Lee Sinsɛn Nǔvú Nɔ Kɔn Cí Dó Mawu Wu Gbɔn É

Mawu ɔ wanyiyi wɛ é nyí, bɔ etɛwu sinsɛn ɖěɖee ka sɔ́ nyikɔ tɔn ɖó ta lɛ é ka ɖ’alɔ ɖò nǔnyanyawiwa gegě mɛ sɔmɔ̌? È na ɖɔ kpowun ɔ, sinsɛn nǔvú wɛ nyí sinsɛn enɛ lɛ; cí kɔn dó Mawu wu wɛ ye ɖè. Nɛ̌ ye ka kɔn cí dó wǔ tɔn gbɔn? Nɛ̌ nǔ ka nɔ cí n’i d’ewu? Nɛ̌ é ka na ɖeɖɛ enɛ gbɔn?

1. Nɛ̌ sinsɛn nǔvú ka nɔ sɔ́ nǔkplɔnmɛ éɖesunɔ tɔn lɛ dó kɔn cí dó Mawu wu gbɔn?

Sinsɛn nǔvú “gbɛ́ nǔgbo e ɖɔ xó dó Mawu wu ɔ yí, bo ka yí gbè nú adingban.” (Hlɔmanu lɛ 1:25) Ði kpɔ́ndéwú ɔ, sinsɛn gegě tíìn bo kplɔ́n nyikɔ Mawu tɔn agunví yetɔn lɛ ǎ. Amɔ̌, Biblu ɖɔ ɖɔ è ɖó na zán nyikɔ Mawu tɔn. (Hlɔmanu lɛ 10:13, 14) Sinsɛngán ɖé lɛ ɖɔ ɖɔ enyi nǔ nyanya ɖé jɛ hǔn, jlǒ Mawu tɔn wɛ. Amɔ̌, adingban sésé wɛ. Mawu nɔ zɔ́n bɔ nǔ nyanya ɖé nɔ jɛ gbeɖé ǎ. (Xà Jaki 1:13.) É blawǔ ɖɔ adingban-núkplɔnmɛ sinsɛn tɔn lɛ nɔ nya gbɛtɔ́ lɛ dó zɔ nú Mawu.

2. Nɛ̌ nǔwiwa sinsɛn nǔvú tɔn lɛ ka nɔ kɔn cí dó Mawu wu gbɔn?

Sinsɛn nǔvú nɔ wà nǔ xá gbɛtɔ́ lɛ Jehovah ɖɔhun ǎ. Biblu ɖɔ ɖɔ sinsɛn nǔvú sín “hwɛ . . . lɛ kplé kaka yì jinukúnsin.” (Nǔɖexlɛ́mɛ 18:5) Sín xwè kanweko mɔ̌kpan ɖíe wɛ sinsɛn nǔvú lɛ nɔ ɖ’alɔ ɖò toxóɖiɖɔ mɛ, nɔ nɔ gudo nú ahwan lɛ, bo nɔ lɛ́ zɔ́n alǒ yí gbè bɔ è nɔ hu gbɛtɔ́ maxamaxa lɛ. Sinsɛngán ɖé lɛ nɔ jló na jɛ dɔkun, enɛ wu ɔ, ye nɔ byɔ akwɛ agunví yetɔn lɛ. Nǔwiwa enɛ lɛ xlɛ́ ɖɔ ye kún tlɛ tuùn Mawu ó, bɔ enɛ wu ɔ, ye ɖó acɛ e na sɔ́ afɔ tɔn ɖó te é ǎ.—Xà 1 Jaan 4:8.

3. Nɛ̌ nǔ ka nɔ cí nú Mawu dó sinsɛn nǔvú wu?

Enyi xomɛ nɔ sin we dó nǔ e sinsɛn nǔvú nɔ wà lɛ é wu ɔ, nɛ̌ nǔ ka nɔ cí nú Jehovah bɔ a lin? É yí wǎn nú gbɛtɔ́ lɛ, amɔ̌, xomɛ nɔ sin i dó sinsɛngán ɖěɖee nɔ kɔn cí dó wǔtu tɔn bo nɔ lɛ́ wà nǔ xá agunví yetɔn lɛ ɖò ali agɔ nu lɛ é wu. É d’akpá bo na sú kún dó nú sinsɛn nǔvú bɔ “è sɔ́ na mɔ ɛ gbeɖé ǎ.” (Nǔɖexlɛ́mɛ 18:21) Zaanɖé dìn ɔ, Mawu na ɖó nǔ sinsɛn nǔvú lɛ bǐ nu.—Nǔɖexlɛ́mɛ 18:8.

BA DÒ NÚ NǓ D’EJI

4. Sinsɛn lɛ bǐ nɔ nyɔ́ Mawu nukúnmɛ ǎ

Mɛ gegě nɔ ɖi nǔ ɖɔ sinsɛn lɛ cí ali vovo lɛ ɖɔhun, bɔ ye bǐ nɔ kplá mɛ yì Mawu gɔ́n. Nǔgbo jɛn ka wɛ à? Xà Matie 7:13, 14, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:

• Etɛ Biblu ka ɖɔ dó ali e nɔ kplá mɛ yì gbɛ̀ mɛ é wu?

Xò VIDEO ɔ, enɛ gudo hǔn, mi ɖɔ xó ɖó kpɔ́ dó nǔkanbyɔ e bɔ d’ewu é jí.

VIDEO: Mawu ka Nɔ Yí Gbè nú Sinsɛn lɛ Bǐ À?: Kpɛví Ɔ (3:22)

• Biblu ɖɔ ɖɔ sinsɛn gegě tíìn bo nyɔ́ Mawu nukúnmɛ wɛ à?

5. Sinsɛn nǔvú nɔ ɖè wanyiyi Mawu tɔn xlɛ́ ǎ

Sinsɛn nǔvú lɛ nɔ kɔn cí dó Mawu wu ɖò ali gegě nu. Ali e nu ye nɔ wà mɔ̌ ɖè b’ɛ nyla tawun é ɖokpo wɛ nyí alɔ e ye nɔ ɖó ɖò ahwan mɛ é. Nú a na mɔ kpɔ́ndéwú ɖokpo hǔn, xò VIDEO ɔ. Enɛ gudo hǔn, mi ɖɔ xó ɖó kpɔ́ dó nǔkanbyɔ e bɔ d’ewu lɛ é jí.

VIDEO: Alɔ E Sinsɛn lɛ Ðó Ðò Wɛkɛ Hwan Wegɔ́ ɔ Mɛ É (2:22)

• Etɛ lɛ sinsɛn gegě ka wà ɖò Wɛkɛ Hwan Wegɔ́ ɔ hwenu?

• Nɛ̌ nǔ ka cí nú we dó nǔ ɖěɖee ye wà lɛ é wu?

Xà Jaan 13:34, 35 kpo 17:16 kpo. Enɛ gudo hǔn, mi ɖɔ xó ɖó kpɔ́ dó nǔkanbyɔ elɔ lɛ jí:

• Nɛ̌ nǔ ka ɖó na ko cí nú Jehovah dó alɔ e sinsɛn nǔvú lɛ nɔ ɖó ɖò ahwan mɛ é wu?

• Sinsɛn nǔvú dó nǔ baɖabaɖa gegě sin. Ali tɛ lɛ nu a ka mɔ ɖɔ sinsɛn nǔvú kún ɖè wanyiyi Mawu tɔn xlɛ́ ó ɖè?

6. Mawu jló na ɖè gbɛtɔ́ lɛ sín sinsɛn nǔvú kannu

Xà Nǔɖexlɛ́mɛ 18:4,a enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:

• Nɛ̌ nǔ ka cí nú we dó tuùn e a tuùn ɖɔ Mawu jló na d’alɔ mɛ ɖěɖee sinsɛn nǔvú ko flú lɛ é wu?

7. Kpò ɖò nǔ kplɔ́n dó Mawu nǔgbo ɔ wu wɛ

Sinsɛn nǔvú ka ɖó na wà nǔ dó linlin e a nɔ ɖó dó Mawu wu é wu wɛ à? Mǐ ni ɖɔ ɖɔ vǐ ɖé gbɛ́ tónú sè nú tɔ́ tɔn, bo gosin xwégbe, lobo dó nǔ baɖabaɖa lɛ sin. Nǔ ɖěɖee vǐ ɔ wà lɛ é nyɔ́ tɔ́ tɔn nukúnmɛ ǎ. Etɛwu é ma ka na sɔgbe ɖɔ è ni dóhwɛ tɔ́ ɔ ɖó lee vǐ tɔn gǔfɔntɔ́ ɔ nɔ zán gbɛ̀ gbɔn é wu ǎ?

• É ka na sɔgbe ɖɔ è ni dóhwɛ Jehovah bo ɖó nǔ kplɔnkplɔn dó wǔtu tɔn te ɖó nǔwiwa sinsɛn nǔvú tɔn lɛ wu à?

ETƐ LƐ A KA KPLƆ́N?

Sinsɛn nǔvú ko kɔn cí dó Mawu wu gbɔn adingban-núkplɔnmɛ tɔn lɛ kpo nǔ baɖabaɖa ɖěɖee é nɔ dósin lɛ é kpo gblamɛ. Mawu na sú kún dó nú sinsɛn nǔvú.

Vɔ̌gbɔnji

• Nɛ̌ nǔ ka nɔ cí nú we dó nǔ ɖěɖee sinsɛn nǔvú ko kplɔ́n mɛ bo lɛ́ wà lɛ é wu?

• Nɛ̌ nǔ ka nɔ cí nú Jehovah dó sinsɛn nǔvú wu?

• Etɛ Mawu ka na wá wà nú sinsɛn nǔvú?

KÍJÉ

Kpɔ́n ali e nu sinsɛn gegě ma nyɔ́ Mawu nukúnmɛ ǎ ɖè é we.

“Sinsɛn lɛ Bǐ Wɛ Nyí Nǔ Ðokpo ɔ À? Ye Mɛ Bǐ Wɛ Nɔ Kplá Mɛ Yì Mawu Gɔ́n À?” (Xóta Ɛntɛnɛti jí tɔn)

Etɛwu Jehovah ba ɖɔ mǐ ni nɔ kpɔ́ xá mɛ ɖevo lɛ bo sɛn emi?

“Dandan Wɛ Ðɔ È Ni Nɔ Sinsɛn E È Bló Tuto Na É ɖé Mɛ À?” (Xóta Ɛntɛnɛti jí tɔn)

Sinsɛn e mɛ yɛhwenɔ ɖé ɖè é ɖ’akpɔ n’i. Amɔ̌, enɛ zɔ́n bonu é ɖó nǔgbo ɔ kplɔnkplɔn dó Mawu wu te ǎ.

“Nǔ E Wu Yɛhwenɔ ɖé Jó Sinsɛn Tɔn Dó É” (Réveillez-vous! février 2015)

Sín xwè kanweko mɔ̌kpan ɖíe ɔ, sinsɛn lɛ nɔ ɖó adingban dó Mawu kɔ, b’ɛ zɔ́n bɔ mɛ lɛ nɔ lin ɖɔ Mawu kún nɔ kpé nukún dó emi wu ó bo lɛ́ nyí adakaxotɔ́. Kplɔ́n nǔgbo ɔ dó adingban enɛ lɛ atɔn wu.

“Adingban Ðěɖee Nɔ Zɔ́n Bɔ È Ma Nɔ Yí Wǎn nú Mawu Ǎ lɛ É” (Atɔxwɛ [Flansegbe] 1^er novembre 2013)