Nɔ Gbeji Ðò Ya Ðaxó ɔ Hwenu

1-2. (a) Etɛ akɔta lɛ ka na jla ɖò malin-malin mɛ? (b) Nǔkanbyɔ tɛ lɛ è ka ɖó na mɔ xósin na?

DǑ NUKÚN mɛ kpɔ́n, akɔta lɛ jla “fífá tíìn, bɔ ayi jɛ ayǐ” xó e è ɖɔ ɖ’ayǐ é fó kɛɖɛ. Ye sixu yí nugo ɖɔ gbɛ̀ ɔ kún ko nɔ ayijayǐ mɛ sɔ lě kpɔ́n ó. Akɔta lɛ na ba ɖɔ mǐ ni lin ɖɔ ye kpéwú bo na ɖeɖɛ tagba gbɛ̀ ɔ tɔn lɛ bǐ. Amɔ̌, ye ka na kpé nǔ e na bɔ d’ewu tlolo é wu ǎ! Etɛwu? Sɔgbe xá nǔɖɔɖ’ayǐ Biblu tɔn ɔ, “nǔ e na vívá kún yetɔn ɔ na zɔn ye jí ajijimɛ . . . ye na gán ɖ’emɛ ǎ.”—1 Tɛ. 5:3.

² È ɖó na mɔ xósin nú nǔkanbyɔ taji ɖé lɛ: Etɛ ka na jɛ ɖò ya ɖaxó ɔ hwenu? Etɛ Jehovah ka na ba ɖɔ mǐ ni wà hwe ɔ nu? Nɛ̌ mǐ ka sixu sɔnǔ nú mǐɖée gbɔn dìn, bá nɔ gbeji ɖò ya ɖaxó ɔ hwenu?—Mat. 24:21.

 3. Sɔgbe xá Nǔɖexlɛ́mɛ 17:5, 15-18 ɔ, nɛ̌ Mawu ka na sú kún dó nú “Babilɔnu ɖaxó ɔ” gbɔn?

³ Xà Nǔɖexlɛ́mɛ 17:5, 15-18. È na sú kún dó nú “Babilɔnu ɖaxó ɔ”! Lee mǐ ɖɔ gbɔn wá yì é ɔ, akɔta lɛ na ɖ’acɛ dó nǔ e na jɛ ɖò hwenɛnu é jí ǎ. Etɛwu? Ðó “Mawu [na] sɔ́ jlǒ e nɔ wà linlin tɔn ɔ dó ayi mɛ nú ye.” Linlin tɛ ka wɛ? É wɛ nyí kún súsú dó nú kplékplé sinsɛn nǔvú lɛ tɔn, kaka jɛ Klisanwun-nyijɛtɔ́ lɛ jí.b Mawu na sɔ́ linlin tɔn dó “zo wǒ” “kanlin vɔvɔ cɛ́cɛ́” ɔ tɔn lɛ sín ayi mɛ. Zo wǒ lɛ nɔte nú acɛkpikpa e nɔ gudo nú “kanlin ɔ” lɛ é bǐ; enɛ wɛ nyí Kplékplé Akɔta lɛ tɔn. (Nǔɖe. 17:3, 11-13; 18:8) Hwenu e akɔta enɛ lɛ na huzu kpannukɔn sinsɛn nǔvú lɛ é ɔ, enɛ na xlɛ́ ɖɔ ya ɖaxó ɔ bɛ́. É na nyí nǔ baɖabaɖa ɖé bo na jɛ gbɔn gbɛ̀ ɔ bǐ mɛ.

 4. (a) Etɛ lɛ akɔta lɛ ka sixu ɖɔ bo na ba hwɛjijɔ nú sinsɛn nǔvú e gbé ye na nya lɛ é? (b) Etɛ lɛ mɛ e ɖò sinsɛn enɛ lɛ mɛ ɖ’ayǐ lɛ é ka na ɖibla wà?

⁴ Mǐ tuùn nǔ ɖěɖee akɔta lɛ sixu ɖɔ bá dó ba hwɛjijɔ nú ahwan e ye na tɔ́n Babilɔnu Ðaxó ɔ é ǎ. Ye sixu ɖɔ ɖɔ sinsɛn e ɖò gbɛ̀ ɔ mɛ lɛ é nyí afɔklɛ́nnú ɖé nú fífá, bo nɔ lɛ́ ɖ’alɔ hwɛhwɛ ɖò toxóɖiɖɔ mɛ. Alǒ ye sixu ɖɔ ɖɔ tutoblonunu sinsɛn tɔn enɛ lɛ jɛ dɔkun tawun, bo lɛ́ ɖó nǔ gegě kan. (Nǔɖe. 18:3, 7) È hɛn ɔ è na ɖɔ ɖɔ é kún nyí hagbɛ̌ sinsɛn enɛ lɛ tɔn lɛ bǐ wɛ è na sú kún dó na ɖò ahwantɔ́nmɛ enɛ hwenu ó. É nyɔ́ wà ɔ, é cí ɖɔ tutoblonunu sinsɛn tɔn lɛ wɛ akɔta lɛ na sú kún dó na ɖɔhun. Enɛ gudo ɔ, mɛ e ɖò sinsɛn enɛ mɛ ɖ’ayǐ lɛ é na mɔ ɖɔ sinsɛngán emitɔn lɛ flú emi, bo na ɖibla ɖó wǔ zɔ nú sinsɛn enɛ lɛ.

 5. Akpá tɛ Jehovah ka dó dó ya ɖaxó ɔ wu? Etɛwu?

⁵ Biblu ɖɔ táan nabi e kún súsú dó nú Babilɔnu Ðaxó ɔ na ɖiga na é ǎ, amɔ̌ mǐ tuùn ɖɔ é kún na ɖiga kaka ɖé ó. (Nǔɖe. 18:10, 21) Jehovah d’akpá ɖɔ emi na “ɖè” ya ɖaxó ɔ sín ‘azǎn kpò’ bonu “mɛ e [emi] cyan ɖó vo lɛ” é kpo sinsɛn nǔgbo ɔ kpo na dó sixu xò zlɛ́. (Mak. 13:19, 20) Amɔ̌, etɛ Jehovah ka na ɖó nukún ɖò mǐ sí ɖò bǐbɛ̌mɛ ya ɖaxó ɔ tɔn kpo ahwan Haamagedɔni tɔn kpo vlamɛ?

 6. Etɛwu sinsɛn nǔvú mɛ gigosin ma ka ko kpé ǎ?

⁶ Lee mǐ ko ɖɔ gbɔn ɖò xóta e wá yì é mɛ é ɔ, Jehovah nɔ ɖó nukún ɖɔ mɛsɛntɔ́ emitɔn lɛ ni ɖó wǔ zɔ nú Babilɔnu Ðaxó ɔ. Amɔ̌, enɛ byɔ nǔ hú sinsɛn nǔvú mɛ gigosin. Mǐ ɖó na kánɖeji bo na zunfan sinsɛn nǔgbo ɔ. Mǐ ni kpɔ́n ali e nu mǐ sixu wà mɔ̌ ɖè é we.

 7. (a) Nɛ̌ mǐ ka sixu tɛ́dó nǔgbododó jlɔjlɔ walɔ ɖagbe tɔn Jehovah tɔn lɛ wu gbɔn? (b) Nɛ̌ Eblée lɛ 10:24, 25 ka tɛɖɛ̌ lee kplé lɛ nyí nǔ taji sɔ, ɖò taji ɔ, ɖò égbé dìn é jí gbɔn?

⁷ Nukɔntɔn ɔ, mǐ ɖó na tɛ́dó nǔgbododó jlɔjlɔ walɔ ɖagbe tɔn Jehovah tɔn lɛ wu. Mǐ sixu yí gbè nú nǔbliblíwiwa gbɛ̀ ɔ tɔn lɛ ǎ. Ði kpɔ́ndéwú ɔ, mǐ nɔ yí gbè nú nǔbliblíwiwa alɔkpa ɖebǔ ǎ, kaka jɛ mɛ e ɖó mɛ̌ ɖokpo ɔ lɛ é na wlí alɔ xá yeɖée, gɔ́ nú gbɛ̀ bliblí ɖevo e ye nɔ zán lɛ é jí. (Mat. 19:4, 5; Hlɔ. 1:26, 27) Wegɔ́ ɔ, mǐ ɖó na kpó ɖò Jehovah sɛn wɛ xá Klisanwun hatɔ́ mǐtɔn lɛ. Mǐ nɔ wà mɔ̌ ɖò fí ɖebǔ e é sixu nyɔ́ bló ɖè é, vlafo ɖò Kpléxɔ Axɔ́suɖuto ɔ tɔn mǐtɔn lɛ mɛ, alǒ nú é byɔ ɖó mɔ̌ ɔ, é nɔ nyí ɖò xwé mɛɖesunɔ tɔn lɛ gbè, kabǐ fí e tlɛ jɛ nǔglɔ lɛ é. Nǔ ɖebǔ na bo jɛ ɔ, mǐ sixu jó aca e mǐ ɖó bo nɔ yì kplé lɛ é dó ǎ. Nǔgbo ɔ, mǐ ɖó na nɔ kplé ɖó kpɔ́ ɖó “Aklunɔ sín azǎn ɔ ko ɖò sisɛkpɔ wɛ.”—Xà Eblée lɛ 10:24, 25.

 8. Nɛ̌ wɛn mǐtɔn ka na ɖibla ɖyɔ gbɔn ɖò sɔgudo?

⁸ Ðò ya ɖaxó ɔ hwenu ɔ, wɛn e jla wɛ mǐ ɖè dìn é na ɖibla huzu. Wɛnɖagbe Axɔ́suɖuto ɔ tɔn jla wɛ mǐ ɖè dìn, bo ɖò gǎn dó wɛ bo ɖò nǔ kplɔ́n mɛ lɛ wɛ bonu ye na huzu ahwanvu. Amɔ̌, hwe ɔ nu ɔ, wɛn e syɛn kɛ́njí ɖɔhun é ɖé wɛ mǐ sixu jla. (Nǔɖe. 16:21) Mǐ sixu jla ɖɔ kún súsú dó nú gbɛ̀ Satáan tɔn ɔ ko ɖò kɛnnɛkɛnnɛ. É ko yá ɔ, mǐ na tuùn wɛn e mǐ na jla tawun é kpo lee mǐ na jla gbɔn é kpo. Wlɛnwín wɛnjijla tɔn ɖěɖee mǐ ko zán nú xwè kanweko jɛji dó wà sinsɛnzɔ́ mǐtɔn é wɛ mǐ na lɛ́ zán à? Alǒ mǐ na zán wlɛnwín ɖevo lɛ? Ðebǔ wɛ é na nyí ɔ, é cí ɖɔ è na jɔwǔ mǐ bɔ mǐ na jla wɛn hwɛɖónúmɛ tɔn Jehovah tɔn kpo akɔ́nkpinkpan kpo ɖɔhun!—Ezek. 2:3-5.

 9. Nɛ̌ akɔta lɛ ka sixu wà nǔ gbɔn ɖó wɛn mǐtɔn wu? Amɔ̌, jiɖe tɛ mǐ ka sixu ɖó?

⁹ Wɛn mǐtɔn na ɖibla dó xomɛsin nú akɔta lɛ, bɔ ye na tɛ́n kpɔ́n bo na xwè nu mǐtɔn dó xɔ bǐ mlɛ́mlɛ́. Lee mǐ ko nɔ ganjɛ Jehovah wu ɖò sinsɛnzɔ́ mǐtɔn mɛ gbɔn dìn é ɔ, mǐ ɖó na lɛ́ ganjɛ wǔ tɔn hwe ɔ nu. Mǐ sixu ɖeji ɖɔ Mawu mǐtɔn na na mǐ hlɔnhlɔn bɔ mǐ na wà jlǒ tɔn.—Micée 3:8.

10. Lee è ɖɔ ɖ’ayǐ gbɔn ɖò Luki 21:25-28 mɛ é ɔ, nɛ̌ gegě mɛ lɛ tɔn ka na wà nǔ gbɔn, ɖó nǔ e na jɛ ɖò ya ɖaxó ɔ hwenu lɛ é wu?

¹⁰ Xà Luki 21:25-28. Ðò ya ɖaxó ɔ hwenu ɔ, ado na hu gbɛtɔ́ lɛ hwenu e ye na mɔ bɔ nǔ e ye lin ɖ’ayǐ ɖɔ ye syɛn só lɛ é bǐ na jɛ ayǐ jɛ jí é. ‘Wǔ na kú’ ye, bɔ xɛsi na ɖi ye ɖó gbɛ̀ yetɔn wu, hwenu e ninɔmɛ e d’ablu hugǎn ɖò hwenuxó gbɛtɔ́ tɔn mɛ é na bɛ́ é. (Sof. 1:14, 15) Ðò hwe ɔ nu ɔ, gbɛ̀ na ɖibla vɛwǔ nú togun Jehovah tɔn hugǎn. Ðó mǐ ma nyí gbɛ̀ ɔ tɔn ǎ wutu ɔ, mǐ sixu mɔ wuvɛ̌ syɛnsyɛn ɖé lɛ. Mǐ tlɛ sixu ba dandannú gbɛmɛ tɔn ɖé lɛ kpò.

11. (a) Etɛwu akɔta lɛ ka na sɔ́ ayi ɖó Kúnnuɖetɔ́ Jehovah tɔn lɛ jí síí? (b) Etɛwu é ma ka byɔ ɖɔ mǐ ni ɖi xɛsi nú ya ɖaxó ɔ ǎ?

¹¹ Mɛ ɖěɖee sín sinsɛn è sú dó lɛ é sixu sin xomɛ, ɖó Kúnnuɖetɔ́ Jehovah tɔn lɛ kpó ɖò Mawu yetɔn sɛn wɛ wu. É ɖò wɛn ɖɔ ye na ɖè lě dò nǔ enɛ sin xomɛ nú ye sɔ́ é xlɛ́ mɛ ɖevo lɛ, bo sixu ɖexlɛ́ ɖò Ɛntɛnɛti jí. Akɔta lɛ kpo gǎn yetɔn Satáan kpo na gbɛ́ wǎn nú mǐ, ɖó sinsɛn mǐtɔn ɖokpo géé wɛ xò zlɛ́ wu. Ye na kpé linlin e ye ɖó bo na sú sinsɛn lɛ bǐ dó sín ayikúngban jí é wu ǎ. Enɛ wu ɔ, ye na sɔ́ ayi ɖó mǐ jí síí. Hwenɛnu ɔ, akɔta lɛ na huzu Gɔgu Magɔgi tɔn.c Ye na ɖó gbè kpɔ́ bo na tɔ́n ahwan baɖabaɖa ɖé togun Jehovah tɔn kpo hlɔnhlɔn yetɔn bǐ kpo. (Ezek. 38:2, 14-16) Ðó mǐ ma tuùn doyidoslɔ́ nǔ e na jɛ tawun ɖò ya ɖaxó ɔ hwenu lɛ é tɔn ǎ wu ɔ, mǐ sixu jɛ nǔ lin jí. Amɔ̌, mǐ ɖó jiɖe elɔ: É byɔ ɖɔ mǐ ni ɖi xɛsi nú ya ɖaxó ɔ ǎ. Jehovah na na mǐ alixlɛ́mɛ e na hwlɛn gbɛ̀ mǐtɔn lɛ é. (Ðɛh. 34:19) Mǐ na kpéwú bo na “jlɔ́, bo kpɔ́n jǐ,” ɖó mǐ na tuùn ɖɔ “hwenu e Mawu na hwlɛn [mǐ] é ko sɛya.”d

12. Nɛ̌ ‘Deví gbejinɔtɔ́, ayiɖotenanɔ ɔ’ ka ko ɖò nǔ sɔ́ nú mǐ wɛ gbɔn dìn nú nǔ e ja ɖò sɔgudo lɛ é?

¹² ‘Deví gbejinɔtɔ́, ayiɖotenanɔ’ ɔ ko ɖò nǔ sɔ́ nú mǐ wɛ dìn bonu mǐ na nɔ gbeji ɖò ya ɖaxó ɔ hwenu. (Mat. 24:45) É ko wà mɔ̌ ɖò ali gegě nu, amɔ̌, mǐ ni kpɔ́n kpɔ́ndéwú ɖokpo: Tuto kpléɖókpɔ́ ɖaxó mǐtɔn tɔn e wá dó ganmɛ bɔ mǐ bló ɖò 2016 jɛ 2018 lɛ é. È dó wusyɛn lanmɛ nú mǐ gbɔn tuto enɛ lɛ gblamɛ, ɖɔ mǐ ni na hlɔnhlɔn jijɔ ɖěɖee sín hudo mǐ ɖó dìn e azǎn Jehovah tɔn ɖò sisɛkpɔ wɛ é é. Mi nú mǐ ni vɔ́ xó ɖɔ dó jijɔ enɛ lɛ wu klewun.

13. Nɛ̌ mǐ ka sixu na hlɔnhlɔn gbeji e mǐ ɖè nú Jehovah é gbɔn? Aniwu mǐ ka ɖó na wà mɔ̌ dìn?

¹³ Gbejininɔ: Kpléɖókpɔ́ ɖaxó 2016 tɔn sín xóta wɛ nyí “Nɔ Gbeji nú Jehovah!” Tuto enɛ kplɔ́n mǐ ɖɔ enyi mǐ ɖó kancica syɛnsyɛn ɖé xá Jehovah ɔ, mǐ na nɔ gbeji n’i. È flín mǐ ɖɔ mǐ sixu sɛkpɔ Jehovah gbɔn ɖɛxixo sɛ́dó è kpo ayi bǐ kpo, kpodo Xó tɔn kplɔnkplɔn dó nǔjɔnǔ mɛ kpo gblamɛ. Mɔ̌ wiwa na na mǐ hlɔnhlɔn bɔ mǐ na ɖu ɖò wuvɛ̌ e tlɛ vɛwǔ hugǎn lɛ é jí. Ðó gbɛ̀ Satáan tɔn ko xwè vivɔnu bǐ wu ɔ, mǐ sixu ɖó nukún ɖɔ gbeji e mǐ ɖè nú Jehovah kpo tutoblonunu tɔn kpo é na gbɔn mɛtɛnkpɔn mɛ hugǎn. Mɛ lɛ na ɖibla kpò ɖò mǐ cá ko wɛ. (2 Pi. 3:3, 4) Ðó mǐ ma nɔ nɔ gudo nú gbɛ̀ Satáan tɔn ǎ wu ɔ, enɛ lɔ sixu zɔ́n bɔ nǔ na nyí mɔ̌. Mǐ ɖó na na hlɔnhlɔn gbejininɔ mǐtɔn dìn, bo na dó kpó ɖò gbeji ɖò ya ɖaxó ɔ hwenu.

14. (a) Huzuhuzu tɛ ka na tíìn bo na kan nɔví ɖěɖee na nɔ nukɔn nú nǔ lɛ ɖò ayikúngban jí é? (b) Etɛwu é ka na byɔ ɖɔ mǐ ni nɔ gbeji ɖò hwenɛnu?

¹⁴ Ðò ya ɖaxó ɔ hwenu ɔ, huzuhuzu ɖé na tíìn bo na kan nɔví ɖěɖee na nɔ nukɔn nú nǔ lɛ ɖò ayikúngban jí é. È na xò nɔví yí ami dó ɖè ɖěɖee kpó ɖò ayikúngban jí lɛ é kplé dó jixwé ɖò hweɖenu, bonu ye na ɖ’alɔ ɖò ahwan Haamagedɔni tɔn ɔ mɛ. (Mat. 24:31; Nǔɖe. 2:26, 27) Enɛ xlɛ́ ɖɔ Hagbɛ̌ Alixlɛ́mɛtɔ́ ɔ kún na ɖò kpɔ́ xá mǐ kaka sɔyi ɖò ayikúngban ɔ jí ó. É ɖò mɔ̌ có, gbɛtɔ́ wɔbuwɔbu lɛ na kpó ɖò tito jí. Nɔví e ɖò lɛngbɔ̌ ɖevo lɛ mɛ bo jɛxa lɛ é wɛ na nɔ nukɔn nú nǔ lɛ. É na byɔ ɖɔ mǐ na ɖè gbejininɔ mǐtɔn xlɛ́ gbɔn gudo ninɔ nú nɔví enɛ lɛ kpo alixlɛ́mɛ Mawu tɔn e ye na na mǐ lɛ é kpo gblamɛ. Enɛ wɛ na zɔ́n bɔ mǐ na gán.

15. Nɛ̌ mǐ ka sixu na hlɔnhlɔn didɛ mǐtɔn gbɔn? Etɛwu é ka ɖò taji ɖɔ mǐ ni wà mɔ̌ dìn?

¹⁵ Didɛ: Xóta kpléɖókpɔ́ ɖaxó 2017 tɔn tɔn wɛ nyí “Ma Jó Gbè Ó!” Kpléɖókpɔ́ enɛ d’alɔ mǐ bɔ mǐ na hlɔnhlɔn nǔwukpíkpé e mǐ ɖó bo na dɛ ɖò mɛtɛnkpɔn lɛ nu é. Mǐ kplɔ́n ɖɔ didɛ mǐtɔn kún na sín ninɔmɛ ɖagbe lɛ wu ó. Mǐ sixu na hlɔnhlɔn didɛ mǐtɔn gbɔn Jehovah wu ginganjɛ gblamɛ. (Hlɔ. 12:12, nwt) Mi nú mǐ ni ma wɔn gbeɖé ɖɔ Jezu dó akpá elɔ ó: “Mɛ e na dɛ ɖò ya enɛ lɛ nu kaka yì fó ɔ, è na hwlɛn ɛ gán.” (Mat. 24:13) Akpá enɛ xlɛ́ ɖɔ ninɔmɛ ɖebǔ na bo kpannukɔn mǐ ɔ, mǐ ɖó na nɔ gbeji. Nú mǐ nɔ dɛ ɖò mɛtɛnkpɔn ɖokpo ɖokpo nu dìn ɔ, nǔɖiɖi mǐtɔn na lidǒ cobɔ ya ɖaxó ɔ na bɛ́.

16. Etɛ ka na xlɛ́ ɖɔ mǐ na kpankɔ́n? Nɛ̌ mǐ ka sixu na hlɔnhlɔn akɔ́nkpinkpan mǐtɔn gbɔn dìn?

¹⁶ Akɔ́nkpinkpan: Xóta kpléɖókpɔ́ ɖaxó 2018 tɔn tɔn wɛ nyí “Kpankɔ́n!” Kpléɖókpɔ́ enɛ flín mǐ ɖɔ é kún nyí nǔwukpíkpé mǐɖesunɔ tɔn lɛ wɛ nɔ xlɛ́ ɖɔ mǐ na kpankɔ́n alǒ gbɔ ó. Lee é nyí gbɔn nú didɛ é ɔ, Jehovah wu ginganjɛ wɛ nɔ zɔ́n bɔ è nɔ kpankɔ́n nǔgbo nǔgbo. Nɛ̌ mǐ ka sixu wà gbɔn bo na nɔ ganjɛ wǔtu tɔn hugǎn? Xó Jehovah tɔn kplɔnkplɔn gbè bǐ gbè kpo tamɛ linlin dó lee é hwlɛn togun tɔn ɖò hwexónu gbɔn é jí wɛ na d’alɔ mǐ. (Ðɛh. 68:21; 2 Pi. 2:9) Nú akɔta lɛ tɔ́n ahwan mǐ ɖò ya ɖaxó ɔ hwenu ɔ, é na byɔ ɖɔ mǐ ni kpankɔ́n bo ganjɛ Jehovah wu hugǎn ɖ’ayǐ tɔn. (Ðɛh. 112:7, 8; Ebl. 13:6) Enyi mǐ ɖeji dó Jehovah wu dìn ɔ, mǐ na ɖó akɔ́nkpinkpan e sín hudo mǐ ɖó, hwenu e Gɔgu na tɔ́n ahwan mǐ é é.e

17. Etɛwu mǐ ma ka ɖó na ɖi xɛsi nú Haamagedɔni ǎ? (Kpɔ́n ɖiɖe e ɖò akpa ɔ jí é.)

¹⁷ Lee mǐ ko ɖɔ gbɔn ɖò xóta e wá yì é mɛ é ɔ, gegě mǐtɔn wɛ zán gbɛ̀ mǐtɔn bǐ ɖò azǎn gudogudo tɔn lɛ mɛ. Amɔ̌, mǐ lɛ́ ɖò nukún ɖó wɛ ɖɔ mǐ na xò ya ɖaxó ɔ zlɛ́. Ahwan Haamagedɔni tɔn wɛ na nyí fí e gbɛ̀ elɔ na wá vivɔnu ɖó é. Amɔ̌, mǐ ɖó na ɖi xɛsi nú nǔtí ǎ. Etɛwu? Ðó ahwan Mawu tɔn wɛ. (Nǔx. 1:33; Ezek. 38:18-20; Zak. 14:3) Nú Jehovah ɖegbe ɔ, Jezu Klisu na bɛ́ ahwan. Mɛ yí ami dó ɖè e ko fɔ́n sín kú lɛ é kpo wɛnsagun wɔbuwɔbu ɖé kpo wɛ na gɔ́ n’i. Ye na nɔ bǔ, bo na fun ahwan xá Satáan, awoví tɔn lɛ kpo ahwangɔnu tɔn ayikúngban jí tɔn lɛ kpo.—Dan. 12:1; Nǔɖe. 6:2; 17:14.

18. (a) Jiɖe tɛ Jehovah ka na mǐ? (b) Nɛ̌ Nǔɖexlɛ́mɛ 7:9, 13-17 ka na jiɖe we dó sɔgudo wu gbɔn?

¹⁸ Jehovah na jiɖe elɔ mǐ: “Alyannú e è na tun bo na sɔ́ dó jǐ we ɔ ɖě na wà nǔtí nú we ǎ.” (Eza. 54:17) Jehovah sɛntɔ́ gbejinɔtɔ́ “wɔbuwɔbu ɖé” na xò “ya ɖaxó ɔ” zlɛ́ bo na nɔ gbɛ̀! Enɛ gudo ɔ, ye na kpó ɖò Mawu sɛn wɛ. (Xà Nǔɖexlɛ́mɛ 7:9, 13-17.) Kpɔ́n lee Biblu na jiɖe mǐ dó sɔgudo wu gbɔn é! Mǐ tuùn ɖɔ Jehovah “nɔ nya xɛ ɖò mɛ e ɖi nǔ n’i lɛ jí.” (Ðɛh. 31:24) É na víví nú mɛ e yí wǎn nú Jehovah bo nɔ kpa susu n’i lɛ é bǐ, hwenu e ye na mɔ è klɔ́ cí sín nyikɔ mímɛ́ tɔn wu é.—Ezek. 38:23.

19. Nukúnɖiɖó jiwǔ tɛ ka ɖò te kpɔ́n mǐ ɖò malin-malin mɛ?

¹⁹ Nú 2 Timɔtée 3:2-5 na jlɛ́ lee gbɛtɔ́ lɛ na wà nǔ gbɔn ɖò gbɛ̀ yɔyɔ̌ e mɛ Satáan ma sɔ́ na dó jɔ nú mɛ lɛ ɖè ǎ é ɔ, lin tamɛ dó xógbe e é na zán lɛ é jí. (Kpɔ́n gbǎví “Lee Mɛ lɛ Na Wá Wà Nǔ Gbɔn É.”) Nɔví George Gangas ee nɔ Hagbɛ̌ Alixlɛ́mɛtɔ́ ɔ mɛ wá yì é tinmɛ gbɔn lě: “Kpɔ́n lee gbɛ̀ ɔ na cí, hwenu e mɛ bǐ na nyí nɔví sunnu alǒ nɔví nyɔnu é! Zaanɖé ɔ, è na jɔwǔ we bɔ a na nɔ gbɛ̀ yɔyɔ̌ ɔ mɛ. A na nɔ gbɛ̀ ɖó bǎ e mɛ Jehovah na nɔ gbɛ̀ ɖó é. Mǐ na nɔ gbɛ̀ kaka sɔyi.” Nukúnɖiɖó jiwǔ tɛ ɖíe!