“Babilɔnu Ðaxó ɔ” Tuùntuùn

XÓGBE ɖé lɛ ɖò wema Nǔɖexlɛ́mɛ tɔn mɛ bɔ è sixu sɔ́ ɖó blǔju bo mɔ nukúnnú jɛ mɛ ǎ. Ði kpɔ́ndéwú ɖé ɔ, é ɖɔ nyɔnu ɖé xó bɔ è wlan “Babilɔnu Ðaxó ɔ” dó nukɔn tɔn. É ɖɔ ɖɔ nyɔnu enɛ junjɔn ‘ahwan lɛ kpo tò lɛ kpo’ jí. (Nǔɖexlɛ́mɛ 17:1, 5, 15) Ðó nyɔnu kpaà ɖě ma sixu wà mɔ ǎ wutu ɔ, Babilɔnu Ðaxó ɔ ɖó na nɔte nú nùɖé. Etɛ agalɛtɔ́ enɛ ka nɔte na lo?

Nǔɖexlɛ́mɛ 17:18 lɛ́ ɖè nyɔnu ɖokpo ɔ xlɛ́ ɖɔ é nyí “toxo ɖaxó e kpa acɛ dó axɔsu ayikúngban jí tɔn lɛ nu ɔ.” Xókwin “toxo” ɔ ɖexlɛ́ ɖɔ gbɛ̌ta e è bló tuto na é ɖé wɛ. Ðó “toxo ɖaxó” enɛ ɔ ɖó acɛ dó “axɔsu ayikúngban jí tɔn lɛ” nu wutu ɔ, nyɔnu e è nɔ ylɔ ɖɔ Babilɔnu Ðaxó ɔ é ɖó na nyí tutoblonunu gbɛ̀ ɔ tɔn nukúnɖeji ɖé. Tutoblonunu alɔkpa tɛ? Sinsɛn tɔn ɖé wɛ. Mǐ ni ba dò nǔ lee akpáxwé wema Nǔɖexlɛ́mɛ tɔn ɖé lɛ tɔn d’alɔ mǐ bɔ mǐ wá gbeta enɛ kɔn gbɔn é.

Tutoblonunu ɖé sixu nyí toxóɖiɖɔ tɔn, ajɔ̌wiwa tɔn, alǒ sinsɛn tɔn. Nyɔnu e è nɔ ylɔ ɖɔ Babilɔnu Ðaxó ɔ é nyí tutoblonunu toxóɖiɖɔ tɔn ɖé ǎ, ɖó Xó Mawu tɔn ɖɔ ɖɔ “axɔsu e ɖò ayikúngban jí lɛ” é, alǒ toxóɖɔgbɛ gbɛ̀ elɔ tɔn lɛ “lɛ̀ aga xá ɛ.” Akɔ e é jɛ xá acɛkpatɔ́ gbɛ̀ elɔ tɔn lɛ é wɛ nyí aga e é lɛ̀ é, bɔ é sɔgbe ɖɔ è ni ylɔ ɛ ɖɔ “agalɛtɔ́ ɖaxó” ɔ.—Nǔɖexlɛ́mɛ 17:1, 2; Jaki 4:4.

Babilɔnu Ðaxó ɔ sixu nyí tutoblonunu ajɔ̌wiwa tɔn ɖé ǎ, ɖó hwenu e è na sú kún tɔn dó é ɔ, “ajɔ̌tɔ́ ayikúngban jí tɔn lɛ” na nɔ aluwɛ mɛ n’i. Nugbǒ ɔ, axɔsu lɛ kpo ajɔ̌tɔ́ lɛ kpo bǐ wɛ “na nɔ zɔ” bo na ɖò Babilɔnu Ðaxó ɔ kpɔ́n sɛ́dó wɛ bɔ wema Nǔɖexlɛ́mɛ tɔn xlɛ́. (Nǔɖexlɛ́mɛ 18:3, 9, 10, 15-17) Enɛ wu ɔ, é sɔgbe ɖɔ è ni wá gbeta ɔ kɔn ɖɔ Babilɔnu Ðaxó ɔ kún nyí tutoblonunu toxóɖiɖɔ alǒ ajɔ̌wiwa tɔn ɖé ó, amɔ̌, ɖɔ é nyí sinsɛn tɔn ɖé.

Xógbe ɖevo e lɛ́ tɛɖɛ̌ jí ɖɔ tutoblonunu sinsɛn tɔn ɖé wɛ Babilɔnu Ðaxó ɔ nyí é wɛ nyí ɖɔ é flú tò lɛ bǐ gbɔn “majiki sín nǔwiwa” tɔn lɛ gblamɛ. (Nǔɖexlɛ́mɛ 18:23) Ðó majikibiblo alɔkpa lɛ bǐ cí sinsɛn ɖɔhun bo ka jɔ sín awovi lɛ gɔ́n wutu ɔ, Babilɔnu Ðaxó ɔ e Biblu ylɔ ɖɔ “awovi lɛ sín nɔtɛn” é ɖó na kpaca mɛ ǎ. (Nǔɖexlɛ́mɛ 18:2; Deutéronome 18:10-12) Biblu lɛ́ xlɛ́ ɖɔ tutoblonunu enɛ kún nɔ mɔ sinsɛn nugbǒ ɔ gbɔ ɖebǔ ó, bo nɔ lɛ́ doya nú “gbeyiɖɔ lɛ kpo mɛɖeɖóvo Mawu tɔn lɛ kpo.” (Nǔɖexlɛ́mɛ 18:24) Nugbǒ ɔ, Babilɔnu Ðaxó ɔ gbɛ́ wǎn nú sinsɛn nugbǒ ɔ ɖesu bo nɔ doya nú ‘kúnnuɖetɔ́ Jezu tɔn lɛ’ tawun bo tlɛ nɔ hu ye mɛ ɖé lɛ. (Nǔɖexlɛ́mɛ 17:6) Hǔn, é xlɛ́ céɖécéɖé dìn ɖɔ nyɔnu enɛ e è nɔ ylɔ ɖɔ Babilɔnu Ðaxó ɔ é nɔte nú tutoblonunu gbɛ̀ ɔ tɔn sinsɛn nùvú tɔn, é wɛ nyí kplékplé sinsɛn e klán gbè xá Jehovah Mawu lɛ é bǐ tɔn.