Gbigbɔ ɔ Nɔ Yí Gbè Dó Nǔ E Gbigbɔ Mǐtɔn Ðɔ ɔ Jí

1-3. Nǔ tɛ ka jɛ bo zɔ́n bɔ Pantekotu xwè 33 H.M. tɔn ka nyí azǎn bunɔ ɖé? Nɛ̌ nǔ enɛ lɛ e jɛ é ka bló bɔ nǔ e Biblu ɖɔ ɖ’ayǐ é jɛ gbɔn? (Kpɔ́n fɔtóo e ɖò bǐbɛ̌mɛ é.)

AKLUNƆZÁNGBE zǎnzǎn wɛ ɖò Jeluzalɛmu. Azǎn bunɔ ɖé wɛ bo lɛ́ nyí awǎjijɛzán. Mɛ lɛ ɖò Pantekotu sín xwè ɖu wɛ. Xwè ɖè ɖó vo ɖé wɛ b’ɛ nɔ ɖu ɖò blěe yiya sín bǐbɛ̌mɛ. Zǎnzǎn enɛ ɔ, vɔsanúxwlémawutɔ́ ɖaxó ɔ xwlé vɔ̌ e è nɔ sá ɖò gbesisɔmɛ lɛ é Mawu. Enɛ gudo ɖò gan tɛnnɛ mɛ ɔ, é xwlé wɔxúxú e è sɔ́ blěe alǒ jinukún nukɔn nukɔntɔn e è ya lɛ é sín linfin dó ɖa na, bo ma dó tɔ́n mɛ ǎ é wè Mawu. Vɔsanúxwlémawutɔ́ ɖaxó ɔ mì wɔxúxú lɛ dó awa vovo xwé bo na dó xwlé ye Jehovah. Lee é nyí gbɔn ɖò Pantekotu xwè 33 H.M. tɔn é nɛ.​—Levíi ví lɛ 23:15-20.

² Xwewu xwewu kaka nú xwè kanweko mɔkpan ɔ, vɔsanúxwlémawutɔ́ ɖaxó lɛ nɔ xwlé vɔ̌ enɛ e è nɔ mì é Mawu. Vɔsisa enɛ ɖó kancica xá nǔ taji e wá jɛ ɖò Pantekotu xwè 33 H.M. tɔn é. Nǔ enɛ jɛ hwenu e ahwanvu Jezu tɔn 120 kplé bo ɖò ɖɛ xò wɛ ɖò síngbó ɖé jí ɖò Jeluzalɛmu é. (Mɛsɛ́dó 1:13-15) Xwè 800 jɛ nukɔn nú hwe enɛ nu ɔ, gbeyiɖɔ Jowɛli ko wlan nǔ dó nǔ enɛ e jɛ é wu. (Jowɛli 3:1-5; Mɛsɛ́dó 2:16-21) Nǔ tɛ ka jɛ bo nyí nǔ taji sɔmɔ̌?

³ Xà Mɛsɛ́dó 2:2-4. Ðò Pantekotu xwè 33 H.M. tɔn hwenu ɔ, Mawu na gbigbɔ mímɛ́ tɔn Klisanwun enɛ lɛ, bɔ gbigbɔ ɖè ye. (Mɛsɛ́dó 1:8) Enɛ gudo ɔ, ahwan ɖé jɛ kplékplé dó ye jí, bɔ ahwanvu lɛ jɛ xó ɖɔ dó azɔ̌ ɖagbeɖagbe ɖěɖee ye ko mɔ bo sè lɛ é wu jí. Mɛsɛ́dó Piyɛ́ɛ tinmɛ nǔ e jɛ tlolo é kpo nǔ e wu é nyí nǔ taji sɔmɔ̌ é kpo. Enɛ gudo ɔ, é ɖɔ nú ahwan ɔ ɖɔ: “Mi lɛkɔ sín hwɛ mǐtɔn lɛ gudo; ɖokpo ɖokpo mitɔn ni [bló baptɛm] ɖò Jezu Klisu nyikɔ mɛ, bonu Mawu na sɔ́ hwɛ mitɔn lɛ kɛ mi, bɔ mi na mɔ [gbigbɔ mímɛ́] e nyí nùnina Mawu tɔn ɔ yí.” Gbè enɛ gbè ɔ, gbɛtɔ́ 3 000 mɔ̌ bló baptɛm, bɔ ye lɔmɔ̌ mɔ gbigbɔ mímɛ́ yí.​—Mɛsɛ́dó 2:37, 38, 41.

 4. (a) Etɛwu mǐ ka ɖó na lin nǔ kpɔ́n dó nǔ e jɛ ɖò Pantekotu xwè 33 H.M. tɔn é jí? (b) Xwè mɔkpan jɛ nukɔn nú hwenɛnu ɔ, nǔ ɖevo tɛ ka sixu ko jɛ ɖò azǎn enɛ ɖokpo ɔ jí? (Kpɔ́n tinmɛ e ɖò vivɔnu é.)

⁴ Etɛ nǔ e vɔsanúxwlémawutɔ́ ɖaxó ɔ nɔ bló ɖò Pantekotu ɖokpo ɖokpo hwenu é, kpo vɔ̌ e é nɔ sá ɖò hwenɛnu é kpo ka nɔte na? Vɔsanúxwlémawutɔ́ ɖaxó ɔ nɔte nú Jezu. Wɔxúxú lɛ nɔte nú ahwanvu Jezu tɔn e gbigbɔ ɖè lɛ é. Hwɛhutɔ́ lɛ mɛ wɛ è cyan ahwanvu enɛ lɛ ɖè, bɔ è nɔ ylɔ ye ɖɔ “mɛ nukɔn nukɔntɔn lɛ.” (Jaki 1:18) Mawu sɔ́ mɛ enɛ lɛ dó ɖó vǐ tɔn lɛ, bo cyan ye bɔ ye na ɖu axɔsu kpo Jezu kpo ɖò jixwé, bo na ɖó mimǎ ɖò Axɔsuɖuto Mawu Tɔn mɛ. (1 Piyɛ́ɛ 2:9) Jehovah na zán Axɔsuɖuto tɔn dó dó nú gbɛtɔ́ tónúsétɔ́ lɛ bǐ. Enɛ wu ɔ, enyi jixwé wɛ mǐ na nɔ xá Jezu ɖè alǒ palaɖisi mɛ wɛ mǐ na nɔ ɖò ayikúngban jí ɔ, Pantekotu xwè 33 H.M. tɔn nyí nǔ taji tawun nú mǐ.^[1]​—Kpɔ́n tinmɛ e ɖò vivɔnu é.

 5. Nɛ̌ mǐ ka wà gbɔn bo tuùn ɖɔ gbigbɔ kún nɔ ɖè mɛ lɛ bǐ ɖò ali ɖokpo ɔ nu ó?

⁵ Ahwanvu e ɖò síngbó jí bɔ gbigbɔ mímɛ́ jɛ dó ye jí lɛ é na wɔn azǎn enɛ gbeɖé kpɔ́n ǎ. Ye mɛ ɖokpo ɖokpo ɖó nùɖé ɖò ta b’ɛ cí zoɖɛ́ ɖɔhun. Jehovah na ye nǔwukpikpé bɔ ye na ɖɔ xó dó gbè ɖevo mɛ. Ye xò nǔ kpɔ́n ɖɔ gbigbɔ mímɛ́ ka ɖè emi à jí ǎ. (Mɛsɛ́dó 2:6-12) Amɔ̌, nùjiwǔ enɛ nɔ jɛ dó Klisanwun lɛ bǐ jí hwenu e gbigbɔ ɖè ye é ǎ. Ði kpɔ́ndéwú ɔ, Biblu ɖɔ ɖɔ nǔ zoɖɛ́ ɖɔhun jɛ ta nú mɛ afatɔ́n mɔkpan e gbigbɔ ɖè ɖò Jeluzalɛmu ɖò gbè enɛ gbè ɖokpo ɔ ɖò táan ɖé gudo é ǎ. Gbigbɔ ɖè ye hwenu e ye bló baptɛm é. (Mɛsɛ́dó 2:38) Mɔ̌ ɖokpo ɔ, enyi Klisanwun lɛ bǐ wɛ gbigbɔ nɔ ɖè ɖò baptɛm yetɔn hwenu ǎ. Gbigbɔ ɖè Samalíinu lɛ hweɖenu ɖò hwenu e ye bló baptɛm gudo é. (Mɛsɛ́dó 8:14-17) Nǔ e ma nɔ jɛ hwɛhwɛ ǎ é ɖé lɛ́ jɛ: gbigbɔ ɖè Kɔnɛyi kpo mɛ e ɖò xwé tɔn gbè lɛ é kpo jɛ nukɔn nú baptɛm yetɔn.​—Mɛsɛ́dó 10:44-48.

 6. Etɛ mɛ e gbigbɔ ɖè lɛ é bǐ ka nɔ mɔ yí? Nɛ̌ é ka nɔ wà nǔ dó ye jí gbɔn?

⁶ É ɖò wɛn ɖɔ Klisanwun lɛ nɔ tuùn ɖɔ gbigbɔ ɖè emi ɖò ali vovo nu. Mɛɖé lɛ sixu yawu tuùn ɖɔ Jehovah ɖè emi. É ko nɔ lín hwɛ̌ cobɔ mɛ ɖevo lɛ nɔ wá tuùn. Amɔ̌, mɛsɛ́dó Pɔlu tín nǔ e nɔ jɛ dó ɖokpo ɖokpo yetɔn wu é mɛ. É ɖɔ: “Mi ɖi nǔ nú Klisu, bɔ Mawu na [gbigbɔ mímɛ́] e sín akpá e é dó ɔ mi, bo dó ɖó wuntun mi. [Gbigbɔ mímɛ́] ɔ wɛ nyí nǔ ɖagbe e Mawu sɔ́ ɖó te nú togun tɔn ɔ sín ganjɛwu nú mǐ.” (Efɛzinu lɛ 1:13, 14) Enɛ wu ɔ, Jehovah nɔ zán gbigbɔ mímɛ́ tɔn dó xlɛ́ Klisanwun enɛ lɛ céɖécéɖé ɖɔ è ɖè ye bɔ ye na yì jixwé. Ðò ali enɛ nu ɔ, gbigbɔ mímɛ́ ɔ nyí “ganjɛwu,” alǒ kúnnuɖenú nú ye ɖɔ ɖò sɔgudo ɔ, ye na nɔ gbɛ̀ kaka sɔyi ɖò jixwé, é na nyí ɖò ayikúngban jí ǎ.​—Xà 2 Kɔlɛntinu lɛ 1:21, 22; 5:5.

 7. Etɛ Klisanwun e gbigbɔ ɖè lɛ é ɖokpo ɖokpo ka ɖó na wà cobo na mɔ ajɔ tɔn jixwé tɔn ɔ yí?

⁷ Enyi gbigbɔ ɖè Klisanwun ɖé ɔ, enɛ xlɛ́ ɖɔ é na mɔ ajɔ tɔn yí dandan jɛn ko nɛ à? Eǒ. É ɖó jiɖe ɖɔ è ko ylɔ emi bɔ emi na yì jixwé. Amɔ̌, nú é nɔ gbeji nú Jehovah ɔ kɛɖɛ jɛn é na mɔ ajɔ tɔn yí. Piyɛ́ɛ tín enɛ mɛ gbɔn lě: “Enɛ wu ɔ, nɔví lɛ mi, mi lɛ́ dó gǎn d’eji, bo zán gbɛ̀ mitɔn nú é ni sɔgbe xá ylɔ̌ e Mawu ylɔ mi ɔ kpo cyan e é cyan mi ɔ kpo; ɖó nú mi nɔ wà nǔ gbɔn alɔkpa enɛ mɛ ɔ, mi na jɛ nǔ nyanya mɛ gbeɖé ǎ. Lee Mawu na na acɛ ɖaxó mi, bɔ mi na dó byɔ Jezu Klisu e nyí Aklunɔ mǐtɔn, bo nyí Mɛhwlɛngantɔ́ mǐtɔn ɔ sín axɔsuɖuɖu mavɔmavɔ ɔ mɛ gbɔn é nɛ.” (2 Piyɛ́ɛ 1:10, 11) Enɛ wu ɔ, Klisanwun e gbigbɔ ɖè lɛ é ɖokpo ɖokpo ɖó na lɔn nú nùɖé na ɖó ye te ɖò Jehovah sinsɛn kɔn ǎ. È ko ylɔ ɛ b’ɛ na yì jixwé có, enyi é ma nɔ gbeji ǎ ɔ, é na mɔ ajɔ tɔn yí ǎ.​—Eblée lɛ 3:1; Nǔɖexlɛ́mɛ 2:10.

8, 9. (a) Etɛwu é ka nɔ vɛwǔ nú mɛ gègě bɔ ye na mɔ nǔ jɛ nǔ e nɔ jɛ hwenu e gbigbɔ ɖè mɛɖé é mɛ? (b) Nɛ̌ mɛɖé ka nɔ tuùn ɖɔ è ylɔ emi bɔ emi na yì jixwé gbɔn?

⁸ É sixu vɛwǔ nú Mawu sɛntɔ́ gègě ɖò égbé bɔ ye na mɔ nǔ jɛ nǔ e nɔ jɛ dó mɛɖé wu hwenu e Mawu ɖè mɛ ɔ é. É ka sɔgbe, ɖó è ɖè yedɛɛ lɛ ǎ wutu. Mawu dá gbɛtɔ́ lɛ bonu ye na nɔ gbɛ̀ kaka sɔyi ɖò ayikúngban jí, é nyí jixwé ǎ. (Bǐbɛ̌mɛ 1:28; Ðɛhan 37:29) Amɔ̌, Jehovah ko cyan mɛɖé lɛ bɔ ye na nyí axɔsu kpo vɔsanúxwlémawutɔ́ kpo ɖò jixwé. Enɛ wu ɔ, nú è ɖó wuntun ye ɔ, nukúnɖiɖo yetɔn kpo lee ye nɔ lin nǔ gbɔn é kpo nɔ huzu, enɛ wu ɔ, ye nɔ sɔ́ nukún yetɔn lɛ ɖó gbɛ̀ e ye na nɔ ɖò jixwé é jí.​—Xà Efɛzinu lɛ 1:18.

⁹ Amɔ̌, nɛ̌ mɛɖé ka nɔ tuùn ɖɔ è ylɔ emi bɔ emi na yì jixwé gbɔn? Ðǒ ayi nǔ e Pɔlu ɖɔ dó nɔví sunnu e gbigbɔ ɖè ɖò Hlɔma bɔ è ‘ylɔ bo ɖè ye ɖó vo’ lɛ é wu é jí. É ɖɔ nú ye ɖɔ: “[Gbigbɔ] e Mawu na mi ɔ nyí, [gbigbɔ] e na sɔ́ mi dó ɖó kannumɔ, bo na bló bɔ mi na huzu xɛsinɔ é ǎ. Loɔ, [gbigbɔ mímɛ́] e sɔ́ mi dó huzu Mawu ví, bo lɛ́ na acɛ mǐ, bɔ mi nɔ súxó ylɔ Mawu ɖɔ: ‘Daa ce! Tɔ́ ce vívɛ́ná’ ɔ wɛ. [Gbigbɔ] Mawu tɔn ɖesu ko yí gbè dó nǔ e [gbigbɔ] mǐtɔn ɖɔ ɔ jí ɖɔ mǐ nyí Mawu ví.” (Hlɔmanu lɛ 1:7; 8:15, 16) Gbɔn gbigbɔ mímɛ́ gblamɛ ɔ, Mawu nɔ ɖexlɛ́ nyì wɛn nú mɛɖé ɖɔ è ylɔ ɛ bɔ é na ɖu axɔsu xá Jezu ɖò jixwé.​—1 Tɛsalonikinu lɛ 2:12.

10. Etɛ ɖɔ wɛ 1 Jaan 2:27 ka ɖè bo ɖɔ ɖɔ é kún byɔ ɖɔ mɛɖé ni kplɔ́n nǔ Klisanwun e gbigbɔ ɖè lɛ é ó?

¹⁰ É byɔ ɖɔ mɛ ɖevo ɖebǔ ni ɖɔ nú mɛ ɖěɖee Mawu ylɔ lɛ é ɖɔ gbigbɔ mímɛ́ ko ɖè ye ǎ. Jehovah nɔ bló bɔ ye nɔ kudeji ɖɔ è ylɔ emi. Mɛsɛ́dó Jaan ɖɔ nú Klisanwun yí ami dó ɖè lɛ ɖɔ: “Midɛɛ lɛ ɔ, Klisu kɔn [gbigbɔ mímɛ́] dó mi jí; enɛ ɔ wɛ zɔ́n bɔ mi bǐ tuùn nugbǒ ɔ.” É lɛ́ ɖɔ: “Midɛɛ lɛ ɔ, [gbigbɔ mímɛ́] e Klisu kɔn dó mi jí ɔ ɖò mi jí; hǔn, é sɔ́ byɔ ɖɔ mɛɖé ni kplɔ́n nǔ mi ǎ. Loɔ, ee [gbigbɔ mímɛ́] enɛ nɔ kplɔ́n nǔ bǐ mi ɔ, bɔ nǔ e é nɔ kplɔ́n mi lɛ ka nyí nugbǒ, bo ma nyí nùvú ǎ é ɔ, mi bǐ ni setónú nú kplɔ́n e é nɔ na mi lɛ, ɖò bǔ e mi ɖè xá Jezu ɔ mɛ.” (1 Jaan 2:20, 27) Jehovah nɔ kplɔ́n Klisanwun e gbigbɔ ɖè lɛ é mɛ bǐ ɖɔhun. Amɔ̌, ye ɖó hudo mɛ ɖě tɔn bɔ mɛ ɔ na na ganjɛwu ye ɖɔ gbigbɔ ɖè ye ǎ. Jehovah ko zán hlɔnhlɔn tɔn ɖaxó bǐ ɔ, enɛ wɛ nyí gbigbɔ mímɛ́ tɔn bo dó xlɛ́ ye céɖécéɖé ɖɔ è ɖè ye!

11, 12. Etɛ Klisanwun e gbigbɔ ɖè é ɖé ka sixu kanbyɔ? Amɔ̌, etɛ wu é ma ka nɔ xò nǔ kpɔ́n dó gbeɖé ǎ?

¹¹ Enyi gbigbɔ mímɛ́ ɖè Klisanwun lɛ ɔ, ye nɔ huzu tawun. Enɛ wu wɛ Jezu ɖɔ ɖɔ ye “vɔ́ jɔ.” (Jaan 3:3, 5) Enɛ gudo ɔ, é tinmɛ ɖɔ: “Ma lɔn bonu lɛ̌vɔjɔ xó enɛ e un ɖɔ nú we ɔ ni kpaca we ó. Jɔhɔn nɔ nyì ɖò fí e jló è ɔ, bɔ a nɔ sè zingidi tɔn; a ka nɔ tuùn fí e é tɔ́n sín ɔ, abǐ fí e é xwè ɔ ǎ. Lee é nɔ nyí gbɔn nú mɛ e vɔ́ jɔ gbɔn [gbigbɔ mímɛ́] mɛ ɔ nɛ.” (Jaan 3:7, 8) É ɖò wɛn ɖɔ é na vɛwǔ bɔ lee nǔ nɔ cí nú mɛ e gbigbɔ ɖè é pɛ́pɛ́pɛ́ é ɔ, è na tinmɛ nú mɛ e gbigbɔ ma ɖè ǎ é.^[2]​—Kpɔ́n tinmɛ e ɖò vivɔnu é.

¹² Mɛ e gbigbɔ ɖè é ɖé sixu kanbyɔ ɖɔ: ‘Etɛwu Jehovah ka ɖè mì b’ɛ ma nyí mɛ ɖevo ǎ?’ É tlɛ sixu lɛ́ kanbyɔ éɖée ɖɔ emi ka nyí mɛ ɖagbe sɔmɔ̌ bo jɛxa azɔ̌ enɛ à jí. Amɔ̌, é nɔ xò nǔ kpɔ́n ɖɔ Jehovah ka ɖè emi à jí ǎ. É nyɔ́ wà ɔ, é nɔ víví n’i ɖesu, bɔ nùnina mɔhun nɔ sù nukún tɔn mɛ tawun. Mɛ e gbigbɔ ɖè lɛ é nɔ ɖó linlin e Piyɛ́ɛ ɖó é, é ɖɔ: “Mi nú mǐ na kpa susu nú Mawu Aklunɔ mǐtɔn Jezu Klisu sín Tɔ́. Ðò xomɛnyínyɔ́ ɖaxó e é ɖó ɔ mɛ ɔ, é fɔ́n Jezu Klisu sín kú, bo dó na gbɛ̀ yaɖeyaɖe mǐ. Enɛ ɔ zɔ́n bɔ nukúnɖiɖo mǐtɔn ɔ nyí nukúnɖiɖo gbɛɖe, bɔ ɖagbe e Mawu sɔ́ ɖ’ayǐ nú mɛ e nyí étɔn lɛ é na na xomɛhunhun mǐ. Ðagbe enɛ lɛ ɔ, ɖagbe ɖé wɛ ye nyí bo sixu gblé ǎ; ye sixu blí ǎ; ye ka sixu cá ǎ. Mawu sɔ́ ɖagbe enɛ lɛ ɖ’ayǐ ɖó [jixwé].” (1 Piyɛ́ɛ 1:3, 4) Enyi mɛ e gbigbɔ ɖè lɛ é xà xógbe enɛ lɛ ɔ, ye nɔ xò nǔ kpɔ́n ɖebǔ cobo nɔ tuùn ɖɔ Tɔ́ emitɔn ɖò xó ɖɔ xá emi wɛ tlɔlɔ ǎ.

13. Nɛ̌ lee mɛɖé nɔ lin nǔ gbɔn é ka nɔ gbɔn vo hwenu e gbigbɔ ɖè é gudo é gbɔn? Etɛ ka nɔ zɔ́n bɔ huzuhuzu enɛ nɔ tíìn?

¹³ Cobonu Jehovah na ylɔ Klisanwun enɛ lɛ bonu ye na yì jixwé ɔ, ye ko ɖó nukúnɖiɖo bo na nɔ gbɛ̀ kaka sɔyi ɖò ayikúngban jí. Ye ɖò te kpɔ́n hwenu e Jehovah na bló bɔ ayikúngban ɔ na nyí palaɖisi ɖé é, kpo hwenu e é na ɖè nǔnyanyawiwa bǐ sín ayikúngban ɔ jí é kpo. Ye sixu ko dó nukún lee ye na dó doo nú xwédo yetɔn sín hagbɛ̌ alǒ xɔ́ntɔn yetɔn e ko kú lɛ é gbɔn é mɛ kpɔ́n. Ye ko lɛ́ ɖó nukún ɖɔ emi na gbá xɔ bo na nɔ mɛ, alǒ emi na tun atín bo na ɖu sínsɛ́n tɔn lɛ. (Ezayíi 65:21-23) Etɛwu ye ka na jɛ nǔ vo lin jí dìn? Ye huzu linlin ɖó ye wá flú bǐ alǒ ye ɖò wuvɛ̌ gègě mɔ wɛ wutu wɛ à? Gbɛ̀ ninɔ kaka sɔyi ɖò ayikúngban jí sɔ́ wá jló ye ǎ ɖò ajijimɛ, bɔ ye mɔ ɖɔ emi kún sixu nɔ awǎjijɛ mɛ ɖò fí ó wɛ à? Alǒ ye jló na tuùn lee gbɛ̀ na cí ɖò jixwé é wɛ à? Eǒ. É nyɔ́ wà ɔ, Mawu wɛ ylɔ ye dó dɔ̌n. Hwenu e é ylɔ ye é ɔ, é zán gbigbɔ mímɛ́ tɔn dó huzu lee ye nɔ lin nǔ gbɔn é, kpo ajɔ e ɖò nukɔn nú ye é kpo.

14. Mɛ e gbigbɔ ɖè lɛ é ɔ, nɛ̌ gbɛ̀ e ye ɖè ɖò ayikúngban jí é ka nɔ cí nú ye?

¹⁴ Enɛ xlɛ́ ɖɔ mɛ e gbigbɔ ɖè lɛ é nɔ jló na kú wɛ à? Pɔlu ɖɔ lee nǔ nɔ cí nú mɛ e gbigbɔ ɖè lɛ é. É jlɛ́ agbaza yetɔn dó “goxɔ” ɖé wu bo ɖɔ: “Nugbǒ wɛ! Kaka jɛ hwenu e mǐ na ɖò ayikúngban jí sín goxɔ enɛ ɔ mɛ dó ɔ, mǐ na ɖò azɔn wɛn wɛ, agban kpinkpɛn ɖé glɔ wɛ mǐ ɖè ɖɔhun. Enyi biba wɛ mǐ ɖè ɖɔ mǐ ni gosin agbaza mǐtɔn ayikúngban jí tɔn ɔ mɛ ǎ; loɔ, nǔ e ba wɛ mǐ ɖè ɔ wɛ nyí ɖɔ mǐ ni sɔ́ agbaza [jixwé] tɔn ɔ dó, bonu nǔ e ɖò gbɛ̀ ɔ na sɔ́ nǔ e ɖò te nú kú ɔ mì.” (2 Kɔlɛntinu lɛ 5:4) Klisanwun enɛ lɛ nɔ jló na kú ǎ. Ye nɔ ɖu gbɛ̀ sín vivǐ, bo nɔ jló na zán azǎn ɖokpo ɖokpo dó sɛ̀n Jehovah ɖó kpɔ́ xá xwédo kpo xɔ́ntɔn yetɔn lɛ kpo. Amɔ̌, ye na bo ɖò nǔ ɖebǔ wà wɛ ɔ, ye nɔ flín nǔ e Mawu d’akpá tɔn nú ye bɔ ye na mɔ ɖò sɔgudo é.​—1 Kɔlɛntinu lɛ 15:53; 2 Piyɛ́ɛ 1:4; 1 Jaan 3:2, 3; Nǔɖexlɛ́mɛ 20:6.

15. Etɛ ma ka nɔ xlɛ́ ɖɔ gbigbɔ mímɛ́ ɖè mɛɖé ǎ?

¹⁵ A sixu ɖò kinkanbyɔ hwiɖée wɛ ɖɔ Jehovah ka ylɔ emi dó jixwé à jí. Enyi mɔ̌ wɛ a nɔ lin hǔn, lin nǔ kpɔ́n dó nùkanbyɔ taji elɔ lɛ jí: A mɔ ɖɔ emi nɔ ɖókan dó Mawuxóɖiɖɔzɔ́ ɔ wu ganji wɛ à? A nɔ ɖu vivǐ Biblu kpinkplɔn tɔn tawun bo nɔ kplɔ́n “tito Mawu tɔn e ɖò hwlàhwlá ɖò gɔngɔn mɛ lɛ” é à? (1 Kɔlɛntinu lɛ 2:10) A nɔ mɔ ɖɔ Jehovah nɔ dó nú Mawuxóɖiɖɔzɔ́ emitɔn b’ɛ jiwǔ wɛ à? A nɔ jló na wà nǔ e Jehovah byɔ ɖɔ è ni wà lɛ é hú nǔ ɖevo ɖebǔ wɛ à? A nɔ ɖó wanyiyi ɖaxó nú mɛ ɖevo lɛ bo nɔ mɔ ɖɔ alɔdido ye bonu ye na sɛ̀n Jehovah nyí azɔ̌ taji ɖé wɛ à? A mɔ kúnnuɖenú ɖé lɛ bɔ ye xlɛ́ we ɖɔ Jehovah ko d’alɔ we ɖò ali tawun tawun gègě nu ɖò gbɛzán towe mɛ wɛ à? Enyi ɛɛn wɛ a ɖɔ nú nùkanbyɔ enɛ lɛ bǐ ɔ, enɛ ko xlɛ́ ɖɔ è ko ylɔ we dó jixwé wɛ à? Eǒ, é nyí mɔ̌ ǎ. Etɛwu? Ðó Mawu sɛntɔ́ lɛ bǐ sixu lin mɔ̌, enyi gbigbɔ ɖè ye kpo é gbɔ kpo ɔ nɛ. Gbɔn gbigbɔ mímɛ́ gblamɛ ɔ, Jehovah hɛn ɔ, é na na hlɔnhlɔn ɖokpo ɔ mɛ e nɔ sɛ̀n ɛ lɛ é ɖebǔ, enyi ajɔ ɖebǔ na bo ɖò te kpɔ́n ye ɔ nɛ. Nugbǒ ɔ, enyi a nɔ kanbyɔ hwiɖée ɖɔ emi na yì jixwé wɛ à jí ɔ, enɛ xlɛ́ ɖɔ è kún ylɔ we ó. Mɛ e Jehovah cyan lɛ é nɔ kàn nǔ enɛ byɔ yeɖée ǎ! Ye nɔ tuùn wɛ!

16. Nɛ̌ mǐ ka wà gbɔn bo tuùn ɖɔ è kún ylɔ mɛ e mɔ gbigbɔ Mawu tɔn yí lɛ é bǐ bonu ye na yì jixwé ó?

¹⁶ Ðò Biblu mɛ ɔ, gbejinɔtɔ́ gègě mɔ gbigbɔ mímɛ́ Jehovah tɔn yí cobɔ ye ka yì jixwé ǎ. Kpɔ́ndéwú tɔn ɖokpo wɛ nyí Jaan Baptɛmublonumɛtɔ́ ɔ. Jezu ɖɔ mɛ ɖě kún hugǎn Jaan ó, amɔ̌, enɛ gudo ɔ, é ɖɔ ɖɔ Jaan kún na ɖu axɔsu ɖò jixwé ó. (Matie 11:10, 11) Gbigbɔ mímɛ́ xlɛ́ ali Davidi lɔ. (1 Samuwɛli 16:13) Gbigbɔ mímɛ́ d’alɔ ɛ b’ɛ mɔ nukúnnú jɛ tito Jehovah tɔn e ɖò hwlàhwlá ɖò gɔngɔn mɛ lɛ é wu, é lɛ́ d’alɔ ɛ b’ɛ wlan akpáxwé ɖé lɛ ɖò Biblu mɛ. (Maki 12:36) É ɖò mɔ̌ có, mɛsɛ́dó Piyɛ́ɛ ɖɔ: “Davidi yì jixwé ɖě ǎ.” (Mɛsɛ́dó 2:34) Jehovah zán gbigbɔ mímɛ́ tɔn dó na hlɔnhlɔn mɛ enɛ lɛ bɔ ye bló nùjiwǔ lɛ, amɔ̌, é zán dó ylɔ ye bonu ye na yì nɔ gbɛ̀ ɖò jixwé ǎ. Enɛ xlɛ́ ɖɔ gbejininɔ yetɔn kún kpé alǒ ye kún jɛxa bo na ɖu axɔsu ɖò jixwé ó wɛ ǎ? Eǒ. Enɛ xlɛ́ kpowun ɖɔ Jehovah na fɔ́n ye wá gbɛ̀ ɖò Palaɖisi mɛ ɖò ayikúngban jí.​—Jaan 5:28, 29; Mɛsɛ́dó 24:15.

17, 18. (a) Ajɔ tɛ ɖó nukún wɛ mɛ e ɖò Mawu sɛ̀n wɛ ɖò égbé lɛ é gègě ka ɖè? (b) Nùkanbyɔ tɛ lɛ jí mǐ ka na ɖɔ xó dó ɖò xota e bɔ d’ewu é mɛ?

¹⁷ Mɛ gègě ɖò Mawu sɛ̀n wɛ ɖò égbé bo na yì jixwé ǎ. Ablaxamu, Davidi, Jaan Baptɛmublonumɛtɔ́ ɔ kpo sunnu kpo nyɔnu kpo e nɔ gbɛ̀ ɖò Biblu sín táan mɛ lɛ é gègě kpo ɖɔhun ɔ, ye ɖò te kpɔ́n hwenu e acɛkpikpa Mawu tɔn na kpacɛ dó ye nu ɖò ayikúngban jí é. (Eblée lɛ 11:10) Mɛ 144 000 wɛ na ɖu axɔsu xá Jezu ɖò jixwé. Mɛ e è cyan bɔ ye na yì nɔ gbɛ̀ ɖò jixwé lɛ é kpɛɖé jɛn kpò ɖò ayikúngban jí fí ɖò azǎn gudogudo tɔn elɔ lɛ mɛ. (Nǔɖexlɛ́mɛ 12:17) Enɛ wu ɔ, mɛ 144 000 lɛ gègě ko kú bo ɖò jixwé.

¹⁸ Amɔ̌, enyi mɛɖé ɖɔ ɖɔ gbigbɔ ɖè emi ɔ, nɛ̌ mɛ e ɖó nukúnɖiɖo bá nɔ gbɛ̀ ɖò ayikúngban jí lɛ é ka ɖó na wà nǔ gbɔn? Enyi mɛ e ɖò agun towe mɛ é ɖé jɛ wɔxúxú ɔ ɖu jí bo jɛ vɛɛn ɔ nu jí ɖò Flǐn sín hwenu ɔ, nɛ̌ a ka ɖó na wà nǔ xá ɛ gbɔn? Enyi kɛ́n mɛ ɖěɖee ɖɔ ɖɔ gbigbɔ ɖè emi lɛ é tɔn ka fɔ́n bo ɖò jijɛji wɛ ɔ ka ló? Enɛ ka ɖó na nyí linkpɔ́n nú we wɛ à? Mǐ na na xósin nú nùkanbyɔ enɛ lɛ ɖò xota e na bɔ d’ewu é mɛ.