Nɛ̌ Kú Jezu Tɔn ka Sixu Hwlɛn Mǐ Gbɔn?

Mǐ nɔ hu hwɛ, nɔ sè wuvɛ̌, bo nɔ lɛ́ kú, ɖó asú kpo asì kpo nukɔntɔn ɔ, Adamu kpo Ɛvu kpo tlitó nú Mawu.a Amɔ̌, nukúnɖiɖó ɖè. Jehovah hun ali ɖé nú mǐ bonu mǐ na gán sín hwɛhuhu kpo kú kpo sí gbɔn Vǐ tɔn Jezu Klisu gblamɛ. Biblu kplɔ́n mɛ ɖɔ Jezu xɔ gbɛ̀ nú mǐ gbɔn kú tɔn gblamɛ. Gbɛxixɔ wɛ nyí axɔ́ e è nɔ sú bo na dó tún kan nú mɛɖé é. Axɔ́ e Jezu sú é wɛ nyí akwɛ e gbɛ̀ tɔn maɖóblɔ̌ ɔ xɔ é. (Xà Matie 20:28.) Ee Jezu sɔ́ jlǒ dó jó acɛ e é ɖó bo na nɔ gbɛ̀ kaka sɔyi ɖò ayikúngban jí é dó é ɔ, é hun ali nú mǐ bonu mǐ na vɔ́ nǔ e Adamu kpo Ɛvu kpo hɛn bú lɛ é bǐ mɔ. Jezu lɛ́ ɖè lě dò é kpo Jehovah kpo yí wǎn nú mǐ sɔ é xlɛ́. Nǔkplɔnkplɔn elɔ na d’alɔ we bɔ kú Jezu tɔn na sù nukún towe mɛ d’eji.

1. Nɛ̌ mǐ ka sixu ɖu kú Jezu tɔn sín lè égbé gbɔn?

Ðó mǐ nyí hwɛhutɔ́ wutu ɔ, mǐ nɔ wà nǔ e ma nɔ nyɔ́ Jehovah nukúnmɛ ǎ lɛ é gegě. É ɖò mɔ̌ có, nú hwɛ mǐtɔn lɛ nɔ vɛ́ nú mǐ nǔgbo nǔgbo bonu mǐ nɔ byɔ hwɛsɔ́kɛ Jehovah gbɔn Jezu Klisu jí, lobo nɔ wà nǔ e wu mǐ kpé é bǐ bo ma sɔ́ nɔ lɛ́ vɔ́ hwɛ ɖokpo ɔ lɛ hu ǎ ɔ, mǐ sixu ɖó kancica syɛnsyɛn ɖé xá Mawu. (1 Jaan 2:1) Biblu ɖɔ dó Klisu wu ɖɔ: “É kú azɔn ɖokpo géé bɔ xó fó dó hwɛ e gbɛtɔ́ lɛ hu lɛ tamɛ; éyɛ mɛ e nɔ wà nǔ jlɔjlɔ ɔ kú dó mɛ e ma nɔ wà nǔ jlɔjlɔ ǎ lɛ tamɛ, bo na dó kplá mi wá Mawu gɔ́n.”—1 Piyɛ́ɛ 3:18.

2. Nɛ̌ mǐ ka sixu ɖu kú Jezu tɔn sín lè ɖò sɔgudo gbɔn?

Jehovah sɛ́ Jezu dó b’ɛ sɔ́ gbɛ̀ tɔn maɖóblɔ̌ ɔ jó “bonu mɛ e na ɖi nǔ [nú Jezu] lɛ ɖebǔ ma dɔn ó; loɔ, ye bǐ ni mɔ gbɛ̀ mavɔmavɔ.” (Jaan 3:16) Jehovah na gbɔn nǔ e Jezu wà é gblamɛ bo na ɖó nǔ nǔ nyanya e tónúmase Adamu tɔn jì lɛ é bǐ nu zaanɖé dìn. Tinmɛ enɛ tɔn wɛ nyí ɖɔ nú mǐ ɖó nǔɖiɖi nú vɔsisa Jezu tɔn ɔ, ali na hun nú mǐ bɔ mǐ na ɖu gbɛ̀ víví kaka sɔyi ɖò palaɖisi mɛ ɖò ayikúngban jí!—Ezayíi 65:21-23.

BA DÒ NÚ NǓ D’EJI

3. Kú Jezu tɔn ɖè mǐ sín hwɛhuhu kpo kú kpo kannu

VIDEO: Etɛwu Jezu ka Kú?: Akpáxwé 1 (2:01)

• Ali e hun nú Adamu é tɛ é ka hɛn bú hwenu e é tlitó nú Mawu é?

Xà Hlɔmanu lɛ 5:12, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:

• Nɛ̌ hwɛ e Adamu hu é ka kúnkplá gbɛzán towe gbɔn?

Xà Jaan 3:16, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:

• Etɛwu Jehovah ka sɛ́ Vǐ tɔn dó ayikúngban jí?

1. Adamu nyí mɛ maɖóblɔ̌ e tlitó nú Mawu é, b’ɛ sín enɛ wu bɔ gbɛtɔ́ lɛ nɔ hu hwɛ bo nɔ kú

2. Jezu nyí mɛ maɖóblɔ̌ e setónú nú Mawu é, b’ɛ sín enɛ wu bɔ ali hun nú gbɛtɔ́ lɛ bɔ ye na huzu mɛ maɖóblɔ̌, lobo nɔ gbɛ̀ kaka sɔyi

4. Kú Jezu tɔn sixu hɛn lè wá nú mɛ bǐ

VIDEO: Etɛwu Jezu ka Kú?: Akpáxwé 2 (2:00)

• Nɛ̌ kú mɛ ɖokpo tɔn ka sixu hɛn lè wá nú mɛ bǐ gbɔn?

Xà 1 Timɔtée 2:5, 6, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:

• Mɛ maɖóblɔ̌ ɖé wɛ Adamu nyí ɖ’ayǐ, amɔ̌, ɖó é hu hwɛ wutu ɔ, gbɛtɔ́ lɛ bǐ nɔ hu hwɛ bo nɔ kú. Mɛ maɖóblɔ̌ ɖé wɛ Jezu nyí, lee Adamu lɔ nyí gbɔn é. Enɛ wu ɔ, etɛ kú tɔn ka wà, b’ɛ zɔ́n bɔ é nyí vɔsisa e jɛxa é?

5. Gbɛxixɔ ɔ, nǔ e Jehovah na we é wɛ

Xɔ́ntɔn Jehovah tɔn lɛ mɔ gbɛxixɔ ɔ dó mɔ nǔ e é na ye tlɔlɔ é ɖé. Ði kpɔ́ndéwú ɔ, xà Galatinu lɛ 2:20, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:

• Nɛ̌ mɛsɛ́dó Pɔlu ka ɖexlɛ́ ɖɔ emi nɔ mɔ gbɛxixɔ ɔ dó mɔ nǔ e è na emi tlɔlɔ é ɖé gbɔn?

Hwenu e Adamu hu hwɛ é ɔ, é kpo kúnkan tɔn lɛ bǐ kpo jɛ kú kannu. Amɔ̌, Jehovah sɛ́ Vǐ tɔn dó b’ɛ kú bonu a na dó sixu nɔ gbɛ̀ kaka sɔyi.

Ee a na ɖò wemafɔ e bɔ d’ewu lɛ é xà wɛ é ɔ, dǒ nukún lee nǔ ɖó na ko cí nú Jehovah hwenu e Vǐ tɔn ɖò wuvɛ̌ sè wɛ é mɛ kpɔ́n. Xà Jaan 19:1-7, 16-18, enɛ gudo hǔn, mi ɖɔ xó ɖó kpɔ́ dó nǔkanbyɔ elɔ jí:

• Nɛ̌ nǔ ka cí nú we dó nǔ e Jehovah kpo Jezu kpo wà nú we é wu?

ETƐ LƐ A KA KPLƆ́N?

Ðó Jezu kú wutu ɔ, Jehovah sixu sɔ́ hwɛ mǐtɔn lɛ kɛ mǐ, bɔ mǐ sixu lɛ́ nɔ gbɛ̀ kaka sɔyi.

Vɔ̌gbɔnji

• Etɛwu Jezu ka kú?

• Ali tɛ nu gbɛ̀ maɖóblɔ̌ Jezu tɔn ka nyí gbɛxixɔ e jɛxa é ɖé ɖè?

• Nɛ̌ kú Jezu tɔn ka sixu hɛn lè wá nú we gbɔn?

KÍJÉ

Kpɔ́n nǔ e wu è ylɔ́ gbɛ̀ maɖóblɔ̌ Jezu tɔn ɖɔ gbɛxixɔ é.

“Nɛ̌ Vɔsisa Jezu Tɔn ka ‘Xɔ Gbɛ̀ nú Mɛ Gegě’ Gbɔn?” (Xóta Ɛntɛnɛti jí tɔn)

Kpɔ́n nǔ e mǐ ɖó na wà cobo na gán é.

“Nɛ̌ Jezu ka Hwlɛn Mǐ Gbɔn?” (Xóta Ɛntɛnɛti jí tɔn)

Jehovah ka sixu sɔ́ hwɛ syɛnsyɛn lɛ lɔ kɛ mɛ à?

“Nǔkanbyɔ Biblu Tɔn lɛ Sín Xósin” (Atɔxwɛ [Flansegbe] 1^er mai 2013)

Kpɔ́n lee nǔ kplɔnkplɔn dó vɔsisa Klisu tɔn wu d’alɔ nya ɖé bɔ é húzú mɛ alɔkpa e é nyí e gbɔn é.

“Un Sɔ́ Nyí Kannumɔ nú Dakaxixo Ǎ” (Xóta Ɛntɛnɛti jí tɔn)