Kpo ɖo suúlu ɖó wɛ

 1. Aniwú mɛ ɖěɖěe nɔ ɖó suúlu lɛ́ é sín nǔ ka nɔ su nukún towe mɛ?

MǏ MƐ bǐ wɛ nɔ yí wǎn nú mɛ ɖěɖěe nɔ ɖó suúlu lɛ́ é. Aniwú? Mǐ nɔ ɖó sísí nú mɛ ɖěɖěe nɔ nɔ te kpɔ́n nǔɖé, bo ma ka nɔ sin xomɛ ǎ lɛ́ é. Ényí mɛ ɖěvo lɛ́ ɖó suúlu dó mǐ wú hwenu e mǐ ɖe afɔ nyi do é ɔ, é nɔ su nukún mǐtɔn mɛ. Gɔ́ ná ɔ, é su nukún mǐtɔn mɛ ɖɔ mɛ e kplɔ́n Biblu xá mǐ é ɖó suúlu dó mǐ wú, hwenu e nǔ e ɖo Biblu mɛ lɛ́ é kplɔ́nkplɔ́n, gbe yíyí nú yě, alǒ yě zínzán vɛ́ wǔ nú mǐ é. Tají hú gǎn ɔ, é su nukún mǐtɔn mɛ tawun ɖɔ Jexóva Mawu nɔ ɖó suúlu dó mǐ wú.—Hlɔ̌. 2:4.

 2. Ninɔmɛ tɛ́ lɛ́ mɛ é ka sixú vɛ́ wǔ nú mǐ bɔ mǐ ná nɔ ɖó suúlu ɖe?

² Nǔgbó wɛ ɖɔ suúlu e mɛ ɖěvo lɛ́ nɔ ɖó é nɔ xɔ akwɛ́ nú mǐ, amɔ̌, é sixú nɔ vɛ́ wǔ nú mǐɖésúnɔ mɛtún ɔ, bɔ mǐ ná nɔ ɖó suúlu hwebǐnu. Mǐ ní ɖɔ ɖɔ xovɛ́ sin we bɔ a jló ná xɔ nǔ ɖu, bɔ gbɛtɔ́ sukpɔ́. A ka ná ɖó suúlu bo nɔ te xwíí a? Suúluɖíɖó sixú lɛ́ vɛ́ wǔ nú mǐ hwenu e mɛ ɖěvo lɛ́ dó xomɛsin nú mǐ é. Gɔ́ ná ɔ, é sixú nɔ vɛ́ wǔ nú mǐ hweɖélɛ́nu, bɔ mǐ ná nɔ te kpɔ́n Jexóva bónú akpá gbɛ yɔ̌yɔ́ ɔ tɔn e é dó nú mǐ é ná jɛnu. A ka ba ná nɔ ɖó suúlu hú gǎn a? Ðo xóta élɔ́ mɛ ɔ, mǐ ná gbéjé nǔ e è ní ɖó suúlu nyí é kpó nǔ e wú é ɖo tají sɔmɔ̌ é kpó kpɔ́n. Mǐ ná lɛ́ gbéjé nǔ e sixú d’alɔ mǐ bɔ mǐ ná nɔ ɖó suúlu hú gǎn é ɖé lɛ́ kpɔ́n.

 3. Nɛ̌ mɛ e nɔ ɖó suúlu é ka nɔ wa nǔ gbɔn hwenu e è dó xomɛsin n’i é?

³ Mǐ ní gbéjé ali e nu mǐ sixú ɖó suúlu ɖe é ɛnɛ kpɔ́n. Nukɔntɔn, mɛ e nɔ ɖó suúlu é nɔ yá wǔ sin xomɛ ǎ. Ényí mɛ ɖěvo lɛ́ wa nǔɖé dó dó xomɛsin n’i ɔ, é nɔ ɖó suúlu, lobo nɔ ba hlɔn ǎ. Ényí é ɖó linkpɔ́n ɔ, é nɔ jɛ akpɔ mɔ dó mɛ bǐ wú jí ǎ. Xógbe “nɔ yá wǔ sin xomɛ ǎ” ɔ tɔ́n ɖo Biblu mɛ azɔn nukɔntɔn ɔ, hwenu e Jexóva ɖɔ xó élɔ́ lɛ́ dó éɖée wú é: “Un nyí Mawu nǔbláwǔkúnúmɛtɔ́, Mawu xomɛfátɔ́, un nɔ yá wǔ sin xomɛ ǎ, un nyí Mawu xomɛnyɔ́tɔ́, un nyí Mawu gbejínɔtɔ́.”—Tín. 34:6.

 4. Ényí é byɔ́ ɖɔ mɛ e nɔ ɖó suúlu é ɖé ní nɔ te kpɔ́n nǔɖé ɔ, nɛ̌ é ka nɔ wa nǔ gbɔn?

⁴ Wegɔ́, mɛ e nɔ ɖó suúlu é sixú xwe sɔ dó nɔ te kpɔ́n nǔɖé. Ényí mɛ mɔ̌hun ɖo nukún ɖó nǔɖé wɛ bɔ é ma ka ko jɛnu dó hwetɔnnu ǎ ɔ, é nɔ jɛ mlamla sún jí, alǒ jɛ xomɛ sin jí gblagbla ǎ. (Mat. 18:26, 27) Ninɔmɛ gěgé mɛ wɛ é nɔ byɔ́ ɖɔ mǐ ní nɔ xwe sɔ dó nɔ te kpɔ́n nǔɖé ɖe. Ði kpɔ́ndéwú ɔ, é nɔ byɔ́ ɖɔ ényí mɛɖé ɖo xó ɖɔ wɛ hǔn, mǐ ní ɖótó è kpó sɔxwixwe kpó, bo ma gbo xó dó nu n’i ó. (Jɔb. 36:2) Mǐ lɛ́ ɖó hudó suúlu tɔn, hwenu e mǐ ɖo alɔ dó nǔkplɔ́ntɔ́ ɖé wɛ bónú é ná mɔ nukúnnú jɛ nǔkplɔ́nmɛ Biblu tɔn ɖé mɛ, alǒ ɖu ɖo walɔ nyanya ɖé jí é.

 5. Ali ɖěvo tɛ́ nu è ka sixú ɖó suúlu ɖe?

⁵ Atɔngɔ́, mɛ e nɔ ɖó suúlu é nɔ zɔn kplakpla jí dó wa nǔ ǎ. Nǔgbó wɛ ɖɔ hweɖélɛ́nu ɔ, é nɔ byɔ́ ɖɔ mǐ ní yá wǔ wa nǔ. É ɖo mɔ̌ có, ényí mɛ e nɔ ɖó suúlu é ɖó azɔ̌ tají ɖé bá wa ɔ, é nɔ zɔn kplakpla jí dó wa nǔ ǎ, mɔ̌ jɛ́n é ma ka nɔ lɛ́ hwlɛndó azɔ̌ bá wa mɔ̌tɔn mɔ̌tɔn bá yá wǔ fó ǎ é nɛ́. É nyɔ́ wa ɔ, é nɔ tɛ́n kpɔ́n bo nɔ ba hwenu bo nɔ bló tuto nú nǔ e wa gbé é ja é. Énɛ́ gúdo ɔ, é nɔ zán hwenu e jɛxá é dó wa azɔ̌ ɔ ganjí.

 6. Ényí mɛ e nɔ ɖó suúlu é ɖé ɖo tagba, alǒ ninɔmɛ syɛ́nsyɛ́n lɛ́ mɛ gbɔn wɛ ɔ, nɛ̌ é ka nɔ wa nǔ gbɔn?

⁶ Ɛnɛgɔ́, mɛ e nɔ ɖó suúlu é nɔ tɛ́n kpɔ́n bo nɔ dɛ ɖo mɛtɛ́nkpɔ́n lɛ́ nu, ma húnhún nǔɖɔ. Ðo ninɔmɛ élɔ́ mɛ ɔ, suúlu cá kan tawun xá didɛ. É ɖo wɛn ɖɔ, é kún nylá ɖɔ è ní ɖɔ xomɛ nú xɔ́ntɔn vívɛ́ ɖé, bo lɛ́ ɖɔ lěe nǔ cí nú mɛ dó nǔ e ɖo mɛ gbo wɛ é wú é n’i ó. É ɖo mɔ̌ có, mɛ e nɔ ɖó suúlu é ná wa nǔ e wú é kpé é bǐ, bá kpo ɖo didɛ wɛ, lobo kpo ɖo linlin ɖagbe ɖó wɛ. (Koló. 1:11) Ðó klisánwun wɛ mǐ nyí wútu ɔ, é byɔ́ ɖɔ mǐ ní nɔ ɖó suúlu ɖo ali énɛ́ lɛ́ bǐ nu. Aniwú? Mi nú mǐ ní gbéjé hwɛjijɔ ɖé lɛ́ kpɔ́n.

 7. Sɔgbe xá Jaki 5:7, 8 ɔ, aniwú suúluɖíɖó ka ɖo tají sɔmɔ̌? (Lɛ̌ kpɔ́n ɖiɖe ɔ.)

⁷ Suúlu ɖo tají cóbɔ mǐ ná mɔ hwlɛngán. Mɛsɛntɔ́ gbejínɔtɔ́ hwexónu tɔn lɛ́ ɖɔhun ɔ, é byɔ́ ɖɔ mǐ ní ɖó suúlu, bo nɔ te kpɔ́n Mawu, bónú é ná ɖe akpá tɔn lɛ́. (Ebl. 6:11, 12) Biblu jlɛ́ ninɔmɛ mǐtɔn dó glesi ɖé tɔn wú. (Xa Jaki 5:7, 8.) Glesi ɖé nɔ w’azɔ̌ syɛ́nsyɛ́n, bo nɔ dó nǔkún, lobo nɔ hú sin ná, amɔ̌, é nɔ tuun hwenu e é ná su dó é lě tawun ǎ. Énɛ́ wú ɔ, glesi ɔ nɔ ɖó suúlu, bo nɔ nɔ te, lobo nɔ ɖeji ɖɔ émí ná ya nǔkún ɖo hwetɔnnu. Mɔ̌ ɖokpó ɔ, mǐ “tuun gbe e gbe Aklúnɔ [mǐtɔn] ná wá dó é ǎ” có, mǐ nɔ tɛ́n kpɔ́n bo nɔ bló bɔ alɔnu mǐtɔn nɔ ján ɖo nǔ gbigbɔ tɔn lɛ́ wiwa mɛ. (Mat. 24:42) Mǐ nɔ ɖó suúlu bo nɔ nɔ te, ɖó mǐ ɖeji ɖɔ Jexóva ná ɖe akpá e é dó lɛ́ é bǐ ɖo hwetɔnnu. Ényí suúlu hwedó mǐ ɔ, te ninɔ sixú ci mǐ, bɔ mǐ ná jɛ zɔ sɛ yi nú Jexóva jí kpɛɖé kpɛɖé. Mǐ sixú lɛ́ jɛ nǔ ɖěɖěe ná ná awǎjijɛ hwenu kléwún ɖé tɔn mǐ lɛ́ é gbé nya jí. Amɔ̌, ényí mǐ nɔ ɖó suúlu ɔ, mǐ sixú dɛ káká jɛ vivɔnu, lobo mɔ hwlɛngán.—Micée 7:7; Mat. 24:13.

 8. Nɛ̌ suúlu ka nɔ d’alɔ mǐ bɔ mǐ nɔ vɛ́ xá mɛ ɖěvo lɛ́ gbɔn? (Kolósinu lɛ́ 3:12, 13)

⁸ Suúlu nɔ d’alɔ mǐ bɔ mǐ nɔ vɛ́ xá mɛ ɖěvo lɛ́. É nɔ d’alɔ mǐ bɔ mǐ nɔ ɖótó mɛ ɖěvo lɛ́ kpó sɔxwixwe kpó hwenu e yě ɖo xó ɖɔ wɛ é. (Ja. 1:19) Suúlu nɔ lɛ́ zɔ́n bɔ mǐ nɔ xo fífá kan. Ényí mǐ nɔ ɖó suúlu ɔ, mǐ ná nɔ yá wǔ wa nǔ, alǒ ɖɔ xó ma kan kwín nú atakín hwenu e mǐ ɖó linkpɔ́n é ǎ. Gɔ́ ná ɔ, ényí mǐ nɔ ɖó suúlu ɔ, mǐ ná nɔ yá wǔ sin xomɛ hwenu e mɛ ɖěvo lɛ́ jɛ do nú mǐ é ǎ. Mǐ ná nɔ ba hlɔn ǎ, é nyɔ́ wa ɔ, mǐ ná “nɔ mɔ [mǐɖée] gbɔ, bo nɔ sɔ́ hwɛ kɛ [mǐɖée] lɛ́ faa.”—Xa Kolósinu lɛ́ 3:12, 13.

 9. Nɛ̌ suúlu ka nɔ d’alɔ mǐ hwenu e é byɔ́ ɖɔ mǐ ní wá gbeta lɛ́ kɔn é gbɔn? (Nǔnywɛ́xó 21:5)

⁹ Suúlu sixú lɛ́ d’alɔ mǐ bɔ mǐ ná wá gbeta ɖagbe lɛ́ kɔn. Mǐ ná nɔ ba hwenu, bo ba do nú nǔ, lobo gbéjé ali e hun nú mǐ lɛ́ é kpɔ́n, cóbá wá gbeta ɖagbe hú gǎn ɔ kɔn; é ná nyɔ́ hú ɖɔ mǐ ní zɔn xomɛsin jí dó wa nǔ, alǒ wa nǔ ma lin tamɛ. (Xa Nǔnywɛ́xó 21:5.) Ði kpɔ́ndéwú ɔ, ényí mǐ ɖo azɔ̌ ba wɛ ɔ, é sixú jló mǐ ɖɔ mǐ ní yí gbe nú azɔ̌ nukɔn nukɔntɔn e è xwlé mǐ é, ényí azɔ̌ ɔ ná bo tlɛ jɛ Jexóva sinsɛn mǐtɔn mɛ ɔ nɛ́. É ɖo mɔ̌ có, ényí mǐ nɔ ɖó suúlu ɔ, mǐ ná zán hwenu, bo lin tamɛ dó nǔ élɔ́ lɛ́ jí: fí e azɔ̌xwé ɔ ɖe dó mǐ é, ganxixo nabí e è nɔ zán dó wa azɔ̌ ɔ é kpó nǔ e azɔ̌ ɔ sixú wa dó xwédo mǐtɔn kpó xɔ́ntɔn e mǐ zun xá Jexóva é kpó wú é. Ényí mǐ nɔ ɖó suúlu ɔ, mǐ sixú nyi alɔ nú gbeta nyanya ɖé kɔn wíwá.

10. Nɛ̌ klisánwun ɖé ka sixú tɛ́n kpɔ́n bo ɖó suúlu, lobo lɛ́ kpo ɖo jijɔ énɛ́ ɖe xlɛ́ wɛ gbɔn?

¹⁰ Nɔ xo ɖɛ bá dó ɖó suúlu hú gǎn. Suúlu ɔ, jijɔ ɖěɖěe gbigbɔ mímɛ́ nɔ d’alɔ bɔ è nɔ ɖó lɛ́ é ɖokpó wɛ. (Ga. 5:22, 23) Énɛ́ wú ɔ, mǐ sixú xo ɖɛ bo byɔ́ ɖɔ gbigbɔ mímɛ́ Jexóva tɔn ní d’alɔ mǐ bónú mǐ ná tɛ́n kpɔ́n bo ɖó jijɔ énɛ́. Ényí mǐ gbɔn ninɔmɛ e tɛ́n suúluɖíɖó mǐtɔn kpɔ́n é ɖé mɛ ɔ, mǐ “nɔ ɖo” gbigbɔ mímɛ́ ‘byɔ́’ wɛ, bónú é ná d’alɔ mǐ nú mǐ ná ɖó suúlu. (Luk. 11:9, 13) Mǐ sixú lɛ́ byɔ́ Jexóva ɖɔ é ní d’alɔ mǐ bónú mǐ ná ɖó linlin ɖokpó ɔ éɖɔhun dó nǔ lɛ́ wú. Ényí mǐ xo ɖɛ gúdo ɔ, mǐ ɖó ná wa nǔ e wú mǐ kpé é bǐ bo ná nɔ ɖó suúlu ayǐhɔ́ngbe ayǐhɔ́ngbe. Bǎ e mɛ mǐ xo ɖɛ bo byɔ́ suúlu, lobo lɛ́ ɖo gǎn dó wɛ bá ɖó jijɔ énɛ́ yi ɖó é ɔ, bǎ énɛ́ mɛ wɛ jijɔ énɛ́ ná dó ɖɔ do ɖo ayi mǐtɔn mɛ, bo ná húzú akpáxwé mɛ alɔkpa e mǐ nyí é tɔn yi ɖó é nɛ́.

11-12. Nɛ̌ Jexóva ka ɖe xlɛ́ ɖɔ émí nɔ ɖó suúlu gbɔn?

¹¹ Nɔ lin tamɛ dó kpɔ́ndéwú Biblu tɔn lɛ́ jí. Kpɔ́ndéwú mɛ e nɔ ɖó suúlu lɛ́ é tɔn gěgé wɛ ɖo Biblu mɛ. Ényí mǐ nɔ lin tamɛ dó kpɔ́ndéwú yětɔn lɛ́ jí ɔ, mǐ sixú mɔ ali ɖěɖěe nu mǐ ná nɔ ɖó suúlu ɖe lɛ́ é. Cóbónú mǐ ná gbéjé kpɔ́ndéwú énɛ́ lɛ́ ɖé lɛ́ kpɔ́n ɔ, mi nú mǐ ní tó ɖɔ xó dó kpɔ́ndéwú Jexóva e nyí suúluɖótɔ́ ɖaxó hú gǎn ɔ é tɔn jí hwɛ̌.

¹² Ðo jikpá Edɛ́ni tɔn mɛ ɔ, Satáan tɛ́n kpɔ́n bo bló bɔ Ɛvu xo nǔ kpɔ́n dó acɛkpatɔ́ ɖagbe e Jexóva nyí, bo nɔ kpa acɛ kpó wǎnyíyí kpó é wú dó kɔn cí dó nyǐkɔ Jexóva tɔn wú. Jexóva sú kún dó nú jidómɛtɔ́ ɔ afɔjíafɔjí ǎ, é nyɔ́ wa ɔ, Jexóva ɖó suúlu, lobo ɖu ɖo éɖée jí, ɖó é tuun ɖɔ é ná byɔ́ hwenu cóbɔ émí ná ɖe xlɛ́ ɖɔ acɛkpikpa émítɔn wɛ nyɔ́ hú gǎn. Bɔ din e é ɖo te é ɔ, é ɖo didɛ wɛ ɖo cí e kɔn dó nyǐkɔ tɔn wú wɛ è ɖe é nu. Gɔ́ ná ɔ, Jexóva ɖó suúlu bo ɖo te, bónú ali ɔ ní hun nú mɛ gěgé, nú yě ní mɔ gbɛ mavɔmavɔ. (2 Pi. 3:9, 15) Énɛ́ zɔ́n bɔ mɛ lǐvi mɔ̌kpán wá tuun i. Ényí mǐ nɔ sɔ́ ayi ɖó le e ɖo suúlu e ɖó wɛ Jexóva ɖe é mɛ lɛ́ é jí ɔ, é ná ɖibla bɔ wǔ nú mǐ hú gǎn, bɔ mǐ ná nɔ te kpɔ́n hwenu e é ɖó dó bo ná sú kún dó nú gbɛ élɔ́ é.

13. Nɛ̌ Jezu ka ɖó suúlu Tɔ́ tɔn ɖɔhun, bɔ nǔ bǐ vɔ ɖ’é wú gbɔn? (Lɛ̌ kpɔ́n fɔtóo ɔ.)

¹³ Jezu nɔ ɖó suúlu Tɔ́ tɔn ɖɔhun, bɔ nǔ bǐ vɔ ɖ’é wú, bɔ hwenu e é wá ayǐkúngban jí é ɔ, é ɖe jijɔ énɛ́ xlɛ́. Ényí hwebǐnu wɛ suúluɖíɖó ná ko nɔ bɔ wǔ n’i ǎ, tají ɔ, hwenu e é byɔ́ ɖɔ é ní ɖó suúlu dó sɛ́nkplɔ́nmɛtɔ́ kpó Falizyɛn kpó yɛmɛnúwatɔ́ lɛ́ wú é. (Jaan 8:25-27) É ɖo mɔ̌ có, Jezu nɔ yá wǔ sin xomɛ ǎ Tɔ́ tɔn ɖɔhun. Ée è zun i, alǒ ba nǔɖɔ ɛ é ɔ, é yí nǔxɔ́sú ǎ. (1 Pi. 2:23) Jezu ɖó suúlu, bo dɛ ɖo wǔvɛ́ lɛ́ nu ma húnhún nǔ ɖɔ. Yǎyá wú wɛ Biblu ɖɔ nú mǐ ɖɔ mǐ ní “flín lěe é dɛ ɖo gǔ mɔ̌hunkɔtɔn e hwɛhutɔ́ lɛ́ fɔ́n dó jǐ tɔn ɔ nu gbɔn é” ǎ. (Ebl. 12:2, 3) Kpó alɔdó Jexóva tɔn kpó ɔ, mǐɖésúnɔ sixú ɖó suúlu, bo dɛ ɖo wǔvɛ́ ɖěbǔ e ná wá kpan nukɔn mǐ é nu.

14. Étɛ́ kpɔ́ndéwú suúluɖíɖó tɔn Ablaxámu tɔn ka sixú kplɔ́n mǐ? (Eblée lɛ́ 6:15) (Lɛ̌ kpɔ́n fɔtóo ɔ.)

¹⁴ Ényí vivɔnu e ɖó nukún wɛ mǐ ɖe é ma ko wá ǎ ɔ ka lo? Vlafo, mǐ ɖo nukún ɖó vivɔnu ɔ wɛ din é ɔ, é sɔ́ hwe ǎ. Mǐ mɛ ɖé lɛ́ sixú ko ɖo nukún ɖó vivɔnu ɔ wɛ sín hwenu línlín ɖíe, bɔ din ɔ, mǐ ɖo nǔ xo kpɔ́n wɛ ɖɔ mǐ kún sɔ́ sixú nɔ gbɛ, bo mɔ wǐwá tɔn ó. Étɛ́ ka sixú d’alɔ mǐ bɔ mǐ ná kpo ɖo suúlu ɖó wɛ? Mǐ ní gbéjé kpɔ́ndéwú Ablaxámu tɔn kpɔ́n. Hwenu e Ablaxámu ɖo xwe 75 ɖó wɛ é ɔ, Jexóva d’akpá élɔ́ n’i: “Un ná zé we dó bló akɔta ɖaxó ɖokpó ná.” (Bǐb. 12:1-4) Ablaxámu ka mɔ akpá énɛ́ sín jijɛnu a? Ðó bǎ ɖé mɛ. Ée Ablaxámu d’asá Efláti tɔ ɔ, bo nɔ te nú xwe 25 gúdo é ɔ, é mɔ bɔ è ji Izáki ɖo nǔjíwǔ linu, bɔ ɖo xwe 60 ɖěvo gúdo ɔ, è ji vǐvú tɔn Esáwu kpó Jakɔ́bu kpó. (Xa Eblée lɛ́ 6:15.) Amɔ̌, Ablaxámu mɔ bónú kúnkan tɔn húzú akɔta ɖaxó, bo lɛ́ ɖu akpádídó-yíkúngban ɔ sín gǔ gbeɖé ǎ. Amɔ̌, nya gbejínɔtɔ́ énɛ́ ɖu xɔ́ntɔn vívɛ́ zunzun xá Gbɛɖótɔ́ ɔ sín vǐví. (Ja. 2:23) Gɔ́ ná ɔ, hwenu e Ablaxámu ná fɔ́n sín kú, bo ná mɔ ɖɔ nǔɖiɖi émítɔn kpó suúlu émítɔn kpó zɔ́n bɔ è kɔn nyɔ̌ná dó akɔta lɛ́ bǐ jí é ɔ, xomɛ ná hun i tawun. (Bǐb. 22:18) Nǔkplɔ́nmɛ ɔ ɖíe: Mǐ sixú mɔ akpá Jexóva tɔn lɛ́ bǐ sín jijɛnu din ǎ. É ɖo mɔ̌ có, ényí mǐ nɔ ɖó suúlu Ablaxámu ɖɔhun ɔ, mǐ sixú ɖeji ɖɔ Jexóva ná d’ajɔ mǐ din, bo tlɛ ná lɛ́ wa nǔ hú mɔ̌ ɖo gbɛ yɔ̌yɔ́ e sín akpá é dó é mɛ.—Mak. 10:29, 30.

15. Étɛ́ lɛ́ mǐ ka sixú gbéjé kpɔ́n ɖo nǔkplɔ́nkplɔ́n mɛɖésúnɔ tɔn mǐtɔn hwenu?

¹⁵ Biblu lɛ́ ɖɔ mɛ gěgé ɖěvo lɛ́ xó, bɔ yě ɖó suúlu. (Ja. 5:10) Aniwú a ma ka ná bló tuto, bo gbéjé kpɔ́ndéwú mɔ̌hun lɛ́ kpɔ́n ǎ?b Ði kpɔ́ndéwú ɔ, Davídi kpo ɖo wǐnnyáwínnyá mɛ cóbɔ è sɔ́ ɛ bɔ é ná nyí axɔ́sú, amɔ̌, é ɖó ná nɔ te nú xwe mɔ̌kpán cóbó jɛ axɔ́sú ɖu jí. Sinmɛnyɔ́ɔ kpó Ana kpó sɛn Jexóva kpó gbejíninɔ kpó, hwenu e yě ɖo te kpɔ́n Mɛsíya e sín akpá è dó é é. (Luk. 2:25, 36-38) Ée a ná ɖo tan mɔ̌hun lɛ́ gbéjé kpɔ́n wɛ é ɔ, ba xósin nú nǔkanbyɔ́ élɔ́ lɛ́: Étɛ́ ka sixú ko d’alɔ mɛ énɛ́ bɔ é ɖó suúlu? Le tɛ́ é ka mɔ, ɖó suúlu e é ɖó é wú? Nɛ̌ un ka sixú xwedó kpɔ́ndéwú tɔn gbɔn? Nǔ kplɔ́nkplɔ́n dó mɛ ɖěɖěe ma ɖó suúlu ǎ lɛ́ é wú lɔ sixú hɛn le wá nú we. (1 Sam. 13:8-14) A sixú nɔ kan nǔ élɔ́ lɛ́ byɔ́ hwiɖée: ‘Étɛ́ ka sixú ko zɔ́n bɔ yě ma ɖó suúlu ǎ? Awě tɛ́ lɛ́ ka xo yě, ɖó suúlu e yě ma ɖó ǎ é wú?’

16. Ðɔ le e ɖo suúluɖíɖó mɛ é ɖé lɛ́.

¹⁶ Nɔ lin tamɛ dó le ɖěɖěe ɖo suúluɖíɖó mɛ lɛ́ é jí. Ényí mǐ nɔ ɖó suúlu ɔ, mǐ nɔ ɖó awǎjijɛ, bo nɔ lɛ́ ɖó vivo ɖo ayi mɛ. Nǔgbó ɔ, suúluɖíɖó nɔ zɔ́n bɔ mǐ nɔ nɔ ganjí ɖo ayi mɛ, bo nɔ lɛ́ nɔ ganjí ɖo agbaza mɛ. Ényí mǐ nɔ ɖó suúlu dó mɛ ɖěvo lɛ́ wú ɔ, mǐ nɔ ɖu vǐví xɔ́ntɔn e mǐ zun xá yě é tɔn hú gǎn. Agun e mɛ mǐ ɖe é nɔ nɔ bǔ hú gǎn. Ényí mɛ ɖěvo lɛ́ ba nǔɖɔ mǐ ɔ, sɔ e mǐ nɔ xwe, bo ma nɔ yá wǔ sin xomɛ ǎ é nɔ zɔ́n bɔ ninɔmɛ ɔ nɔ nylá d’é jí ǎ. (Ðɛh. 37:8; Nǔx. 14:29) Amɔ̌, tají hú gǎn ɔ, ényí mǐ nɔ ɖó suúlu ɔ, Tɔ́ mǐtɔn jǐxwé tɔn ɔ ɖɔhun wa nǔ wɛ mǐ ɖe, bo lɛ́ ɖo blǒbló wɛ bɔ xɔ́ntɔn e mǐ zun xá ɛ é ná syɛ́n d’é jí nɛ́.

17. Étɛ́ mǐ ka ɖó ná kán ɖ’é jí bá wa?

¹⁷ Suúlu ɔ, jijɔ e nɔ dɔn mɛ, bo lɛ́ ɖó le tawun é ɖé wɛ! Nǔgbó wɛ ɖɔ é sixú nɔ vɛ́ wǔ nú mǐ hweɖélɛ́nu ɖɔ mǐ ní ɖó suúlu, amɔ̌, kpó alɔdó Jexóva tɔn kpó ɔ, mǐ sixú kpo ɖo tíntɛ́nkpɔ́n wɛ bo ná ɖó jijɔ énɛ́. Gɔ́ ná ɔ, ée mǐ ná ɖo te kpɔ́n gbɛ yɔ̌yɔ́ ɔ é ɔ, mǐ sixú ɖeji ɖɔ ‘Jexóva sín nukún nɔ ɖo mɛ e nɔ nɔ gbejí n’i lɛ́ é jí, mɛ e nɔ ɖó nukún xomɛnyínyɔ́ tɔn lɛ́ é’ jí. (Ðɛh. 33:18) Mi nú mǐ bǐ ní kán ɖ’é jí, bá kpo ɖo suúlu sɔ́ dó wɛ awu ɖɔhun.