ami dó ɖè lɛ na d’ajɔ “lɛngbɔ̌ ɖevo lɛ” nú alɔ e ye dó ye lɛ é bǐ zaanɖé. (Jaan 10:16) Gbɔn nɛ̌ é? Cobonu ahwan Haamagedɔni tɔn ɔ na bɛ́ ɔ, è na ko fɔ́n gbɛtɔ́ 144 000 lɛ bǐ dó jixwé, bɔ ye na nyí gbigbɔ jɔmakú. Enɛ gudo ɔ, ye na nyí akpáxwé ahwankpá jixwé tɔn e na sú kún dó nú Gɔgu é tɔn, bo na cyɔn alɔ “mɛ wɔbuwɔbu” e cí lɛngbɔ̌ ɖɔhun é jí. (Nǔɖe. 2:26, 27; 7:9, 10) Ɛɛn, wǔjɔmɛ ɖaxó ɖé wɛ mɛ wɔbuwɔbu ɔ ɖó, bo ɖò gudo nú mɛsɛntɔ́ yí ami dó ɖè Jehovah tɔn lɛ dìn e ye kpó ɖò ayikúngban jí é!

19-20. Mɛtɛnkpɔn mǐtɔn lɛ na bo syɛn gbɔn ɖebǔ ɔ, nɛ̌ mǐ ka sixu nɔ gbeji dìn e Haamagedɔni ɖò sisɛkpɔ wɛ é gbɔn?

¹⁹ Ðò azǎn gudogudo tɔn elɔ lɛ e vɛwǔ é mɛ ɔ, mɛ Jehovah tɔn lɛ gegě ɖò mɛtɛnkpɔn mɛ gbɔn wɛ. É ɖò mɔ̌ có, mǐ sixu dɛ kpo awǎjijɛ kpo. (Ja. 1:2-4) Nǔ e na d’alɔ mǐ é ɖokpo wɛ nyí ɖɔ mǐ ni ɖókan dó ɖɛ vívɛ́ xixo wu. (Luk. 21:36) Gbɔn vo nú ɖɛxixo ɔ, mǐ ɖó na nɔ lɛ́ kplɔ́n Xó Mawu tɔn gbè bǐ gbè, bo na nɔ lin tamɛ d’eji; mǐ na nɔ lɛ́ lin tamɛ dó nǔɖɔɖ’ayǐ jiwǔ e kúnkplá hwe mǐtɔn nu lɛ é jí. (Ðɛh. 77:13) Nǔ enɛ lɛ wiwa, gɔ́ nú alɔɖiɖó ɖò sinsɛnzɔ́ ɔ mɛ bǐ mlɛ́mlɛ́ na zɔ́n bɔ nǔɖiɖi mǐtɔn na lidǒ, bɔ nukúnɖiɖó mǐtɔn na ɖò gbɛ̀.

²⁰ Enyi è sú kún dó nú Babilɔnu ɖaxó ɔ, bɔ Haamagedɔni wá vivɔnu ɔ, kpɔ́n lee xomɛ na hun we sɔ́ é. Taji hugǎn ɔ, hwenu e è na ko klɔ́ cí sín nyikɔ Mawu tɔn kpo Nǔbǐwukpétɔ́ e é nyí é kpo wu bǐ mlɛ́mlɛ́ é ɔ, dǒ nukún mɛ, bo kpɔ́n lee awǎjijɛ towe na syɛn sɔ́ é. (Eze 38:23) Wɛnɖagbe ɖé wɛ Haamagedɔni nyí nú mɛ e nɔ sɛn Mawu, nɔ setónú nú Vǐ tɔn, bo dɛ kaka jɛ vivɔnu lɛ é nǔgbo.—Mat. 24:13.