2 Timɔtée 1:7: “É nyí xɛsiɖiɖi sín [gbigbɔ] wɛ Mawu ná mǐ ǎ”

“Ðó Mawu ná mǐ gbigbɔ xɛsiɖiɖi tɔn ǎ, loɔ, gbigbɔ hlɔ̌nhlɔ́n, wǎnyíyí kpó ayiɖote kpó tɔn wɛ é ná mǐ.”—2 Timɔtée 1:7, Biblu gbɛ yɔ̌yɔ́ ɔ tɔn.

“É nyí xɛsiɖiɖi sín yɛ wɛ Mawu ná mǐ ǎ; loɔ, hlɔ̌nhlɔ́n kpódó wǎnyíyí kpó, kpódó mɛɖésúnɔ jí ɖu ɖe kpó sín yɛ wɛ é ná mǐ.”—2 Timɔtée 1:7, MAWUXÓWÉMA.

Mawu sixú d’alɔ mɛɖé bɔ é ná wa nǔ e sɔgbe é kpó akɔ́nkpinkpan kpó. Mawu ba ɖɔ mɛ ɖěbǔ ní jɛ mɔ “xɛsiɖiɖi” tɔn mɛ ǎ, énɛ́ wɛ nyí xɛsi e sixú glɔ́n ali nú mɛɖé bɔ é ná gɔn nǔ e nɔ nyɔ́ Mawu nukúnmɛ lɛ́ é wa é.

Mǐ ní ɖɔ xó dó jijɔ atɔn e xó è ɖɔ ɖo wěmafɔ énɛ́ mɛ bɔ Mawu nɔ ná mɛ bɔ yě sixú d’alɔ bɔ è ɖu ɖo xɛsiɖiɖi jí lɛ́ é wú.

“Hlɔ̌nhlɔ́n.” Klisánwun lɛ́ kpé wú bo sɛn Mawu kpó akɔ́nkpinkpan kpó, ényí yě tlɛ ɖó kɛntɔ́ syɛ́nsyɛ́n gěgé alǒ tlɛ ɖo ninɔmɛ syɛ́nsyɛ́n lɛ́ mɛ ɔ nɛ́. Xɛsi zɔ́n bónú yě dó gǔdofɔ ǎ. (2 Kɔlɛ́ntinu lɛ́ 11:23-27) Nɛ̌ nǔ ka nyí mɔ̌ gbɔn? Mɛsɛ́dó Pɔ́lu tínmɛ gbɔn lě: “Mɛ e nɔ ná mì hlɔ̌nhlɔ́n é wɛ nɔ zɔ́n bɔ un nɔ mɔ hlɔ̌nhlɔ́n dó kpé nǔ lɛ́ bǐ wú.” (Filípunu lɛ́ 4:13) Mawu sixú ná “hlɔ̌nhlɔ́n e . . . zɛ gbɛtɔ́ tɔn wú” é mɛsɛntɔ́ tɔn lɛ́ bónú yě ná ɖu ɖo tagba ɖěbǔ jí.—2 Kɔlɛ́ntinu lɛ́ 4:7.

“Wǎnyíyí.” Wǎnyíyí e gɔ́ngɔ́n é ɖíɖó nú Mawu nɔ d’alɔ klisánwun ɖé bɔ é nɔ jɛ hun dó nǔ e sɔgbe é jí kpó akɔ́nkpinkpan kpó. Ðo ali ɖokpó ɔ nu ɔ, wǎn e klisánwun ɖé yí nú nɔzo tɔn lɛ́ é nɔ sísɛ́ ɛ bɔ nǔ mɛ ɖěvo lɛ́ tɔn nɔ ɖu ayi mɛ n’i hú nǔ éɖésúnɔ tɔn lɛ́, ényí è na bo tlɛ ɖo gbe klán xá ɛ wɛ, alǒ gbɛ tɔn na bo tlɛ ɖo axɔ́ nu ɔ nɛ́.—Jaan 13:34; 15:13.

“Ayiɖote.” Ðo Biblu mɛ ɔ, ayiɖote nɔ yá wǔ dó gesí nǔwúkpíkpé e klisánwun ɖé ɖó bo nɔ wá gbeta e nǔnywɛ́ kpé, bo jínjɔ́n Biblu jí lɛ́ é kɔn é. Mɛ e nɔ wa nǔ kpó ayiɖote kpó é ɖé nɔ kpé wú bo nɔ lin tamɛ ganjí bɔ nǔwiwa tɔn lɛ́ nɔ lɛ́ xwe ali, ényí é ná bo tlɛ ɖo wǔvɛ́ mɛ ɔ nɛ́. É sixú wá gbeta e sɔgbe xá linlin Mawu tɔn lɛ́ é kɔn, ɖó é tuun ɖɔ xɔ́ntɔn e émí zun xá Mawu é ɖo tají hú gǎn linlin mɛ ɖěvo lɛ́ tɔn lɛ́.

Wěma e mɛsɛ́dó Pɔ́lu wlán sɛ́dó xɔ́ntɔn vívɛ́ tɔn Timɔtée, éé lɛ́ nyí azɔ̌gbɛ́ tɔn é ɖé wɛ wěma Biblu tɔn Timɔtée wegɔ́ ɔ nyí. Ðo wěmasɛ́dómɛ énɛ́ mɛ ɔ, Pɔ́lu dó wǔsyɛ́n lanmɛ nú mɛ wínnyáwínnyá Timɔtée kpó akpakpa sɔ́ mɛ kpó ɖɔ é ní kpo ɖo azɔ̌ syɛ́nsyɛ́n wa wɛ ɖo sinsɛnzɔ́ ɔ mɛ. (2 Timɔtée 1:1, 2) Timɔtée sixú ko nyí mɛɖé bo nɔ kú winnyá alǒ nɔ gba wǔ dó mɛ mɛ ǎ, bɔ énɛ́ sixú ko dɔn ɛ dó gǔdo ɖo agunzɔ́ lɛ́ wiwa kɔn. (1 Timɔtée 4:12) Amɔ̌, Pɔ́lu flín Timɔtée ɖɔ é mɔ nǔníná ɖé yí, énɛ́ wɛ nyí sinsɛnzɔ́ bǔnɔ ɖé ɖo agun ɔ mɛ. É byɔ́ Timɔtée ɖɔ é ní ma xo nǔ kpɔ́n hwenu e é ɖo nukúnkpénǔwútɔ́ agun tɔn sín acɛ e é ɖó é zán wɛ é, hwenu é ɖo wɛn ɖagbe ɔ jlá wɛ é kpó hwenu e é ɖo didɛ ɖo wǔvɛ́ lɛ́ nu wɛ ɖó nǔɖiɖi tɔn wú é kpó ó.—2 Timɔtée 1:6-8.

Timɔtée wɛ è wlán xó énɛ́ lɛ́ sɛ́dó ɖo bǐbɛ́mɛ có, yě ná gǎnjɛwú mɛ ɖěɖěe jló ná wa sinsɛnzɔ́ nú Mawu ɖo égbé lɛ́ é bǐ ɖɔ Mawu ná dó alɔ e sín hudó yě ɖó bɔ é ná kpa yě é yě, ényí yě ná bo tlɛ ɖo tagba ɖěbǔ mɔ wɛ ɔ nɛ́.