3 Asiria maŋtsɛ Shalmaneser kwɔ kɛba ni ekɛ Hoshea bawu,+ ni Hoshea batsɔ etsulɔ ni eyakeɔ Asiria maŋtsɛ lɛ nii.*+ 4 Shi Asiria maŋtsɛ lɛ ná ele akɛ Hoshea ekpaŋ eyi nɔ, ejaakɛ Hoshea tsu mɛi kɛtee Ejipt maŋtsɛ ni atsɛɔ lɛ So lɛ ŋɔɔ,+ ni ekɛ nikeenii emajeee Asiria maŋtsɛ lɛ tamɔ bɔ ni efeɔ yɛ afii ni eho lɛ amli lɛ. No hewɔ lɛ, Asiria maŋtsɛ lɛ hã amɔ Hoshea ni efi lɛ ewo tsuŋ.

5 Asiria maŋtsɛ lɛ fã ta eshi shikpɔŋ lɛ fɛɛ, ni eba Samaria, ni ewo Samaria he ka afii etɛ. 6 Yɛ Hoshea nɔyeli afi ni ji nɛɛhu lɛ nɔ lɛ, Asiria maŋtsɛ lɛ ŋɔ Samaria.+ Ni eŋɔ Israelbii lɛ nom kɛtee Asiria,+ ni ehã amɛhi Hala kɛ Habor yɛ Gozan faa lɛ he,+ kɛ agbɛnɛ hu, Mediabii lɛ amaji lɛ amli.+