Nǔ E Avǐ E Jezu Ya lɛ É Sixu Kplɔ́n Mǐ É

1-3. Wuvɛ̌ tɛ lɛ mɔ̌ ka sixu zɔ́n bɔ mɛ e ɖò Jehovah sɛn wɛ lɛ é na y’avǐ?

HWETƐNU ka nyí azɔn gudo tɔn e a y’avǐ é? Hweɖelɛnu ɔ, mǐ nɔ y’avǐ ɖó mǐ ɖò awǎjijɛ mɛ wutu. Amɔ̌, hwɛhwɛ ɔ, wuvɛ̌ wɛ nɔ zɔ́n bɔ mǐ nɔ y’avǐ. Ði kpɔ́ndéwú ɔ, enyi mɛ vívɛ́ná mǐtɔn ɖé kú ɔ, mǐ sixu y’avǐ. Lorilei ee nyí nɔví nyɔnu ɖé, bo nɔ nɔ États-Unis é wlán ɖɔ: “Hweɖelɛnu ɔ, un nɔ nɔ aluwɛ mɛ tawun ɖó vǐ nyɔnu ce e kú é wu, b’ɛ nɔ cí ɖɔ nǔ ɖebǔ kún sixu dó gbɔ nú mì ó ɖɔhun. Hwe enɛ lɛ nu ɔ, un nɔ mɔ ɖɔ un kún sɔ́ na mɔ nyiɖée mɛ kpɔ́n gbeɖé ó.”b

² Mǐ sixu lɛ́ y’avǐ ɖó hwɛjijɔ ɖevo lɛ wutu. Hiromi ee nyí gbexosin-alijitɔ́ ɖé bo nɔ nɔ Japon é ɖɔ: “Hweɖelɛnu ɔ, wǔ nɔ kú mì, ɖó mɛ ɖěɖee un nɔ ɖɔ Mawuxó na lɛ é nɔ ba na ɖótó wɛn Biblu tɔn ǎ. É nɔ wá sù hweɖelɛnu bɔ kpo avǐ kpo wɛ un nɔ byɔ Jehovah ɖɔ é ni d’alɔ mì bonu má mɔ mɛ e ɖò nǔgbo ɔ ba wɛ é ɖé.”

³ Nǔ nɔ cí mɔ̌ nú we hweɖelɛnu wɛ à? Mǐ mɛ gegě wɛ na yí gbè. (1 Pi. 5:9) Mǐ ba na ‘sɛn Jehovah kpo xomɛhunhun kpo,’ amɔ̌, é nɔ sín aluwɛ, awakanmɛkúmɛ, alǒ ninɔmɛ vɛwǔ e nɔ tɛ́n gbeji e mǐ ɖè nú Mawu é kpɔ́n é ɖé wu bɔ mǐ nɔ y’avǐ. (Ðɛh. 6:7; 100:2) Enyi nǔ nɔ cí mɔ̌ nú mǐ ɔ, etɛ mǐ ka sixu wà?

 4. Etɛ lɛ mǐ ka na gbéjé kpɔ́n ɖò xóta elɔ mɛ?

⁴ Kpɔ́ndéwú Jezu tɔn sixu kplɔ́n nǔ mǐ. Ðò hweɖelɛnu ɔ, lee nǔ cí n’i é syɛn sɔmɔ̌ bɔ ‘é y’avǐ.’ (Jaan 11:35; Luk. 19:41; 22:44; Ebl. 5:7) Mǐ ni vɔ́ ninɔmɛ e mɛ nǔ nyí mɔ̌ ɖè é ɖé lɛ jí gbɔn. Ee mǐ na ɖò mɔ̌ wà wɛ é ɔ, mǐ na mɔ nǔ ɖěɖee ye sixu kplɔ́n mǐ lɛ é. Mǐ na lɛ́ mɔ nǔ e mǐ sixu wà ɖò ninɔmɛ ɖěɖee nɔ dó avǐ nu nú mǐ lɛ é mɛ é.

 5. Etɛ tan e ɖò Jaan 11:32-36 mɛ é ka kplɔ́n mǐ dó Jezu wu?

⁵ Ðò avivɔ hwenu ɖò xwè 32 H.M. tɔn ɔ, xɔ́ntɔn Jezu tɔn Lazáa bɛ́ azɔn bo kú. (Jaan 11:3, 14) Lazáa ɖó nɔví nyɔnu we, ye wɛ nyí Mali kpo Mata kpo; Jezu yí wǎn nú xwédo enɛ tawun. Ahwi xò nɔví nyɔnu we lɛ, ɖó kú e nɔví sunnu yetɔn kú é wutu. Ðò kú Lazáa tɔn gudo ɔ, Jezu yì gletoxo Betaníi tɔn mɛ, fí e Mali kpo Mata kpo nɔ nɔ é. Hwenu e Mata sè ɖɔ Jezu wá é ɔ, é kánwezun yì kpé é. Dǒ nukún aluwɛ e mɛ é na ko ɖè hwenu e é ɖɔ xó elɔ lɛ é mɛ kpɔ́n: “Aklunɔ, enyi fí wɛ a ko ɖè ɔ, nɔví ce na kú ǎ.” (Jaan 11:21) Táan kpɛɖé gudo hwenu e Jezu mɔ bɔ Mali kpo mɛ ɖevo lɛ kpo ɖò avǐ ya wɛ é ɔ, é “ya avǐ.”—Xà Jaan 11:32-36.

 6. Aniwu Jezu ka y’avǐ ɖò ninɔmɛ enɛ mɛ?

⁶ Aniwu Jezu ka y’avǐ ɖò ninɔmɛ enɛ mɛ? Étude perspicace des Écritures na xósin ɔ bo ɖɔ: “Kú e xɔ́ntɔn tɔn Lazáa kú é kpo aluwɛ e mɛ Lazáa sín nɔví nyɔnu lɛ kpo ɖè é zɔ́n bɔ Jezu ‘sín lanmɛ slɔ́ fún, b’ɛ y’avǐ.’”c Jezu sixu ko ɖò tamɛ lin dó wuvɛ̌ e xɔ́ntɔn tɔn vívɛ́ Lazáa sè hwenu e é ɖò azɔn jɛ wɛ é jí wɛ, bo sixu ko lɛ́ ɖò nukún dó lee nǔ na ko cí n’i hwenu e é ɖ’ayi wu ɖɔ emi ɖò na kú wɛ é mɛ kpɔ́n wɛ. É ɖò wɛn ɖɔ mɔ e Jezu mɔ lee kú Lazáa tɔn wà nǔ dó Mali kpo Mata kpo wu gbɔn é lɛ́ zɔ́n bɔ é y’avǐ. Enyi xɔ́ntɔn vívɛ́ towe, alǒ mɛ e ɖò xwédo towe mɛ é ɖé ko kú jó we dó kpɔ́n hǔn, é ɖò gaan ɖɔ nǔ na ko cí mɔ̌ nú hwiɖesunɔ kpɔ́n. Mǐ ni gbéjé nǔ e tan enɛ sixu kplɔ́n mǐ é atɔn kpɔ́n.

 7. Etɛ avǐ e Jezu ya dó xɔ́ntɔn tɔn lɛ tamɛ é ka kplɔ́n mǐ dó Jehovah wu?

⁷ Jehovah nɔ mɔ nǔ jɛ lee nǔ nɔ cí nú we é mɛ. Jezu ɔ, “xlɛ̌ titewungbe” Tɔ́ tɔn tɔn wɛ é nyí. (Ebl. 1:3) Hwenu e Jezu y’avǐ é ɔ, lee nǔ nɔ cí nú Tɔ́ tɔn é wɛ é ɖexlɛ́ mɔ̌. (Jaan 14:9) Enyi mɛvívɛ́ ɖé ko kú jó we dó ɔ, a sixu kúdeji ɖɔ Jehovah nɔ ɖó ayi aluwɛ e mɛ a ɖè é wu, bɔ nǔ towe nɔ lɛ́ ɖu ayi mɛ n’i tawun. É ba na xò hwihwɛ́ ayi towe e ko gbadó é.—Ðɛh. 34:19; 147:3.

 8. Etɛwu mǐ ka sixu ɖeji ɖɔ Jezu na fɔ́n mɛ vívɛ́ná mǐtɔn lɛ?

⁸ Jezu ba na fɔ́n mɛvívɛ́ towe lɛ sín kú. Táan klewun ɖé jɛ nukɔn nú hwenu e Jezu y’avǐ é ɔ, é na ganjɛwu Mata ɖɔ: “Nɔví towe na fɔ́n.” Mata ɖi nǔ nú Jezu. (Jaan 11:23-27) Ðó Mata nyí mɛsɛntɔ́ Jehovah tɔn gbejinɔtɔ́ ɖé wutu ɔ, é ɖò wɛn ɖɔ é tuùn ɖɔ gbeyiɖɔ Elíi kpo Elizée kpo ko fɔ́n mɛ sín kú wá yì. (1 Axɔ́. 17:17-24; 2 Axɔ́. 4:32-37) Gɔ́ na ɔ, é na ko lɛ́ sè ɖɔ Jezu fɔ́n mɛ lɛ sín kú. (Luk. 7:11-15; 8:41, 42, 49-56) Hwiɖesu sixu kúdeji ɖɔ a na lɛ́ wá mɔ mɛ vívɛ́ná towe ɖěɖee ko kú lɛ é. Enɛ wu ɔ, etɛ avǐ e Jezu ya hwenu e é ɖò gbɔ dó nú xɔ́ntɔn tɔn ɖěɖee ɖò aluwɛ mɛ lɛ é wɛ é ka kplɔ́n mǐ? É kplɔ́n mǐ ɖɔ akpakpa ɖò sísɔ́ ɛ wɛ bonu é na fɔ́n mɛkúkú lɛ!

 9. Jezu ɖɔhun ɔ, nɛ̌ a ka sixu d’alɔ mɛ ɖěɖee ɖò aluwɛ mɛ lɛ é gbɔn? Nǎ kpɔ́ndéwú ɖé.

⁹ A sixu nɔ gudo nú mɛ ɖěɖee ɖò aluwɛ mɛ lɛ é. Avǐ kɛɖɛ wɛ Jezu ya xá Mali kpo Mata kpo ǎ, loɔ, é lɛ́ ɖótó ye, lobo lɛ́ dó gbɔ nú ye. Mǐ sixu wà nǔ ɖokpo ɔ nú mɛ ɖěɖee ɖò aluwɛ mɛ lɛ é. Dan nyí mɛxo agun tɔn ɖé, bo nɔ nɔ Australie; é ɖɔ: “Ee asì ce kú gudo é ɔ, un ɖó hudo alɔdó tɔn. Nɔví sunnu gegě kpo asì yetɔn lɛ kpo ɖò gbesisɔmɛ hwebǐnu bá ɖótó mì. Ye na tɛn mì bɔ un ɖè aluwɛ e mɛ un ɖè é xlɛ́, bɔ avǐ e un nɔ ya é ka nɔ lɛ́ d’akpɔ nú ye ǎ. Ye lɛ́ d’alɔ tawun tawun lɛ mì, ɖi mɔ̌to klɔ́klɔ́, axi xwléxwlé, nǔ ɖiɖa ɖò hwenu e un ma sixu kpé nǔ enɛ lɛ wu ǎ é. Gɔ́ na ɔ, hwɛhwɛ wɛ ye nɔ xoɖɛ ɖó kpɔ́ xá mì. Ye xlɛ́ ɖɔ xɔ́ntɔn nǔgbo kpo ‘nɔví sunnu e wu è sixu ɖeji dó ɖò wuvɛ̌ lɛ hwenu é’ kpo wɛ emi nyí.”—Nǔx. 17:17, nwt.

10. Tinmɛ nǔ e jɛ bɔ è ɖɔ ɖò Luki 19:36-40 mɛ é.

¹⁰ Jezu wá Jeluzalɛmu ɖò azǎn 9gɔ́ Nisáan xwè 33 H.M. tɔn. Ee é ɖò toxo ɔ sɛkpɔ́ wɛ é ɔ, ahwan ɖé kplé, bo nɔ sɔ́ avɔ yetɔn lɛ tɛ́ ɖò nukɔn tɔn, bo na dó xlɛ́ ɖɔ emi yí gbè ɖɔ Axɔ́su emitɔn wɛ é nyí. É ɖò wɛn ɖɔ hwenu awǎjijɛ tɔn ɖé wɛ é nyí. (Xà Luki 19:36-40.) Enɛ wu ɔ, ahwanvu tɔn lɛ sixu ko gɔn nukún ɖó nǔ e jɛ bɔ d’ewu é. “Ee Jezu sɛya Jeluzalɛmu, bo mɔ tò ɔ sɛ́dó ɔ, é ya avǐ ɖó ta tɔn mɛ.” Ðasin wɛ ɖò Jezu nukúnmɛ b’ɛ ɖɔ nǔdabaɖa e ɖò na jɛ dó mɛ ɖěɖee ɖò Jeluzalɛmu lɛ é jí ɖò malin-malin mɛ wɛ é nú ye.—Luk. 19:41-44.

11. Aniwu Jezu ka y’avǐ dó mɛ ɖěɖee nɔ nɔ Jeluzalɛmu lɛ é takúnmɛ?

¹¹ Jezu ɖò aluwɛ mɛ, ɖó é tuùn ɖɔ Jwifu lɛ gegě kún na yí wɛn Axɔ́suɖuto ɔ tɔn ó. Wǎgbɔ tɔn ɔ, è na sú Jeluzalɛmu sín kún dó, bo na bɛ́ Jwifu ɖěɖee na gán lɛ é yì kannumɔgbenu. (Luk. 21:20-24) É blawǔ ɖɔ lee Jezu ko ɖɔ gbɔn jɛ nukɔn é ɔ, mɛ lɛ gegě gbɛ́ wɛn tɔn. Nɛ̌ mɛ lɛ ka nɔ yí wɛn Axɔ́suɖuto ɔ tɔn gbɔn ɖò fí e a nɔ nɔ é? Enyi mɛ kpɛɖé wɛ nɔ ɖótó wɛn towe ɔ, etɛ avǐ e Jezu ya é ka sixu kplɔ́n we? Nǔkplɔnmɛ atɔn ɖevo lɛ ɖíe.

12. Etɛ avǐ e Jezu ya dó nɔzo tɔn lɛ takúnmɛ é ka sixu kplɔ́n mǐ dó Jehovah wu?

¹² Nǔ mɛ lɛ tɔn nɔ ɖu ayi mɛ nú Jehovah. Avǐ e Jezu ya lɛ é nɔ flín mǐ lě dò nǔ mɛ lɛ tɔn nɔ ɖu ayi mɛ nú Jehovah sɔ é. “É jló ɖɔ mɛ ɖebǔ ni dɔn ǎ; é nyɔ́ wà ɔ, é jló ɖɔ mɛ bǐ ni mɔ ali, bo lɛkɔ sín nǔnyanyawiwa gudo.” (2 Pi. 3:9) Égbé ɔ, mǐ nɔ xlɛ́ ɖɔ mǐ yí wǎn nú mɛ e jlá wɛn ɔ wɛ mǐ ɖè lɛ é, gbɔn tintɛnkpɔn bo na d’alɔ ye hwebǐnu bonu ye na kplɔ́n nǔ dó wɛnɖagbe e kúnkplá Axɔ́suɖuto ɔ é wu gblamɛ.—Mat. 22:39.d

13-14. Nɛ̌ Jezu ka sè wuvɛ̌ xá mɛ lɛ gbɔn? Nɛ̌ mǐ ka sixu sɔnǔ nú jijɔ enɛ gbɔn?

¹³ Jezu nɔ w’azɔ̌ syɛnsyɛn ɖò sinsɛnzɔ́ ɔ mɛ. É nɔ gbɔn ali e nɔ hun n’i lɛ é bǐ gblamɛ dó kplɔ́n nǔ mɛ lɛ, dó ɖexlɛ́ ɖɔ emi yí wǎn nú ye. (Luk. 19:47, 48) Etɛ ka nɔ sísɛ́ ɛ bɔ é nɔ wà mɔ̌? Jezu nɔ sè wuvɛ̌ xá ye. Hweɖenu ɔ, mɛ gegě ba na sè xó Jezu tɔn lɛ kaka bɔ é kpo ahwanvu tɔn lɛ kpo “sɔ́ mɔ tɛn na ɖu nǔ ǎ.” (Mak. 3:20) Gɔ́ na ɔ, hwenu e nya ɖé ba na ɖɔ xó xá Jezu ɖò zǎnmɛ é ɔ, é ɖò gbesisɔmɛ bo ɖɔ xó xá ɛ. (Jaan 3:1, 2) Mɛ ɖěɖee ɖótó Jezu lɛ é gegě huzu ahwanvu tɔn ǎ. Amɔ̌, mɛ e ɖótó è lɛ é bǐ sè Mawuxó ɔ bǐ mlɛ́mlɛ́. Égbé ɔ, mǐ ba na hun ali ɔ nú mɛ lɛ bǐ bonu ye na sè wɛnɖagbe ɔ. (Mɛ. 10:42) Bo na dó kpé enɛ wu ɔ, é sixu byɔ ɖɔ mǐ ni huzu lee mǐ nɔ jlá wɛnɖagbe ɔ gbɔn é.

¹⁴ Ðò gbesisɔmɛ bo na bló huzuhuzu e ɖò dandan lɛ é. Enyi gan ɖokpo ɔ mɛ jɛn mǐ nɔ jlá wɛn ɔ hwebǐnu ɔ, mǐ sixu gɔn mɛ ɖěɖee ba na sè wɛnɖagbe ɔ é ɖé lɛ xò gò. Gbexosin-alijitɔ́ e nɔ nyí Matilda é ɖɔ: “Asú ce kpo nyi kpo nɔ tɛ́n kpɔ́n bo nɔ yì ba mɛ lɛ kpɔ́n ɖò gan vovo mɛ. Ðò zǎnzǎn lɛ ɔ, mǐ nɔ yì jlá wɛn ɖò ajɔ̌watɛn lɛ. Hwemɛ hwenu e mɛ gegě nɔ ɖò toxo mɛ é ɔ, mǐ nɔ zán kɛkɛví lɛ dó ɖekúnnu. Gbadanu lɛ ɔ, mǐ nɔ mɔ mɛ gegě ɖò xwé yetɔn lɛ gbè.” Enyi hwenu e nyɔ́ nú mǐ lɛ é kɛɖɛ wɛ mǐ ɖó na nɔ jlá wɛnɖagbe ɔ ǎ, é nyɔ́ wà ɔ, mǐ ɖó na ɖò gbesisɔmɛ bo na huzu tuto mǐtɔn bo na mɔ tɛn dó jlá wɛn ɔ mɛ lɛ ɖò hwenu e mǐ na ɖibla mɔ ye hugǎn é. Enyi mǐ wà mɔ̌ ɔ, mǐ sixu ɖeji ɖɔ xomɛ na hun Jehovah.

15. Lee Luki 22:39-44 ɖɔ gbɔn é ɔ, etɛ ka jɛ ɖò zǎn gudo tɔn e jɛ nukɔn nú kú Jezu tɔn é mɛ?

¹⁵ Ðò azǎn 14gɔ́ Nisáan xwè 33 H.M. tɔn, ɖò zǎnxwete ɔ, Jezu yì jikpá Jɛtisemaníi tɔn mɛ. Finɛ wɛ é ɖɔ nǔ e ɖò ayi tɔn mɛ lɛ é nú Jehovah ɖè. (Xà Luki 22:39-44.) Wuvɛ̌ sín táan enɛ lɛ mɛ wɛ Jezu “xoɖɛ bo savo kpodo xósúsú kpo, kpodo ɖasin kpo.” (Ebl. 5:7) Etɛ Jezu ka byɔ ɖò zǎn gudo tɔn enɛ e jɛ nukɔn nú kú tɔn é mɛ? É xoɖɛ bo byɔ hlɔnhlɔn bá dó kpò ɖò gbeji nú Jehovah, lobo lɛ́ wà jlǒ Tɔn. Jehovah sè ɖɛ e Vǐ tɔn xò kpo ayi bǐ kpo é, bo sɛ́ wɛnsagun ɖé dó bonu é na na ɛ hlɔnhlɔn.

16. Aniwu ayi Jezu tɔn ka gbadó hwenu e é ɖò ɖɛ xò wɛ ɖò jikpá Jɛtisemaníi tɔn mɛ é?

¹⁶ É ɖò wɛn ɖɔ hwenu e Jezu ɖò ɖɛ xò wɛ ɖò jikpá Jɛtisemaníi tɔn mɛ é ɔ, é y’avǐ, ɖó linlin e mɛ lɛ nɔ ɖó ɖɔ é kún ɖó sísí ɖě nú nyikɔ Mawu tɔn ó é wutu. É lɛ́ tuùn ɖɔ é ɖò taji ɖɔ emi ni nɔ gbeji, bo jɛhun dó nyikɔ Tɔ́ emitɔn tɔn jí. Enyi ninɔmɛ e nɔ gb’ayi dó nú mɛ, bo nɔ tɛ́n gbeji e è ɖè nú Jehovah é kpɔ́n é ɖé mɛ gbɔn wɛ a ɖè ɔ, etɛ avǐ e Jezu ya é ka sixu kplɔ́n we? Nǔkplɔnmɛ atɔn ɖevo lɛ ɖíe.

17. Etɛ sinkɔn e Jehovah na nú ɖɛ e Jezu xò kpo ayi tɔn bǐ kpo lɛ é ka sixu kplɔ́n mǐ dó Jehovah wu?

¹⁷ Jehovah nɔ ɖótó vosisa towe lɛ. Jehovah ɖótó nǔ e Jezu byɔ kpo ayi bǐ kpo é. Aniwu? Nǔ taji e ɖò ayi mɛ ɖu nú Jezu wɛ é wɛ nyí gbeji e é na nɔ nú Tɔ́ tɔn é kpo hun e é na jɛ dó Tɔ́ tɔn sín nyikɔ jí é kpo. Enyi gbeji e mǐ na nɔ nú Jehovah é kpo hun e mǐ na jɛ dó nyikɔ tɔn jí é kpo nɔ ɖu ayi mɛ nú mǐ ɔ, é na na sinkɔn nú ɖɛ e mǐ nɔ xò dó byɔ alɔdó lɛ é.—Ðɛh. 145:18, 19.

18. Ali tɛ lɛ nu Jezu ka cí xɔ́ntɔn xomɛnyɔtɔ́ e nɔ mɔ nǔ jɛ ninɔmɛ mǐtɔn mɛ é ɖé ɖɔhun ɖè?

¹⁸ Jezu nɔ mɔ nǔ jɛ lee nǔ nɔ cí nú we é wu. Enyi ado ɖò mǐ hu wɛ, bɔ mǐ ka ɖó xɔ́ntɔn e nɔ mɔ nǔ jɛ lee nǔ nɔ cí nú mǐ é mɛ é ɖé, taji ɔ, b’ɛ ko gbɔn ninɔmɛ mǐtɔn ɖɔhun ɖé mɛ wá yì ɔ, xomɛ nɔ hun mǐ. Xɔ́ntɔn mɔ̌hun wɛ Jezu nyí. É tuùn nǔ e gǎn vɔ ɖò mɛ wu kpo è ɖó hudo alɔdó tɔn kpo nyí é. É nɔ mɔ nǔ jɛ gǎnmaɖó mǐtɔn lɛ wu, bo ka na kúdeji ɖɔ mǐ mɔ alɔdó e sín hudo mǐ ɖó é “ɖò hwetɔnnu.” (Ebl. 4:15, 16) Lee Jezu yí gbè nú alɔdó wɛnsagun ɖé tɔn ɖò jikpá Jɛtisemaníi tɔn mɛ gbɔn é ɔ, mǐ lɔmɔ̌ ɖó na ɖò gbesisɔmɛ, bo na yí gbè nú alɔ e Jehovah nɔ dó mǐ vlafo gbɔn wema ɖé, video ɖé, xóɖiɖɔ ɖé, alǒ ba e mɛxo agun tɔn ɖé kabǐ xɔ́ntɔn e zin é ɖé wá ba mǐ kpɔ́n bo dó wusyɛn lanmɛ nú mǐ é gblamɛ é.

19. Enyi ninɔmɛ e nɔ gb’ayi dó nú mɛ, bo nɔ tɛ́n gbeji e è ɖè nú Mawu é kpɔ́n é ɖé mɛ wɛ a ɖè ɔ, nɛ̌ a ka sixu mɔ hlɔnhlɔn gbɔn? Nǎ kpɔ́ndéwú ɖé.

¹⁹ Jehovah na na we ‘fífá tɔn.’ Nɛ̌ Jehovah ka na na mǐ hlɔnhlɔn gbɔn? Enyi mǐ xoɖɛ ɔ, mǐ nɔ mɔ “fífá Mawu tɔn e hugǎn nukúnnúmɔjɛnǔmɛ gbɛtɔ́ tɔn bǐ” é. (Fili. 4:6, 7) Fífá e Jehovah nɔ na mǐ é nɔ bló ayixa mǐtɔn kpo linlin mǐtɔn lɛ kpo ɖó. Kpɔ́n lee enɛ jɛ wě ɖò nɔví nyɔnu e nɔ nyí Luz é sín ninɔmɛ mɛ gbɔn é. É ɖɔ: “Hwɛhwɛ wɛ un nɔ mɔ ɖɔ un ɖò nyiɖokpo. Hweɖelɛnu ɔ, un nɔ mɔ ɖɔ Jehovah kún yí wǎn nú mì ó. Enyi nǔ cí mɔ̌ nú mì ɔ, tɛn tɔn mɛ jɛn un nɔ ɖɔ nú Jehovah ɖè. Ðɛxixo nɔ zɔ́n bɔ un nɔ mɔ nyiɖée mɛ hugǎn.” Lee xó e nɔví nyɔnu ɔ ɖɔ é xlɛ́ gbɔn é ɔ, ɖɛxixo sixu d’alɔ mǐ, bɔ mǐ na ɖó fífá.

20. Etɛ avǐ ɖěɖee Jezu ya lɛ é ka kplɔ́n mǐ?

²⁰ Nǔkplɔnmɛ e dó gbɔ nú mɛ, bo lɛ́ nyɔ́ zán lɛ é gegě wɛ mǐ sixu mɔ ɖò avǐ e Jezu ya lɛ é mɛ! È flín nǔ mǐ ɖɔ mǐ ni nɔ nɔ gudo nú xɔ́ntɔn ɖěɖee ɖò aluwɛ mɛ lɛ é, bo lɛ́ ɖeji ɖɔ Jehovah kpo Jezu kpo na nɔ gudo nú mǐ hwenu e mɛvívɛ́ mǐtɔn lɛ kú é. È lɛ́ dó wusyɛn lanmɛ nú mǐ ɖɔ mǐ ni nɔ ɖɔ Mawuxó, bo lɛ́ kplɔ́n nǔ mɛ kpo wuvɛ̌sexámɛ kpo ɖó Jehovah Mawu kpo Jezu Klisu kpo nɔ ɖè jijɔ ɖaaɖagbe enɛ xlɛ́. Gɔ́ na ɔ, tuùn e mǐ tuùn ɖɔ Jehovah kpo Vǐ tɔn vívɛ́ná ɔ kpo nɔ mɔ nǔ jɛ lee nǔ nɔ cí nú mǐ é mɛ, nɔ sè wuvɛ̌ xá mǐ ɖò gǎnmaɖó mǐtɔn lɛ mɛ, bo lɛ́ ba na d’alɔ mǐ bɔ mǐ na dɛ é nɔ dó gbɔ nú mǐ. Mi nú mǐ ni kpò ɖò nǔ e mǐ kplɔ́n lɛ é zán wɛ kaka jɛ hwenu e Jehovah na ɖè akpá ɖaaɖagbe elɔ e é dó ɖɔ emi na “súnsún ɖasin bǐ sín nukún [mǐtɔn] mɛ” é!—Nǔɖe. 21:4.