Mɛ Wɔbuwɔbu ɔ Ðò Susu Kpa nú Mawu kpo Klisu kpo Wɛ

 1. Ðagbe tɛ xóɖiɖɔ e è xwlé mɛ ɖò kpléɖókpɔ́ ɖaxó ɖé jí ɖò 1935 é ka wà nú mɛ winnyawinnya ɖé?

XWÈ 18 ɖó wɛ mɛ winnyawinnya ɖé ɖè hwenu e é bló baptɛm ɖò 1926 é. Biblu Kplɔntɔ́ wɛ mɛjitɔ́ tɔn lɛ nyí; lee è nɔ ylɔ́ Kúnnuɖetɔ́ Jehovah tɔn lɛ ɖɔ hwenɛnu é nɛ. Vǐ sunnu atɔn kpo vǐ nyɔnu we kpo wɛ ye ɖó, bo kplɔ́n ye bǐ bɔ ye nɔ sɛn Jehovah Mawu, lobo nɔ xwedó kpɔ́ndéwú Jezu Klisu tɔn. Biblu Kplɔntɔ́ lɛ bǐ ɖɔhun ɖò hwe ɔ nu ɔ, mɛ winnyawinnya gbejinɔtɔ́ enɛ nɔ ɖu wɔ̌xúxú ɔ, bo nɔ lɛ́ nu vɛ̌ɛn ɔ xwewu xwewu ɖò Aklunɔ Sín Nǔɖuɖu ɔ domɛ. Amɔ̌, hwenu e é sè xóɖiɖɔ taji e xóta tɔn nyí “Mɛ Wɔbuwɔbu” ɔ é ɔ, nukúnɖiɖó tɔn sɔgudo tɔn ɖyɔ. Nɔví J. F. Rutherford wɛ xwlé xóɖiɖɔ ɔ mɛ ɖò 1935 ɖò kpléɖókpɔ́ ɖaxó ɖé jí ɖò Washington D.C., États-Unis. Etɛ Biblu kplɔntɔ́ lɛ ka kplɔ́n ɖò kpléɖókpɔ́ ɖaxó enɛ jí?

 2. Nǔgbo e sɔ́ akpakpa mɛ é tɛ Nɔví Rutherford ka ɖexlɛ́ ɖò xóɖiɖɔ tɔn mɛ?

² Ðò xóɖiɖɔ ɔ mɛ ɔ, Nɔví Rutherford ɖè mɛ ɖěɖee na nyí “mɛ wɔbuwɔbu” e xó Nǔɖexlɛ́mɛ 7:9 ɖɔ é xlɛ́. Kaka jɛ hwenɛnu ɔ, Biblu Kplɔntɔ́ lɛ nɔ lin ɖɔ mɛ wɔbuwɔbu ɔ lɔ na yì jixwé, amɔ̌, ye kún ka ɖò gbeji sɔ mɛ yí ami dó ɖè lɛ ó. Nɔví Rutherford zán Mawuxówema ɔ dó tinmɛ ɖɔ è kún sɔ́ mɛ wɔbuwɔbu ɔ bonu é na yì nɔ gbɛ̀ ɖò jixwé ó, loɔ, lɛngbɔ̌ ɖevob Klisu tɔn e na xò “ya ɖaxó” ɔ zlɛ́, bo na nɔ gbɛ̀ kaka sɔyi ɖò ayikúngban jí lɛ é wɛ nú ye. (Nǔɖe. 7:14) Jezu d’akpá ɖɔ: “Un lɛ́ ɖó lɛngbɔ̌ ɖevo lɛ bɔ ye ɖò wutó elɔ mɛ ǎ; un ɖó na kplá ye lɔmɔ̌ wá fí, bɔ ye na sè gbè ce, bɔ lɛngbɔ̌hwan ɔ na nyí ɖokpo, bɔ lɛngbɔ̌nyitɔ́ lɔmɔ̌ na nyí ɖokpo.” (Jaan 10:16) Lɛngbɔ̌ ɖevo enɛ lɛ ɖò gesí dó Kúnnuɖetɔ́ Jehovah tɔn gbejinɔtɔ́ ɖěɖee ɖó nukúnɖiɖó, bo na nɔ gbɛ̀ kaka sɔyi ɖò Palaɖisi mɛ ɖò ayikúngban jí lɛ é wɛ. (Mat. 25:31-33; 25:46, nwt) Mi nú mǐ ni kpɔ́n lee nukúnnúmɔjɛnǔmɛ yɔyɔ̌ nǔgbo Biblu tɔn tɔn enɛ huzu gbɛzán mɛ gegě tɔn ɖò togun Jehovah tɔn mɛ, kaka jɛ nɔví xwè 18 mɛví ɔ tɔn jí gbɔn é.—Ðɛh. 97:11; Nǔx. 4:18.

3-4. Ðò kpléɖókpɔ́ ɖaxó 1935 tɔn jí ɔ, nukúnnúmɔjɛnǔmɛ tɛ mɛ afatɔ́n mɔ̌kpan ka ɖó dó nukúnɖiɖó yetɔn wu? Etɛwu?

³ Akpakpa sɔ́ mɛ e wá kpléɖókpɔ́ ɖaxó enɛ ɔ lɛ é tawun hwenu e xóɖɔtɔ́ ɔ kan nǔ elɔ byɔ é: “Mi mɛ e ɖò nukún ɖó wɛ bá nɔ gbɛ̀ kaka sɔyi ɖò ayikúngban jí lɛ é ka sixu kɛnklɛn site à?” Nɔví sunnu e yì kpléɖókpɔ́ ɖaxó enɛ é ɖé ɖɔ ɖɔ emi mɔ bɔ mɛ e wá kpléɖókpɔ́ ɔ lɛ é vlɔ̌ jɛji site. Enɛ gudo ɔ, Nɔví Rutherford ɖɔ: “Mi kpɔ́n! Mɛ wɔbuwɔbu ɔ!” Bɔ ye bɔ alɔ xixo nyi dò kpo awǎjijɛ kpo. Mɛ e site lɛ é mɔ nǔ jɛ wu ɖɔ è kún sɔ́ emi bonu emi na yì jixwé ó. Ye tuùn ɖɔ gbigbɔ Mawu tɔn kún ɖè emi ó. Ayihɔngbe tɔn ɖò kpléɖókpɔ́ ɔ jí ɔ, mɛ yɔyɔ̌ 840 bló baptɛm bo huzu Kúnnuɖetɔ́; ye mɛ gegě ɖò lɛngbɔ̌ ɖevo lɛ mɛ.

⁴ Ðò xóɖiɖɔ enɛ gudo ɔ, mɛ winnyawinnya e xó è ɖɔ ɖò bǐbɛ̌mɛ é kpo mɛ afatɔ́n ɖevo lɛ kpo ɖó wɔ̌xúxú ɔ ɖuɖu te, bo lɛ́ ɖó vɛ̌ɛn ɔ nunu te ɖò Aklunɔ Sín Nǔɖuɖu ɔ hwenu. Nɔví sunnu ɖé ɖè lee nǔ cí nú mɛ gegě é xlɛ́ kpo mɛɖéesɔ́hwe kpo, bo ɖɔ: “Flǐn 1935 tɔn wɛ nyí gudo tɔn e hwenu un ɖu wɔ̌xúxú ɔ, bo nu vɛ̌ɛn ɔ é. Un wá mɔ nǔ jɛ wu ɖɔ Jehovah kún sɔ́ gbigbɔ mímɛ́ tɔn dó ɖè mì bonu má yì jixwé ó. É nyɔ́ wà ɔ, nukúnɖiɖó ayikúngban jí tɔn wɛ un ɖó, bo na d’alɔ bɔ ayikúngban ɔ na huzu Palaɖisi.” (Hlɔ. 8:16, 17; 2 Kɔ. 1:21, 22) Sín hwenɛnu ɔ, kɛ́n mɛ wɔbuwɔbu ɔ tɔn jɛji, bɔ ye nɔ ɖò azɔ̌ wà wɛ alɔ ɖò alɔ mɛ xá mɛ yí ami dó ɖè ɖěɖee kpò ɖò ayikúngban jí lɛ é.

 5. Linlin tɛ Jehovah ka nɔ ɖó dó mɛ ɖěɖee ɖó wɔ̌xúxú ɔ ɖuɖu kpo vɛ̌ɛn ɔ nunu kpo te lɛ é wu?

⁵ Ðò 1935 gudo ɔ, linlin tɛ Jehovah ka nɔ ɖó dó mɛ ɖěɖee ɖó wɔ̌xúxú ɔ ɖuɖu kpo vɛ̌ɛn ɔ nunu kpo te lɛ é wu? Enyi mɛ e ko bló baptɛm ɖò égbé é ɖé nɔ ɖu wɔ̌xúxú ɔ, lobo nɔ nu vɛ̌ɛn ɔ ɖò Aklunɔ Sín Nǔɖuɖu ɔ hwenu, bo ka wá mɔ nǔ jɛ wu ɖɔ gbigbɔ mímɛ́ kún ɖè emi ó ɔ lo? (1 Kɔ. 11:28) Mɛɖé lɛ nɔ ɖu wɔ̌xúxú ɔ, bo nɔ lɛ́ nu vɛ̌ɛn ɔ ɖó ye mɔ nukúnnú jɛ nukúnɖiɖó yetɔn mɛ nyi dò. Amɔ̌, enyi ye yí gbè ɖɔ nǔ wɛ emi wà nyi dò, bo ma sɔ́ ɖu alǒ nu ɖě ǎ, bo kpò ɖò Jehovah sɛn wɛ kpo gbejininɔ kpo ɔ, é ɖò wɛn ɖɔ é na xà ye dó lɛngbɔ̌ ɖevo lɛ mɛ. Ye sɔ́ nɔ ɖu wɔ̌xúxú ɔ, bo nɔ lɛ́ nu vɛ̌ɛn ɔ ǎ có, ye ka nɔ kpò ɖò Flǐn ɔ domɛ yì wɛ dó ɖè lee nǔ e Jehovah kpo Jezu kpo wà nú ye é sù nukún yetɔn mɛ gbɔn é xlɛ́.

 6. Etɛ Jezu ka ɖegbe nú wɛnsagun lɛ ɖɔ ye ni wà?

⁶ Ðó ya ɖaxó ɔ ko ɖò kɛnnɛkɛnnɛ wutu ɔ, é na nyɔ́ ɖɔ mǐ ni vɔ́ nǔ e wemata 7gɔ́ wema Nǔɖexlɛ́mɛ tɔn ɖɔ dó Klisanwun yí ami dó ɖè lɛ kpo mɛ wɔbuwɔbu ɔ kpo wu é gbéjé kpɔ́n. Jezu ɖegbe nú wɛnsagun lɛ ɖɔ ye ni ma jó jɔhɔn ɛnɛ e nɔ hɛn nǔ gblé lɛ é dó ó. Ye ɖó na lɔn nú jɔhɔn enɛ lɛ na nyi dó ayikúngban ɔ jí kaka cobonu è na ɖó wuntun Klisanwun yí ami dó ɖè lɛ bǐ ǎ. Enɛ na xlɛ́ ɖɔ Jehovah yí gbè ɖɔ ye ɖò gbeji. (Nǔɖe. 7:1-4) Ðó nɔví Klisu tɔn lɛ nɔ gbeji wu ɔ, ajɔ e è na dó ye é wɛ nyí ɖɔ ye na nyí axɔ́su kpo vɔsanúxwlémawutɔ́ lɛ kpo ɖò Klisu kpá ɖò jixwé. (Nǔɖe. 20:6) Jehovah, Jezu kpo wɛnsagun lɛ kpo na j’awǎ tawun hwenu e ye na mɔ bɔ mɛ 144 000 lɛ na yí ajɔ jixwé tɔn yetɔn é.

 7. Ðò Nǔɖexlɛ́mɛ 7:9, 10 mɛ ɔ, mɛ̌ mɛ̌ e Jaan ka mɔ ɖò nǔmimɔ mɛ? Etɛ wà wɛ ye ka ɖè? (Kpɔ́n ɖiɖe e ɖò akpa ɔ jí é.)

⁷ Ee Jaan ɖɔ xó dó mɛ 144 000 e na nyí axɔ́su kpo vɔsanúxwlémawutɔ́ kpo lɛ é wu gudo é ɔ, é lɛ́ mɔ nǔ e sɔ́ akpakpa mɛ é ɖé, é wɛ nyí “mɛ wɔbuwɔbu” e xò Haamagedɔni zlɛ́ lɛ é. Gbɛ̌ta we enɛ lɛ gbɔn vo nú yeɖée, ɖó mɛ e ɖò mɛ wɔbuwɔbu ɔ mɛ lɛ é sukpɔ́ tawun hú mɛ 144 000 lɛ, bɔ è sixu tuùn kɛ́n yetɔn tawun lě ǎ. (Xà Nǔɖexlɛ́mɛ 7:9, 10.) Ye “dó awu gaga wewé,” enɛ wɛ nyí ɖɔ ye jó yeɖée dó bonu gbɛ̀ Satáan tɔn hɛn ye “blí ǎ,” bo lɛ́ nɔ gbeji nú Mawu kpo Klisu kpo. (Ja. 1:27) Ye ɖò xó sú wɛ ɖɔ è hwlɛn emi ɖó nǔ e Jehovah kpo Jezu e nyí Lɛngbɔ̌ví Mawu tɔn é kpo wà é wu. Gɔ́ na ɔ, ye hɛn děma alɔ mɛ, bɔ é ɖò xlɛ́xlɛ́ wɛ ɖɔ ye yí gbè kpo xomɛhunhun kpo ɖɔ Jezu wɛ nyí axɔ́su e Jehovah sɔ́ é.—Sɔ́ jlɛ́ dó Jaan 12:12, 13 wu.

 8. Etɛ Nǔɖexlɛ́mɛ 7:11, 12 ka ɖɔ nú mǐ dó xwédo Jehovah tɔn e ɖò jixwé é wu?

⁸ Xà Nǔɖexlɛ́mɛ 7:11, 12. Etɛ ka jɛ hwenu e mɛ e ɖò jixwé lɛ é mɔ mɛ wɔbuwɔbu ɔ é? Jaan mɔ bɔ mɛ e ɖò jixwé lɛ é ɖò awǎ jɛ wɛ, bo lɛ́ ɖò Mawu kpa wɛ, hwenu e ye mɔ mɛ wɔbuwɔbu ɔ é. Hwenu e mɛ wɔbuwɔbu ɔ na xò ya ɖaxó ɔ zlɛ́ é ɔ, xomɛ na hun xwédo Jehovah tɔn e ɖò jixwé é tawun ɖɔ nǔmimɔ enɛ jɛnu mlɛ́mlɛ́.

 9. Sɔgbe xá Nǔɖexlɛ́mɛ 7:13-15 ɔ, etɛ wà wɛ mɛ wɔbuwɔbu ɔ ka ɖè dìn?

⁹ Xà Nǔɖexlɛ́mɛ 7:13-15. Jaan wlán ɖɔ mɛ wɔbuwɔbu ɔ “nya awu gaga yetɔn lɛ, bo bɛ́ dó Lɛngbɔ̌ví ɔ sín hun mɛ.” Enɛ xlɛ́ ɖɔ ye ɖó ayixa mímɛ́ ɖé, bɔ nǔ yetɔn nɔ lɛ́ nyɔ́ Jehovah nukúnmɛ. (Eza. 1:18) Ye zé yeɖée jó bo bló baptɛm, bo ɖó nǔɖiɖi syɛnsyɛn nú vɔsisa Jezu tɔn, lobo lɛ́ ɖó kancica syɛnsyɛn ɖé xá Jehovah. (Jaan 3:36; 1 Pi. 3:21, nwt) Nǔ e wu nǔ yetɔn nyɔ́ Mawu nukúnmɛ, bɔ ye lɛ́ “ɖò azɔ̌ wà nú Mawu wɛ zǎn kéze” ɖò ayikúngban jí fí é nɛ. Ye ɖò azɔ̌ wà wɛ kpo kanɖodónǔwu kpo bo nɔ wà nǔ e wu ye kpé é bǐ dó jlá wɛn Axɔ́suɖuto ɔ tɔn, lobo nɔ lɛ́ kplɔ́n nǔ mɛ lɛ bonu ye na huzu ahwanvu, ɖó Axɔ́suɖuto Mawu tɔn wɛ ɖò taji hugǎn nú ye.—Mat. 6:33; 24:14; 28:19, 20.

10. Etɛ jí mɛ wɔbuwɔbu ɔ ka kú dó? Akpá tɛ sín jijɛnu ye ka na mɔ?

¹⁰ Mɛ wɔbuwɔbu e xò ya ɖaxó ɔ zlɛ́ é kánɖeji ɖɔ Mawu na kpò ɖò nukún kpé dó emi wu wɛ, ɖó ‘nɔtɛn tɔn ɖò tɛntin yetɔn.’ Akpá e è dó ɖɔ lɛngbɔ̌ ɖevo lɛ na nɔte kpɔ́n jijɛnu nǔɖɔɖ’ayǐ elɔ tɔn é na jɛnu mlɛ́mlɛ́: “[Mawu] na súnsún ɖasin bǐ sín nukún yetɔn mɛ; kú sɔ́ na tíìn ǎ, aluwɛ sɔ́ na tíìn ǎ, alěnina sɔ́ na tíìn ǎ, wuvɛ̌ mimɔ sɔ́ na tíìn ǎ; nǔ xóxó lɛ ko bú.”—Nǔɖe. 21:3, 4.

11-12. (a) Lee Nǔɖexlɛ́mɛ 7:16, 17 xlɛ́ gbɔn é ɔ, nyɔna tɛ lɛ ka ɖò sɛxwetɛn nú mɛ wɔbuwɔbu ɔ? (b) Etɛ lɛngbɔ̌ ɖevo lɛ ka sixu wà ɖò Flǐn ɔ domɛ? Etɛwu?

¹¹ Xà Nǔɖexlɛ́mɛ 7:16, 17. Dìn hwɛ̌ ɔ, Jehovah sɛntɔ́ ɖé lɛ ɖò xovɛ́, ɖó ye sɔ́ ɖó akwɛ kaka ɖé bo na xɔ nǔ e sín hudo ye ɖó lɛ é ǎ, alǒ ɖó ahwan hɛn nǔ gblé dó ye wu wutu. È sú mɛ ɖevo lɛ dó ganmɛ ɖó nǔɖiɖi yetɔn wutu. É ɖò mɔ̌ có, mɛ e ɖò mɛ wɔbuwɔbu ɔ mɛ lɛ é nɔ j’awǎ, ɖó ye tuùn ɖɔ hwenu e emi na xò gbɛ̀ nyanya elɔ e sín kún è na sú dó é zlɛ́ é ɔ, hwebǐnu wɛ emi na nɔ mɔ nǔɖuɖu kpo alixlɛ́mɛ Jehovah tɔn lɛ kpo, b’ɛ na túnflá. Hwenu e Jehovah na sú gbɛ̀ nyanya Satáan tɔn sín kún dó é ɔ, é na kúdeji ɖɔ è cyɔn alɔ mɛ wɔbuwɔbu ɔ jí sín xomɛsin tɔn e cí ‘yozó e nɔ hɛn mɛ é’ ɖɔhun é sí. Hwenu e ya ɖaxó ɔ na ko fó gudo é ɔ, Jezu na xlɛ́ ali mɛ ɖěɖee na gán ɖò ayikúngban ɔ jí lɛ é yì “sin e nɔ na gbɛ̀ [mavɔmavɔ] mɛ” é kɔn. Dǒ nukún mɛ kpɔ́n: Nukúnɖiɖó bǔnɔ ɖé wɛ mɛ wɔbuwɔbu ɔ ɖó. Mɛ liva mɔ̌kpan e ko nɔ gbɛ̀ kpɔ́n lɛ é sixu nɔ ma kú gbeɖé!—Jaan 11:26.

¹² Lɛngbɔ̌ ɖevo lɛ ɖó nukúnɖiɖó jiwǔ ɖé, b’ɛ nɔ zɔ́n bɔ ye nɔ dókú nú Jehovah kpo Jezu kpo. Jehovah sɔ́ ye bonu ye na yì nɔ gbɛ̀ ɖò jixwé ǎ có, lee é yí wǎn nú mɛ yí ami dó ɖè lɛ gbɔn é jɛn é yí wǎn nú ye lɔ gbɔn. Mɛ yí ami dó ɖè lɛ kpo lɛngbɔ̌ ɖevo lɛ kpo bǐ sixu kpa susu nú Mawu kpo Klisu kpo. Ali e nu ye nɔ wà mɔ̌ ɖè é ɖokpo wɛ nyí Aklunɔ Sín Nǔɖuɖu ɔ domɛ yiyi.

13-14. Etɛwu mɛ lɛ bǐ ka ɖó na yì Flǐn Kú Klisu tɔn tɔn domɛ?

¹³ Agaɖanu dìn ɔ, ɖò mɛ 1 000 jí ɔ, mɛ e nɔ ɖu wɔ̌xúxú ɔ, bo nɔ lɛ́ nu vɛ̌ɛn ɔ lɛ é nɔ yì ɖokpo ǎ. Ðò agun gegě mɛ ɔ, mɛ ɖebǔ tlɛ nɔ ɖu wɔ̌xúxú ɔ, bo nɔ lɛ́ nu vɛ̌ɛn ɔ ǎ. Mɛ e nɔ wá Flǐn ɔ domɛ lɛ é gegě ɖó nukúnɖiɖó ayikúngban jí tɔn. Bɔ Etɛwu ye ka nɔ yì Flǐn ɔ domɛ lo? Hwɛjijɔ e wu mɛ lɛ nɔ yì xɔ́ntɔn yetɔn ɖé sín alɔwliwli domɛ é ɖokpo ɔ wu wɛ ye nɔ yì. Ye nɔ yì ɖó ye jló na ɖè wǎn e ye yí nú mɛ e jló na wlí alɔ lɛ é xlɛ́ ye, bo lɛ́ jló na nɔ gudo nú ye. Nǔ ɖokpo ɔ wɛ é nɔ lɛ́ nyí nú lɛngbɔ̌ ɖevo e nɔ yì Flǐn ɔ domɛ lɛ é lɔ, ɖó ye jló na ɖè wǎn e ye yí nú Klisu kpo mɛ yí ami dó ɖè lɛ kpo é xlɛ́, bo lɛ́ jló na nɔ gudo nú ye. Lɛngbɔ̌ ɖevo lɛ nɔ lɛ́ yì dò tɔn mɛ dó ɖexlɛ́ ɖɔ vɔ̌ e Jezu sá é sù nukún emitɔn mɛ, ɖó é wɛ zɔ́n bɔ emi na nɔ gbɛ̀ kaka sɔyi ɖò ayikúngban jí.

¹⁴ Hwɛjijɔ taji e wu lɛngbɔ̌ ɖevo lɛ nɔ yì Flǐn ɔ domɛ é ɖevo wɛ nyí ɖɔ ye jló na setónú nú gbeɖiɖe Jezu tɔn. Hwenu e Jezu ɖó nǔwiwa bǔnɔ enɛ ayǐ kpo mɛsɛ́dó tɔn gbejinɔtɔ́ lɛ kpo é ɔ, é ɖɔ nú ye ɖɔ: “Mi na nɔ bló gbɔn lě dó flín mì na.” (1 Kɔ. 11:23-26) Enɛ wu ɔ, enyi mɛ yí ami dó ɖè lɛ kpò ɖò gbɛ̀ ɖò ayikúngban jí jɛn wɛ nyí ɔ, lɛngbɔ̌ ɖevo lɛ na kpò ɖò Aklunɔ Sín Nǔɖuɖu ɔ domɛ yì wɛ. Gɔ́ na ɔ, lɛngbɔ̌ ɖevo lɛ nɔ ylɔ́ mɛ lɛ bǐ ɖɔ ye ni wá bló Flǐn ɔ xá emi.

15. Etɛ mǐ ka sixu wà dó kpa susu nú Mawu kpo Klisu kpo ɖò Flǐn ɔ domɛ?

¹⁵ Ðò Flǐn ɔ domɛ ɔ, ali nɔ hun nú mǐ, bɔ mǐ nɔ jihan bo nɔ lɛ́ xoɖɛ dó kpa susu nú Mawu kpo Klisu kpo. Xóɖiɖɔ e è na xwlé mɛ xwè elɔ mɛ é sín xóta wɛ nyí “Nǔ E Mawu kpo Klisu kpo Wà nú We É Ni Xɔ Akwɛ nú We!” É na bló bɔ lee nǔ e Jehovah kpo Klisu kpo wà nú mǐ é sù nukún mǐtɔn mɛ gbɔn é na lɛ́ jɛji. Hwenu e è na ɖò wɔ̌xúxú ɔ kpo vɛ̌ɛn ɔ kpo zé gbɔn nukɔn mǐtɔn wɛ é ɔ, mǐ na kpéwú bá lin tamɛ dó nǔ e ye nɔte na é jí, enɛ wɛ nyí agbaza Jezu tɔn kpo hun tɔn kpo. Mǐ na flín ɖɔ Jehovah yí gbè bɔ Vǐ tɔn wá kú dó ta mǐtɔn mɛ, bɔ enɛ zɔ́n bɔ mǐ sixu nɔ gbɛ̀. (Mat. 20:28) Mɛ e yí wǎn nú Tɔ́ mǐtɔn jixwé tɔn ɔ kpo Vǐ tɔn kpo lɛ é bǐ na ba na yì Flǐn ɔ domɛ.

16. Ali tɛ lɛ nu mɛ yí ami dó ɖè lɛ kpo lɛngbɔ̌ ɖevo lɛ kpo ka nyí nǔ ɖokpo ɔ ɖè?

¹⁶ Vogbingbɔn e ɖò nɔví yí ami dó ɖè lɛ kpo lɛngbɔ̌ ɖevo lɛ kpo tɛntin é wɛ nyí lee ye xɔ akwɛ gbɔn ɖò Mawu nukúnmɛ é ǎ. Gbɛ̌ta we lɛ bǐ wɛ xɔ akwɛ n’i. È na ɖɔ ɔ, akwɛ ɖokpo ɔ wɛ é dó xɔ ye bǐ, é wɛ nyí gbɛ̀ Vǐ vívɛ́ná tɔn tɔn e é sɔ́ jó dó xɔ gbɛ̀ nú mɛ yí ami dó ɖè lɛ kpo lɛngbɔ̌ ɖevo lɛ kpo é. Nukúnɖiɖó vovo e gbɛ̌ta we lɛ ɖó é wɛ ɖè vogbingbɔn e ɖò tɛntin yetɔn é xlɛ́. Gbɛ̌ta we lɛ bǐ ɖó na kpò ɖò gbeji nú Mawu kpo Klisu kpo. (Ðɛh. 31:24) Flín ɖɔ gbigbɔ mímɛ́ Mawu tɔn sixu xlɛ́ ali ye ɖó bǎ ɖokpo ɔ mɛ. Enɛ xlɛ́ ɖɔ Jehovah nɔ na gbigbɔ mímɛ́ tɔn mɛ ɖokpo ɖokpo, lee é ɖó hudo tɔn gbɔn é.

17. Etɛ lɛ ɖó nukún wɛ mɛ yí ami dó ɖè e kpò lɛ é ka ɖè?

¹⁷ È nɔ jì Klisanwun yí ami dó ɖè lɛ kpo nukúnɖiɖó jixwé tɔn kpo ǎ. Mawu wɛ zé nukúnɖiɖó enɛ d’ayi mɛ nú ye. Ye nɔ ɖò tamɛ lin dó nukúnɖiɖó yetɔn jí wɛ, nɔ ɖò ɖɛ xò dó ta tɔn mɛ wɛ, bɔ akpakpa nɔ lɛ́ ɖò ye sɔ́ wɛ bonu ye na mɔ ajɔ jixwé tɔn yetɔn ɔ. Ye sixu tuùn lee agbaza yetɔn na cí ɖò jixwé é ǎ. (Fili. 3:20, 21; 1 Jaan 3:2) É ɖò mɔ̌ có, ye ɖò nukún ɖó wɛ bo na nɔ kpɔ́ xá Jehovah, Jezu, wɛnsagun lɛ kpo nɔví yí ami dó ɖè e kpò lɛ é kpo ɖò Axɔ́suɖuto jixwé tɔn ɔ mɛ.

18. Etɛ lɛ ɖó nukún wɛ lɛngbɔ̌ ɖevo lɛ ka ɖè?

¹⁸ Lɛngbɔ̌ ɖevo lɛ ɖò nukún ɖó wɛ bo na nɔ gbɛ̀ kaka sɔyi ɖò ayikúngban jí. Nǔ e ba wɛ gbɛtɔ́ lɛ bǐ ɖè é nɛ. (Nǔt. 3:11, nwt) Ye ɖò nukún ɖó hwenu e ye na d’alɔ bɔ ayikúngban ɔ bǐ na huzu Palaɖisi é wɛ. Ye ɖò te kpɔ́n hwenu e ye sixu gbá xwé yetɔn lɛ, bló jikpá yetɔn lɛ, bo lɛ́ kplɔ́n vǐ yetɔn lɛ bɔ ye na ɖó lanmɛ syɛn hunsin ɖagbe é wɛ. (Eza. 65:21-23) Ye ɖò nukún ɖó wɛ bo na nɔ ɖisa gbɔn fí gegě ɖò ayikúngban ɔ jí, kpɔ́n só lɛ, zungbó lɛ, xù lɛ, lobo lɛ́ kplɔ́n nǔ dó nǔ e Jehovah nɔ bló lɛ é bǐ wu. Taji hú bǐ ɔ, tuùn e ye tuùn ɖɔ kancica e emi ɖó xá Jehovah é na fɔ́n bo na ɖò jijɛji wɛ é nɔ d’awǎjijɛ nú ye tawun.

19. Ali tɛ Flǐn ɔ ka hun nú mǐ mɛ ɖokpo ɖokpo? Hwetɛnu è ka na bló Flǐn xwè elɔ mɛ tɔn?

¹⁹ Jehovah sɔ́ nukúnɖiɖó jiwǔ ɖé ɖó te nú mɛ e zé yeɖée jó n’i lɛ é ɖokpo ɖokpo. (Jel. 29:11) Flǐn Kú Klisu tɔn tɔn hun ali taji ɖé nú mǐ mɛ ɖokpo ɖokpo bonu mǐ na kpa susu nú Mawu kpo Klisu kpo nú nǔ e ye wà nú mǐ, b’ɛ zɔ́n bɔ mǐ sixu ɖu vivǐ gbɛ̀ mavɔmavɔ tɔn é. Flǐn ɔ wɛ nyí kplé taji hugǎn e Klisanwun nǔgbo lɛ nɔ bló xwewu xwewu é. È na bló ɖò Samedi 27 mars 2021 ɖò hwenu e hwe na ko yì xɔ gudo é. Ðò xwè elɔ mɛ ɔ, mɛ gegě na ɖò fí ɖěɖee ye sixu vo bo yì nǔwiwa taji enɛ domɛ ɖè é. Gbeklánxámɛ lɛ na ɖò finɛ có, mɛ ɖevo lɛ na kpéwú bo na yì dò tɔn mɛ. Mɛɖé lɛ na bló Flǐn ɔ ɖò ganmɛ. Jehovah, Jezu, wɛnsagun lɛ kpo mɛ yí ami dó ɖè e fɔ́n sín kú lɛ é kpo bǐ na ɖò mǐ kpɔ́n wɛ. Enɛ wu ɔ, Flǐn ɔ ni bo yì ganji nú agun lɛ bǐ, kánɖó lɛ bǐ kpo mɛ ɖokpo ɖokpo kpo mɛɛ.