“Hɛn Nǔ E È Sɔ́ Dó Así nú We ɔ Syɛnsyɛn”

1-2. Sɔgbe xá 1 Timɔtée 6:20 ɔ, etɛ è ka sɔ́ dó así nú Timɔtée?

HWƐHWƐ wɛ mǐ nɔ sɔ́ nǔ xɔ akwɛ mǐtɔn lɛ jó nú mɛ ɖevo lɛ bɔ ye nɔ kpé nukún d’ewu. Ði kpɔ́ndéwú ɔ, mǐ sixu sɔ́ akwɛ mǐtɔn yì ɖó akwɛsɛxwetɛn ɖé. Nú mǐ sɔ́ yì ɖ’ayǐ ɔ, mǐ nɔ ganjɛ wu ɖɔ, nǔɖe kún na tɔ́n fɛn akwɛ mǐtɔn ó, é kún na bú ó, è kún ka na lɛ́ fin ó. Enɛ wu ɔ, mǐ mɔ nǔ jɛ nǔ e nǔ xɔ akwɛ mǐtɔn ɖé sísɔ́ dó así nú mɛ ɖevo lɛ nyí é mɛ.

² Xà 1 Timɔtée 6:20. Mɛsɛ́dó Pɔlu flín nǔ Timɔtée ɖɔ è sɔ́ nǔ xɔ akwɛ ɖé dó así n’i, é wɛ nyí nukúnnúmɔjɛnǔmɛ e sɔgbe é dó linlin e Mawu ɖó nú gbɛtɔ́ lɛ é wu. Jehovah lɛ́ jɔwǔ Timɔtée bɔ é na “wà Wɛnɖagbejlatɔ́ sín azɔ̌.” (2 Tim. 4:2, 5) Pɔlu dó wusyɛn lanmɛ nú Timɔtée ɖɔ é ni lébe nú nǔ e è sɔ́ dó así n’i é. Timɔtée ɖɔhun ɔ, è sɔ́ nǔ xɔ akwɛ ɖé lɛ dó así nú mǐ. Nǔ tɛ lɛ ka wɛ? Bɔ etɛwu mǐ ka ɖó na cyɔn alɔ dɔkun e Jehovah sɔ́ dó así nú mǐ é jí?

3-4. Hwɛjijɔ tɛ lɛ wu nǔgbo Biblu tɔn lɛ ka xɔ akwɛ?

³ Jehovah nyɔ́ xomɛ dó mǐ wu bo na mǐ nukúnnúmɔjɛnǔmɛ e sɔgbe nǔgbo xɔ akwɛ e ɖò Xó tɔn Biblu mɛ lɛ é tɔn. Nǔgbo enɛ lɛ xɔ akwɛ ɖó ye nɔ kplɔ́n mǐ lee mǐ na ɖó kancica ɖagbe ɖé xá Jehovah gbɔn é, bo nɔ lɛ́ tinmɛ nǔ e nɔ zɔ́n bɔ è nɔ ɖó awǎjijɛ jɔ awǎjijɛ ɖò gbɛ̀ mɛ lɛ é nú mǐ. Enyi mǐ yí gbè nú nǔgbo enɛ lɛ bo nɔ zán gbɛ̀ sɔgbe xá ye ɔ, enɛ nɔ tún kan nú mǐ sín adingban-núkplɔnmɛ lɛ kpo nǔwalɔ blíblí lɛ kpo sí.—1 Kɔ. 6:9-11.

⁴ Hwɛjijɔ ɖevo e wu nǔgbo e ɖò Xó Mawu tɔn mɛ lɛ é xɔ akwɛ é wɛ nyí ɖɔ Jehovah nɔ ɖè ye xlɛ́ mɛ ɖěɖee nɔ sɔ́ yeɖée hwe, bo ɖó “ninɔmɛ ayi mɛ tɔn e jɛxa” lɛ é kɛɖɛ. (Mɛ. 13:48, nwt) Mɛ mɔ̌hun lɛ nɔ yí gbè nú ali e nu é nɔ gbɔn dó kplɔ́n nǔgbo enɛ lɛ mɛ ɖò égbé é. (Mat. 11:25; 24:45) Mǐ sixu nɔ mǐɖoɖó bo kplɔ́n nǔgbo enɛ lɛ ǎ, nǔ ɖevo ɖebǔ ka lɛ́ ɖò fí ɖebǔ, bo xɔ akwɛ hú mɔ̌ ǎ.—Nǔx. 3:13, 15.

 5. Nǔ ɖevo tɛ Jehovah ka lɛ́ sɔ́ d’así nú mǐ?

⁵ Jehovah lɛ́ jɔwǔ mǐ, bonu mǐ na kplɔ́n nǔgbo ɔ mɛ ɖevo lɛ dó É kpo linlin tɔn lɛ kpo wu. (Mat. 24:14) Wɛn e mǐ nɔ jlá é xɔ akwɛ tawun ɖó é nɔ d’alɔ mɛ lɛ bɔ ye nɔ wá xwédo Jehovah tɔn mɛ, bɔ é nɔ lɛ́ hun ali nú ye bonu ye na mɔ gbɛ̀ mavɔmavɔ. (1 Tim. 4:16) Alɔ e ɖó ɖò sinsɛnzɔ́ ɔ mɛ wɛ mǐ mɛ ɖokpo ɖokpo ɖè é na bo tlɛ d’agba alǒ hwe ɔ, gudo nɔ nú azɔ̌ taji hugǎn e wà wɛ è ɖè ɖò táan elɔ lɛ mɛ é wɛ mǐ ɖè nɛ. (1 Tim. 2:3, 4) Wǔjɔmɛ ɖaxó ɖé wɛ é nyí ɖɔ è ni nyí azɔ̌watɔ́gbɛ́ Mawu tɔn lɛ!—1 Kɔ. 3:9, nwt.

 6. Etɛ ka jɛ dó mɛ e è jɔ wǔ bɔ ye na nyí azɔ̌watɔ́gbɛ́ Mawu tɔn, b’ɛ ma sù nukún yetɔn mɛ ǎ é ɖé lɛ wu?

⁶ Wǔ e è jɔ mɛ e kpo Timɔtée kpo nɔ gbɛ̀ ɖò táan ɖokpo ɔ mɛ lɛ é, bɔ ye nyí azɔ̌watɔ́gbɛ́ Mawu tɔn é sù ye mɛ ɖé lɛ nukúnmɛ ǎ. Ðó Demasi yí wǎn nú gbɛ̀ ɔ wutu ɔ, é jó wǔjɔmɛ e é ɖó bo nɔ w’azɔ̌ xá Pɔlu é dó. (2 Tim. 4:10) É cí ɖɔ Fijɛlu kpo Ɛɛmɔjɛni kpo jó wɛnɖagbejijlazɔ́ ɔ dó, ɖó ye ɖi xɛsi ɖɔ è táa wá dó ya e è dó nú Pɔlu é ɖɔhun nú emi. (2 Tim. 1:15) Imɛnɛ́ɛ, Alɛsandlu kpo Filetɔsi kpo huzu gǔfɔndómawujitɔ́, bo jó nǔgbo ɔ dó. (1 Tim. 1:19, 20; 2 Tim. 2:16-18) È na ɖɔ ɔ, ye mɛ enɛ lɛ bǐ wɛ ko lidǒ ɖò nǔɖiɖi mɛ kpɔ́n, amɔ̌, ye wá wɔn ya nú nǔ xɔ akwɛ hugǎn ɔ.

 7. Wlɛnwín tɛ lɛ Satáan ka nɔ zán bo na dó flú mǐ?

⁷ Nɛ̌ Satáan ka nɔ tɛ́n kpɔ́n bonu mǐ na jó dɔkun e Jehovah sɔ́ d’así nú mǐ lɛ é dó gbɔn? Wlɛnwín e é nɔ zán é ɖé lɛ ɖíe. É nɔ zán ayiɖeɖayǐ, telée kpo nǔ mɔ̌hun ɖevo lɛ kpo dó flɔ́ zo dó glɔ̌ nú linlin kpo jijɔ kpo ɖěɖee é mɔ ɖɔ ye na zɔ́n bɔ kpɛɖé kpɛɖé ɔ, mǐ na jɛ nǔgbo ɔ jó dó jí lɛ é. É nɔ tɛ́n kpɔ́n, bo na dó xɛsi mǐ gbɔn kɔgbidínúmɛ gbɛ̌ lɛ tɔn, alǒ yadonúmɛ gblamɛ, bonu mǐ na ɖó wɛnɖagbejijlazɔ́ ɔ te. É nɔ lɛ́ tɛ́n kpɔ́n bo na blɛ́ mǐ bonu mǐ na nɔ ɖótó “nǔnywɛ ma nyí nǔnywɛ” gǔfɔndómawujitɔ́ lɛ tɔn “e mɛ lɛ nɔ ylɔ́ ɖɔ nǔnywɛ” é, bá jó nǔgbo ɔ dó.—1 Tim. 6:20, 21.

 8. Etɛ kpɔ́ndéwú nɔví sunnu e nɔ nyí Daniel é tɔn ka sixu kplɔ́n we?

⁸ Enyi mǐ ma ɖ’ayi te ǎ ɔ, mǐ sixu jɛ nǔgbo ɔ jó dó jí kpɛɖé kpɛɖé. Mǐ ni kpɔ́n kpɔ́ndéwú Danielb e yí wǎn nú ayihundida video jí tɔn lɛ é tɔn. É tinmɛ ɖɔ: “Un jɛ ayihun video jí tɔn lɛ da jí hwenu e un ɖó xwè wǒ mɔ̌ é. Ðò bǐbɛ̌mɛ ɔ, un jɛ ayihun ɖěɖee ma nyla kaka ɖé ǎ lɛ é da jí. Amɔ̌, kpɛɖé kpɛɖé ɔ, un jɛ ayihun ɖěɖee mɛ adakaxixo kpo awovínúwiwa kpo ɖè lɛ é da jí.” Wǎgbɔ tɔn ɔ, é nɔ zán ganxixo 15 mɔ̌ gbè bǐ gbè dó d’ayihun video jí tɔn lɛ. Daniel ɖɔ: “Ðò ayi gɔngɔn ce mɛ ɔ, un tuùn ɖɔ ayihun alɔkpa e un nɔ da lɛ é kpo táan nabi e un nɔ zán ɖò ye kɔn lɛ é kpo ɖò sisɛ mì dó zɔ nú Jehovah wɛ. É ɖò mɔ̌ có, ayi ce wá kú atli, bɔ un nɔ mɔ ɖɔ nǔgbododó Biblu tɔn lɛ kún sɔgbe xá mì ó.” Hǔn, nú mǐ ma ɖ’ayi te ǎ ɔ, blewun jɛn ayiɖeɖayǐ sixu zɔ́n bɔ mǐ na jɛ nǔgbo ɔ jó dó jí kpɛɖé kpɛɖé. Enyi nǔ mɔ̌hun jɛ ɔ, mǐ sixu wá hɛn nǔ xɔ akwɛ e Jehovah na mǐ lɛ é bú.

 9. Sɔgbe xá 1 Timɔtée 1:18, 19 ɔ, etɛ Pɔlu ka dó wusyɛn lanmɛ nú Timɔtée ɖɔ é ni wà?

⁹ Xà 1 Timɔtée 1:18, 19. Pɔlu jlɛ́ Timɔtée dó ahwanfuntɔ́ ɖé wu. (2 Tim. 2:3) Bo dó wusyɛn lanmɛ n’i ɖɔ é ni “fun ahwan ɖagbe ɔ.” Ahwan enɛ nyí ahwan e è nɔ fun lě tlɔlɔ é ǎ, loɔ, ahwan gbigbɔ tɔn wɛ. Ali tɛ lɛ nu Klisanwun lɛ ka cí ahwanfuntɔ́ e ɖò ahwangbenu lɛ é ɖɔhun ɖè? Ðó mǐ nyí ahwanfuntɔ́ Klisu tɔn lɛ wutu ɔ, jijɔ tɛ lɛ mǐ ka ɖó na sɔnǔ na? Mǐ ni gbéjé nǔ e nǔjlɛdonǔwu Pɔlu tɔn sixu kplɔ́n mǐ é atɔ́ɔ́n kpɔ́n. Nǔkplɔnmɛ enɛ lɛ sixu d’alɔ mǐ bɔ mǐ na tɛ́dó nǔgbo ɔ wu.

10. Etɛ ka nyí mɛɖée zízé jó nú Mawu? Etɛwu mǐ ka ɖó hudo tɔn?

¹⁰ Sɔnǔ nú mɛɖée zízé jó nú Mawu. Ahwanfuntɔ́ ɖagbe ɖé nɔ nɔ gbeji. É na fun ahwan syɛnsyɛn dó nya xɛ ɖò mɛ e é yí wǎn na é, alǒ nǔ e xɔ akwɛ n’i tawun é jí. Pɔlu dó wusyɛn lanmɛ nú Timɔtée ɖɔ é ni sɔnǔ nú mɛɖée zízé jó nú Mawu, enɛ wɛ nyí ɖɔ é ni tɛ́dó Mawu wu kpo gbejininɔ kpo. (1 Tim. 4:7, nwt) Bǎ e mɛ mǐ yí wǎn nú Mawu yì ɖó é ɔ, bǎ enɛ mɛ wɛ mǐ na ba na tɛ́dó nǔgbo ɔ wu yì ɖó.—1 Tim. 4:8-10; 6:6.

11. Etɛwu mǐ ka ɖó na nɔ gbɛ́ nǔ nú mǐɖée?

¹¹ Kplɔ́n bo nɔ gbɛ́ nǔ nú hwiɖée. Enyi ahwanfuntɔ́ ɖé na ɖò gbesisɔmɛ hwebǐnu nú ahwan ɔ, é ɖó na kplɔ́n bo na nɔ gbɛ́ nǔ nú éɖée. Timɔtée ɖò gbesisɔmɛ ɖò gbigbɔ lixo, ɖó é xwedó wěɖexámɛ Pɔlu tɔn e ɖɔ ɖɔ è ni hɔn nú jlǒ nyanya lɛ, nya jijɔ Mawu tɔn lɛ gbé, bo dó gbɛ̌ xá nǔɖitɔ́ hatɔ́ lɛ é. (2 Tim. 2:22) Enɛ byɔ nǔ gbɛ́ nú mɛɖesunɔ. Mǐ ɖó na gbɛ́ nǔ nú mǐɖée, bo na dó ɖu ɖò ahwan e fun xá jlǒ agbaza tɔn mǐtɔn lɛ wɛ mǐ ɖè é jí. (Hlɔ. 7:21-25) Gɔ́ na ɔ, mǐ ɖó na nɔ gbɛ́ nǔ nú mǐɖée, bo na dó huzu mɛ alɔkpa e mǐ nyí é, lobo sɔnǔ nú jijɔ ɖagbe lɛ. (Efɛ. 4:22, 24) Nú mǐ w’azɔ̌ ɖò kéze ɔ bǐ mɛ, bonu nǔ ko cikɔ nú mǐ ɔ, é sixu byɔ ɖɔ mǐ ni dó gǎn ɖesu cobo yì kplé.—Ebl. 10:24, 25.

12. Ali tɛ lɛ nu mǐ ka sixu bló bɔ lee mǐ nɔ zán Biblu ɔ gbɔn é na kpɔ́n te d’eji ɖè?

¹² Ahwanfuntɔ́ ɖé ɖó na kplɔ́n bo na nɔ zán ahwanlyannú tɔn lɛ. Enyi alɔ na bí n’i ɖò ahwanlyannú tɔn lɛ zinzan kɔn ganji ɔ, é ɖó na nɔ zán ye hwɛhwɛ. Mɔ̌ ɖokpo ɔ, Xó Mawu tɔn zinzan ɖó na bí alɔ nú mǐ ganji. (2 Tim. 2:15) Mǐ sixu kplɔ́n ali e nu mǐ sixu wà mɔ̌ ɖè é ɖé lɛ ɖò kplé agun tɔn mǐtɔn lɛ jí. Amɔ̌, nú mǐ na ɖexlɛ́ mɛ ɖevo lɛ ɖɔ nǔgbo Biblu tɔn lɛ xɔ akwɛ nǔgbo ɔ, mǐ ɖó na nɔ kplɔ́n ɖò gbesisɔmɛ. Mǐ ɖó na nɔ zán Xó Mawu tɔn bo na dó hɛn nǔɖiɖi mǐtɔn lidǒ. Enɛ byɔ nǔ hú Biblu ɔ xixa kpowun. É byɔ ɖɔ mǐ ni nɔ lin tamɛ dó nǔ e mǐ xà lɛ é jí, bo nɔ lɛ́ ba dò nú nǔ ɖò wema mǐtɔn lɛ mɛ, bo na dó sixu mɔ nukúnnú jɛ Mawuxówema ɔ mɛ ganji, lobo wà nǔ sɔgbe xá. (1 Tim. 4:13-15) Mɔ̌ mɛ ɔ, mǐ na kpéwú bo zán Xó Mawu tɔn dó kplɔ́n nǔ mɛ ɖevo lɛ. Ðò ninɔmɛ elɔ mɛ ɔ, é lɛ́ byɔ nǔ hú wemafɔ Biblu tɔn ɖé xixa kpowun. Mǐ jló na d’alɔ tóɖómǐtɔ́ lɛ bonu ye na mɔ nukúnnú jɛ wemafɔ ɔ kpo lee é kan ye gbɔn é kpo wu. Enɛ wu ɔ, nú mǐ nɔ kplɔ́n Biblu ɔ ɖò gbesisɔmɛ ɔ, mǐ sixu huzu Biblu kplɔnmɛtɔ́ ɖagbe lɛ.—2 Tim. 3:16, 17.

13. Sɔgbe xá Eblée lɛ 5:14 ɔ, etɛwu mǐ ka ɖó na ɖ’ayi te?

¹³ Nɔ ɖó ayi te. Ahwanfuntɔ́ ɖé ɖó na kpéwú bo na nɔ ɖ’ayi awovínú lɛ wu jɛ nukɔn, lobo nyi alɔ nú ye. Mǐ ɖó na lɛ́ kplɔ́n bo na nɔ ɖ’ayi ninɔmɛ ɖěɖee sixu wà nǔ dó mǐ wu lɛ é wu, bo wà nǔɖe, bo na dó nyi alɔ nú nǔ e ye sixu jì lɛ é. (Nǔx. 22:3; xà Eblée lɛ 5:14.) Ði kpɔ́ndéwú ɔ, mǐ ɖó na nɔ cyan ayiɖeɖayǐ mǐtɔn lɛ kpo nǔnywɛ kpo. Nǔwiwa televiziɔn jí tɔn lɛ kpo fímu lɛ kpo nɔ xlɛ́ walɔ bliblí lɛ hwɛhwɛ. Nǔwalɔ mɔ̌hun lɛ nɔ dó xomɛsin nú Mawu, bɔ è sixu xógló nǔ e ye na jì lɛ é ǎ. Enɛ wu ɔ, mǐ nɔ nyi alɔ nú ayiɖeɖayǐ ɖěɖee sixu wà nǔ dó wǎn e mǐ yí nú Mawu é wu kpɛɖé kpɛɖé lɛ é.—Efɛ. 5:5, 6.

14. Nɛ̌ ayiɖote ka d’alɔ Daniel gbɔn?

¹⁴ Daniel e xó mǐ ɖɔ wá yì é jɛ ayi ɖ’ewu jí ɖɔ ayihundida video jí tɔn e mɛ adakaxixo kpo awovínúwiwa kpo ɖè lɛ é nyla. É ba nǔ ɖěɖee na d’alɔ ɛ bɔ é na ɖí xwi xá tagba tɔn lɛ é ɖò Watchtower Library mɛ. Nɛ̌ enɛ ka wà ɖagbe n’i gbɔn? É ɖó ayihun video jí tɔn ɖěɖee ma sɔgbe ǎ lɛ é dida te. É lɛ́ ɖó nǔ kancica e ɖò é kpo ayihun mɔ̌hun da tɔ́ ɖevo lɛ kpo tɛntin é nu. Daniel ɖɔ: “Un ɖè ta sín ayihundida video jí tɔn lɛ mɛ, bo jɛ hwenu zán ɖó kpɔ́ xá xɔ́ntɔn e ɖò agun ɔ mɛ lɛ é jí.” Dìn ɔ, Daniel nyí gbexosin-alijitɔ́ bo lɛ́ nyí mɛxo agun tɔn.

15. Etɛwu adingbanxó lɛ ka nyí awovínú?

¹⁵ Timɔtée ɖɔhun ɔ, mǐ lɔ ɖó na nɔ ɖó ayi te dó awovínú e ɖò adingbanxó ɖěɖee gǔfɔndómawujitɔ́ lɛ nɔ fúnfún kpé lɛ é mɛ é wu. (1 Tim. 4:1, 7; 2 Tim. 2:16) Ði kpɔ́ndéwú ɔ, ye sixu tɛ́n kpɔ́n bo fúnfún adingbanxó lɛ kpé dó nɔví mǐtɔn lɛ wu, alǒ bló bɔ mǐ na xò nǔ kpɔ́n dó tutoblonunu Jehovah tɔn wu. Adingbanxó mɔ̌hun lɛ sixu vɔ́da nú nǔɖiɖi mǐtɔn. Mǐ ɖó na lɔn nú xó fúnfún fúnfún kpé dó mɛ wu enɛ lɛ na flú mǐ ǎ. Etɛwu? Ðó “gbɛtɔ́ e sín tamɛ ma sɔgbe ǎ bɔ ye ma sɔ́ tuùn nǔgbo ɔ ǎ lɛ” é wɛ nɔ fúnfún xó mɔ̌hun lɛ kpé. Nǔ e gbé ye nɔ nya é wɛ nyí ɖɔ ye na fɔ́n “nǔdindɔn kpodo jlɛɖiɖɔ kpo” nyite. (1 Tim. 6:4, 5) Ye nɔ ba ɖɔ mǐ ni ɖi nǔ nú mɛhɛngbléxó yetɔn lɛ bo ma sɔ́ nɔ ɖeji dó nɔví mǐtɔn lɛ wu ó.

16. Nǔ e nɔ fɛ́ ayi mɛtɔn lɛ é tɛ lɛ mǐ ka ɖó na nyi alɔ na?

¹⁶ Nɔ nyi alɔ nú nǔ e na fɛ́ ayi towe lɛ é. Ðó Timɔtée nyí “ahwanfuntɔ́ ɖagbe Klisu Jezu tɔn” ɖé wutu ɔ, é ɖó na sɔ́ ayi ɖó sinsɛnzɔ́ ɔ jí hú ɖɔ é ni jó éɖée dó nú nǔ agbaza tɔn lɛ ni fɛ́ ayi tɔn. (2 Tim. 2:3, 4) Timɔtée ɖɔhun ɔ, mǐ ɖó na jó mǐɖée dó bonu wǎn yí nú nǔ agbaza tɔn lɛ na fɛ́ ayi mǐtɔn ǎ. “Dɔkun gbɛmɛ fí tɔn sín mɛdindɔn lɛ” sixu zɔ́n bɔ wǎn e mǐ yí nú Jehovah é na bú, Xó tɔn sɔ́ na nɔ xɔ akwɛ nú mǐ ǎ, bɔ jlǒ e mǐ ɖó bo na má Xó tɔn xá mɛ ɖevo lɛ é lɔ na blí bú. (Mat. 13:22) Mǐ ɖó na nɔ zán gbɛ̀ e bɔkun é, bo na nɔ zán hwenu mǐtɔn kpodo hlɔnhlɔn mǐtɔn kpo dó nya ‘Axɔ́suɖuto ɔ gbé jɛ nukɔn.’—Mat. 6:22-25, 33.

17-18. Etɛ mǐ ka sixu wà dó nya xɛ ɖò kancica e ɖò mǐ kpo Jehovah kpo tɛntin é jí?

¹⁷ Sɔnǔ ɖ’ayǐ bo na dó yawǔ wà nǔ. Ahwanfuntɔ́ ɖé ɖó na bló tuto lee é na wà nǔ gbɔn é tɔn jɛ nukɔn. Enyi mǐ na nya xɛ ɖò nǔ ɖěɖee Jehovah sɔ́ dó así nú mǐ lɛ é jí ɔ, mǐ ɖó na yawǔ wà nǔ hwenu e mǐ mɔ awovínú ɖé sɛ́dó é. Etɛ ka sixu d’alɔ mǐ bɔ mǐ na wà mɔ̌? Mǐ ɖó na bló tuto lee mǐ na wà nǔ ɖò awovínú ɖé nukɔn gbɔn é tɔn jɛ nukɔn.

¹⁸ Ði kpɔ́ndéwú ɔ, nú è yì nǔwiwa ɖé tɛnmɛ ɔ, hwɛhwɛ wɛ è nɔ byɔ mɛ e wá lɛ é ɖɔ ye ni ɖ’ayi fí e sɛkpɔ́ ye hugǎn bɔ ye na gbɔn bo tɔ́n é wu hwɛ̌ cobonu nǔwiwa ɔ ni bɛ́. Etɛwu? Mɔ̌ mɛ ɔ, ye na kpéwú bo yawǔ hɔn tɔ́n hwenu e ajijimɛnú ɖé na jɛ é. Ðò ali ɖokpo ɔ nu ɔ, cobonu nǔbliblí, adakaxixo alǒ gǔfɔndómawujitɔ́ lɛ sín nǔɖe na wá xwetɔ́n ajijimɛ hwenu e mǐ na ɖò Ɛntɛnɛti jí, ɖò fímu ɖé kpɔ́n wɛ, alǒ ɖò tuto televiziɔn jí tɔn ɖé kpɔ́n wɛ é ɔ, mǐ sixu bló tuto nǔ e mǐ na wà ɖò ninɔmɛ mɔ̌hun mɛ é tɔn jɛ nukɔn. Enyi mǐ nɔ sɔnǔ ɖ’ayǐ nú nǔ e sixu wá jɛ é ɔ, mǐ sixu yawǔ wà nǔ, bo nya xɛ ɖò kancica e ɖò mǐ kpo Jehovah kpo tɛntin é jí, lobo kpò ɖò mɛ mímɛ́ nyí wɛ ɖò Jehovah nukúnmɛ.—Ðɛh. 101:3; 1 Tim. 4:12.

19. Enyi mǐ nya xɛ ɖò nǔ xɔ akwɛ ɖěɖee Jehovah sɔ́ d’así nú mǐ lɛ é jí ɔ, nyɔna tɛ lɛ mǐ ka na mɔ?

¹⁹ Mǐ ɖó na hɛn nǔ xɔ akwɛ e Jehovah na mǐ lɛ é wu ganji, ye wɛ nyí nǔgbo xɔ akwɛ Biblu tɔn lɛ kpo wǔjɔmɛ e mǐ ɖó bá kplɔ́n ye mɛ ɖevo lɛ é kpo. Nú mǐ wà mɔ̌ ɔ, mǐ na ɖó ayixa mímɛ́ ɖé, gbɛ̀ mǐtɔn na ɖó nu, bɔ mǐ na lɛ́ mɔ awǎjijɛ e ɖò alɔ didó mɛ ɖevo lɛ bonu ye na tuùn Jehovah mɛ é. Kpo alɔdó tɔn kpo ɔ, mǐ na kpéwú bo hɛn nǔ e è sɔ́ dó así nú mǐ é syɛnsyɛn.—1 Tim. 6:12, 19.