Etɛ ka Nyí Kanlin Vɔvɔ Cɛ́cɛ́ E Xó È Ðɔ Ðò Nǔɖexlɛ́mɛ Wemata 17gɔ́ ɔ Mɛ É?

Kanlin vɔvɔ cɛ́cɛ́ e xó Nǔɖexlɛ́mɛ wemata 17gɔ́ ɔ ɖɔ é ɔ, tutoblonunu e linlin tɔn wɛ nyí ɖɔ é na xò akɔta e ɖò gbɛ̀ ɔ mɛ lɛ é bǐ kplé bɔ ye na nɔ bǔ, bo lɛ́ sɔ́ afɔ yetɔn ɖó te é sín wuntun wɛ. É ko tíìn ɖ’ayǐ bo nyí Akɔjijɛ Akɔta lɛ tɔn, bɔ dìn ɔ, é nyí Kplékplé Akɔta lɛ tɔn.

Lee è sixu tuùn kanlin vɔvɔ cɛ́cɛ́ enɛ gbɔn é

1. Gbɛ̌ta toxóɖɔgbɛ́ lɛ tɔn ɖé. Kanlin vɔvɔ cɛ́cɛ́ ɔ ɖó “ta tɛnwe” bɔ è ɖɔ ɖɔ ye nɔte nú “só tɛnwe” kpo “axɔ́su tɛnwe” alǒ acɛkpikpa e ɖò acɛ kpa wɛ lɛ é kpo. (Nǔɖexlɛ́mɛ 17:9, 10) Enyi è zán só lɛ kpo kanlin lɛ kpo ɖò Biblu mɛ ɔ, ye nɔ dó gesí acɛkpikpa lɛ ɖò nǔjlɛdonǔwu linu.—Jelemíi 51:24, 25; Daniyɛli 2:44, 45; 7:17, 23.

2. Akpajlɛ tuto toxóɖiɖɔ tɔn gbɛ̀ ɔ bǐ tɔn ɖé. Kanlin vɔvɔ cɛ́cɛ́ ɔ ɖi kanlin ta tɛnwenɔ e xó Nǔɖexlɛ́mɛ wemata 13gɔ́ ɔ ɖɔ é, b’ɛ nɔte nú tuto toxóɖiɖɔ tɔn gbɛ̀ ɔ bǐ tɔn ɖé. Kanlin we lɛ ɖokpo ɖokpo ɖó ta tɛnwe, zo wǒ, bɔ nu nyla dó Mawu wu sín nyikɔ ɖò ye wu. (Nǔɖexlɛ́mɛ 13:1; 17:3) Nǔ e kanlin enɛ lɛ ɖó ɖò bǔ é sukpɔ́ dín bɔ è na ɖɔ nǔkpédónǔnu ɖé wɛ. Tuto toxóɖiɖɔ tɔn gbɛ̀ ɔ bǐ tɔn ɖé sín xlɛ̌ alǒ akpajlɛ ɖé wɛ kanlin vɔvɔ cɛ́cɛ́ ɔ nyí.—Nǔɖexlɛ́mɛ 13:15.

3. Acɛkpikpa ɖevo lɛ wɛ nɔ na ɛ hlɔnhlɔn. Acɛkpikpa ɖevo e ko ɖò acɛ kpa wɛ lɛ é mɛ wɛ kanlin vɔvɔ cɛ́cɛ́ ɔ gosin.—Nǔɖexlɛ́mɛ 17:11, 17.

4. É nɔ wà nǔ ɖó bǔ xá sinsɛn. Babilɔnu Ðaxó ɔ, ee nyí kplékplé sinsɛn nǔvú e gbɔn gbɛ̀ ɔ bǐ mɛ lɛ é tɔn é jinjɔn kanlin vɔvɔ cɛ́cɛ́ ɔ jí, enɛ ɖò xlɛ́xlɛ́ wɛ ɖɔ gbɛ̌ta sinsɛn lɛ tɔn lɛ ɖó acɛ dó kanlin ɔ jí.—Nǔɖexlɛ́mɛ 17:3-5.

5. É nɔ ɖè Mawu kpò. “Nu nyla dó Mawu wu sín nyikɔ kpé” kanlin ɔ wu.—Nǔɖexlɛ́mɛ 17:3.

6. É na nɔ nǔɖe ma wà nú táan ɖé. È na zé kanlin vɔvɔ cɛ́cɛ́ ɔ dó “dò gɔngɔn” mɛ,a alǒ é na nɔ nǔɖe ma wà nú táan ɖé, amɔ̌, é na lɛ́ wá tɔ́n.—Nǔɖexlɛ́mɛ 17:8.

Nǔɖɔɖ’ayǐ Biblu tɔn jɛnu

Ð’ayi lee Akɔjijɛ Akɔta lɛ tɔn kpo Kplékplé Akɔta lɛ tɔn e jɛ tɛn tɔn mɛ é kpo bló bɔ nǔɖɔɖ’ayǐ Biblu tɔn e ɖɔ xó dó kanlin vɔvɔ cɛ́cɛ́ ɔ wu é jɛnu gbɔn é wu.

1. Gbɛ̌ta toxóɖɔgbɛ́ lɛ tɔn ɖé. Kplékplé Akɔta lɛ tɔn nɔ nɔ gudo nú tuto toxóɖiɖɔ tɔn lɛ, ɖó é nɔ jɛhun dó sɛ́n e ɖɔ ɖɔ “Tò e ɖ’emɛ lɛ é bǐ ɖó acɛ ɖokpo ɔ lɛ é” jí.b

2. Akpajlɛ tuto toxóɖiɖɔ tɔn gbɛ̀ ɔ bǐ tɔn ɖé. Ðò 2011 ɔ, tò 193gɔ́ ɔ byɔ Kplékplé Akɔta lɛ tɔn mɛ. Mɔ̌ mɛ ɔ, é nɔ flé nu ɖɔ emi sɔ́ akɔta kpo togun kpo gegě sín afɔ ɖó te ɖò gbɛ̀ ɔ mɛ.

3. Acɛkpikpa ɖevo lɛ wɛ nɔ na ɛ hlɔnhlɔn. Tò e ɖò Kplékplé Akɔta lɛ tɔn mɛ lɛ é wɛ zɔ́n b’ɛ tíìn, bɔ ye mɛvo ɔ, é ɖó hlɔnhlɔn kpo acɛ kpo ɖě ǎ.

4. É nɔ wà nǔ ɖó bǔ xá sinsɛn. Sinsɛn e ɖò gbɛ̀ ɔ mɛ lɛ é nɔ gudo nú Akɔjijɛ Akɔta lɛ tɔn kpo Kplékplé Akɔta lɛ tɔn kpo bǐ hwebǐnu.c

5. É nɔ ɖè Mawu kpò. È ɖó Kplékplé Akɔta lɛ tɔn ayǐ “bonu é na jɛhun dó fífá kpo ayijayǐ kpo jí gbɔn gbɛ̀ ɔ bǐ mɛ.”d Nǔ enɛ e gbé nya wɛ Kplékplé Akɔta lɛ tɔn ɖè é sixu cí nǔ ɖagbe ɖɔhun có, nú è na ɖɔ ɔ, é ɖè Mawu kpò, ɖó é jló na wà nǔ e Mawu ɖɔ ɖɔ Axɔ́suɖuto emitɔn kɛɖɛ jɛn na bló ye lɛ é.—Ðɛhan 46:10; Daniyɛli 2:44.

6. É na nɔ nǔɖe ma wà nú táan ɖé. Akɔjijɛ Akɔta lɛ tɔn e è ɖó ayǐ táan klewun ɖé ɖò Wɛkɛ Hwan Nukɔntɔn ɔ gudo bonu é na jɛhun dó fífá jí é kpéwú bo gbò kpò nyi ali jí nú hwɛgbe lɛ ɖò tò lɛ tɛntin ǎ. Acɛ tɔn kú hwenu e Wɛkɛ Hwan Wegɔ́ ɔ bɛ́ ɖò 1939 é. Ee Wɛkɛ Hwan Wegɔ́ ɔ fó gudo é ɔ, è ɖó Kplékplé Akɔta lɛ tɔn ayǐ ɖò 1945. Linlin tɔn lɛ, lee é nɔ wà nǔ gbɔn é, kpo lee è bló tuto na gbɔn é kpo ɖibla nyí nǔ ɖokpo ɔ xá Akɔjijɛ Akɔta lɛ tɔn tɔn.