Jexóva ná gǎnjɛwú mǐ ɖɔ émí ná bló bɔ ayǐkúngban ɔ ná húzú palaɖísi

 1. Xó tɛ́ gbeyíɖɔ Ezayíi ka ɖɔ nú Izlayɛ́li ví gbɛ̌ tɔn lɛ́?

GBEYÍÐƆ Ezayíi ɖɔ dó Jexóva wú ɖɔ é nyí “Mawu nǔgbóɖɔtɔ́.” Xókwín e è tínmɛ bɔ é nyí “nǔgbó” é ɔ, blǔju tɔn wɛ nyí “amǐ.” (Eza. 65:16, nwt.) “Amǐ” sín tínmɛ wɛ nyí “ní nyí mɔ̌.” Ényí è ɖo xó ɖɔ dó Jexóva alǒ Jezu wú wɛ, bo zán xókwín “amǐ” ɖo Biblu mɛ ɔ, gǎnjɛwú wɛ é nyí ɖɔ nǔɖé nyí nǔgbó. Ényí mɔ̌ hǔn, xó e Ezayíi ɖɔ nú Izlayɛ́li ví gbɛ̌ tɔn lɛ́ é ɖo wɛn: Nǔ e Jexóva nɔ ɖɔ ɖ’ayǐ lɛ́ é nɔ jɛnu hwebǐnu. Nǔgbó ɔ, Jexóva nɔ ɖe akpá e é dó lɛ́ é ɖokpó ɖokpó.

 2. Aniwú mǐ ka sixú ɖeji dó akpá ɖěɖěe Jexóva dó dó sɔgúdo mǐtɔn wú lɛ́ é wú? Nǔkanbyɔ́ tɛ́ lɛ́ mǐ ka ná gbéjé kpɔ́n?

² Mǐ lɔmɔ̌ ka sixú ɖó jiɖe ɖokpó ɔ dó akpá ɖěɖěe Jexóva dó dó sɔgúdo mǐtɔn wú lɛ́ é wú a? Ezayíi kú b’ɛ ná bló xwe 800 mɔ̌ gúdo é ɔ, mɛsɛ́dó Pɔ́lu tínmɛ nǔ e wú mǐ sixú ɖeji ɖɔ akpá Mawu tɔn lɛ́ ná nɔ jɛnu hwebǐnu é. Pɔ́lu ɖɔ: ‘Mawu sixú ɖó adingban ǎ.’ (Ebl. 6:18) Lěe tɔjɔtɛn ɖé ma sixú ná sin ɖagbe kpó sin e vlɛ́ é kpó zɛ̌ɛ́n ǎ gbɔn é ɔ, mɔ̌ jɛ́n Jexóva e nyí Jɔtɛn nǔgbó ɔ tɔn é ma sixú ɖ’adingban ǎ gbɔn é nɛ́. Énɛ́ wú wɛ mǐ sixú ɖeji bǐ mlɛ́mlɛ́ dó nǔ ɖěɖěe Jexóva ɖɔ lɛ́ é bǐ wú, káká jɛ akpá ɖěɖěe é dó nú mǐ dó sɔgúdo mǐtɔn wú lɛ́ é bǐ jí. Ðo xóta élɔ́ mɛ ɔ, mǐ ná gbéjé nǔkanbyɔ́ élɔ́ lɛ́ kpɔ́n: Étɛ́ Jexóva ka d’akpá ɖɔ émí ná ná mǐ ɖo sɔgúdo? Nɛ̌ Jexóva ka ná mǐ gǎnjɛwú ɖɔ akpá émítɔn ná jɛnu gbɔn?

 3. (a) Akpá tɛ́ mawusɛntɔ́ lɛ́ ka nɔ yí wǎn ná tawun? (Nǔɖexlɛ́mɛ 21:3, 4) (b) Ényí è má akpá énɛ́ xá mɛɖé lɛ́ ɔ, nɛ̌ yě ka nɔ wa nǔ gbɔn?

³ Mɛsɛntɔ́ Mawu tɔn e gbɔn gbɛ ɔ bǐ mɛ lɛ́ é yí wǎn nú akpá e jí mǐ ná ɖɔ xó dó é tawun. (Xa Nǔɖexlɛ́mɛ 21:3, 4.) Hweɖénu ná wá su bɔ akpá élɔ́ e Jexóva dó é ná jɛnu: “Kú sɔ́ ná tíin ǎ; mɔ̌ jɛ́n aluwɛ alǒ alěníná alǒ wǔvɛ́ ma sɔ́ ná tíin ǎ é nɛ́.” Mǐ mɛ gěgé wɛ nɔ zán akpáxwé Mawuxówéma ɔ tɔn énɛ́ e dó gbɔ nú mɛ bo ɖɔ xó dó gbɛ ninɔ ɖo palaɖísi mɛ wú é hwenu e mǐ ɖo sinsɛnzɔ́ ɔ mɛ é. Nɛ̌ mɛɖé lɛ́ ka nɔ wa nǔ gbɔn hwenu e è ɖɔ akpá énɛ́ sín xó nú yě é? Yě sixú ɖɔ: “Xó énɛ́ lɛ́ mɛ́ sin dín bo ná jɛnu.”

 4. (a) Étɛ́ Jexóva ka ko tuun bo ɖɔ ɖ’ayǐ? (b) Gbɔn vo nú akpá e Jexóva dó é ɔ, nǔ ɖěvo tɛ́ é ka lɛ́ wa?

⁴ É ɖo wɛn ɖɔ, hwenu e Jexóva ɖo gbɛ ninɔ ɖo palaɖísi mɛ sín akpá énɛ́ sɔ́ dó ayi mɛ nú mɛsɛ́dó Jaan wɛ ɖɔ é ní wlán é ɔ, É tuun ɖɔ égbé ɔ, mǐ ná ɖɔ xó nú mɛ ɖěvo lɛ́ dó nukúnɖíɖó énɛ́ wú hwenu e mǐ ɖo wɛn ɖagbe Axɔ́súɖuto ɔ tɔn jlá wɛ é. Jexóva lɛ́ ɖɔ ɖ’ayǐ ɖɔ é ná vɛ́ wǔ nú mɛ gěgé bɔ yě ná ɖi ɖɔ ‘nǔ yɔ̌yɔ́ e ná jɛ’ bɔ émí dó akpá tɔn lɛ́ é ná jɛnu. (Eza. 42:9; 60:2; 2 Kɔ. 4:3, 4) Énɛ́ wú ɔ, nɛ̌ mǐ ka sixú ná gǎnjɛwú mɛ ɖěvo lɛ́ káká jɛ mǐɖésúnɔ jí ɖɔ nyɔ̌ná ɖěɖěe xó è ɖɔ ɖo Nǔɖexlɛ́mɛ 21:3, 4 mɛ lɛ́ é ná jɛnu gbɔn? Jexóva d’akpá énɛ́ e dó gbɔ nú mɛ é kpowun ǎ, loɔ, é lɛ́ ná hwɛjijɔ ɖěɖěe wú mǐ sixú lɛ́ gán jɛ wú lɛ́ é mǐ. Hwɛjijɔ tɛ́ lɛ́ ka wɛ?

 5. Hwɛjijɔ tɛ́ lɛ́ mǐ ka ɖó bo ná ɖeji dó akpá gbɛ mavɔmavɔ tɔn e Mawu dó é wú? Fítɛ́ mǐ ka mɔ yě ɖe?

⁵ Mǐ mɔ hwɛjijɔ ɖěɖěe wú mǐ ná ɖeji dó Palaɖísi sín akpá e Jexóva dó nú mǐ é wú lɛ́ é ɖo wěmafɔ e bɔ d’é wú lɛ́ é mɛ. Mǐ xa ɖɔ: “Mɛ e ɖo ayǐjínjɔ́n ɖo axɔ́súzinkpo ɔ jí é ɖɔ: ‘Éɖíe! Un ɖo nǔ lɛ́ bǐ bló wɛ yɔ̌yɔ́ tɔn.’ É lɛ́ ɖɔ: ‘Wlǎn, ɖó xó ɖejidéwú wɛ nyí xó énɛ́ lɛ́ bo lɛ́ nyí nǔgbó.’ É lɛ́ ɖɔ nú mì ɖɔ: ‘Yě ko jɛnu! Nyɛ wɛ nyí Alúfa bo lɛ́ nyí Omɛ́ga, nyɛ wɛ nyí bǐbɛ́mɛ ɔ bo lɛ́ nyí vivɔnu ɔ.’”—Nǔɖe. 21:5, 6a.

 6. Étɛ́wú gǎnjɛwúxó ɖěɖěe ɖo Nǔɖexlɛ́mɛ 21:5, 6 mɛ lɛ́ é ka nɔ ná hlɔ̌nhlɔ́n jiɖe e mǐ ɖó dó akpá Mawu tɔn wú é?

⁶ Étɛ́wú wěmafɔ Biblu tɔn énɛ́ lɛ́ ka ná hlɔ̌nhlɔ́n jiɖe e mǐ ɖó dó akpá Mawu tɔn wú é? Wěma Osọhia ɖɔ xó élɔ́ dó wěmafɔ énɛ́ lɛ́ wú: “É cí ɖɔ Jexóva ɖésúnɔ d’alɔ wěma mɛ nú gbɛtɔ́ gbejínɔtɔ́ lɛ́ dó ná gǎnjɛwú yě ɖɔ émí ná ɖe akpá émítɔn bǐ mlɛ́mlɛ́ wɛ ɖɔhun.”b Akpá e Mawu dó é ɖo Nǔɖexlɛ́mɛ 21:3, 4 mɛ. Amɔ̌ énɛ́ gúdo ɔ, nú è ná ɖɔ ɔ, Jexóva d’alɔ wěma ɔ mɛ ɖo wěmafɔ 5 kpó 6 kpó mɛ dó ná mǐ gǎnjɛwú ɖɔ akpá e émí dó é ná jɛnu bǐ mlɛ́mlɛ́. Mi nú mǐ ní xwe sɔ bo gbéjé lěe Jexóva ná mǐ gǎnjɛwú ɖɔ mǐ sixú ɖeji dó émí wú gbɔn é kpɔ́n.

 7. Mɛ̌ ka jɛ xó ɖɔ jí sín wěmafɔ 5gɔ́ ɔ mɛ? Étɛ́wú xó énɛ́ lɛ́ ka nyí xó bǔnɔ?

⁷ Gǎnjɛwú e Mawu ná mǐ é bɛ́ gbɔn lě: “Mɛ e ɖo ayǐjínjɔ́n ɖo axɔ́súzinkpo ɔ jí é ɖɔ.” (Nǔɖe. 21:5a) Xó bǔnɔ wɛ xó énɛ́ lɛ́ nyí, ɖó yě nyí ɖokpó ɖo xó ɖěɖěe Jexóva ɖɔ azɔn atɔn gbɔn nǔmimɔ mɛ ɖo wěma Nǔɖexlɛ́mɛ tɔn mɛ lɛ́ é mɛ. Énɛ́ wú ɔ, é nyí wɛnsagun hlɔ̌nhlɔ́nnɔ ɖé wɛ ná gǎnjɛwú énɛ́ mǐ ǎ, mɔ̌ jɛ́n é ma ka lɛ́ nyí Jezu e è fɔ́n sín kú é ǎ é nɛ́, Jexóva ɖésúnɔ wɛ! Énɛ́ xlɛ́ ɖɔ mǐ sixú ɖeji bǐ mlɛ́mlɛ́ dó nǔ e é ɖɔ bɔ d’é wú é wú. Étɛ́wú nǔ ka nyí mɔ̌? Ðó Jexóva “sixú ɖó adingban ǎ.” (Ti. 1:2) Xó énɛ́ zɔ́n bɔ mǐ sixú ɖeji dó nǔ e mǐ xa ɖo Nǔɖexlɛ́mɛ 21:5, 6 mɛ é wú bǐ mlɛ́mlɛ́.

 8. Étɛ́ Jexóva ka ɖɔ dó dó zǒgbe jí ɖɔ akpá émítɔn ná jɛnu? (Ezayíi 46:10)

⁸ Énɛ́ gúdo ɔ Jexóva ɖɔ: “Éɖíe!” (Nǔɖe. 21:5) Azɔn mɔ̌kpán wɛ è zán xókwín Glɛ̌kigbe tɔn e tínmɛ tɔn nyí “Éɖíe!” é ɖo wěma Nǔɖexlɛ́mɛ tɔn mɛ. Wěma alɔdlɛ́ndónǔ tɔn ɖé ɖɔ ɖɔ, è zán axwáxwi bo ná dó “dɔn ayi nǔxatɔ́ ɔ tɔn wá nǔ e bɔ d’é wú é jí.” Étɛ́ ka bɔ dó axwáxwi ɔ wú? Mawu ɖɔ: “Un ɖo nǔ lɛ́ bǐ bló wɛ yɔ̌yɔ́ tɔn.” Nǔgbó wɛ ɖɔ hǔzúhúzú sɔgúdo tɔn lɛ́ xó ɖɔ wɛ Jexóva ɖe, amɔ̌, nú éyɛ́ ɔ, akpá énɛ́ lɛ́ sín jijɛnu ɖó gǎnjɛwú sɔmɔ̌ bɔ é ɖɔ xó dó yě wú cí nǔ ɖɔ yě ko ɖo jijɛnu wɛ ɖɔhun.—Xa Ezayíi 46:10.

 9. (a) Étɛ́ lɛ́ dó gesí wɛ nukɛgbe “ɖo nǔ lɛ́ bǐ bló wɛ yɔ̌yɔ́ tɔn” ɔ ka ɖe? (b) Étɛ́ ka ná jɛ dó “jǐnukúnsin” kpó “ayǐkúngban” kpó e tíin din é wú?

⁹ Mǐ ní ɖɔ xó dó nukɛgbe e bɔ d’é wú ɖo Nǔɖexlɛ́mɛ 21:5 mɛ é wú: “Ðo nǔ lɛ́ bǐ bló wɛ yɔ̌yɔ́ tɔn.” Ðo wěmata Biblu tɔn énɛ́ mɛ ɔ, nukɛgbe énɛ́ ɖo gesí dó nǔ e Jexóva ná wa é we wɛ. É ná ɖe nǔɖé lɛ́ síin lobo bló bɔ linlin e é ɖó nú ayǐkúngban ɔ é ná jɛnu. Nukɔntɔn, étɛ́ lɛ́ ɖe síin gbé wɛ Jexóva ka ja? Nǔɖexlɛ́mɛ 21:1 ɖɔ: “Jǐnukúnsin xóxó ɔ kpó ayǐkúngban xóxó ɔ kpó ko bú.” “Jǐnukúnsin xóxó ɔ” nɔ dó gesí acɛkpikpa ɖěɖěe ɖo Satáan kpó awǒvi tɔn lɛ́ kpó lɔ mɛ lɛ́ é. (Mat. 4:8, 9; 1 Jaan 5:19) Lěe Biblu xlɛ́ gbɔn é ɔ, “ayǐkúngban” sixú dó gesí gbɛtɔ́ ɖěɖěe ɖo ayǐkúngban ɔ jí lɛ́ é. (Bǐb. 11:1; Ðɛh. 96:1) Mɔ̌ mɛ ɔ, “ayǐkúngban xóxó ɔ” nɔ dó gesí gbɛtɔ́ dídá ɖěɖěe ɖo gbɛ ɔ mɛ égbé lɛ́ é. Jexóva ná vɔ́ azɔ̌ wa, alǒ jlá nǔ lɛ́ ɖó ɖo “jǐnukúnsin” kpó “ayǐkúngban” kpó, éé tíin din é wú kpowun ǎ, é nyɔ́ wa ɔ, é ná sú kún yětɔn dó bǐ dégbédégbé. É ná sɔ́ “jǐnukúnsin yɔ̌yɔ́ ɖé kpó ayǐkúngban yɔ̌yɔ́ ɖé kpó” dó ɖyɔ́ jǐnukúnsin kpó ayǐkúngban kpó e ɖo ayǐ din é, énɛ́ wɛ nyí ɖɔ acɛkpikpa yɔ̌yɔ́ ɖé ná kp’acɛ dó nǔjlɔ́jlɔ́watɔ́ lɛ́ jí.

10. Étɛ́ lɛ́ bló wɛ Jexóva ka ɖe yɔ̌yɔ́ tɔn?

¹⁰ Ali ɖěvo tɛ́ nu Jexóva ka ɖo nǔ lɛ́ bǐ bló wɛ yɔ̌yɔ́ tɔn ɖe? (Nǔɖe. 21:5) Jexóva ná jlá ninɔmɛ ayǐkúngban ɔ tɔn ɖó, bo ná bló bɔ kpɛɖé kpɛɖé ɔ, gbɛtɔ́ lɛ́ ná húzú mɛ maɖóblɔ̌. Lěe Ezayíi ɖɔ ɖ’ayǐ gbɔn é ɔ, Jexóva ná bló bɔ ayǐkúngban ɔ blěbú ná húzú fí ɖɛkpɛ ɖɛkpɛ ɖé, lobo ná cí jikpá Edɛ́ni tɔn ɖɔhun. Gɔ́ ná ɔ, é ná gbɔ azɔn nú mǐ mɛ ɖokpó ɖokpó bǐ mlɛ́mlɛ́ dó bló bɔ mǐ ná húzú mɛ yɔ̌yɔ́. È ná gbɔ azɔn nú sékúnɔ lɛ́, nukúntɔ́nnɔ lɛ́ kpó tókúnɔ lɛ́ kpó bo tlɛ ná fɔ́n mɛ e kú lɛ́ é wá gbɛ.—Eza. 25:8; 35:1-7.

11. Gbe tɛ́ Jexóva ka ɖe nú Jaan? Hwɛjijɔ tɛ́ É ka ná ɛ?

¹¹ Nǔ ɖěvo tɛ́ Jexóva ka ɖɔ dó ná gǎnjɛwú mǐ ɖɔ mǐ sixú ɖeji dó émí wú? Jexóva ɖɔ nú Jaan ɖɔ: “Wlǎn, ɖó xó ɖejidéwú wɛ nyí xó énɛ́ lɛ́ bo lɛ́ nyí nǔgbó.” (Nǔɖe. 21:5) Jexóva ɖe gbe kpowun ɖɔ “wlǎn” ǎ; é lɛ́ wa nǔ hú mɔ̌. É lɛ́ ɖɔ hwɛjijɔ ɖokpó. É ɖɔ: “Xó ɖejidéwú wɛ nyí xó énɛ́ lɛ́ bo lɛ́ nyí nǔgbó.” Tínmɛ tɔn wɛ nyí ɖɔ, xó Mawu tɔn lɛ́ ɖó gǎnjɛwú bo lɛ́ nyí nǔgbó. É su nukún mǐtɔn mɛ ɖɔ Jaan se tónú nú gbe e è ɖe n’i ɖɔ é ní “wlǎn” é. Wǎgbɔ tɔn ɔ, mǐ sixú xa nǔ dó Palaɖísi sín akpá e Mawu dó é wú, bo lɛ́ lin tamɛ dó nyɔ̌ná ɖaaɖagbe e ɖo te kpɔ́n mǐ lɛ́ é jí.

12. Jexóva ɖɔ: “Yě ko jɛnu!” Étɛ́wú é ka ɖɔ mɔ̌?

¹² Étɛ́ Mawu ka ɖɔ bɔ d’é wú? “Yě ko jɛnu!” (Nǔɖe. 21:6) Din ɔ, Jexóva ɖo xó ɖɔ wɛ cí nǔ ɖɔ nǔ énɛ́ lɛ́ e é ɖɔ dó akpá Palaɖísi tɔn ɔ wú lɛ́ é bǐ ko jɛnu wɛ ɖɔhun. Ðó nǔ ɖěbǔ sixú sú ali do è bónú é gɔn blǒbló bónú linlin tɔn jɛnu ǎ. Énɛ́ gúdo ɔ, Jexóva ɖɔ nǔ ɖěvo e ná mǐ gǎnjɛwú ɖɔ akpá e é dó nú mǐ é ná jɛnu bǐ mlɛ́mlɛ́ é. Étɛ́ ka nyí nǔ ɔ?

13. Aniwú Jexóva ka ɖɔ: “Nyɛ wɛ nyí Alúfa bo lɛ́ nyí Omɛ́ga”?

¹³ Lěe mǐ ko ɖɔ gbɔn wá yi é ɔ, Jexóva ɖésúnɔ ɖɔ xó nú Jaan ɖo nǔmimɔ mɛ azɔn atɔn. (Nǔɖe. 1:8; 21:5, 6; 22:13) Jexóva vɔ́ xó élɔ́ ɖɔ ɖo ninɔmɛ énɛ́ lɛ́ ɖokpó ɖokpó mɛ: “Nyɛ wɛ nyí Alúfa bo lɛ́ nyí Omɛ́ga.” Ðo Glɛ̌kigbe mɛ ɔ, Alúfa wɛ nyí wěkwín nukɔntɔn ɔ bɔ Omɛ́ga nyí wěkwín gǔdo tɔn ɔ. Ðɔ e Jexóva ɖɔ ɖɔ émí nyí “Alúfa bo lɛ́ nyí Omɛ́ga” é xlɛ́ ɖɔ ényí é jɛ nǔɖé wú ɔ, é nɔ wa yi fó ganjí bɔ xó ɖě nɔ ɖ’é wú ǎ.

14. (a) Nǎ kpɔ́ndéwú hwenu e é cí ɖɔ Jexóva ɖɔ émí nyí “Alúfa” é kpó hwenu e é ná wá ɖɔ ɖo ali ɖé nu ɖɔ émí nyí “Omɛ́ga” é kpó tɔn ɖokpó. (b) Gǎnjɛwúxó tɛ́ mǐ ka mɔ ɖo Bǐbɛ́mɛ 2:1-3 mɛ?

¹⁴ Ée Jexóva dá Adámu kpó Ɛvu kpó gúdo é ɔ, é ɖɔ linlin e é ɖó dó gbɛtɔ́ lɛ́ kpó ayǐkúngban ɔ kpó wú é nú yě. Biblu ɖɔ: “[Mawu] xo ɖɛ dó yě jí bo ɖɔ: ‘Mi ji, mi gba kún, bo kpé ayǐkúngban ɔ jí, bo sɔ́ ɛ ɖó acɛ mitɔn glɔ́.’” (Bǐb. 1:28) È ná ɖɔ ɔ, ɖiɖɔ wɛ Jexóva ɖe hwenɛ́nu ɖɔ “Alúfa.” É ɖɔ linlin tɔn sɔ́ nyi wɛn: Hwe ɔ nu ná wá su bɔ kúnkan Adámu kpó Ɛvu kpó tɔn e nyí mɛ maɖóblɔ̌ bo nɔ se tónú nú Mawu lɛ́ é ná kpé ayǐkúngban ɔ bǐ jí bo ná bló bɔ é ná húzú Palaɖísi. Hwenu e linlin Jexóva tɔn ná jɛnu bǐ mlɛ́mlɛ́ é ɔ, é ná cí ɖɔ ɖiɖɔ wɛ é ɖe ɖɔ “Omɛ́ga” ɖɔhun. Ée Jexóva ɖó “wɛ̌kɛ́ ɔ [énɛ́ wɛ nyí jǐxwé gɔ́ nú ayǐkúngban] kpó nǔ e ɖ’é mɛ lɛ́ bǐ kpó” gúdo é ɔ, é ɖɔ nǔɖé bɔ é xlɛ́ ɖɔ linlin tɔn ná jɛnu dandan. É ɖo Bǐbɛ́mɛ 2:1-3 mɛ. (Xa.) Jexóva xo ɖɛ dó azǎn tɛ́nwegɔ́ ɔ jí bo ɖe ɖó vo. Étɛ́ ka nyí tínmɛ énɛ́ tɔn? Jexóva ná mǐ gǎnjɛwú ɖɔ émí ná bló bɔ linlin e émí ɖó nú gbɛtɔ́ lɛ́ kpó ayǐkúngban ɔ kpó é ná jɛnu dandan. É ná jɛnu bǐ mlɛ́mlɛ́ ɖo vivɔnu azǎn tɛ́nwegɔ́ énɛ́ tɔn.

15. Étɛ́wú Satáan ka sixú ko lin ɖɔ émí kpé wú bo sú ali dó Jexóva bɔ linlin tɔn kún ná jɛnu ó?

¹⁵ Ée Adámu kpó Ɛvu kpó fɔ́n gǔ dó Mawu jí gúdo é ɔ, yě húzú hwɛhutɔ́ bo jó hwɛhuhu kpó kú kpó sín gǔ dó nú kúnkan yětɔn. (Hlɔ̌. 5:12) Wǎgbɔ tɔn ɔ, é cí ɖɔ Satáan d’avaja linlin e Mawu ɖó ɖɔ gbɛtɔ́ maɖóblɔ̌ e nyí tónúsetɔ́ lɛ́ é ná gɔ́ ayǐkúngban ɔ jí é mɛ wɛ ɖɔhun. Satáan ka kpé wú bo sú ali dó Jexóva bónú linlin tɔn ná gɔn jijɛnu wɛ a? Satáan sixú ko lin ɖɔ Jexóva kún sixú ɖe akpá tɔn ó. É sixú ko lin ɖɔ Jexóva ná hu Adámu kpó Ɛvu kpó lobo dá asú kpó asi kpó yɔ̌yɔ́ ɖěvo, bo ná bló bɔ linlin e É ɖó nú gbɛtɔ́ lɛ́ é ná jɛnu. Amɔ̌, ényí Mawu ko wa mɔ̌ wɛ ɔ, Awǒvi ná dó hwɛ ɛ ɖɔ é nyí adingbannɔ. Aniwú? Ðó sɔgbe xá Bǐbɛ́mɛ 1:28 ɔ, Jexóva ɖɔ nú Adámu kpó Ɛvu kpó ɖɔ kúnkan yětɔn wɛ ná gɔ́ ayǐkúngban ɔ bǐ jí.

16. Étɛ́wú Satáan ka sixú ko lin ɖɔ émí hɛn ɔ, émí ná dó hwɛ Jexóva ɖɔ é hwedó nǔ wú?

¹⁶ Gbeta ɖěvo tɛ́ kɔn Satáan ka sixú ko lin ɖɔ Mawu ná wá? Vlafo Satáan lin ɖɔ Jexóva ná ná tɛn Adámu kpó Ɛvu kpó bɔ yě ná ji vǐ hwɛhutɔ́ lɛ́ lobɔ yě kún ná kpé wú gbeɖé bo húzú mɛ maɖóblɔ̌ ó. (Nǔt. 7:20; Hlɔ̌. 3:23) Ényí mɔ̌ wɛ ɔ, é ɖo wɛn ɖɔ Awǒvi ná dó hwɛ Jexóva ɖɔ é hwedó nǔ wú. Aniwú? Ðó nǔ sixú nyí mɔ̌ bónú linlin e Mawu ɖó ɖɔ kúnkan Adámu kpó Ɛvu kpó tɔn e nyí mɛ maɖóblɔ̌ lobo nɔ lɛ́ se tónú nú Mawu lɛ́ é ní gɔ́ palaɖísi mɛ ɖo ayǐkúngban jí é jɛnu ǎ.

17. Nɛ̌ Jexóva ka ɖe ɖɛ gǔ e Satáan, gɔ́ nú asú kpó asi kpó nukɔntɔn ɔ fɔ́n dó jǐ tɔn é gbɔn? Étɛ́ mɛ é ka ná tɔ́n kɔ dó? (Lɛ̌ kpɔ́n ɖiɖe ɔ.)

¹⁷ Jexóva ɖe ɖɛ gǔ e Satáan, gɔ́ nú asú kpó asi kpó nukɔntɔn ɔ fɔ́n dó jǐ tɔn é ɖo ali ɖé nu bɔ é bú vo dó Satáan ɖésú. (Ðɛh. 92:6) Jexóva wa nǔ e wú é kpé é bǐ bá dó xlɛ́ ɖɔ émí kún nyí adingbannɔ ó ǎ, é nyɔ́ wa ɔ, é ná tɛn Adámu kpó Ɛvu kpó bɔ yě ji vǐ lɛ́ dó xlɛ́ ɖɔ nǔgbóɖɔtɔ́ wɛ émí nyí. Gɔ́ ná ɔ, Jexóva xlɛ́ ɖɔ, ényí émí ɖɔ ɖɔ émí ná wa nǔɖé ɔ, émí nɔ wa bɔ nǔ ɖěbǔ kún nɔ sixú ɖó émí te ó. É bló bɔ “kúnkan” ɖé ná hwlɛ́n kúnkan Adámu kpó Ɛvu kpó tɔn tónúsetɔ́ lɛ́, dó kú d’é jí bǐ mlɛ́mlɛ́ ɖɔ linlin émítɔn ná jɛnu. (Bǐb. 3:15, nwt; 22:18) Tuto gbɛxixɔ ɔ tɔn e Jexóva bló é zɔ́n bɔ Satáan sixú xo nǔ ɖo wǔ ǎ! Aniwú? Ðó wǎnyíyí e ma ɖó cejɛ́nnábí ǎ é jí wɛ tuto énɛ́ júnjɔ́n. (Mat. 20:28; Jaan 3:16) Satáan ka ɖó jijɔ énɛ́ ǎ. Cejɛ́nnábínɔ wɛ n’i. Énɛ́ wú ɔ, étɛ́ mǐ ka sixú ɖó nukún ɖó tito gbɛxixɔ ɔ tɔn e Mawu sɔ́ ɖ’ayǐ é wú? Ðo xwe afatɔ́n lɛ́ sín vivɔnu ɔ, Adámu kpó Ɛvu kpó sín vǐ e nyí mɛ maɖóblɔ̌ bo lɛ́ nyí tónúsetɔ́ lɛ́ é ná ɖu ayǐkúngban e ná húzú palaɖísi é sín gǔ lěe Jexóva ko lin gbɔn sín do é. Hwe énɛ́ nu ɔ, é ná cí ɖɔ Jexóva ɖɔ “Omɛ́ga” wɛ ɖɔhun.

18. Gǎnjɛwúxó atɔn tɛ́ lɛ́ Mawu ka ɖɔ nú mǐ? (Lɛ̌ kpɔ́n gbǎví “Hwɛjijɔ ɖěɖěe wú è ná ɖeji dó akpá ɖěɖěe Jexóva dó lɛ́ é wú é atɔn.”)

¹⁸ Sɔgbe xá nǔ e mǐ ko gbéjé kpɔ́n lɛ́ é ɔ, gǎnjɛwúxó tɛ́ lɛ́ mǐ ka sixú má xá mɛ ɖěɖěe nɔ xo nǔ kpɔ́n ɖɔ akpá palaɖísi tɔn e Mawu dó é ka ná jɛnu a jí lɛ́ é? Nukɔntɔn, Jexóva ɖésú wɛ dó akpá ɔ. Wěma Nǔɖexlɛ́mɛ tɔn ɖɔ: “Mɛ e ɖo ayǐjínjɔ́n ɖo axɔ́súzinkpo ɔ jí é ɖɔ: ‘Éɖíe! Un ɖo nǔ lɛ́ bǐ bló wɛ yɔ̌yɔ́ tɔn.’” É ɖó nǔnywɛ́, hlɔ̌nhlɔ́n kpó jlǒ kpó bo ná ɖe akpá e é dó é. Wegɔ́, akpá énɛ́ sín jijɛnu ɖó gǎnjɛwú ɖo Jexóva sín nukúnmɛ sɔmɔ̌ bɔ é ɖɔ xó cí nǔ ɖɔ é ko jɛnu wɛ ɖɔhun. Énɛ́ wú wɛ é ɖɔ: “Xó ɖejidéwú wɛ nyí xó énɛ́ lɛ́ bo lɛ́ nyí nǔgbó. . . . Yě ko jɛnu!” Atɔngɔ́, ényí Jexóva jɛ nǔɖé wú ɔ, é nɔ wa yi fó ganjí bɔ xó ɖě nɔ ɖ’é wú ǎ. Énɛ́ wɛ xógbe élɔ́ lɛ́ xlɛ́: “Nyɛ wɛ nyí Alúfa bo lɛ́ nyí Omɛ́ga.” Jexóva ná xlɛ́ ɖɔ Satáan nyí adingbannɔ bo lɛ́ hwedó nǔ wú.

19. Ényí mɛ lɛ́ xo nǔ kpɔ́n dó akpá Palaɖísi tɔn e Mawu dó é wú ɔ, étɛ́ a ka sixú wa?

¹⁹ Flín ɖɔ, hweɖébǔnu e a má gǎnjɛwúxó énɛ́ lɛ́ xá mɛ ɖěɖěe a nɔ xo go ɖo sinsɛnzɔ́ ɔ mɛ lɛ́ é ɔ, hlɔ̌nhlɔ́n ná jiɖe e a ɖó dó akpá Jexóva tɔn lɛ́ wú é wɛ a ɖe mɔ̌ nɛ́. Énɛ́ wú ɔ, hweɖévonu e a ná xa akpá gbɔdónúmɛ tɔn e ɖɔ xó dó palaɖísi wú, bo ɖo Nǔɖexlɛ́mɛ 21:4 mɛ é bɔ mɛɖé ná ɖɔ “xó énɛ́ mɛ́ sin dín bo ná nyí nǔgbó é ɔ,” étɛ́ a ka sixú wa? A sixú xa wěmafɔ 5 kpó 6gɔ́ ɔ kpó bo tínmɛ n’i. Xlɛ́ ɛ lěe Jexóva xlɛ́ ɖɔ akpá émítɔn ɖó gǎnjɛwú, cí nǔ ɖɔ alɔ wɛ é dó wěma mɛ ɖɔhun gbɔn é.—Eza. 65:16, nwt.