Etɛ ka Nyí Tinmɛ Xixa 666 ɔ Tɔn?

Sɔgbe xá nǔ e wema gudogudo tɔn Biblu tɔn ɖɔ é ɔ, 666 ɔ, xixa alǒ nyikɔ gběkanlin e ɖó ta tɛnwe zo wǒ bo tɔ́n sín xù mɛ é tɔn wɛ. (Nǔɖexlɛ́mɛ 13:1, 17, 18) Kanlin enɛ ɔ, tuto toxóɖiɖɔ gbɛ̀ ɔ bǐ tɔn tɔn sín xlɛ̌ ɖé wɛ bo ɖò acɛ kpa dó “akɔta lɛ bǐ kpo togun lɛ bǐ kpo . . . gbè lɛ bǐ kpo tò lɛ bǐ kpo nu” wɛ. (Nǔɖexlɛ́mɛ 13:7) Nyikɔ 666 ɔ xlɛ́ ɖɔ tuto toxóɖiɖɔ tɔn ɔ ko j’ayǐ bǐ mlɛ́mlɛ́ ɖò Mawu nukúnmɛ. Gbɔn nɛ̌ é?

É nɔte ɖó lee è nɔ ylɔ́ gbɔn é kɛɖɛ jí ǎ. Nyikɔ e Mawu nɔ na lɛ é nɔ ɖó tinmɛ. Ði kpɔ́ndéwú ɔ, Mawu sun nyǐ Ablamu ee tinmɛ tɔn nyí “Tɔ́ D’agba (Susunɔ)” é ɖɔ Ablaxamu bɔ tinmɛ tɔn nyí “Tɔ́ Mɛ Wɔbuwɔbu ɖé (Gegě) Tɔn,” hwenu e É dó akpa ɖɔ Emi na bló bɔ Ablaxamu na nyí “tɔ́ nú akɔta wɔbuwɔbu ɖé” é. (Bǐbɛ̌mɛ 17:5, nwt, tinmɛ e ɖò dò é) Mɔ̌ ɖokpo ɔ, Mawu sun nyikɔ 666 ɔ kanlin ɔ, b’ɛ nyí xlɛ̌ ɖé bo sɔgbe xá kanlin ɔ ganji.

Kɛ́n ayizɛ́n nɔ dó gesí nǔ e ɖó blɔ̌ é. Hwɛhwɛ ɔ, kɛ́n e è nɔ zán ɖò Biblu mɛ lɛ é nɔ nyí xlɛ̌. Ðò jɔwamɔ linu ɔ, kɛ́n tɛnwe nɔ nɔte nú nǔ e ɖò blebu é alǒ nǔ e ma ɖó blɔ̌ ǎ é. Kɛ́n ayizɛ́n ɔ, kɛ́n tɛnwe bɔ è ɖè ɖokpo sín mɛ wɛ (7-1=6), b’ɛ sixu dó gesí nǔ e ma ɖò blebu ǎ é alǒ nǔ e ɖó blɔ̌ ɖò Mawu nukúnmɛ é, é sixu cá kan xá kɛntɔ́ Mawu tɔn lɛ.—1 Tan 20:6; Daniyɛli 3:1.

È nɔ ɖɔ xó ɖé azɔn atɔn bo na dó tɛɖɛ̌ nǔɖe jí. Hweɖelɛnu ɔ, Biblu nɔ ɖɔ xó ɖé azɔn atɔn bo na dó tɛɖɛ̌ nǔ e ɖɔ wɛ é ɖè é jí. (Nǔɖexlɛ́mɛ 4:8; 8:13) Enɛ wu ɔ, nyikɔ 666 ɔ xlɛ́ vaan ɖɔ tuto toxóɖiɖɔ tɔn gbɛtɔ́ lɛ tɔn ko j’ayǐ bǐ mlɛ́mlɛ́ ɖò Mawu nukúnmɛ. Ye kpéwú bo hɛn fífá kpo ayijayǐ kpo e na nɔ ayǐ kaka sɔyi é wá ǎ; Axɔ́suɖuto Mawu tɔn kɛɖɛ jɛn na kpé nǔ enɛ lɛ wu.

Wuntun kanlin ɔ tɔn

Biblu ɖɔ ɖɔ gbɛtɔ́ lɛ nɔ ɖó “wuntun kanlin ɔ tɔn,” ɖó ‘nǔ tɔn nyɔ́ ye nukúnmɛ’ bɔ ye nɔ xwedó è, kaka bo tlɛ nɔ sɛn ɛ. (Nǔɖexlɛ́mɛ 13:3, 4; 16:2) Ye nɔ wà mɔ̌ gbɔn susu xixɔ nú tò yetɔn, wuntun tɔn, alǒ ahwankpá hlɔnhlɔnnɔ tò ɔ tɔn gblamɛ. Encyclopedia of Religion ɖɔ: “Wǎn yí nú tò mɛtɔn wá huzu sinsɛn alɔkpa ɖé bo gbakpé hugǎn ɖò gbɛ̀ égbé tɔn mɛ.”a

Nɛ̌ è ka nɔ ɖó wuntun kanlin ɔ tɔn mɛɖé dó alɔ tɔn ɖisí ɔ alǒ nukɔn tɔn gbɔn? (Nǔɖexlɛ́mɛ 13:16) Mawu ɖɔ ɖò gbè e é ɖè nú akɔta Izlayɛli tɔn lɛ é mɛ ɖɔ: “Mi na bla ye dó awa abǐ nukɔn, bo ma wá wɔn ó.” (Sɛ́nflínmɛ 11:18) Ðiɖɔ wɛ è ɖè ɖɔ Izlayɛli-ví lɛ na ɖó wuntun awa yetɔn lɛ kpo nukɔn yetɔn lɛ kpo tlɔlɔ lě ǎ, loɔ, ɖiɖɔ wɛ è ɖè ɖɔ xó Mawu tɔn na nɔ xlɛ́ ali ye ɖò nǔwalɔ yetɔn lɛ kpo linlin yetɔn lɛ kpo bǐ mɛ. Mɔ̌ ɖokpo ɔ, 666 e nyí wuntun kanlin ɔ tɔn é jɛn è na wlan dó wǔtu tlɔlɔ lě ǎ, loɔ, ɖò nǔjlɛdonǔwu linu ɔ, wuntun kanlin ɔ tɔn nɔ dó gesí mɛ ɖěɖee jó tuto toxóɖiɖɔ tɔn dó b’ɛ nɔ xlɛ́ ali gbɛzán yetɔn lɛ é. Mɛ ɖěɖee ɖó wuntun kanlin ɔ tɔn lɛ é nɔ klán gbè xá Mawu.—Nǔɖexlɛ́mɛ 14:9, 10; 19:19-21.